Italy tadikaka ta ladana Bruno, be abia hidi badana ta ia karaia. Ena sikuli ia haorea bona maka namodia ia abia dainai, ena varavara bona tisa ese idia hamaoroa iunivesiti ia lao be namo. To, lagani haida gunanai Bruno be Iehova dekenai ena mauri ia gwauhamatalaia, bona ia ura Dirava ena ura do ia atoa guna. Vadaeni, edena do ia abia hidi? Ia gwau: ‘Iehova lau guriguri henia bona lau hamaoroa, egu gwauhamata ia dekenai do lau badinaia bona iena ura do lau atoa guna.’ To danu, Bruno be ena guriguri lalonai ia gwau, ia ura hesiai gaukara idauidau do ia karaia bona ena mauri do ia moalelaia.

 Lagani haida murinai, Bruno be Ecuador, South America dekenai ia lao. Ia gwau Iehova ese ena guriguri ia haerelaia, bona hahenamo ma haida ia henia danu. Ecuador ai ia ginidae neganai, ia hoa badina matamata taudia ma haida be unuseni idia lao danu, Iehova idia hesiai henia totona.

IEHOVA IDIA ABIDADAMA HENIA MATAMATA TAUDIA

Iehova ia ura mai eda kudouna ibounai ida ia ita hesiai henia, bona ita abia dae momokani ita do ia hanamoa. Iehova ia gwau: “Mani lau do umui tohoa . . . lau ese guba ena uindo do lau kehoa, bona hahenamo be emui latanai do lau bubua diho.” (Mal. 3:10, BHğ) Tanobada hegegemadai, Bruno bona matamata taudia ma haida be Iehova ena boiboi herevana idia abia dae. Dirava idia lalokau henia dainai, edia nega, goada bona moni idia gaukaralaia, pablisa momo lasi gabudia ai Basileia sivarai namona idia harorolaia.

Matamata taudia be tano ma ta dekenai idia ginidae neganai, idia itaia “uma aniani gogoa gaukarana be bada, to gaukara taudia be momo lasi.” (Mat. 9:37) Hegeregere, German taihu ladana Jaqueline be Ecuador brens dekenai revareva ia siaia ia gwau: “Lagani rua mai kahana Ecuador dekenai lau haroro bona egu Baibel stadi ibounai be 13. Idia foa be hanaihanai hebou idia mai. Unai be moale gauna!” Canada taihu ta ladana Chantal, ia gwau: “Lagani 2008 ai, Ecuador ena kone kahana dekenai lau lao. Unuseniai kongrigeisen be tamona sibona. To hari, kongrigeisen be toi bona painia taudia be 30 bamona.” Ia gwau  ia moale badina ia itaia hereva momokani idia abia dae taudia momo idia goada idia lao. Vanegai, Andes Mountains ai ia noho siti ta dekenai ia lao. Unai gabu be mita 2,743 bamona ororo ataiai ai ia noho. Unai siti ai taunimanima 75,000 bamona idia noho, to kongrigeisen be tamona sibona. Chantal ia gwau, unai teritori ai momo be hereva momokani idia abia dae, bona haroro gaukara ia moalelaia.

HEKWAKWANAI HAIDA

Tano ma ta ai hesiai gaukara karaia be mai ena hekwarahi, bona matamata taudia haida ese unai abia hidi idia karaia be auka. Hegeregere, United States taihu ta ladana Kayla ia gwau, ena kongrigeisen taudia haida idia gwau ia lao lasi be namo. Idia laloparara lasi dahaka dainai Kayla ia ura tano ma ta dekenai ia painia. Ena be idia ura ia idia durua, to edia hereva dainai ia lalohisihisi. Nega haida ia daradara bema ia be abia hidi maorona ia karaia eiava lasi. Ia gwau: “Nega momo Iehova lau guriguri henia, bona lo tadikaka taihu ida lau herevahereva. Unai ese lau ia durua bona lau laloparara, Iehova be mai edia ura ida ia idia hesiai henia taudia do ia hanamoa.”

Gado ma ta dibaia karana be mai ena hekwarahi. Ireland taihu ta ladana Siobhan, ia gwau: “Egu ura gaudia lau gwauraia be auka. Gado matamata lau dibaia totona lau haheauka be namo, bona kerere lau karaia neganai lau kiri sibona.” Estonia taihu ta ladana Anna, ia gwau: “Ena be gabu ia siahu, kahu be bada bona digu totona ranu siahu be lasi, to unai lau laloa bada lasi. Lau lalohekwarahilaia gauna be, Spanish gado dibaia totona lau hekwarahi bada. Nega haida lau hesiku. Lau dibaia gauna be, egu kerere do lau laloa momo lasi, to gado herevalaia dalana do lau hanamoa noho.”

Danu, idia lalohisihisi badina edia famili bona turadia be gabu daudau ai idia noho. Hegeregere, United States tadikaka ta ladana Jonathan, be Ecuador ai ia ginidae neganai unai hemami ia abia. To, Baibel ia stadilaia bona ia haroro momo neganai ena famili bona turadia totona ia laloa momo lasi. Daudau lasi murinai, haroro gaukara ai ekspiriens namodia ia davaria, bona kongrigeisen ai tura matamatadia ia davaria. Unai ese ia durua ia moale totona.

