“Daika Garina Do Lau Gari?”
“Bema tuari bada be lau dekenai ia kamokau neganai, lau ese Dirava do lau abidadama henia.”—SAL. 27:3.
EDENA DALA AI HENU SIRIDIA ESE OI IA DURUA OI GARI LASI TOTONA?
1. Salamo karoa 27 ese edena henanadai do ia haerelaidia?
HEREVANA tanobada ia dika ia lao, to dahaka dainai iseda haroro gaukara ita habadaia noho? Ena be moni ena hekwakwanai ita davaria, to dahaka dainai mai moale ida iseda nega bona goada ita gaukaralaia haroro gaukara ita karaia totona? Ena be momo be vaira negana idia garilaia, to dahaka ese ita ia durua ita gari lasi totona? King Davida ese ia torea Salamo karoa 27 ai unai henanadai edia haere do ita davaria.
2. Bema ta ia gari dahaka ia vara? To ita abia dae Iehova be dahaka ia karaia diba?
2 Unai siri ai Davida ia gwau: “Lohiabada be lauegu diari, ma ia ese lau ia hamauria noho. Daika dekenai do lau gari? Lohiabada ese mase gaudia ibounai dekena amo, lau ia gimaia noho. Daika garina do lau gari?” (Sal. 27:1) Bema ta ia gari ena tauanina ia manoka dainai, ia be goada lasi gau ta ia karaia totona. To, Iehova ia abidadama henia tauna be ia goada bona ia gari lasi. (1 Pet. 3:14) Bema Iehova be iseda roho mauri gabuna ai ita halaoa bona ia ita abidadama henia, ‘do ita noho namonamo, gari ta lasi.’ (Aon. 1:33; 3:25) Dahaka dainai unai bamona ita hereva?
“IEHOVA BE EGU DIARI BONA HAMAURIA TAUNA”
3. Edena dala ai Iehova be eda diari, bona dahaka ita karaia be namo?
3 Baibel ia gwau “Iehova be egu diari,” anina be Iehova be ita dekenai hereva momokani ia hadibaia. (Sal. 27:1, BHğ) Hegeregere, raka dalana ia koua gaudia be tosi ena diari amo ita itaia diba, to unai diari ese dala ia koua gauna ia kokia diba lasi. Namona be ita sibona ese eda dala ia koua gauna ita kokia. Unai hegeregerena, tanobada dekenai idia vara gaudia edia anina be Iehova ese ita ia hadibaia. Ia ese dika hanaia daladia be ita dekenai ia hadibaia. Danu, Baibel amo hakaua hereva namodia ia henia. Salamo torea tauna ia gwau, Dirava ena taravatu ese ia dekenai aonega ia henia, bona unai ‘aonega ese ia idia tuari henia taudia edia aonega ia hereaia’ bona ‘ena hadibaia taudia ibounai edia diba ia hereaia.’ Bema Baibel ena hakaua herevadia ita badinaia, ita danu be aonega taudia ai do ita lao.—Sal. 119:98, 99, 130.
4. (a) Dahaka dainai Davida ia gwau Iehova be iena hamauria tauna? (b) Edena negai Iehova ese ena hesiai taudia do ia hamauria?
4 Salamo 27:1 ese ia hahedinaraia Davida be Iehova ese guna ia hamauria negadia ia laloaboio lasi. Hegeregere, laiona bona bea dekena amo Iehova ese Davida ia hamauria. Danu, Iehova ese Davida ia durua Goliata ia hamasea totona. Gabeai, nega idaudia rua ai King Saulo ese io amo Davida ia gwadaia toho, to Iehova ese ia hamauria. (1 Sam. 17:37, 49, 50; 18:11, 12; 19:10) Unai dainai Davida ia gwau, Iehova be iena hamauria tauna. Oibe, Iehova ese Davida ia hamauria hegeregerena iena hesiai taudia do ia hamauria danu. Edena negai unai do ia karaia? “Hisihisi badana” ai unai do ia karaia.—Apok. 7:14; 2 Pet. 2:9.
IEHOVA ESE OI IA DURUA NEGADIA LALOATAO
5, 6. (a) Iehova ese ita ia durua negana ta laloa lou karana ese edena dala ai ita ia durua? (b) Dahaka dainai Iehova ese guna ena taunimanima ia hamauria karadia ita laloatao be namo?
