‘Lau ese umui lau noia lauma helaga ese ia henia lalotamona karana umui badinaia totona.’​—⁠EFE. 4:1, 3.

EDENA BAMONA DO OI HAERE?

Dahaka dainai Dirava be gaukara haheaua dalana ia hegaegaelaia?

Edena dala ai ‘lauma helaga ese ia henia lalotamona karana ita badinaia’ diba?

Dahaka ese ita do ia durua ta ta dekenai “kara namo” ita hahedinaraia totona?

1, 2. Iehova ena ura tanobada bona taunimanima totona be dahaka?

 RUMA BESE. Unai hereva oi kamonai neganai, dahaka oi laloa? Moale bona lalokau karadia oi laloa, a? Ruma bese ida gau ta umui hagugurua totona, umui gaukara hebou karana oi laloa, a? Eiava oi laloa ia be gabu namona ta bamona, unuseniai oi tubu daekau, gau momo oi dibaia, bona emu lalohadai oi gwauraia diba, a? Bema famili namona lalonai oi tubu daekau, reana unai gaudia oi laloa. Iehova ese ruma bese ia havaraia. (Efe. 3:14, 15) Ia ura guba bona tanobada taudia ibounai be ruma bese ta bamona do idia hemataurai heheni, abidadama heheni, bona lalotamona.

² Adamu bona Heva idia kara dika murinai, tanobada taudia be Dirava ena ruma bese lalonai idia noho lasi. To Dirava ena ura ia idau lasi. Ia ura Adamu bona Heva edia natudia ese paradaiso do idia hahonua. (Gen. 1:28; Isa. 45:18) Dirava be gau idauidau ia hegaegaelaia iena ura ia hagugurua totona. Efeso bukana ese lalotamona karana bona Iehova ese ia hegaegaelaia gaudia ia herevalaia. Hari, unai Baibel bukana ena siri haida do ita herevalaia, bona do ita itaia edena dala ai Iehova ita durua diba guba bona tanobada taudia be bese tamona ai ia halaoa totona.

GAUKARA HAHEAUA DALANA

3. Efeso 1:10 ese ia gwauraia Dirava ena gaukara haheaua dalana be dahaka? Ena kahana ginigunana hegaegaelaia karana be edena negai ia matamaia?

³ Mose ese Israela taudia ia hamaoroa: “Iehova be eda Dirava, Iehova mo sibona.” (Deu. 6:4, BHğ) Iehova ese gau ibounai be iena ura hegeregerena ia karaia. Iena abia hidi negana ai, guba taudia bona tanobada taudia ia hegaegaelaia bese tamona ai idia lao totona. Unai hegaegae karana ia gwauraia, “gaukara haheaua dalana.” (Efeso 1:8-10 duahia.) Dirava ena gaukara haheaua dalana ena kahana be rua.  Ginigunana be inai: Dirava ese horoa taudia ia hegaegaelaia guba ai idia noho totona​—⁠unuseniai idia be Iesu Keriso henunai do idia gaukara. Pentekoste 33 C.E. ai unai ia matamaia. Unai negai, Iehova ese Keriso ida guba ai do idia lohia taudia ia horoa bona haboua matamaia. (Kara 2:1-4) Keriso ena mauri davalaia boubouna dainai, Dirava ese horoa taudia ia gwauraia kara maoromaoro taudia, bona mauri idia abia diba. Horoa taudia idia diba idia be “Dirava ena natudia” ai idia lao.​—⁠Roma 3:23, 24; 5:1; 8:15-17.

4, 5. Dirava ese ia hegaegaelaia gaukara haheaua dalana ena kahana iharuana be dahaka?

