Olivier Randriamora ese ia sivarailaia

“Lau dekenai gau momo idia noho eiava gau momo idia noho lasi, to unai bamona mauri lau diba momokani. Lau dibaia gauna be, gau ibounai lalonai bona noho daladia ibounai lalonai egu lalona ia hegeregere, herevana lau bogakunu eiava lau hitolo, eiava lau dekenai gau momo idia noho eiava lau dabu. Lau dekenai siahu ia henia tauna amo goada lau abia gau ibounai lau karaia totona.”​—⁠Fili. 4:12, 13.

HANAIHANAI aposetolo Paulo ena hereva ese lau bona egu adavana Oly ia hagoadaia. Madagascar ai emai hesiai gaukara ai karaia neganai, ai “dibaia gauna” be inai: Gau ibounai lalonai Iehova dekenai ai tabekau be namo.

Lagani 1982 ai lau bona Oly ai maoheni, bona unai negai Oly ena sinana be Iehova ena Witnes taudia ida Baibel ia stadilaia. Gabeai, Baibel lau stadilaia matamaia, unai murinai Oly danu ia stadi. Lagani 1983 ai, ai headava, bona lagani 1985 ai bapatiso murinai heduru painia gaukara ai karaia, bena July 1986 ai, regula painia gaukara ai karaia.

September 1987 ai, spesel painia gaukara ai hamatamaia, bona ai idia siaia gabu ginigunana be Madagascar ena notwest kahana ena taoni maragina ta; unuseniai kongrigeisen be lasi. Madagascar dekenai hanua badadia be 18, to iduhu maragidia be momo, bona edia kastom be idauidau. Edia gado badana be Malagasy, to hanua ta ta dekenai hereva haida idia idau sisina. Emai teritori taudia edia gado ai dibaia, unai dainai ai idia abia dae haraga.

Matamanai, ai ruaosi sibona ese hebou ai karaia. Sunday ibounai pablik tok lau henia bona tok dokonai Oly be imana ia patapataia. Haroro Sikuli ai iena tok ia henia neganai, ia be ta ida ia herevahereva dalanai ia karaia. Unai dainai, sekit naria tauna ia vadivadi bona ai ia hamaoroa emai hebou do ai haidaua neganai ai moale!

Revareva idia ginidae haraga lasi dainai, hua ta ta ai emai moni ai abia haraga lasi. Aposetolo Paulo bamona, ena be emai moni bona aniani be bada lasi, to ai dekenai unai be hegeregere. Dina ta, sekit hebouhebou ai lao totona PMV davana be hegeregere lasi. Sekit hebouhebou gabuna ena daudau be kilomita 130 bamona. To, tadikaka ta ena hagoadaia herevana ai laloa lou. Ia gwau: “Namona be oiemu hekwakwanai ibounai be Iehova dekenai oi gwauraia. Badina oi be iena gaukara oi karaia noho.” Unai dainai, lau bona Oly ai guriguri bena emai lalona ai hadaia do ai raka. To, ai raka gwauraia neganai, tadikaka ta be ai ia vadivadi bona moni sisina ia henia. Unai moni be hegeregere PMV ena davana ai karaia totona!

 SEKIT GAUKARA

February 1991 ai, sekit gaukara lau karaia matamaia. Unai neganai, emai grup maragina dekenai pablisa taudia be nain bona toi be idia bapatiso vadaeni. Nega momo hebou idia mai taudia be 50 bamona. Sekit naria gaukara ena treinini lau abia murinai, Antananarivo siti badana dekenai ai idia siaia. Lagani 1993 ai, Madagascar ena ist kahana dekenai ai lao. Unai gabu ena mauri be siti ena mauri amo ia idau.

Kongrigeisen bona gabu daudau grup ai vadivadi totona, kilomita 145 bamona uda badadia lalonai ai raka, bona ororo ai daekau. Unai dainai kohu momo ai abia kau lasi. To, bema pablik tok ai laulau haida do lau hahedinaraia, kohu metaudia haida ai huaia danu. Oly be projector ia huaia bona lau be motuka ena bateri lau huaia.

