Guna Emilia be painia taihu ta, to lagani 15 gunanai painia gaukara ia rakatania. Guna ia painia neganai ia mamia moalena ia laloa lou dainai, ia ura unai gaukara ia karaia lou.

Emilia be ena moni gaukara dekenai nega bada ia haorea dainai, ia moale lasi. Dina ta, gaukara taudia haida vairanai ia gwau: “Hora haida sibona lau gaukara be namo!” Ena bosi be unai ia kamonai neganai, Emilia ia nanadaia bema ia ura unai ia karaia. Emilia ia gwau: “Oibe, egu ura be unai.” To, kampani ena taravatu be gaukara taudia be dina ibounai do idia gaukara. Unai dainai, Emilia ia ura kampani ena dairekta ida ia hebou, bona gwaumaoro ia abia ena gaukara horadia idia hamaragia totona. Unai hebou totona ia hegaegae neganai, Emilia ese Iehova ia noia lalomaino bona goada do ia henia.

Dairekta ida ia hebou neganai, Emilia be mai hemataurai ida ia noia ena gaukara horadia ia hamaragia totona. Dairekta ia hamaoroa ia gaukara lasi neganai, ia be ena nega ia gaukaralaia ma haida ia durua totona. Danu, ia hamaoroa ia be Iehova ena Witnes hahine ta, bona taunimanima ia durua Baibel idia dibaia totona. Ma ia gwau, hari momo be maoro bona kerere edia toana idia diba lasi, to Baibel ena aonega herevadia ese ia durudia diba abia hidi maorodia idia karaia totona. Emilia ese dairekta ia hamaoroa ena gaukara do ia karaia namonamo noho, to ia ura hora haida sibona do ia gaukara. Unai amo ia be mai ena nega ma haida ia durua totona.

Dairekta be Emilia ena hereva ia kamonai bona ia gwau, ia danu be guna ia ura taunimanima durua gaukarana ia karaia. Emilia ena hereva ia lalopararalaia dainai, gwaumaoro ia henia hora haida sibona do ia gaukara. To, Emilia ia nanadaia: “Oi laloparara ai ese emu pei do ai hamaragia, ani?” Emilia ia gwau unai ia diba, to ia be kohu momo lasi maurina do ia noholaia. Ma ia gwau, taunimanima ia durua neganai ia moale. Dairekta ia gwau Emilia dekenai ia moale, badina ena nega ia henia taunimanima ia durua totona.

Guna unai kampani be ta dekenai gwaumaoro ia henia lasi, hora haida sibona ia gaukara totona. To, hari Emilia be wiki ta ai dina foa sibona ia gaukara, bona ia hoa badina kampani ese ena pei idia habadaia. Ia gwau: “Egu ura gauna lau hagugurua vadaeni, bona regula painia gaukara lau karaia lou diba!”

Palani oi karaia vadaeni emu mauri ai gau haida oi haidaua oi painia totona, a? Eiava bema guna oi painia, hari oi painia lou diba, a?

[Blurb on page 32]

Dairekta ia gwau Emilia dekenai ia moale, badina ena nega ia henia taunimanima ia durua totona