“Nega be ia ese ia biagua bona ia haidaua. Ia ese king ia atoa, bona king ia kokia.”​—DAN. 2:21.

EDENA BAMONA DO OI HAERE?

Dirava ese ia havaraia gaudia bona idia guguru vadaeni peroveta herevadia amo dahaka ita dibaia?

Ita diba Iehova be ‘nega ia biagua’ dainai, dahaka ita karaia be namo?

Herevana taunimanima edia palani be dahaka, to dahaka dainai Iehova be ia makaia negana do ia haidaua lasi?

1, 2. Dahaka dainai ita gwau diba Iehova sibona be hegeregere nega ia gwauraia hedinarai totona?

 IEHOVA DIRAVA be taunimanima ia do karaia lasi neganai, nega duahia totona gau haida ia karaia guna. Dina namba foa ai diari gaudia ia karaia, “dina bona hanuaboi do idia hapararaia totona.” Unai amo “lahara bona laurabada ena toana, dina bona lagani edia toana” ita duahia diba. (Gen. 1:14, 19, 26) Oibe, unai be Iehova ena ura hegeregerena idia vara.

² Saiens taudia be nega o taim ena gaukara dalana idia gwauraia hedinarai diba lasi. Ensaiklopidia ta ia gwau: “Ta be ia hegeregere lasi nega ena gaukara dalana ia gwauraia hedinarai totona.” To, Iehova sibona ese nega ia gwauraia hedinarai diba. Ia ese “guba” bona “tanobada ia karaia” bona nega vaira ai do idia vara gaudia ia diba. Iehova ia gwau: “Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna.” (Isa. 45:18; 46:10) Inai stadi ai gau rua do ita herevalaia: (1) Iehova ese ia havaraia gaudia, bona (2) idia guguru vadaeni peroveta herevadia. Unai ese iseda abidadama Iehova bona Baibel dekenai do ia hagoadaia. Bona unai ese ia hamomokania Iehova be Nega Naria Tauna Hereadaena bona iena ura be nega korikori ai ia hagugurudia.

IEHOVA ESE IA HAVARAIA GAUDIA

3. Nega idia badinaia gaudia haida be dahaka?

³ Guba bona tanobada ai idia noho gaudia ibounai be nega idia badinaia. Hegeregere dina, hua, hisiu, bona planeti ma haida be nega idia badinaia dainai, idia heau namonamo. Unai dainai, taunimanima be hua bona hisiu do idia hedinarai negana, edia noho gabuna korikorina, keru bona siahu negana idia gwauraia hedinarai diba. Unai gaudia ese taunimanima idia durua, davara  loaloa totona nega maorona idia abia hidi bona idia lao henia gabuna idia davaria totona. Oibe, Iehova ena havaraia gaudia ese idia hamomokania “iena siahu be bada herea” bona ita hanamoa be maoro.​—Isaia 40:26 duahia.

4. Iehova ese ia havaraia gaudia ese dahaka idia hamomokania?

⁴ Animal bona tubutubu gaudia danu be nega idia badinaia. Unai dainai manu idia diba edena nega be nega namona gabu ma ta dekenai idia roho lao totona. (Ier. 8:7) Ita taunimanima danu be nega idia badinaia. Hegeregere, ita diba edena nega ai do ita mahuta bona edena nega ai do ita noga. Bema peleini amo tano ta ita lao, bona unai gabu ena nega be iseda tano ena nega amo ia idau, dina haida murinai unai gabu ena nega dekenai do ita manada. Iehova ese ia havaraia gaudia idauidau ese idia hamomokania ia be ‘nega ia biagua’ Diravana, bona ena siahu bona aonega be bada. (Salamo 104:24 duahia.) Unai dainai ita diba momokani ena ura be nega korikori ai do ia hagugurua!

NEGA KORIKORI AI IDIA GUGURU PEROVETA HEREVADIA

5. (a) Edena dala ai nega vaira ai do idia vara gaudia ita dibaia diba? (b) Dahaka dainai Iehova be nega vaira ai do idia vara gaudia bona do idia vara negana ia gwauraia diba?

⁵ Iehova ia havaraia gaudia amo ‘iena siahu bona iena kara idauidau ita lalopararalaia.’ To henanadai badana be: ‘Nega vaira ai taunimanima dekenai dahaka do ia vara?’ (Roma 1:20) Unai henanadai ena haere ita davaria totona, Baibel ita stadilaia be namo. Eda stadi amo ita itaia peroveta herevadia momo be nega korikori ai idia guguru vadaeni. Bona Iehova be nega vaira ai do idia vara gaudia ia diba dainai, ita ia hadibaia. Danu, Baibel ena peroveta herevadia be nega korikori ai idia guguru, badina Iehova ese unai nega ia makaia vadaeni ena ura ia hagugurua totona.