5 Salamo 27:2, 3 duahia. Unai siri ese ia hahedinaraia ita gari lasi totona, mai anina bada gauna ta ita karaia be namo. Davida be Iehova ese ia hamauria negadia ia laloatao. (1 Sam. 17:34-37) Unai ese Davida dekenai lalogoada ia henia nega aukadia lalonai ia haheauka totona. Iehova ese guna oi ia durua negana ta oi laloatao, a? Unai ese oi dekenai lalogoada ia henia, a? Hegeregere, hekwakwanai ta dainai oi lalohisihisi neganai, Iehova dekenai unai oi gurigurilaia, a? Oi guriguri murinai, oi mamia Iehova be oi dekenai aonega bona goada ia henia, unai oi haheaukalaia totona, a? Guna hekwakwanai haida dainai emu hesiai gaukara oi moalelaia lasi, to Iehova oi guriguri henia bona oi ia durua dalana oi laloatao, a? Eiava oi dekenai hesiai gaukara ma haida ia henia negana oi laloatao, a? (1 Kor. 16:9) Hari, unai ibounai oi laloa lou neganai emu hemami be edena bamona? Unai gaudia laloatao karana ese emu lalona do ia hagoadaia, unai amo do oi diba Iehova be oi ia durua diba emu hekwakwanai badadia oi hamaoromaoroa o haheaukalaia totona.—Roma 5:3-5.
6 Bema gavamani badana ta ia ura Iehova ena Witnes taudia edia orea ia hadikaia ore, dahaka do ita karaia? Vanegai laganidia ai, gavamani haida idia ura unai bamona idia karaia, to idia kwalimu lasi. Iehova ese guna ena taunimanima ia hamauria karadia ita laloatao neganai, goada do ita abia nega vairai idia vara hekwakwanai ita haheaukalaia totona.—Dan. 3:28.
TOMADIHO MOMOKANI BADINAIA
7, 8. (a) Salamo 27:4 ai Davida be Iehova amo dahaka ia noia? (b) Iehova ese ia hegaegaelaia tomadiho dala matamatana be dahaka? Edena dala ai unai dala matamatana ai Iehova ita tomadiho henia?
7 Ita gari lasi totona, ita ia durua gauna ma ta be, tomadiho momokani badinaia karana. (Salamo 27:4 duahia.) Davida ena negai, “Lohiabada ena Dubu” be palai dubuna. To Davida ese dala ia hegaegaelaia, iena natuna Solomona ese Iehova totona dubu helaga hairaina ta do ia haginia. Lagani handred haida murinai, Iesu ia gwau nega ta do ia mai taunimanima be Iehova tomadiho henia totona dubu helaga dekenai do idia lao lasi. (Ioa. 4:21-23) Iehova be dala ta ia hegaegaelaia ia ese ia ura henia dalanai ia ita tomadiho henia totona. Bema Iesu ena mauri davalaia boubouna ita abidadama henia, eda tomadiho dalana do ia abia dae. Heberu karoa 8 ia lao 10 ai, aposetolo Paulo be unai dala ia herevalaia neganai, ia gwau, Dirava tomadiho henia totona Iehova be dubu helaga ta ia hegaegaelaia, to unai be “imana amo idia karaia lasi” gauna. Paulo ia gwau, Iesu ia bapatiso bona sibona ia henia Iehova ena ura do ia karaia neganai, unai dubu helaga ia gini matamaia. Unai be lagani 29 C.E. ai ia vara. (Heb. 10:10) Vadaeni, edena dala ai unai dubu dekenai ita tomadiho? Daladia be inai: (1) “Mai iseda kudou maorona ida, bona abidadama momokani ida” Iehova ita guriguri henia, (2) mai gari lasi ida ita haroro, (3) hebou ita lao, bona (4) ruma bese ena tomadiho ita karaia. (Heb. 10:22-25) Ena be nega aukadia lalonai ita noho, to bema tomadiho momokani ita laloa bada, unai gaudia do ita karaia.
8 Tanobada hegegemadai, Iehova ena hesiai taudia be nega bada idia gaukaralaia idia haroro, gado ma ta idia dibaia, bona pablisa momo lasi gabudia idia lao Basileia idia harorolaia totona. Idia be salamo torea tauna bamona, ia be Iehova amo gau tamona sibona ia noia. Ia ura ‘Lohiabada ena Dubu lalonai do ia noho, bona Lohiabada ena namo do ia laloa.’ Hari, Iehova ena hesiai taudia idia ura iena hahenamo idia abia, bona herevana dahaka ia vara, idia ura ia do idia tomadiho henia noho.—Salamo 27:6 duahia.
DIRAVA DEKENAI TABEKAU
9, 10. Salamo 27:10 ai dahaka hagoadaia herevana ia noho?
9 Davida ena hereva ese ia hahedinaraia ia be Iehova dekenai ia tabekau. Ia gwau: “Egu tamana bona sinana, ese lau idia rakatania, to Lohiabada ese lau do ia abia dae.” (Sal. 27:10) 1 Samuela karoa 22 ai ita duahia sivarai amo ita diba, Davida be ena tama sina ese idia rakatania lasi. To hari, momo be edia famili ese idia dadaraia. Unai bamona taudia be Keristani kongrigeisen amo heduru idia abia dainai idia gari lasi.
