Salamo 116:15 ia gwau: “Iehova ena vairanai ena helaga taudia edia mase be gau hereadaena.” Unai ena anina be dahaka?

▪ Salamo torea tauna ta ia gwau: “Iehova ena vairanai ena helaga taudia edia mase be gau hereadaena.” (Sal. 116:15, BHğ) Iehova dekenai iena tomadiho taudia ta ta edia mauri be mai anina bada. To, Salamo 116:15 be tau tamona ena mase ia herevalaia lasi.

Keristani tauna ta ena fineral ai tok ia henia tadikaka ese Salamo 116:15 ia gaukaralaia be maoro lasi. Dahaka dainai? Badina unai siri be tau tamona ena mase ia herevalaia lasi. To, ena anina be Dirava ese iena orea taudia ibounai ia lalokau henidia bada, bona ia ura lasi iena orea taudia do idia mase ore.​—Salamo 72:14; 116:8 itaia.

Salamo 116:15 ese ita ia hadibaia Iehova ese iena hesiai taudia ia gimaia dainai, tanobada ai iena orea taudia be ta ese do ia hadikaia ore lasi. Hari inai negai ita haheaukalaia hahetoho bona dagedage badadia ese ia hamomokania Dirava be ena taunimanima ia gimaia bona do idia mase ore lasi.

Bema Iehova idia inai henia taudia ese iena orea taudia ibounai idia hadikaia ore, anina be edia siahu ese Iehova ena siahu ia hereaia. Bona taunimanima be tanobada ai do idia mauri hanaihanai gwauhamatana be do ia guguru lasi. (Isa. 45:18; 55:10, 11) Bema tanobada ai taunimanima be lasi, Iehova ena dubu helaga ena ariara ai ta ese ia do ia tomadiho henia lasi! Anina be “tanobada matamata” o kara maoromaoro taudia do idia noho lasi. (Apok. 21:1) Bona danu, Keriso ena Lagani 1,000 Lohia Negana do ia guguru lasi, badina tanobada ai taunimanima be lasi. To, ita diba momokani Iehova be mai ena siahu bada bona iena ura ia hagugurua diba.​—Apok. 20:4, 5.

Bema Iehova idia inai henia taudia ese ena orea taudia idia hamasedia ore, momo do idia daradara bema Iehova be Dirava momokanina eiava lasi. Unai ese Guba bona Tanobada edia Lohia Badana, Iehova ena ladana do ia hadikaia. Danu, iena ladana helagana ia matauraia dainai, iena orea taudia do ia gimaia bona do idia mase ore lasi. Mani inai oi laloa: Dirava ena “dala ibounai be maoro, bona iena kota be momokani,” unai dainai Ia idia abidadama henia taudia do ia gimaia. (Deu. 32:4; Gen. 18:25) Danu, iena orea taudia do idia mase ore lasi badina Baibel ia gwau: “Lohiabada ese gwauhamata metauna ia karaia vadaeni, ia ese umui do ia rakatania lasi.” (1 Sam. 12:22) Oibe, “Lohiabada ese iena bese taudia do ia rakatania lasi. Iena abia hidi besena do ia rakatania lasi.”​—Sal. 94:14.

Ita diba momokani Iehova ena orea be tanobada ai do ia noho hanaihanai. Unai ese ita ia hagoadaia! Unai dainai, namona be Dirava ita badinaia bona ena gwauhamata ita abidadama henia, ia gwau: “Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba. Lau ese egu hesiai taudia do lau naria namonamo, bona kwalimu idia dekenai do lau henia.”​—Isa. 54:17.

[Blurb on page 22]

Dirava ese ena orea taudia do ia gimaia bona do idia mase ore lasi