“Lohiabada ese umui ruaosi dekenai adavana matamatadia do ia henia, ruma namodia danu.”​—RUTA 1:9.

HAERE TAHUA:

Idaunegai idia noho abidadama taudia edia lalohadai headava dekenai be dahaka?

Edena bamona ita diba daika do ita adavaia be mai anina bada Dirava dekenai?

Emu headava lalonai edena sisiba oi ura badinaia?

1. Dirava ese Heva ia karaia neganai, Adamu be dahaka ia gwau?

 “HARIHARI lau bamona tauna ia noho. Ia be lauegu turia ena turia, bona lauegu hidio ena hidio. Iena ladana do idia atoa, Hahine, badina be tau dekena amo be ia kokia.” (Gen. 2:23) Unai hereva be Adamu ese ia gwauraia. Ia moale badina Iehova ese ia totona hahine hairaina ta ia karaia! Dirava ese Adamu ia hamahutaia, bona ena ruduna turia ta ia kokia bona unai turia amo hahine ia karaia. Adamu ese ena ladana ia hatoa, Heva. Idia be Dirava ese ia hakapua taudia ginigunadia. Heva be Iehova ese Adamu ena ruduna turiana amo ia karaia dainai, idia ruaosi be tauanina tamona!

2. Dahaka dainai tau bona hahine idia headava?

² Iehova ese taunimanima ia havaraia neganai, tau bona hahine huanai ia vara lalokauna be edia lalonai ia atoa. Unai lalokau dainai tau bona hahine idia headava, bona momo idia ura unai lalokau be do ia noho hanaihanai.

HEADAVA IDIA MATAURAIA TAUDIA

3. Aberahamo be Isako totona adavana ia tahua neganai dahaka ia karaia?

³ Abidadama tauna Aberahamo be Iehova ena taravatu headava dekenai ia matauraia. Unai dainai, ena hesiai tauna burukana ia siaia Mesopotamia dekenai Isako totona adavana ta do ia tahua. Hesiai tauna be Iehova ia guriguri henia, bona ia ese ia durua dainai, Dirava ia gari henia kekenina Rebeka ia davaria bona Isako ena adavana ai ia lao. Iehova ese Aberahamo dekenai ia gwauhamatalaia garana be Rebeka amo ia vara. (Gen. 22:18; 24:12-14, 67) Hari momo be sibodia edia adavana idia abia hidi. To nega haida,  varavara o turadia ese ta idia durua ena adavana ia abia hidi totona. To bema singul tauna be edia heduru ia noia lasi, namo lasi idia doria to idia matauraia be namo. Dirava ese ta ena adavana ia abia hidi lasi. To, bema Keristani tauna ta ia ura ia headava, namona be Dirava bona ena lauma helaga totona ia guriguri, bona Dirava ese do ia durua.​—Gal. 5:18, 25.

4, 5. Edena bamona oi diba Sulama kekeni bona mamoe naria merona be ta ta idia lalokau henia?

⁴ Idaunegai, Israela ai ia noho Sulama kekeni hairaina ta be ia ura lasi ena turadia ese idia doria King Solomona ia adavaia totona. Ia gwau: “Ierusalema kekeni e, umui lau hagania egu lalokau urana be do umui haoa lasi, ela bona sibona do ia noga.” (Sol. 8:4, NW) Sulama kekeni be mamoe naria merona ta ia lalokau henia bona ia dekenai ia gwau: “Lau be Sarona dekenai ia vara rousi palauapalaua, koura dekenai ia vara sosana palauapalaua.” Mamoe naria merona be Sulama kekeni ia lalokau henia danu. Ia gwau: “Hahine edia huanai egu lalokau hahine be, sosana palauapalaua, ava ginigini edia huanai bamona.” (Sol. 2:1, 2) Oibe, idia ruaosi be ta ta idia lalokau henia.