10 Ena be haida ese Iehova ena hesiai taudia idia dadaraia, to ia ese idia do ia rakatania lasi. Unai dainai ita diba momokani hekwakwanai badadia idia davaria neganai, ia ese do ia durudia. Hegeregere, bema eda famili naria totona ita lalohekwarahi, namona be ita laloatao Iehova be ita do ia durua. (Heb. 13:5, 6) Iehova be eda noho dalana ia lalopararalaia bona eda dabu gaudia ia diba.
11. Eda kara amo ita hahedinaraia Iehova ita abidadama henia dainai, momo be dahaka idia gwau? Haheitalai ta gwauraia.
11 Liberia ai Baibel stiuden ta, ladana Victoria mani ita laloa. Ia ida ia noho tauna ese ia bona ena natudia toi ia rakatania. Ena be ia be ruma lasi bona ia gaukara lasi, to ena Baibel stadi ia karaia ela bona ia bapatiso. Dina ta, ena natuna kekeni, mauri lagani 13, ese moni amo ia honu paosi ta ia davaria. Victoria bona ena natuna be unai moni idia duahia lasi, badina idia ura lasi henaohenao lalohadaina idia abia. To, karaharaga unai paosi ena biaguna idia tahua, bona idia davaria ia be ami tauna ta. Bena Victoria bona ena natuna ia hamaoroa, bema taunimanima ibounai be Iehova ena Witnes taudia bamona idia henaohenao lasi, tanobada be maino bona gabu namona ai do ia lao. Victoria ese Baibel amo Iehova ena gwauhamata ia hahedinaraia. Ami tauna be Victoria ena abidadama bona kara momokani dainai ia hoa, bona Victoria dekenai moni ena kahana badana ia henia. Tanobada hegegemadai momo idia diba Iehova ena Witnes taudia be kara momokani taudia. Bona idia henaohenao lasi badina idia abia dae Iehova ese idia do ia naria.
12. Dahaka dainai Iehova ita hesiai henia noho, ena be eda moni gaukara ita haboioa? Haheitalai ta gwauraia.
12 Sierra Leone ai bapatiso lasi pablisa ta ladana, Thomas mani ita laloa. Ia be haisikuli tisa ta, to kahirakahira lagani ta bamona ena pei idia henia lasi. Thomas be ena pei ia abia totona, ia ura sikuli ena administreita ia hereva henia. Administreita be pris tauna bona Thomas ia hamaoroa, sikuli dekenai Iehova ena Witnes taudia edia hahediba herevadia idia abia dae lasi. Bona ia gwau bema Thomas ia ura lasi ena gaukara amo ia doko, Iehova ena Witnes taudia edia tomadiho ia rakatania be namo. Ena be Thomas be ena pei ia abia lasi, to ena gaukara amo ia doko. Unai murinai, Thomas be reidio bona mobael fon hanamoa gaukarana ta ia davaria. Oibe, tadikaka taihu edia sivarai momo ese idia hamomokania, bema Iehova dekenai ita tabekau ia ese eda dabu gaudia do ia henia. Iehova be gau ibounai ia havaraia bona hanaihanai ena taunimanima ia naria dainai, ita diba ia ese ita do ia naria.
13. Dahaka dainai ogogami tanodia ai tadikaka taihu be haroro gaukara dekenai idia bisi bada?
13 Ogogami tanodia momo ai tadikaka taihu be haroro gaukara dekenai idia bisi bada. Dahaka dainai? Brens ofesi ta ena ripoti ia gwau: “Baibel stadi idia abia dae taudia momo be moni gaukara idia karaia lasi, unai dainai idia be mai edia nega Baibel idia stadilaia totona. Danu, tadikaka taihu be mai edia nega haroro gaukara idia karaia totona. Ogogami tanodia ai idia noho taudia be iseda nega lalonai idia vara gaudia idia itaia dainai, idia abia dae ita be dina gabediai ita noho.” Tano ma ta ai pablisa momo be Baibel stadi toi toi idia karaia. Misinari tadikaka ta be unai tano dekenai lagani 12 mai kahana ia noho bona ia gwau, lalona veria gaudia be momo lasi dainai tadikaka taihu momo be mai edia nega haroro bona Baibel stadi idia karaia totona.
14. Edena dala ai Iehova ese hutuma bada taudia ia gimaia diba?
14 Iehova ia gwauhamata ena orea taudia do ia durua, gimaia bona hamauria, bona ita diba unai gwauhamata do ia hagugurua. (Sal. 37:28; 91:1-3) “Hisihisi badana” amo hutuma bada do idia roho mauri. (Apok. 7:9, 14) Unai ese ia hahedinaraia inai nega dokonai Dirava ese ena taunimanima be edia inai taudia amo do ia gimaia. Iehova ese idia do ia gimaia dalana ma ta be, goada do ia henidia hahetoho idia haheaukalaia, bona edia hetura karana ia ida ia goada noho totona. Danu, Aramagedono ai Iehova ese ena hesiai taudia do ia gimaia bona hamauridia.