Kongrigeisen ma ta ai vadivadi henia totona, nega momo dina ta lalonai kilomita 40 bamona ai raka. Ororo ai daekau, sinavai ai hanaia bona kopukopu dekenai ai raka. Nega haida dala badinai ai mahuta, to nega momo hanua ta ai tahua unuseni ai mahuta totona. Ai diba lasi taudia ai noidia bema edia ruma dekenai ai mahuta diba. Ai idia abia dae neganai, emai aniani ai hegaegaelaia totona, Oly be ruma taudia edia pani ia noia bona sinavai amo ranu ia abia, bona lau be ira lau noia emai lahi au lau siria totona. Aniani nadua totona nega bada ai haorea. Dina haida kokoroku ta ai hoia, ai alaia bona ai hagoevaia.

Ai aniani murinai ranu ma haida ai abia ai digu totona. Nega haida kisini dekenai ai mahuta. Medu negadiai, guhi amo medu ia vareai bona ai paripari lasi totona, haba dekenai ai tabekau bona ai mahuta.

Edia ruma dekenai ai noho taudia ai haroro henidia toho. Tadikaka taihu edia ruma dekenai ai ginidae neganai, edia hebogahisi bona heabidae karana ese ai ia hagoadaia bada. Emai vadivadi idia moalelaia bada dainai, emai laolao lalonai ai davaria hekwakwanai ai laloa lasi.

Tadikaka taihu ida ai noho neganai, mai moale ida edia ruma gaukara haida ai karaia. Unai amo idia be mai edia nega haroro gaukara lalonai ai idia bamoa totona. Ai ura lasi tadikaka taihu ese ai totona dava bada kohu o aniani idia hoia.

GABU DAUDAU GRUP AI VADIVADI

Gabu daudau grup vadivadi henia karana ai moalelaia. Unuseniai, tadikaka ese gaukara idauidau idia palanilaia, bona ai bisi bada dainai ai be nega lasi ai “laga-ani” totona. (Mar. 6:31) Gabu ta dekenai, tadikaka ta bona ena adavana ese edia Baibel stiuden taudia 40 idia boiria mai. Oly bona taihu ese Baibel stadi 20 idia karaia, bona lau bona tadikaka ese Baibel stadi ma 20 ai karaia. Stadi ta ai haorea neganai, stadi ma ta ai hamatamaia. Adorahi ai kongrigeisen hebou ai karaia, bena Baibel stadi oredia ai karaia. Nega momo unai bamona ai karaia ela bona 8 oklok hanuaboi!

Gabu daudauna ma ta ai vadivadi neganai, kahirakahira ia noho hanua ta ai lao totona, ai ibounai be 8 oklok dabai ai raka. Danu, ibounai  be dabua gunadia ai hahedokilaia. Uda badadia lalonai nega daudau ai raka ela bona 12 oklok bamona ai ginidae. Emai dabua ai haidaua, dabua namodia ai karaia bona ai haroro matamaia. Ruma be momo lasi to pablisa be momo dainai, miniti 30 lalonai teritori ai haorea, bena hanua ma ta ai lao. Unuseniai ai haroro murinai, ai raka ela bona emai noho gabuna dekenai ai ginidae. Ai lalohisihisi badina ena be hora momo ai raka, to hora tamona sibona ai haroro. To, unai gabu ena Witnes taudia idia maumau lasi, to idia moale sibona.

Taviranambo ai pablisa haida be ororo dorina ai idia noho. Unuseniai idia noho tadikaka ta bona ena famili edia ruma ena daiutu be tamona sibona, to ai be idia danu ai noho. Ruma maragina ma ta dekenai hebou idia karaia. Tadikaka be ma haida hadibaia totona ia boiboi, “Tadikaka, o!” Ororo ma ta amo ta ia haere. Tadikaka be ma ia boiboi lou, “Sekit naria tauna ia ginidae vadaeni!” Idia haere bona idia gwau iena hereva idia kamonai vadaeni. Bena idia ese ma haida idia hadibaia danu. Daudau lasi murinai hebou totona idia ginidae. Hebou ia matamaia neganai, ibounai 100 mai kahana idia haboua.