⁵ Edia headava be do ia goada, badina idia ta ta be Dirava idia lalokau henia bada. Sulama kekeni be mamoe naria merona dekenai ia gwau: “Egu toana oi atoa emu kudouna ai, egu toana oi atoa emu imana ai. Lalokau ena goada be mase ena goada hegeregerena, bona mama ena dagedage be mase gabuna ena dagedage hegeregerena; ena siahu be lahi hururuhururu ena siahu bamona, Iah ena hururuhururu hegeregerena. Ranu momo ese lalokau ia habodoa diba lasi; abata badana ese ia huria oho diba lasi. Bema lalokau dainai tau ta be ena ruma ena dava bada kohu ibounai ia henia, taunimanima ese ia do idia ura henia lasi.” (Sol. 8:6, 7, NW) Dirava ena hesiai taudia ese edia adavana dekenai unai bamona lalokau idia hahedinaraia be namo.

DIRAVA BE EMU ABIA HIDI IA LALOA BADA

6, 7. Edena bamona ita diba daika do ita adavaia be mai anina bada Dirava dekenai?

⁶ Iehova be daika do ita adavaia ena abia hidi ia laloa bada. Hegeregere, ia ese Israela taudia ia haganidia Kanana taudia do idia adavaia lasi. Ia gwau: “Unai bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona. Badina unai bamona neganai, idia ese emui natudia Lohiabada dekena amo do idia hakaua siri, idau dirava tomadiho henia totona. Unai bamona ia vara neganai, Lohiabada ese umui do ia hadikaia ore haraga.” (Deu. 7:3, 4) Lagani handred momo murinai, hahelaga tauna Esera ia gwau: “Umui be umui kerere vadaeni, idau bese edia hahine taudia umui adavaia vadaeni dainai, Israela ena kerere umui habadaia vadaeni.” (Esr. 10:10) Gabeai, aposetolo Paulo ese Keristani taudia ia hamaorodia: “Hahine ta ena adavana ia mauri noho negadia ibounai lalonai, ia ida do ia noho. To bema ena adavana be mase lalonai ia mahuta, ia be ena ura tauna ia adavaia diba, to Lohiabada lalonai sibona.”​—1 Kor. 7:39.

⁷ Bema bapatiso tadikaka o taihu be murimuri tauna ta ia adavaia, ia be Iehova ena taravatu ia utua. Esera ena negai idia noho Israela taudia be idau bese hahine idia adavaia neganai, Dirava ena taravatu idia utua. Baibel ia gwau Keristani taudia be Keristani taudia sibona idia adavaia be namo. Namo lasi Keristani tauna ta ia laloa Dirava ena taravatu ia utua bona murimuri tauna ia adavaia be kerere badana lasi. Unai be lalohadai kererena,  bona namo lasi ia laloa Iehova ese ena headava do ia hanamoa. (Esr. 10:10; 2 Kor. 6:14, 15) Dirava ena taravatu ia utua tauna be Keristani kongrigeisen lalonai ena hahenamo ia haboioa diba.

IEHOVA ENA DIBA BE BADA

8. Dahaka dainai Dirava ena hakaua herevadia ita badinaia be namo?

⁸ Masini ta ia karaia tauna, be unai masini ena gaukara dalana ia diba. Bona unai masini gaukaralaia dalana be ita ia hadibaia. To, bema ia gwauraia dalana ita badinaia lasi, dahaka do ia vara? Masini ita hadikaia diba! Unai hegeregerena, bema ita ura eda headava lalonai ita moale, namona be headava havaraia tauna, Iehova, ena hakaua herevadia ita badinaia.

9. Dahaka dainai Iehova ese headava ia havaraia?

⁹ Iehova be taunimanima bona headava maurina ia diba goevagoeva. Ia ura idia be ‘bese do idia havaraia’ bona ‘do idia momo herea,’ unai dainai edia lalona ai mahuta hebou urana ia atoa. (Gen. 1:28) Heva ia do karaia lasi neganai, ia gwau: “Tau sibona ia noho be ia namo lasi, lau ese durua tauna ia bamona do lau karaia.” (Gen. 2:18) Oibe, Iehova ia ura headava taudia idia moale.​—Aonega Herevadia 5:15-18 duahia.