Danu, tano ma ta ena mauri dalana be auka.  Unuseniai mauri dalana be emu hanua ena mauri dalana amo ia idau. Canada tadikaka ta ladana Beau, ia gwau ena gabu ai ranu bona paoa be ruma lalonai, to hari ia noho tanona ai unai gaudia be lasi. Danu, tano haida ai trenspot namodia be lasi. Momo be idia ogogami, bona duahiduahi bona toretore idia diba lasi. Austria taihu ta ladana Ines, ia durua gauna be ia ese taunimanima edia kara namodia ia laloa. Ia gwau: “Idia be heabidae taudia, manau, bona heduru bada taudia. Bona gau badana be, idia ura dikadika Dirava do idia dibaia.”

‘HAHENAMO DO LAU BUBUA DIHO ELA BONA IA HONUDAE’

Iehova idia hesiai henia totona, Ecuador idia lao matamata taudia be gau momo idia reaia, to edia dabu gaudia be Iehova ese ia henia bona ia hanamodia. (Efe. 3:20) Idia mamia ia ese ‘hahenamo be edia latanai ia bubua diho ela bona ia honudae bona ia bubua danu.’ (Mal. 3:10, BHğ) Idia ta ta ese edia hesiai gaukara lalonai idia davaria moalena be henunai idia herevalaia:

Bruno: ‘Ecuador, Amazon gabu hairaina ai egu hesiai gaukara lau hamatamaia. Gabeai, Ecuador ena brens ofesi dekenai konstraksen gaukarana lau durua. Hari, lau be Betele dekenai lau gaukara. Italy ai lau noho neganai, egu lalona lau hadaia Iehova do lau atoa guna, bona ia ese lau dekenai mauri namona ia henia, bona ena hesiai gaukara idauidau lau karaia noho.’

Beau: ‘Hari, egu hetura karana Iehova ida ia goada, badina Ecuador ai egu nega bada lau gaukaralaia ia lau hesiai henia totona. Danu, gabu hairaidia momo dekenai lau loaloa, unai be egu ura gauna ta.’

Anna: ‘Lau be singul taihu dainai, lau laloa lau hegeregere lasi misinari gaukara lau karaia totona. To, hari lau laloparara, unai lau karaia diba. Iehova lau tanikiu henia, badina iena heduru dainai stadi matamatadia lau davaria, Kingdom Hall haginia gaukara lau durua, bona tura matamatadia lau davaria danu. Hari, lau moale bada.’

Elke: ‘Egu hanua Austria ai nega momo Iehova lau guriguri henia stadi tamona lau davaria totona. To, iniseniai egu Baibel stadi be 15! Bona lau moale badina lau itaia idia ura Iehova idia dibaia.’

Joel: ‘Tano ma ta ai Iehova oi hesiai henia be hahenamo badana. Ia oi tabekau henia bona oi itaia emu hekwarahi ia hanamoa neganai, unai be moale gauna! United States lau rakatania bona iniseniai lagani tamona lau noho lalonai, lau bamoa grup ena pablisa be 6 amo ia daekau 21, bona Memorial dekenai taunimanima 110 idia mai.’

DAHAKA DO OI KARAIA?

Matamata taudia e, bema emui noho dalana ia hegeregere, pablisa be momo lasi gabudia umui lao diba, a? Momokani, unai bamona abia hidi badana oi karaia totona, palani namona oi karaia be namo. Gau badana be Iehova bona taunimanima oi lalokau henidia. Bema oi be unai bamona tauna, bona oi hegeregere gabu ma ta oi lao totona, Iehova dekenai unai oi gurigurilaia be namo. Danu, emu tama sina bona kongrigeisen elda taudia dekenai unai oi herevalaia. Reana, oi danu be mai moale ida tano idauna ai Iehova oi hesiai henia diba.

[Blurb on page 3]

“Nega momo Iehova lau guriguri henia, bona lo tadikaka taihu ida lau herevahereva. Unai ese lau ia durua bona lau laloparara, Iehova be mai edia ura ida ia idia hesiai henia taudia do ia hanamoa.”​—⁠Kayla, United States amo

[Box/Picture on page 6]

Tano ma ta lao totona hegaegae dalana

• Sibona emu Baibel stadi karana oi goadalaia

• August 2011 Iseda Basileia Gaukara, rau 4-6 riviulaia

• Tano ma ta ai hesiai gaukara idia karaia taudia oi hereva henia

• Tano ena histori bona kastom oi dibaia

• Tano ena gado oi dibaia

[Box/Picture on page 6]

Tano ma ta idia lao taudia be inai dala haida amo sibona idia naria . . .

• lagani ta ta hua haida ai edia gabu dekenai moni gaukara idia karaia

• edia bisinesi o ruma be haida ese idia rentaia

• Intanet amo gaukara haida idia karaia

[Pictures on page 4, 5]

1 Jaqueline, Germany amo

2 Bruno, Italy amo

3 Beau, Canada amo

4 Siobhan, Ireland amo

5 Joel, United States amo

6 Jonathan, United States amo

7 Anna, Estonia amo

8 Elke, Austria amo

9 Chantal, Canada amo

10 Ines, Austria amo