Iehova Ena Hairai Oi Hahedinaraia, A?
“Ita ibounai be . . . hevarivari bamona Iehova ena hairai ita hahedinaraia.” —2 KOR. 3:18.
EMU HAERE BE DAHAKA?
Ena be ita be goevadae lasi taudia, to edena dala ai Iehova ena hairai ita hahedinaraia diba?
Edena dala ai guriguri bona hebou karana ese ita idia durua Dirava ena hairai ita hahedinaraia totona?
Edena dala ai Iehova ena ladana ita hanamoa noho diba?
1, 2. Dahaka dainai taunimanima be Dirava ena kara namodia idia tohotohoa diba?
ITA ta ta eda toana be iseda tamana o sinana hegeregerena. Reana ita kamonai ta ese mero maragina ta ia hamaoroa, ‘Oi be emu tamana bamona.’ Eiava kekeni maragina dekenai ia gwau, ‘Oi lau itaia neganai, emu sinana lau laloa.’ Nega momo natudia idia ura edia tama sina edia kara idia tohotohoa. To, ita be edena bamona? Iseda guba Tamana, Iehova, ita tohotohoa diba, a? Ena be ia ita itaia lasi, to ia havaraia gaudia amo ena kara namodia ita dibaia. Danu, Baibel ita stadilaia bona Iesu ena hereva bona ena kara ita laloa dobu neganai, Dirava ena kara namodia ita dibaia. (Ioa. 1:18; Roma 1:20) Oibe, Iehova ena kara ita tohotohoa neganai, iena hairai ita hahedinaraia diba.
2 Dirava ese tau bona hahine ginigunadia ia karaia neganai, ia diba idia ese iena ura do idia karaia, iena kara do idia tohotohoa, bona iena ladana do idia hanamoa. (Genese 1:26, 27 duahia.) Ita be Keristani taudia dainai, Dirava ena kara ita tohotohoa bona ena hairai ita hahedinaraia be hahenamo badana. Ena be iseda tano o kopina ena kala be idauidau, sikuli badana ita lao o lasi, to ita ibounai be Dirava ena hairai ita hahedinaraia diba. Unai ita karaia diba badina, “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.”—Kara 10:34, 35.
3. Korinto Iharuana 3:18 ena anina be dahaka? Bona edena dala ai iseda vairana ia diaridiari?
3 Horoa Keristani taudia ese Iehova ena hairai idia hahedinaraia. Horoa tauna aposetolo Paulo ia gwau: “Ita ibounai iseda vairana be dabua ese ia koua lasi, bona hevarivari bamona Iehova ena hairai ita hahedinaraia, bona unai ese ita ia haidaua bona ita be iena toana hegeregerena, bona iseda hairai be ia bada ia lao noho.” (2 Kor. 3:18) Unai siri lalonai Paulo ese Mose dekenai ia vara gauna ia herevalaia. Mose be Sinai Ororona dekenai Taravatu 10 ia abia bona ia diho neganai, ena vairana ia diaridiari badina ia be Dirava danu ia herevahereva. (Eso. 34:29, 30) Momokani, iseda vairana be Mose ena vairana hegeregerena ia diaridiari, lasi. To, ma haida dekenai Iehova ena kara namodia bona ena ura ita herevalaia neganai, iseda moale toana idia itaia. Unai dainai, herevana ita be horoa taudia o mamoe ma haida, to ita be hevarivari bamona, eda haroro gaukara bona mauri ai Iehova ena hairai ita hahedinaraia diba. (2 Kor. 4:1) Nega ibounai emu haroro gaukara bona Keristani kara namodia amo Iehova ena hairai oi hahedinaraia, a?
ITA URA IEHOVA ENA HAIRAI ITA HAHEDINARAIA
4, 5. (a) Paulo bamona, ita be dahaka hekwakwanai ita davaria? (b) Edena dala ai kara dika ese taunimanima ia koua?
4 Ita be Iehova ena hesiai taudia dainai, namona be ita karaia gaudia ibounai lalonai ena hairai ita hahedinaraia. To, nega momo kara namo ita ura karaia neganai, kara dika ita karaia. Paulo be unai ia diba danu. (Roma 7:21-25 duahia.) Bona unai ia vara ena badina ia herevalaia, ia gwau: “Taunimanima ibounai be idia kara dika vadaeni bona Dirava ena hairai idia reaia.” (Roma 3:23) Adamu ia kara dika dainai, taunimanima ibounai be kara dika taudia, bona kara dika be dagedage king ta bamona idia ia biagua.—Roma 5:12; 6:12.