6. Dahaka dainai ita diba Iehova ia ura Baibel ena peroveta herevadia ita lalopararalaia?

⁶ Dirava ese nega ia duahia dalana be taunimanima edia nega duahia dalana amo ia idau. To, nega korikori ai do ia vara gauna ia ura herevalaia neganai, taunimanima ese idia lalopararalaia herevadia ia gaukaralaia. (Salamo 90:4 duahia.) Hegeregere, Apokalupo bukana ese “aneru 4” ia herevalaia. Idia be “unai hora, unai dina, unai hua, bona unai lagani” totona “idia noho hegaegae.” Taunimanima be hora, dina, hua, bona lagani idia lalopararalaia diba. (Apok. 9:14, 15) Unai dainai, peroveta herevadia be Dirava ese ia makaia negadia ai idia guguru neganai, iseda abidadama Dirava bona Baibel dekenai ia hagoadaia. Mani idia guguru vadaeni peroveta herevadia haida ita herevalaia.

7. Ierusalema bona Iuda dekenai idia vara gaudia ese dahaka ia hamomokania?

⁷ Lagani 600 B.C.E. bamona ai ia guguru peroveta herevana mani ita herevalaia. “Iehoiakimi, Iuda ena king Iosaia ena natuna, ena lohia lagani namba 4 lalonai,” Iuda taudia dekenai do ia vara gauna be Iehova ese Ieremia dekenai ia gwauraia. (Ier. 25:1) Ia gwau Babulonia taudia ese Ierusalema do idia hadikaia bona Iuda taudia be igui hesiai taudia bamona Babulonia dekenai do idia abia lao. Unuseniai, Iuda taudia be “lagani 70 lalonai Babulonia ena king ena hesiai gaukara do idia karaia.” Lagani 607 B.C.E. ai, Babulonia ena tuari taudia ese Ierusalema idia hadikaia bona Iuda taudia be igui hesiai taudia bamona Babulonia dekenai idia abidia lao. To, lagani 70 murinai dahaka ia vara? Iehova ia gwau “lagani 70 be Babulonia dekenai do idia ore” murinai, edia tano dekenai do ia hakaudia lao. (Ier. 25:11, 12; 29:10) Unai peroveta herevana be nega korikori ai ia guguru.  Mede bona Parasa basileiana ese Iuda taudia be Babulonia amo ia ruhadia, bona lagani 537 B.C.E. ai, edia tano dekenai idia giroa lou.

8, 9. Daniela ena peroveta herevadia ese edena bamona idia hahedinaraia Iehova be ‘nega ia biagua’ Diravana?

⁸ Iuda taudia be Babulonia idia do rakatania lasi neganai, Daniela ese peroveta herevana ma ta ia gwauraia. Ia gwau Ierusalema haginia lou herevana do idia gwauraia bona lagani 483 murinai Mesia do ia ginidae. Lagani 455 B.C.E. ai Mede bona Parasa edia king ese gwaumaoro ia henia Ierusalema idia haginia lou totona. Lagani 483 murinai, lagani 29 C.E. ai, Nasareta tauna Iesu ia bapatiso neganai lauma helaga ese ia horoa bona Mesia ai ia lao. a​—Neh. 2:1, 5-8; Dan. 9:24, 25; Luka 3:1, 2, 21, 22.

⁹ Baibel ese Dirava ena Basileia ia perovetalaia dalana mani ita itaia. Baibel ia gwau lagani 1914 ai, Keriso be guba dekenai King ai do ia lao. Hegeregere, Baibel ese Iesu ena noho negana “ena toana” ia herevalaia neganai, ia hahedinaraia Satani be guba amo do idia negea diho bona tanobada ai hekwakwanai momo do idia vara. (Mat. 24:3-14; Apok. 12:9, 12) Peroveta herevadia ma haida amo ita diba lagani 1914 ai guba dekenai Keriso be King ai ia lao, bona “idau bese edia nega ia ore.”​—Luka 21:24; Dan. 4:10-17. b

10. Nega korikori ai do idia vara gaudia haida be dahaka?

¹⁰ Kahirakahira, Iesu ese ia perovetalaia “hisihisi badana” do ia vara. Unai murinai, Iesu be lagani 1,000 lalonai do ia lohia. Ita daradara lasi, unai gaudia ibounai be edia nega korikori ai do idia vara. Iesu be tanobada ai ia noho neganai, do idia vara gaudia ena “dina bona hora” be Iehova ese ia abia hidi vadaeni.​—Mat. 24:21, 36; Apok. 20:6.