TRENSPOT ENA HEKWAKWANAI

Lagani 1996 ai, Antananarivo siti kahirakahira ena sekit ta dekenai ai idia siaia. Unuseniai hekwakwanai haida ai davaria. Gunika gabudia lao totona nega momo PMV idia heau lasi. Dina ta, palani ai karaia Beankàna (Besakay) grup ai vadivadi totona, to ena daudau be kilomita 240 bamona. Motuka maragina ta ai itaia bona draiva ida davana ai herevalaia murinai ai guia. To pasendia ibounai 30 idia guia vadaeni. Haida be motuka ena guhi dekenai idia hekure, bona haida be motuka ena murina auri idia dogoatao bona idia gini.

Daudau lasi murinai, motuka ia dika dainai ai raka. Hora haida ai raka murinai, motuka badana ta ia mai, ena be helai gabudia be lasi to ia stopu, bona ai guia sibona. Sinavai ta dekenai ai ginidae neganai, bridge be ia dika bona idia hanamoa noho dainai, ai hanaia diba lasi. Unai dainai, ma ai raka lou bona spesel painia taudia haida edia hanua maragina dekenai ai ginidae. Ena be unai ai palanilaia lasi, to idia ida wiki ta ai noho bona ai haroro.

Wiki ta murinai bridge idia hanamoa bona motuka ta ia mai neganai ai guia. Dala dekenai guri  badadia idia noho bona ranu amo idia honu. Unai dainai, nega momo ai stopu motuka ai doria totona, bona nega haida kopukopu lalonai ai moru. Daba maragi ai hanua maragina ta dekenai ai ginidae. Dala badana ai rakatania bona raisi umadia lalonai ai raka lao; ranu be ia daekau ela bona emai gabana dekenai bona kopukopu be bada.

Unai be nega ginigunana unai gabu ai vadivadi, unai dainai raisi umana ai idia gaukara taudia haida ai haroro henia, bona ai nanadaidia bema Witnes taudia edia noho gabuna idia diba. To, ai moale badina ai davaria idia be emai tadikaka!

HAIDA AI HAGOADAIA FUL-TAIM HESIAI GAUKARA TOTONA

Ma haida ai hagoadaia ful-taim hesiai gaukara idia karaia neganai ai moale. Hegeregere, ai vadivadi henia kongrigeisen ta lalonai regula painia be nain. Idia ai hagoadaia pablisa ta ta do idia durua painia taudia ai idia lao totona. Hua siks murinai, regula painia taudia be 22! Regula painia taihu rua ese edia tamadia idia hagoadaia regula painia gaukara idia karaia totona. Edia tamadia be elda taudia bona idia ese elda ma ta idia durua painia tauna ai ia lao totona. Gabeai unai elda be spesel painia tauna ai ia lao, bona daudau lasi murinai, ena adavana ida sekit gaukara idia karaia. Unai tama rua be dahaka idia karaia? Hari, idia ta be sekit naria tauna bona ma ta be Kingdom Hall haginia gaukarana ia durua noho.

Iehova ena heduru dainai dina ta ta ia ai tanikiu henia, badina ai diba sibona emai goada amo gau ta ai karaia diba lasi. Ena be nega haida ai hesiku o ai gorere, to emai haroro gaukara ese ia havaraia anina namona ai laloa neganai ai moale. Iehova ese ia totona ai karaia gaukarana ia hanamoa. Ai moale badina hari spesel painia gaukarana ai karaia noho. Emai hesiai gaukara amo ai “dibaia gauna” be, gau ibounai lalonai Iehova dekenai ai tabekau be namo, badina ia be “siahu ia henia tauna.”

[Blurb on page 6]

Ai “dibaia gauna“ be, gau ibounai lalonai Iehova dekenai ai tabekau be namo

[Map/​Pictures on page 4]

Madagascar ena ladana ta be Big Red Island. Tanobada ibounai lalonai, ia be motumotu badana namba foa. Unuseniai animal bona tubutubu gaudia idauidau idia noho

[Picture on page 5]

Haida ida Baibel stadilaia karana ai moalelaia

[Pictures on page 5]

Hanua ta ta ai lao be mai ena hekwarahi