⁴ Dirava ena gaukara haheaua dalana ena kahana iharuana be inai: Dirava ese tanobada Paradaisona ai do idia noho taudia ia hegaegaelaia. Idia ese Mesia Basileiana, Keriso bona horoa taudia edia lohia dalana idia abia dae. Aramagedono amo do idia roho mauri “hutuma bada” taudia, be Paradaiso ai do idia noho taudia ginigunadia. (Apok. 7:9, 13-17; 21:1-5) Bena, Keriso ena Lagani 1,000 Lohia Negana lalonai, mase taudia bilioni momo do idia toreisi lou, bona tanobada ai hutuma bada taudia ida do idia noho. (Apok. 20:12, 13) Mani oi laloa, herevana taunimanima idauidau do idia toreisi lou, to lalotamona ai do ita noho! Hutuma bada bona toreisi lou taudia be Efeso 1:10 ese ia gwauraia “tanobada gaudia” idia laulaulaia. Idia be lagani 1,000 ena dokonai hahetoho do idia abia. Dirava idia badinaia taudia ibounai be “Dirava ena natudia” ai do idia lao, bona tanobada ai do idia noho.​—⁠Roma 8:21; Apok. 20:7, 8.

⁵ Hari, Iehova be horoa taudia ia hegaegaelaia guba ai idia noho totona, bona mamoe ma haida ia hegaegaelaia tanobada Paradaisona ai idia noho totona. To, ita ta ta be edena dala ai Dirava ena gaukara haheaua dalana ita durua diba?

“LAUMA HELAGA ESE IA HENIA LALOTAMONA KARANA UMUI BADINAIA”

6. Edena siri ese idia hahedinaraia Keristani taudia idia hebou be namo?

⁶ Baibel ia gwau Keristani taudia idia hebou be namo. (1 Kor. 14:23; Heb. 10:24, 25) Nega momo taunimanima be lalotamona davaria totona gabu tamona ai idia haboua, hegeregere maketi o steidiam. To, ita lalotamona totona unai sibona ita karaia be hegeregere lasi. Namona be Iehova amo ita dibaia gaudia ita badinaia, bona taunimanima namodia ai ita lao totona lauma helaga ena heduru ita noia.

7. Edena dala ai Efeso 4:3 ena sisiba ita badinaia diba?

⁷ Herevana ita be horoa taudia eiava mamoe ma haida, to Keriso ena mauri davalaia boubouna ita abidadama henia dainai, Iehova ese ita ia gwauraia kara maoromaoro taudia. To, inai nega dokona lalonai iseda huanai hekwakwanai haida do idia vara. (Roma 5:9; Iam. 2:23) Unai dainai, Baibel ia gwau ita haheauka be gau badana. Eda tadikaka taihu ida lalotamona ai ita noho totona, dahaka ita karaia be namo? Namona be “manau” bona “lalomanada” karana ita dibaia bona hahedinaraia. Paulo be ita ia hagoadaia: “Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.” (Efeso 4:1-3 duahia.) Unai sisiba ita badinaia dalana ta be, Dirava ena lauma helaga ena hakaua dalana ita badinaia, bona ena kara namodia ita hahedinaraia. Danu, tauanina ena kara dikadia, o Dirava ese ia inai henia karadia ita dadaraia. Lauma helaga ena huahua ese ita idia durua hepapahuahu ita hamaoromaoroa totona. Oibe, lauma helaga ese ita ia hatamonaia, to tauanina ena kara dikadia ese ita idia hapararaia.

8. Edena dala ai tauanina ena kara dikadia ese taunimanima ia hapararaia?

⁸ Edena dala ai “tauanina ena kara dikadia” ese taunimanima ia hapararaia? (Galatia 5:19-21 duahia.) Matabodaga karadia ia karaia tauna be Iehova bona kongrigeisen amo ia parara. Heudahanai karadia ia karaia tauna o hahinena be ena adavana o natudia amo ia parara, bona ena ruma bese lalonai lalohisihisi ia havaraia. Miro karadia ia karaia tauna be ia idia lalokau henia taudia bona Dirava amo ia parara. Gwau-edeede hemarai karadia ia karaia tauna be Iehova ena  taravatu ia matauraia lasi bona ia utua. Tauanina ena kara dikadia ma haida idia karaia taudia danu be Dirava bona ma haida amo idia parara. Oibe, Iehova ese tauanina ena kara dikadia ibounai ia inai henia.