‘NEGA OI GAUKARALAIA NAMONAMO’

11. Bema ita abia dae ita be dokona negana ai ita noho, dahaka ita karaia be namo?

¹¹ Ita diba Keriso be King ai ia lao vadaeni bona ita be “dokona negana” ai ita noho. Vadaeni, dahaka ita karaia be namo? (Dan. 12:4) Taunimanima idia itaia hekwakwanai be idia bada idia lao, to idia diba lasi unai be Baibel ese ia perovetalaia dina gabedia ena toana. Haida idia gwau inai tanobada be do ia dika momokani. Ma haida idia gwau taunimanima ese “maino bona noho namo” idia havaraia diba. (1 Tes. 5:3) To, ita be edena bamona? Ita abia dae kahirakahira Dirava ese Satani ena tanobada do ia hadikaia ore, a? Bema unai ita abia dae, iseda nega do ita gaukaralaia namonamo Iehova ita hesiai henia, bona ma haida ita durua ia idia dibaia totona. (2 Tim. 3:1) Unai dainai, iseda nega ita gaukaralaia dalana ita laloa  namonamo be gau badana.​—Efeso 5:15-17 duahia.

12. Noa ena nega ai idia vara gaudia amo dahaka ita dibaia?

¹² Gau momo ese iseda lalona idia veria diba dainai, iseda nega ita gaukaralaia namonamo be auka. Iesu ia gwau: “Noa ena nega hegeregerena, taunimanima ena Natuna ena noho negana danu be unai bamona.” Noa ena nega be edena bamona? Dirava ese Noa ia hamaoroa ena negai idia noho taudia be do ia hadikaia ore. Tanobada ibounai dekenai do ia vara abata badana lalonai kara dika taudia ibounai do idia mase. Noa be “kara maoromaoro ia harorolaia tauna,” bona ia hesiku lasi iena negai idia noho taudia ia haroro henidia totona. (Mat. 24:37; 2 Pet. 2:5) To, unai taudia be “idia aniani, idia inuinu, idia headava noho . . . ela bona Abata ia mai bona idia ibounai ia abia lao.” Unai dainai Iesu ia gwau: “Umui danu do umui noho hegaegae, badina umui laloa lasi horana ai, taunimanima ena Natuna do ia mai.” (Mat. 24:38, 39, 44) Namona be Noa ita tohotohoa, bona ena nega ai idia noho taudia edia kara ita dadaraia. Ita gima noho totona, dahaka ita karaia be namo?

13, 14. Taunimanima ena Natuna ena mai negana ita naria noho lalonai, dahaka ita laloatao be namo?

¹³ Ena be Taunimanima ena Natuna do ia mai negana ita diba lasi, to namona be ita laloatao Iehova be ia abia hidi negana ai ena ura do ia hagugurua. Herevana tanobada ai dahaka ia vara, eiava taunimanima edia palani be dahaka, to Iehova ese do ia karaia gauna ena nega be ia makaia vadaeni, bona do idia vara gaudia ia diba. (Daniela 2:21 duahia.) Aonega Herevadia 21:1 (BHğ) ia gwau: “Hanua pavapava ena lalona be sinavai ta bamona, Iehova ena imana ai; iena ura gabuna dekenai do ia ha-arua lao.”

¹⁴ Iehova be idia vara gaudia edia nega ia biagua, unai amo nega korikori ai ena ura ia hagugurua diba. Tanobada ai idia vara gau badadia momo ese idia hamomokania Baibel ena peroveta herevadia be idia guguru noho. Hegeregere, Basileia ena sivarai namona be tanobada hegegemadai do idia harorolaia ena peroveta herevana be ia guguru noho. Mani Soviet Union gavamani ia moru murinai idia vara gaudia ita laloa. Taunimanima haida idia laloa gavamani lalonai unai bamona senisi badana do ia vara lasi. To, unai ese dala ia kehoa Basileia ena sivarai namona be guna idia taravatua tanodia ai idia harorolaia totona. Unai dainai gau badana be iseda nega ita gaukaralaia namonamo, ‘nega ia biagua’ Diravana Iehova ena hesiai gaukara ita karaia noho totona.

