“Dirava ita lalokau henia ena anina be inai, iena taravatu ita badinaia, bona iena taravatu be idia metau lasi.”​—⁠1 IOA. 5:3.

OI HAERE DIBA, A?

Satani ia ura Dirava ena taravatu be edena bamona do ita laloa?

Dahaka dainai iseda turadia ita abia hidi namonamo be namo?

Dahaka ese ita do ia durua ura kwalimu ia henia Diravana ita badinaia noho totona?

1. Edena dala ai Iehova ese ena ura kwalimu ia gaukaralaia? Adamu bona Heva dekenai edena bamona ura kwalimu ia henia?

 IEHOVA sibona ena ura kwalimu be gau ta ese ia koua diba lasi, bona nega ibounai ia ese dala maorona ai ia gaukaralaia. Danu, ena hesiai taudia ese idia karaia gaudia ibounai ia biagua lasi, to ura kwalimu ia henidia, sibodia abia hidi idia karaia bona edia ura namodia idia hagugurua totona. Hegeregere, Dirava ese Adamu bona Heva dekenai gau tamona sibona ia taravatua. Ia hamaorodia “kara namo bona kara dika hadibaia au ena huahua” do idia ania lasi. (Gen. 2:17) Unai amo idia be Dirava ena taravatu idia badinaia diba, bona sibodia edia ura gaudia idia karaia diba danu!

2. Dahaka dainai Adamu bona Heva be kara dika ena igui hesiai taudia ai idia lao?

² Dahaka dainai Dirava ese Adamu bona Heva dekenai ura kwalimu ia henidia? Badina Dirava ese idia be iena toana hegeregerena ia karaia, bona idia dekenai lalomamina ia henia. Dirava ia laloa ia be edia Havaraia Tauna dainai, Ia do idia lalokau henia bona kara maoromaoro do idia badinaia. (Gen. 1:27; Roma 2:15) To, Adamu bona Heva be edia Havaraia Tauna ese ia henia ura kwalimu idia laloa bada lasi. Idia sibona ese dahaka be maoro bona dahaka be dika idia abia hidi. Idia laloa unai kara amo ura kwalimu korikorina do idia davaria. To edia abia hidi dainai, idia bona edia natudia be kara dika ena igui hesiai taudia ai idia lao, bona hisihisi bona mase idia davaria.​—⁠Roma 5:12.

3, 4. Satani ia ura Dirava ena taravatu be edena bamona do ita laloa?

³ Satani ese goevadae taudia rua bona aneru momo ia koidia bona Dirava ena lohia dalana idia dadaraia dainai, ita ia koia diba danu. Satani be iena koikoi karadia ia haidaua lasi. Ia ura do ita laloa Dirava ena taravatu ese ita ia biagua auka. Danu, ia ura ita laloa bema Dirava ita hesiai henia, eda mauri do ita moalelaia lasi. (1 Ioa. 5:3) Tanobada  taudia be unai bamona idia laloa, bona bema idia ita bamoa momo, edia lalohadai ita abia diba. Guna matabodaga karadia ia karaia taihu ta, hari ena mauri lagani be 24, ia gwau: “Tura dikadia bamoa karana ese egu kara ia haidaua, badina lau ura lasi egu lalohadai be idia edia amo ia idau.” Reana oi danu be emu turadia amo unai bamona hahetoho oi davaria vadaeni.

⁴ Keristani kongrigeisen lalonai haida be tura dikadia ai idia lao diba. Matamata tadikaka ta ia gwau: “Lau be Witnes matamata taudia haida lau diba, idia be murimuri taudia idia deit o turana karaia. Idia lau bamoa momo neganai, lau itaia lau danu be edia kara lau tohotohoa, bona unai ese egu hetura karana Dirava ida ia hadikaia. Unai dainai Keristani heboudia lau moalelaia lasi bona lau haroro momo lasi. Unai neganai lau laloparara, idia lau bamoa lasi be namo. Bona unai bamona lau karaia!” Emu turadia ese oi idia durua o hakaua kerere diba. Mani Baibel ese ia herevalaia tauna ta ena sivarai ita itaia.​—⁠Roma 15:4.

EDIA LALONA IA VERIA

5, 6. Edena dala ai Abesaloma ese ma haida ia koia? Abesaloma ena palani ia guguru, a?