5 Iehova ena kara, ena ura, bona taravatu be goevadae. To, kara dika be dahaka? Kara dika ese tau ta ena hetura karana Dirava ida ia hadikaia diba. Kara dika ese ita ia koua dainai, Dirava ena hairai ita hahedinaraia lasi. Hegeregere labana tauna ia ura boroma ia tarakia, to gau ta ese ena dala ia koua dainai boroma ia tarakia lasi. Nega haida kara dika be mai eda ura ida ita karaia, to nega haida ita diba lasi ita be kara dika ita karaia. (Num. 15:27-31) Kara dika be mai ena siahu bona iseda Havaraia Tauna amo ita ia hapararaia diba. (Sal. 51:5; Isa. 59:2; Kol. 1:21) Taunimanima momo be edia mauri lalonai Dirava ena ura idia badinaia lasi. Oibe, kara dika ese taunimanima ia koua dainai, Dirava ena hairai idia hahedinaraia lasi.
6. Ena be ita be kara dika taudia, to edena dala ai Iehova ena hairai ita hahedinaraia diba?
6 Ena be ita be mai iseda kara dika, to Iehova ese ita dekenai helaro ia henia. (Roma 15:13) Iesu ena mauri davalaia boubouna amo Iehova ese dala ia karaia kara dika ena igui amo ita ia ruhaia totona. Unai boubou gauna ita abidadama henia dainai, “kara dika ena igui” amo ita ia ruhaia, Iehova ena turadia ai ita lao, bona ena hairai ita hahedinaraia diba. (Roma 5:19; 6:6; Ioa. 3:16) Bema iseda hetura karana Dirava ida ia goada noho, hari inai negai ita do ia hanamoa, bona nega vaira ai goevadae taudia ai do ita lao bona do ita mauri hanaihanai. Ita moale badina ena be ita be kara dika taudia, to Dirava ia diba iena hairai ita hahedinaraia diba.
DIRAVA ENA HAIRAI ITA HAHEDINARAIA DALANA
7. Bema ita ura Dirava ena hairai ita hahedinaraia, dahaka ita karaia guna be namo?
7 Ita be kara dika taudia dainai, ita ibounai be mai iseda manoka gaudia. Bema ita ura Dirava ena hairai ita hahedinaraia, namona be iseda manoka gaudia ita diba bona ita hekwarahi unai gaudia ita hanamoa totona. (2 Siv. 6:36) Hegeregere, bema ita be ponografi laulau ita itaia, namona be elda taudia dekenai ita gwauraia hedinarai bona ita noidia ita idia durua totona. (Iam. 5:14, 15) Unai ita karaia guna be namo, bema ita ura Dirava ena hairai ita hahedinaraia. Bona ita gaukara goada Iehova ese ia moalelaia mauri dalana ita badinaia totona. (Aon. 28:18; 1 Kor. 10:12) Herevana iseda manoka gauna be dahaka, namona be ita hekwarahi noho unai ita hanamoa totona, unai amo Dirava ena hairai ita hahedinaraia diba.
8. Ena be ita be goevadae lasi to dahaka ita karaia diba?
8 Iesu sibona ese Dirava ena ura ia karaia bona ena hairai ia hahedinaraia goevagoeva. Ita be Iesu bamona lasi, to namona be ita hekwarahi iena haheitalai ita tohotohoa totona. (1 Pet. 2:21) Iehova ia itaia ita hekwarahi ena ladana ita hanamoa bona ita goada ita lao neganai, iseda hekwarahi do ia hanamoa.
9. Baibel be edena dala ai ita ia durua Dirava ena hairai ita hahedinaraia namonamo totona?
9 Baibel ese ita ia durua diba Dirava ena hairai ita hahedinaraia namonamo totona. Unai dainai, namona be Baibel ita stadilaia bona ena hereva ita laloa dobu. (Sal. 1:1-3) Dina ta ta ai Baibel ita duahia neganai, kara namodia ita dibaia bona unai ese ita ia durua Keristani tauna goadana ai ita lao totona. (Iamesi 1:22-25 duahia.) Baibel amo ita dibaia gaudia ese iseda abidadama ia hagoadaia bona ita ia durua kara dika ita dadaraia bona Iehova ita hamoalea totona.—Sal. 119:11, 47, 48.