10. Headava taudia be edena dala ai Iehova idia hamoalea diba?

¹⁰ Adamu ese taunimanima dekenai kara dika ia henia hanai dainai, headava taudia be idia goevadae lasi. To Iehova ena hesiai taudia be edia mauri lalonai Baibel ena hereva idia badinaia neganai, moale korikorina idia davaria diba. Hegeregere, Paulo be headava lalonai mahuta hebou karana dekenai hakaua herevadia ia henia. (1 Korinto 7:1-5 duahia.) Mahuta hebou karana be natuna havaraia sibona totona lasi, to ia be tau bona hahine edia lalokau idia hahedinaraia dalana ma ta. To, Dirava be matabodaga hemarai karadia ia moalelaia lasi. Unai dainai Keristani tau bona hahine ese ta ta idia matauraia be namo.

11. Ruta be Iehova ia badinaia dainai dahaka hahenamo ia abia?

¹¹ Namona be headava lalonai moale ia noho bona Keristani ruma bese lalonai maino bona lalotamona ia noho. Lagani 3,000 gunanai ia vara gauna ta mani ita laloa. Hahine burukana Naomi bona ena ravana hahine rua, Opera bona Ruta be idia vabu. Idia toiosi be Moaba amo Iuda dekenai idia lao neganai, Naomi ese Opera bona Ruta ia hamaorodia edia hanua dekenai do idia giroa lou. To Ruta be Moaba dekenai ia giroa lou lasi, ia be Naomi ida ia noho bona Dirava momokanina ia tomadiho henia. Boasi be Iehova ia tomadiho  henia tauna ta. Ia ese Ruta ia hamaoroa: “Israela taudia edia Dirava dekenai oi mai vadaeni, ia ese oi do ia naria totona. Lau ura ia ese davana namona oi dekenai do ia henia.” (Ruta 1:9; 2:12) Ruta be Dirava ena harihari gauna, headava ia matauraia bona Boasi ia adavaia. Ruta be tanobada paradaisona ai ia toreisi lou neganai, do ia moale badina do ia laloparara Iesu Keriso be iena bese amo ia vara. (Mat. 1:1, 5, 6; Luka 3:23, 32) Oibe, Iehova ia badinaia dainai hahenamo momo ia abia!

HEADAVA IA HAGOADAIA HAKAUA HEREVADIA

12. Hakaua hereva namodia be edeseni ita davaria diba?

¹² Headava ia goada totona Dirava be ita dekenai hakaua herevadia ia henia. Iena diba ese taunimanima edia diba ia hereaia. Bona headava dekenai Baibel sibona amo hakaua hereva namodia ita abia diba. Unai dainai, bema ta ia ura ma ta ia durua, Baibel ia gaukaralaia be namo. Hegeregere, aposetolo Paulo ia gwau: “Namona be umui ibounai ese emui hahine do umui lalokau henia, sibona umui lalokau henia hegeregerena. Hahine danu ese iena tau do ia matauraia bada be namo.” (Efe. 5:33) Lo Keristani taudia be unai siri idia lalopararalaia, to do idia badinaia, a? Do idia badinaia bema Dirava ena harihari gauna, headava idia laloa bada bona matauraia. a

13. Bema tau be 1 Petero 3:7 ia badinaia lasi dahaka ia vara diba?

¹³ Namona be Keristani tauna be mai lalokau ida ena adavana ia kara henia. Aposetolo Petero ia gwau: “Umui tatau e, emui adavadia ida umui noho hebou negadiai, mai laloa namonamo ida idia do umui kara henia. Hahine dekenai hemataurai do umui henia, badina idia be hodu manokana bamona. Danu, idia be umui ida mauri ena ahuna do idia abia, Dirava ese ena hebogahisi hereadaena dainai ia henia gauna unai. Unai bamona umui karaia neganai, emui guriguri be gau ta ese do ia koua lasi.” (1 Pet. 3:7) Bema tau be unai hakaua herevana ia dadaraia, Iehova ese iena guriguri do ia kamonai lasi. Bona idia ruaosi edia hetura karana Iehova ida ia dika diba. Danu, idia huanai hekwakwanai badadia do idia vara, reana do idia hepapahuahu momo bona ta ta do idia dagedage henia.