⁵ Baibel lalonai ma haida idia hakaua kerere taudia momo edia sivarai idia noho. Idia ta be King Davida ena natuna Abesaloma. Abesaloma be mai ena hairai, to Satani bamona ena kudouna ai ura dikana ia abia. Abesaloma ia ura tamana ena king dagina ia abia, ena be ia be maoro lasi. a Abesaloma be ena ura ia hagugurua totona taunimanima ia koia, unai amo idia laloa Abesaloma ia ura idia ia durua, to king Davida be idia ia laloa lasi. Eden umana ai Diabolo ia karaia bamona, Abesaloma be taunimanima ia koia bona idia laloa ia ese idia ia laloa bada. Danu, hereva koikoidia amo ena tamana ena ladana ia hadikaia.​—⁠2 Sam. 15:1-5.

⁶ Abesaloma ena palani ia guguru, a? Oibe. Baibel ia gwau: “Unai dala dekenai Abesaloma ese Israela taudia edia lalona ia veria.” (2 Sam. 15:6) Ena be Abesaloma ese taunimanima momo ia koia, to dokonai dika ia davaria. Ena hekokoroku karana dainai, ia bona ia koidia taudia tausen momo idia mase.​—⁠2 Sam. 18:7, 14-17.

7. Abesaloma ena sivarai amo dahaka ita dibaia? (Rau 14 ena laulau itaia.)

⁷ Dahaka dainai Israela taudia ese Abesaloma ena hereva idia abia dae? Reana idia be ia herevalaia gaudia idia ura henia. Eiava reana iena hairai idia laloa bada. Herevana Abesaloma ena hereva idia abia dae ena badina be dahaka, to ita dibaia gauna be inai: Idia be Iehova bona ia horoa king idia badinaia lasi. Hari, Satani be Abesaloma bamona taudia ia gaukaralaia Iehova ena hesiai taudia ia koidia totona. Reana, idia gwau Iehova ena taravatu be auka, bona Iehova idia hesiai henia lasi taudia be edia mauri idia moalelaia. Unai bamona taudia edia hereva oi kamonai neganai, oi laloparara idia koikoi bona Dirava do oi badinaia noho, a? Oi abia dae Iehova ena “taravatu goevadaena,” Keriso ena taravatu unai, ese oi dekenai ura kwalimu korikorina ia henia diba, a? (Iam. 1:25) Bema oibe, namona be oi hahedinaraia unai taravatu oi lalokau henia, bona emu ura kwalimu oi gaukaralaia Iehova oi hamoalea totona.​—⁠1 Petero 2:16 duahia.

8. Iehova ena taravatu idia badinaia lasi dainai idia lalohisihisi taudia haida edia sivarai mani oi gwauraia.

⁸ Satani ia ura matamata taudia ia koia. Mauri lagani 30 ia hanaia tadikaka ta be ena mauri lagani 13 ia lao 19 negana ia herevalaia, ia gwau: “Lau laloa Iehova ena kara maoromaoro taravatudia be auka, bona lau idia gimaia lasi.” Unai dainai matabodaga karadia ia karaia, to ia moale lasi. Ma ia gwau: “Lagani momo lalodiai egu kerere dainai lau lalohisihisi.” Taihu ma ta be ena matamata negana ia herevalaia, ia gwau:  “Matabodaga karana lau karaia murinai lau hemarai bona lau laloa lau be anina lasi. Ena be lagani 19 idia ore vadaeni, to nega momo unai kara dikadia lau laloa loulou.” Taihu ta ia gwau: “Egu kara amo egu lalokau taudia lau hahisia karana lau laloa neganai, lau lalohisihisi bada. Ma ia gwau: “Iehova ena lalonamo oi haboioa neganai, emu mauri do oi moalelaia lasi.” Satani ia ura lasi oi karaia kara dikadia dainai do idia vara hekwakwanai oi laloa.

9. (a) Iehova, ena taravatu bona hakaua herevadia ita laloa neganai, edena henanadai ita gwauraia be namo? (b) Dahaka dainai Dirava ita diba namonamo be namo?

⁹ Ataiai sivarai ese idia hahedinaraia, Dirava idia badinaia lasi taudia be hekwakwanai momo idia davaria diba. Madi, orea lalonai matamata taudia momo​—⁠taunimanima badadia danu​—⁠be Dirava ena taravatu idia badinaia lasi dainai idia lalohisihisi! (Gal. 6:7, 8) Oi sibona oi nanadaia: ‘Satani ese lau ia koia toho daladia lau lalopararalaia, a? Lau laloa Iehova be egu Turana namona, badina nega ibounai hereva momokani ia gwauraia bona egu namo ia laloa bada, a? Lau abia dae momokani Iehova ia ura egu mauri lau moalelaia, a?’ (Isaia 48:17, 18 duahia.) Bema Iehova oi diba namonamo, oi gwau diba, oibe. Namona be oi abia dae Baibel ena taravatu bona hakaua herevadia ese idia hahedinaraia, Iehova be oi ia lalokau henia bona ia ura emu ura kwalimu oi gaukaralaia namonamo.​—⁠Sal. 25:14.