10. Edena dala ai guriguri karana ese iseda hesiai gaukara ia durua diba?
10 Bema ita ura Dirava ena hairai ita hahedinaraia, namona be ‘guriguri ita hadokoa lasi.’ (Roma 12:12) Iehova ese ita do ia durua dala maorona ai ia ita hesiai henia totona. Guriguri amo Dirava do ita noia ita dekenai lauma helaga do ia henia, iseda abidadama do ia habadaia, bona goada ia henia hahetoho ita dadaraia totona. Danu, ia ita noia ita do ia durua ma haida dekenai Baibel ita hadibaia namonamo totona. (Mat. 6:13; Luka 11:13; 17:5; 2 Tim. 2:15) Hekwakwanai negadiai natu ta be ena Tamana dekenai ia tabekau hegeregerena, eda Tamana, Iehova dekenai ita tabekau be gau badana. Iseda hesiai gaukara ita hanamoa totona Iehova ita noia neganai, ita diba ita do ia durua. Iehova ia ura nega ibounai iseda guriguri ia kamonai. Iseda guriguri amo ia ita hanamoa, ita tanikiu henia, bona ena heduru ita noia eda hekwakwanai ita hanaidia totona. Danu, ita noia ita do ia durua iseda hesiai gaukara amo iena ladana ita hanamoa totona.—Sal. 86:12; Iam. 1:5-7.
11. Edena dala ai Keristani heboudia ese ita idia durua Dirava ena hairai ita hahedinaraia totona?
11 Dirava ese “igui hesiai tauna” dekenai maduna ia henia iena mamoe ia naria totona. (Mat. 24:45-47; Sal. 100:3) Igui hesiai tauna be Keristani heboudia amo ita ia durua Iehova ena hairai ita hahedinaraia totona. Ia be dabua turia hahinena bamona; dabua ia utua bona kahana ta ta ia turia hebou namonamo bona ita karaia neganai, iseda toana be namo herea. Unai hegeregerena, hebou dekenai igui hesiai tauna amo ita abia sisiba namodia ese ita idia durua iseda Keristani karadia ita hanamoa totona. (Heb. 10:24, 25) Unai dainai, nega korikori ai hebou dekenai ita ginidae be namo. Bema nega ibounai ita leiti, hebou amo namo do ita davaria lasi.
DIRAVA ITA TOHOTOHOA
12. Edena dala ai Dirava ita tohotohoa diba?
12 Bema ‘Dirava ita tohotohoa,’ ena hairai ita hahedinaraia diba. (Efe. 5:1) Ia ita tohotohoa dalana ta be ia laloa hegeregerena do ita laloa. Dirava ena ura ita dadaraia bona sibona eda ura ita badinaia neganai, dika ita davaria diba. Ita be Satani ena tanobada ai ita noho dainai, namona be ita hekwarahi Iehova ia inai henia gaudia ita inai henia totona, bona ia ura henia gaudia ita ura henia. (Sal. 97:10; 1 Ioa. 5:19) Ita abia dae momokani Dirava ita hesiai henia dalana maorona be, gau ibounai do ita karaia ia ita hanamoa totona.—1 Korinto 10:31 duahia.
13. (a) Dahaka dainai kara dika ita inai henia be namo? (b) Aposteit taudia be edena bamona do ita kara henidia?
13 Iehova be kara dika ia inai henia dainai, ita danu ese kara dika do ita inai henia. Anina be ita idia hakaua kerere gaudia ibounai do ita dadaraia. Hegeregere, aposteit lalohadai ita dadaraia be gau badana, badina aposteit taudia be Dirava idia hanamoa lasi. (Deu. 13:6-9) Namona be aposteit tauna o ia gwau ia be tadikaka to iena kara amo Dirava ena ladana ia hadikaia tauna, ita dadaraia. Ena be idia be iseda varavara, to idia ita bamoa lasi be namo. (1 Kor. 5:11) Namo lasi aposteit taudia o Iehova ena orea idia hadikaia taudia ida ita hepapahuahu, badina unai ese namo ta do ia havaraia lasi. Danu, edia hereva ita kamonai lasi, edia buka o magasin o Intanet sait ita duahia lasi, badina unai ese iseda hetura karana Iehova ida ia hadikaia diba.—Isaia 5:20; Mataio 7:6 duahia.