9. Ita bona ma haida huanai maino bona lalotamona ia noho totona, sibona dekenai edena henanadai ita henia?

⁹ Unai dainai sibona ita nanadaia: ‘Lau bona egu tadikaka taihu huanai maino bona lalotamona ia noho totona lau hekwarahi, a? Bema ta ida lau hepapahuahu dahaka lau karaia? Egu turadia ma haida dekenai unai lau sivarailaia egu hereva idia abia dae totona, a? Lau ura elda taudia ese lau totona unai hekwakwanai do idia hamaoromaoroa, unai amo lau sibona be unai tadikaka do lau hereva henia lasi maino ai karaia totona, a? Bona bema lau diba ta be lau dekenai ia badu, ia lau hereva henia lasi badina lau ura lasi unai ai hamaoromaoroa, a?’ Iehova ena ura be, Keriso henunai taunimanima be bese tamona bamona lalotamona ai do idia noho. To bema ataiai ita herevalaia karadia ita karaia, ita hahedinaraia ita be Iehova ena ura ita badinaia lasi.

10, 11. (a) Dahaka dainai eda tadikaka ida maino ita karaia be mai anina bada? (b) Eda huanai maino ia noho bona Iehova ese ita ia hanamoa totona, dahaka ita karaia be namo?

¹⁰ Iesu ia gwau: “Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia lalohisihisi, namona be emu harihari gauna be pata helagana vairanai oi rakatania bona oi lao. Emu tadikaka ida maino oi karaia guna, bena oi giroa lou neganai, emu harihari gauna oi bouboulaia. . . . Emui hekwakwanai umui hamaoromaoroa haraga.” (Mat. 5:23-25) Danu, Iamesi ia gwau: “Maino idia karaia taudia be maino negana lalonai, kara maoromaoro huahua ena uhe idia hadoa.” (Iam. 3:17, 18) Anina be bema ma haida ida maino ita karaia, kara maoromaoro ita badinaia diba.

¹¹ Hegeregere, tuari tanodia haida ai, tano henunai bomu idia noho dainai, gabu momo dekenai biru taudia be uma idia karaia diba lasi. Bomu ta ia pou neganai biru taudia be uma idia karaia diba lasi, moni gaukara davaria be auka, bona siti taudia be uma aniani idia abia diba lasi. Unai hegeregerena, bema haida ida maino ai ita noho lasi, do ia auka eda Keristani kara ita hanamoa totona. Anina be ita be tano henunai ia noho bomu bamona. Bema ita diba eda kara haida ita haidaua be namo, vadaeni unai ita karaia be gau badana. Bema haida edia dika ita gwauatao haraga, bona idia dekenai kara namodia ita karaia, eda huanai maino do ia noho bona Iehova ese ita do ia hanamoa.

12. Edena dala ai elda taudia ese ita idia durua lalotamona ai ita noho totona?

¹² Elda taudia be “harihari gaudia bamona,” bona idia ese ita idia durua “iseda abidadama do ia tamona” totona. (Efe. 4:8, 13) Anina be elda taudia edia heduru dainai kongrigeisen lalonai lalotamona ia noho. Hesiai gaukara idauidau  ai ita idia bamoa bona Baibel amo ita idia hagoadaia neganai, unai ese ita ia durua eda kara ita hanamoa totona. (Efe. 4:22-24) Laloatao, elda taudia be oi idia sisiba henia neganai, idia be Iehova ese ia gaukaralaia oi idia hahegaegaea tanobada matamatana ai oi noho totona. Bona elda taudia e, haida umui sisiba henia neganai, namona be umui hahedinaraia idia umui laloa bada.​—⁠Gal. 6:1.