14. Lalokau hahinena ese ena ruma bese lalonai dahaka namo ia havaraia diba?

¹⁴ Baibel ena sisiba bona lauma helaga ena hakaua dalana ia badinaia hahinena ena ruma bese ai maino bona moale do ia noho. Namona be Keristani tau be ena adavana ia lalokau henia bona ia gimaia. Danu, bema Keristani hahine ia ura ena adavana ese ia lalokau henia, kara namodia ia hahedinaraia be namo. Aonega Herevadia 14:1 ia gwau: “Aonega hahine ese gaukara namona ia karaia, bona iena famili taudia ia haginidia goada. To kavakava hahine ese, iena ruma bona famili ia hadikaia noho.” Oibe, aonega bona lalokau ia hahedinaraia hahinena ena ruma bese taudia be do idia moale. Unai ese ia hahedinaraia Dirava ena harihari gauna, headava ia matauraia.

15. Efeso 5:22-25 ai dahaka sisiba ia noho?

 ¹⁵ Tau bona hahine be Iesu ena haheitalai idia tohotohoa neganai, idia hahedinaraia Dirava ena harihari gauna, headava idia matauraia. Idia be ta ta idia lalokau henia bona matauraia. (Efeso 5:22-25 duahia.) Ena be ta ese ta ia habadua, to lalokau korikori bona hemataurai ia noho dainai, do idia manau bona edia herevahereva karana do ia dika lasi bona do idia moale noho. Oibe, Iehova ese unai bamona taudia ia hanamoa!

TA ESE DO IA HAPARARADIA LASI

16. Dahaka dainai Keristani taudia haida idia do headava lasi?

¹⁶ Singul taudia momo idia ura dina ta do idia headava. To, Iehova ena hesiai taudia haida be idia do headava lasi, badina idia ura henia tauna ta eiava Dirava ena taravatu ia laloa bada tauna ta idia do davaria lasi. To, ma haida be idia ura lasi idia headava. Badina idia ura nega bada idia atoa Iehova ena hesiai gaukara idia karaia totona, bona edia mauri idia moalelaia.​—Mat. 19:10-12; 1 Kor. 7:1, 6, 7, 17.

17. (a) Headava taudia dekenai Iesu ena sisiba be dahaka? (b) Bema Keristani tauna ta be ma ta ena adavana ia hegahusi henia, dahaka ia karaia haraga be namo?

¹⁷ Herevana ita be singul o headava taudia, to Iesu ena hereva ita laloatao be namo, ia gwau: “Umui duahia lasi, a? Matamana negana amo, idia ia havaraia tauna [Dirava] ese idia ia karaia tau bona hahine, bona ia gwau: ‘Unai dainai tau ese ena tamana bona sinana do ia rakatania bona ena hahine danu do ia hakapua, bona idia ruaosi be tauanina tamona ai do idia lao.’ Vadaeni idia be rua lasi, to tauanina tamona. Unai dainai Dirava ese ia hakapua taudia be ta ese do ia hapararaia lasi be namo.” (Mat. 19:4-6) Bema Keristani tauna ta be ma ta ena adavana ia hegahusi henia, unai be kara dikana momokani. (Deu. 5:21) Bema ta be unai bamona lalohadai ia abia, namona be ia hekwarahi unai lalohadai dikana ia kokia haraga totona. Ena be unai ese ia dekenai lalohekwarahi bada do ia havaraia, to gau badana be unai hegahusi karana ia hadokoa.​—Mat. 5:27-30; Ier. 17:9.

18. Dirava ena harihari gauna, headava be edena bamona ita laloa be namo?

¹⁸ Momo be Iehova Dirava ena taravatu idia diba lasi, to iena harihari gauna, headava idia matauraia. Ita be edena bamona? Ita be “moale Diravana,” Iehova ena hesiai taudia dainai, namona be iseda mauri dalana amo ita hahedinaraia ita be Dirava ena harihari gauna, headava ita laloa bada bona matauraia!​—1 Tim. 1:11.

[Footnote]

[Study Questions]

[Blurb on page 6]

Headava do ia goada bema tau bona hahine be Dirava idia lalokau henia

[Picture on page 5]

Ruta be Dirava ena harihari gauna, headava ia matauraia

[Picture on page 7]

Oi be Dirava ena harihari gauna, headava oi matauraia, a?