14. Edena dala hereadaena ai Iehova ita tohotohoa diba, bona dahaka dainai?
14 Iehova ita tohotohoa dalana hereadaena be lalokau ita hahedinaraia. (1 Ioa. 4:16-19) Oibe, eda huanai ia noho lalokauna ese ia hamomokania ita be Iesu ena hahediba taudia bona Iehova ena hesiai taudia. (Ioa. 13:34, 35) Ita be goevadae lasi taudia dainai, nega haida ia auka lalokau ita hahedinaraia totona. To, namona be ita hekwarahi unai ita karaia totona. Bema lalokau bona Keristani kara namodia ita hahedinaraia, unai ese ita do ia durua kara dika bona ma haida hahisia karadia ita dadaraia totona.—2 Pet. 1:5-7.
15. Bema taunimanima ita lalokau henidia, edena bamona do ita kara henidia?
15 Lalokau dainai taunimanima dekenai kara namo ita hahedinaraia. (Roma 13:8-10) Hegeregere, bema headava tau bona hahine be ta ta idia lalokau henia, matabodaga karadia do idia dadaraia. Bema elda taudia ita lalokau henia bona edia gaukara ita matauraia, do ita kamonai henidia. Bema natudia be edia tama sina idia lalokau henia, do idia matauraidia bona do idia hereva dika henidia lasi. Bema taunimanima ita lalokau henidia, do ita lalodia bada bona mai hemataurai ida do ita hereva henidia. (Iam. 3:9) Bona elda taudia be Dirava ena mamoe idia lalokau henia dainai, mai hebogahisi ida idia kara henidia.—Kara 20:28, 29.
16. Haroro gaukara ai lalokau ita hahedinaraia ena namo be dahaka?
16 Haroro gaukara ai lalokau ita hahedinaraia danu be namo. Iehova ita lalokau henia bada dainai, taunimanima be ita laohaia hereva idia kamonai lasi neganai, do ita lalomanoka lasi. Haroro gaukara totona do ita hegaegae namonamo bona Dirava ena Hereva hadibaia taudia namodia ai do ita lao. Bema Dirava bona taunimanima ita lalokau henia, haroro gaukara do ita laloa bada, bona mai moale ida do ita karaia.—Mat. 10:7.
IEHOVA ITA HANAMOA NOHO
17. Kara maoromaoro ita badinaia totona, dahaka ita karaia be namo?
17 Taunimanima momo be idia laloparara lasi dahaka dainai Dirava ese kara dika ia inai henia. To ita be ena badina ita diba dainai, namona be ita hekwarahi kara dika ita dadaraia totona. Bona iseda lalomamina ita hadibaia loulou, unai amo ura dikadia do ita dadaraia bona kara maoromaoro do ita badinaia. (Roma 7:22, 23) Momokani, ita be goevadae lasi taudia, to Dirava ese ita ia hagoadaia diba kara maoromaoro ita badinaia totona.—2 Kor. 12:10.
18, 19. (a) Edena dala ai Satani bona ena demoni ita halusia diba? (b) Oiemu lalona oi hadaia dahaka oi karaia totona?
18 Ita ura Iehova ita hanamoa dainai, namona be Satani bona ena demoni ita tuari henidia. Bema “Dirava ese ia henia tuari dabua” ita hahedokilaia, do ita kwalimu. (Efe. 6:11-13) Satani ia hekwarahi bada Iehova ena ladana ia hadikaia totona. Danu, ia hekwarahi bada iseda hetura karana Dirava ida ia hadikaia totona. Unai dainai, ita goevadae lasi tatau, hahine, bona natudia ese Dirava ita badinaia bona ena ladana ita hanamoa neganai, Satani ita halusia. Namona be aneru edia hereva ita tohotohodia bona ita gwau: “Iehova, aiemai Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia bona oiemu ura dainai idia noho bona oi havaradia.”—Apok. 4:11.
19 Namona be iseda lalona ita hadaia Iehova ita hanamoa noho totona. Iehova ia itaia ena hesiai taudia momo be ia idia tohotohoa bona ena hairai idia hahedinaraia neganai, ia moale bada. (Aon. 27:11) Namona be Davida bamona, mai iseda kudouna ibounai ida Iehova ita hanamoa ita gwau: “Lau ese oiemu ladana, be do lau hanamoa bada ela bona hanaihanai.” (Sal. 86:12) Iehova idia badinaia taudia ese iena hairai do idia hahedinaraia goevagoeva bona ia do idia hanamoa ela bona hanaihanai. Unai nega ai ita noho be hahenamo badana ta. Hari oi be Iehova Dirava ena hairai oi hahedinaraia noho, bona nega vaira ai unai do oi karaia ela bona hanaihanai, a?
[Study Questions]
[Pictures on page 27]
Iehova ena hairai be inai dala idauidau ai oi hahedinaraia, a?