IEHOVA BE IA MAKAIA NEGANA AI ENA URA DO IA HAGUGURUA

15. Iehova ena orea ese gau haida ia haidaua neganai, dahaka ita karaia be namo?

¹⁵ Dina gabediai haroro gaukara ita goadalaia noho totona, namona be ita abia dae momokani Iehova be ia makaia negana ai iena ura do ia hagugurua. Tanobada ai idia vara gaudia momo be idia idau idia lao dainai, nega haida iseda haroro daladia ita haidaua be namo. Unai dainai, Iehova ena orea be gau haida ia haidaua, unai amo momo ese ita harorolaia sivaraina do idia kamonai. Bema idia haidaua gaudia ita badinaia bona “kongrigeisen ena kwarana” Iesu henunai ita gaukara, ita hahedinaraia ita be ‘nega ia biagua’ Diravana ita abidadama henia.​—Efe. 5:23.

16. Dahaka dainai ita diba momokani Iehova be ita do ia durua?

¹⁶ Iehova ia ura nega ibounai ia ita guriguri henia bona ita abia dae ia amo “heduru be nega maorona ai do ita abia.” (Heb. 4:16) Unai ese ia hamomokania Iehova be ita ta ta ia lalokau henia. (Mat. 6:8; 10:29-31) Bema guriguri amo Iehova ena heduru ita noia bona ena hakaua dalana ita badinaia,  ita hahedinaraia ita be Iehova Dirava ita abidadama henia. Danu, namona be iseda tadikaka taihu totona ita guriguri.

17, 18. (a) Kahirakahira Iehova be ena inai taudia dekenai dahaka do ia karaia? (b) Dahaka lalohadai kererena ita dadaraia be namo?

¹⁷ Hari, iseda abidadama ia goada noho be namo, unai amo mai gari lasi ida Dirava ena ura ita karaia diba. (Roma 4:20) Satani bona ia idia badinaia taudia idia ura Iesu ese ita ia henia gaukarana idia koua. (Mat. 28:19, 20) Herevana Diabolo ia ura ita ia koua, to ita diba Iehova be “abidadama taudia edia Hahemauri Tauna momokanina,” bona ia ese “ia idia badinaia taudia be hahetoho amo ia hamauridia dalana ia diba.”​—1 Tim. 4:10; 2 Pet. 2:9.

¹⁸ Kahirakahira Iehova ese inai tanobada dikana do ia hadikaia ore. Ita diba lasi edena dala ai bona edena negai unai do ia karaia, to ita diba Keriso ese Dirava ena inai taudia be nega korikori ai do ia hadikaia ore. Unai negana ai, taunimanima do idia diba Iehova be mai ena maoro guba bona tanobada ia lohiaia totona. Gau badana be ita abia dae momokani ita be dokona negana ai ita noho. Unai dainai, namo lasi ita laloa “gau ta ia idau lasi, [idia be] Dirava ese gau ibounai ia havaraia negana hegeregerena.”​—1 Tes. 5:1; 2 Pet. 3:3, 4.

IEHOVA ITA NARIA

19, 20. Dahaka dainai mai haheauka ida Iehova ita naria be gau badana?

¹⁹ Iehova ese taunimanima ia havaraia neganai, ia ura do idia mauri hanaihanai, unai amo ia bona ia ese ia havaraia gau namodia ibounai do idia dibaia. Hadibaia Tauna 3:11 ia gwau: “Dirava ese gau ibounai mai hairaina danu ia karaia. Edia hairai ena nega danu, be Dirava ese ia gwauraia. Ia ese gabeai do ia vara maurina do ita davaria ena ura, be ita dekenai ia henia vadaeni, to iseda lalona ia ese ia koua bamona, vadaeni ita ese Dirava ena kara ena anina ita davaria diba lasi.”

²⁰ Ita moale badina Iehova ena ura taunimanima totona be ia idau lasi. (Mal. 3:6) Baibel ia gwau: “Dina ena laulauna be ia senisi diba, to Tamana be ia senisi diba lasi.” (Iam. 1:17) Iehova ese nega ia duahia dalana be taunimanima ese nega idia duahia dalana amo ia idau. Badina ia be “Noho Hanaihanai King.” (1 Tim. 1:17) Unai dainai mai haheauka ida Iehova ita naria be namo. (Mika 7:7) Baibel ia gwau: “Lohiabada ena nega namona umui naria noho taudia ibounai e, do umui goada, do umui boga auka.”​—Sal. 31:24.

[Footnotes]

[Study Questions]

[Picture on page 19]

Daniela ia diba Dirava ena peroveta herevadia be do idia guguru momokani

[Picture on page 21]

Emu nega oi gaukaralaia namonamo, a?