“KARA NAMO HEHENI”

13. Dahaka do ia vara bema Efeso 4:25-32 ena sisiba ita badinaia lasi?

¹³ Efeso 4:25-29 be do ita dadaraia karadia ia herevalaia. Namona be ita koikoi lasi, badu haraga lasi, lahedo lasi, bona hereva mirodia ita gwauraia lasi, to hereva namodia o hagoadaia herevadia ita gwauraia. Unai sisiba ia badinaia lasi tauna be Dirava ena ‘lauma helaga ia hahisia,’ badina lauma helaga be taunimanima ia hatamonaia. (Efe. 4:30) Maino bona lalotamona ia noho totona, Paulo ena hereva ita badinaia be namo. Ia gwau: “Namona be inai heheni karana, badu, badu dikadika, boiboi badabada, hadikaia herevadia, bona dika gaudia ibounai danu, umui dadaraia. To do umui kara namo heheni bona hebogahisi heheni, bona mai kudouna ibounai ida do umui gwauatao heheni, Dirava ese mai kudouna ibounai ida, Keriso amo umui ia gwauatao hegeregerena.”​—⁠Efe. 4:31, 32.

14. (a) Dahaka dainai Paulo ese inai sisiba, do ita “kara namo heheni” ia gwauraia? (b) Dahaka ese ita do ia durua kara namo ita hahedinaraia totona?

¹⁴ Paulo ese inai sisiba, do ita “kara namo heheni” ia gwauraia badina reana nega haida unai kara ita hahedinaraia lasi, bona ita hekwarahi unai kara ita habadaia totona. Ma haida edia hemami laloa bada karana ita manadalaia be namo. (Fili. 2:4) Reana nega haida ita ura gwauraia herevana ese ma haida do ia hakiria. To bema ita diba unai ese ta ena lalona ia hahisia diba, vadaeni ita gwauraia lasi be namo. Bema do ita gwauraia herevana ita laloa namonamo guna, ma haida dekenai “kara namo” ita hahedinaraia unai.

RUMA BESE AI LALOKAU BONA HEMATAURAI KARANA DIBAIA

15. Edena dala ai Efeso 5:28 ese headava tatau ia durua Keriso idia tohotohoa totona?

¹⁵ Baibel ese tau be ena adavana do ia kara henia dalana, be Keriso ese kongrigeisen ia kara henia dalana ida ia hahegeregerea. Keriso ena haheitalai ese tau ia durua ia laloparara ia ese ena adavana ia gunalaia, lalokau henia bona naria be namo. Danu, Keriso ena haheitalai ese hahine ia durua ia laloparara ena adavana henunai ia noho be namo. (Efe. 5:22-33) Paulo ia gwau: “Unai dala ai tatau ese edia hahine do idia lalokau henidia be namo, sibodia edia tauanina idia lalokau henia hegeregerena.” Unai hereva “dala” anina be dahaka? (Efe. 5:28) Paulo ese Keriso bona kongrigeisen ia herevalaia dalana ese ita ia durua unai henanadai ita haerelaia totona. Ia gwau, Keriso ese kongrigeisen ia lalokau henia dainai ena mauri ia henia, bona ia ese kongrigeisen be “Dirava ena hereva ena ranu amo ia hagoevaia.” Unai dainai, tau ena maduna be ena ruma bese taudia ta ta do ia durua, Iehova idia tura henia namonamo totona. Unai bamona ia karaia neganai, ia be Iehova ena ura ia durua​—⁠Iena ia ura be taunimanima ibounai be bese tamona ai idia lao, bona Keriso ese idia do ia lohiaia.