“LOHIABADA E, OIEMU KARA BE LAU DEKENAI DO OI HADIBAIA”
15, 16. Iehova ese ita ia hadibaia gaudia ita badinaia neganai, dahaka namo ita abia? Haheitalai ta gwauraia.
15 Bema ita ura ita gini goada, Dirava ese ita ia hadibaia noho be gau badana. Davida ia gwau: “Lohiabada e, oiemu kara be lau dekenai do oi hadibaia. Dala maoromaoro dekenai lau do oi hakaua, badina lau idia dagedage henia taudia be momo.” (Sal. 27:11) Dirava ese ita ia hadibaia ena anina be Baibel bona Iehova ena orea amo idia mai hakaua herevadia ita kamonai namonamo. Danu, namona be ita dibaia gaudia ita badinaia. Hegeregere, momo be Baibel ena hakaua herevana idia badinaia bona kohu momo lasi maurina idia noholaia. Edia abitorehai davana idia karaia bona edia kohu momo idia hoihoilaia. Unai dainai, moni ena hekwakwanai ia bada neganai, idia be moni dainai idia lalohekwarahi lasi. Hari, idia be anina bada lasi gaudia edia davana karaia totona idia hekwarahi bada lasi, unai dainai edia haroro gaukara idia habadaia diba. Namona be ita ta ta sibona ita nanadaia, ‘Baibel bona igui hesiai tauna mai ena kamonai ese idia halasia buka o magasin ai lau duahia gaudia lau badinaia haraga, ena be nega haida lau dekenai unai be auka, a?’—Mat. 24:45.
16 Bema Iehova ese ita ia hadibaia bona iseda mauri be iena ura hegeregerena ita gaukaralaia, gau ta dekenai do ita gari lasi. United States ai, painia ta be ena gaukara gabunai ia ura dagi ta ia abia unai amo ia bona ena ruma bese do ia durua idia painia noho totona. To, bosi ia gwau ia be koledi ia lao lasi dainai, ia hegeregere lasi unai dagi ia abia totona. Bema unai ia vara oi dekenai, do oi lalohisihisi badina matamanai oi be ful-taim hesiai gaukara oi abia hidi, to koledi o iunivesiti oi abia hidi lasi, a? Wiki rua murinai, unai bosi be ena gaukara amo idia hadokoa bona bosi ma ta ese tadikaka ia nanadaia ia ura dahaka do ia karaia. Tadikaka ia gwau, ia bona ena adavana be Iehova ena Witnes taudia edia ful-taim hesiai taudia, bona idia ura unai gaukara do idia karaia noho. To tadikaka be hereva ta ia do gwauraia lasi neganai, bosi ia gwau: “Lau itaia oi be gaukara taudia ma haida amo oi idau. Egu tamana be ia gorere dikadika bona kahirakahira ia mase neganai, Witnes taudia rua be dina ibounai idia mai bona ia dekenai Baibel idia duahia. Gwauhamata lau karaia bema dala ia kehoa Iehova ena Witnes tauna ta lau durua totona, unai do lau karaia.” Murina dinana ai, tadikaka be guna ia ura do ia abia dagina idia henia. Oibe, bema eda mauri lalonai Basileia ita atoa guna, Iehova be ena gwauhamata hegeregerena ita ura henia gaudia ibounai do ia henia.—Mat. 6:33.
ABIDADAMA BONA HELARO
17. Dahaka ese ita do ia durua nega vaira totona ita gari lasi?
17 Davida ese ita ia durua bona ita laloparara abidadama bona helaro be mai anina bada. Ia gwau: “Lau diba momokani, lau ese inai mauri lalonai, Lohiabada ena kara namo do lau itaia.” (Sal. 27:13) Bema Dirava ese ita dekenai helaro ia henia lasi bona Salamo karoa 27 ese ia herevalaia gaudia ita diba lasi, hari iseda mauri be edena bamona? Unai dainai inai dina gabedia ai, namona be hanaihanai ita guriguri Iehova ese ita dekenai goada do ia henia bona ita do ia gimaia ela bona Aramagedono ai ita ia hamauria.—Salamo 27:14 duahia.
[Study Questions]
[Picture on page 23]
Davida be Iehova ese ia hamauria negadia ia laloa lou neganai, goada ia abia ia haheauka totona
[Picture on page 25]
Ena be moni ena hekwakwanai ita davaria, to dahaka dainai eda haroro gaukara ita habadaia noho?