16. Bema tama sina ese edia maduna idia huaia namonamo, dahaka do ia vara?

¹⁶ Namona be tama sina idia laloatao, Iehova ese idia dekenai natudia naria ena maduna ia henia. To madi, hari ruma bese momo lalonai “lalokau be lasi.” (2 Tim. 3:1, 3) Tama momo be edia maduna idia laloa bada lasi dainai, natudia idia lalohisihisi bona edia mauri ia dika. To, Paulo ese Keristani tama ia hamaorodia: “Emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.” (Efe. 6:4) Natudia ese ruma bese lalonai lalokau bona siahu taudia matauraia karana idia dibaia guna. Tama sina ese edia natudia dekenai unai gaudia idia hadibaia neganai, idia be Iehova ena ura idia durua​—⁠Iena  ura be taunimanima ibounai be bese tamona ai do idia lao. Unai dainai, namona be tama sina ese edia badu idia biagua, natudia idia lolo henidia lasi o hereva dika henidia lasi. Unai amo natudia do idia mamia edia tama sina ese idia lalokau henidia. Danu, natudia dekenai lalokau bona ma haida matauraia karana idia hadibaia. Unai ese natudia ia hegaegaelaia Dirava ena tanobada matamatana ai idia noho totona.

17. Diabolo ita tuari henia totona dahaka ita karaia be namo?

¹⁷ Laloatao, Diabolo ia ura ita bona ma haida ia koua Dirava ita hesiai henia lasi totona. Tanobada ai momo be Diabolo ena ura karadia idia karaia noho, hegeregere haida edia headava ia parara, o idia headava lasi to idia noho hebou kava sibona, o tau be ma tau ta ia adavaia, o hahine be ma hahine ta ia adavaia. Ita be tanobada taudia edia kara ita tohotohoa lasi, to Keriso ita tohotohoa. (Efe. 4:17-21) Diabolo bona ena demoni ita tuari henia totona, ‘Dirava ese ia henia tuari dabua ibounai do ita hahedokilaia’ be gau badana.​—⁠Efeso 6:10-13 duahia.

“LALOKAU AI DO UMUI RAKA NOHO”

18. Lalotamona ai ita noho totona, dahaka be mai anina bada?

¹⁸ Lalotamona ia noho totona lalokau be mai anina bada. Oibe, maino bona lalotamona ai ita noho totona, eda ‘Lohiabada tamona’ Iesu Keriso, eda ‘Dirava tamona’ Iehova, bona ta ta ita lalokau henia be gau badana. (Efe. 4:3-6) Iesu be unai bamona lalokau totona ia guriguri, ia gwau: “Idia sibona totona lau noinoi lasi, to edia hereva amo lau idia abidadama henia taudia totona lau noinoi danu. Unai amo idia ibounai be do idia tamona, bona oi, Tamana, be lau ida oi hakapua, lau be oi ida lau hakapua hegeregerena. Vadaeni idia be ita ida do idia hakapua.” Ma ia gwau: “Bona lau ese emu ladana be idia dekenai lau gwauraia hedinarai vadaeni, bona do lau gwauraia hedinarai, unai amo lau dekenai oi hahedinaraia lalokauna be idia dekenai do ia noho, bona lau be idia ida do lau hakapua.”​—⁠Ioa. 17:20, 21, 26.

19. Emu lalona oi hadaia dahaka oi karaia totona?

¹⁹ Reana iseda kara ta ita haidaua be auka, to lalokau ese ita do ia durua unai ita karaia totona. Salamo torea tauna bamona ita guriguri, ita gwau: “Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” (Sal. 86:11) Namona be eda lalona ita hadaia Diabolo ita tuari henia totona, unai amo eda lalokau Tamana bona tadikaka taihu amo ita do ia hapararaia lasi. Bona namona be ruma bese, haroro gaukara, bona kongrigeisen lalonai ita gaukara goada, ‘Dirava ita tohotohoa, badina ita be iena lalokau natudia, bona lalokau ai do ita raka noho.’​—⁠Efe. 5:1, 2.

[Study Questions]

[Picture on page 29]

Harihari gauna be pata ai ia rakatania bona ia lao ena tadikaka ida maino ia karaia guna

[Picture on page 31]

Tama sina e, natudia hadibaia ma haida idia matauraia totona