AONEGA BONA LALOPARARA TOTONA OI GURIGURI

10. Dahaka dainai King Solomona ita tohotohoa be namo?

¹⁰ Solomona be mero matamata neganai mai  manau ida Iehova ia guriguri henia, ia gwau: “Lau be mero maragina sibona. Lau diba lasi edena bamona do lau raka lasi bona edena bamona do lau raka vareai.” Solomona be laloparara bona aonega totona ia noinoi. (1 Kin. 3:7-9, 12, BHğ) Iehova ese ena guriguri ia haerelaia. Herevana oi be matamata o buruka, to bema aonega bona Dirava badinaia totona oi guriguri, Iehova ese emu guriguri do ia kamonai henia. Momokani, Iehova be hoa dalanai oi dekenai aonega do ia henia lasi. To, bema iena Hereva oi stadilaia, lauma helaga totona oi guriguri, bona kongrigeisen amo oi abia hakaua herevadia oi badinaia, oi dekenai aonega do ia henia. (Iam. 1:5) Iehova idia hesiai henia matamata taudia edia aonega ese Dirava idia kamonai henia lasi taudia, bona tanobada ena “aonega bona diba bada taudia” edia aonega ia hereaia.​—⁠Luka 10:21; Salamo 119:98-100 duahia.

11-13. (a) Salamo 26:4, Aonega Herevadia 13:20 bona 1 Korinto 15:33 amo dahaka mai anina bada gaudia ita dibaia? (b) Edena dala ai emu mauri lalonai unai gaudia oi badinaia diba?

¹¹ Hari, do ita herevalaia siri haida ese idia hahedinaraia eda turadia ita abia hidi namonamo be mai anina bada. Unai amo do ita laloparara, Baibel stadilaia bona laloa dobu karana be mai anina bada, bona ita ia durua Iehova ita diba namonamo totona. Salamo 26:4 ia gwau: “Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi.” Aonega Herevadia 13:20 ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” Bona 1 Korinto 15:33 ia gwau: “Hebamo dikadia ese ta ena kara namodia idia hadikaia diba.”

¹² Unai siri amo dahaka mai anina bada gaudia ita dibaia? (1) Iehova ia ura eda turadia ita abia hidi namonamo. Ia ura ita ia gimaia, unai amo ita bona eda hetura karana ia ida be gau ta ese do ia hadikaia lasi. (2) Iseda turadia ese ita idia durua o hakaua kerere diba. Unai be vaia ia vara gauna. Unai Baibel siridia idia torea dalana ese idia hahedinaraia, Iehova ia ura iena hereva ese iseda kudouna ia hamarerea. Idia be hereva momokanidia, to taravatu aukadia lasi. Hegeregere, idia gwau lasi, “inai oi karaia lasi” o “unai oi karaia lasi.” To, unai be hegeregere Iehova ia gwau: ‘Inai be hereva momokanidia. To, oi be dahaka do oi abia hidi? Emu kudouna ai dahaka oi laloa bada?’

¹³ Inai do ita laloa danu: Unai siri toi be Baibel ena hereva momokanidia, bona idia torea negana amo ema bona hari, taunimanima ibounai dekenai edia sisiba be mai anina bada. Namona be sibona oi nanadaia: “Edena bamona negadiai “kara maoromaoro koikoi taudia” lau bamodia? Edena dala ai idia lau dadaraia diba? (Aon. 3:32; 6:12) Iehova ia ura edena “aonega tauna” lau tura henia? Iehova ia ura edena “kavakava taudia” lau dadaraia? (Sal. 111:10; 112:1; Aon. 1:7) Bema tura dikadia lau bamoa, edena dala ai egu “kara namodia” idia hadikaia diba? Tanobada taudia sibona be “hebamo dikadia,” a? (2 Pet. 2:1-3) Edena dala ai unai henanadai oi haerelaidia diba?

14. Edena dala ai Ruma Bese ena Tomadiho karaia dalana umui hanamoa diba?

¹⁴ Unai siri toi sibona lasi, to Baibel siri ma haida oi duahia be namo. Unai siri ese oi bona emu famili do idia durua, Dirava ena lalohadai mai anina bada gaudia dekenai umui lalopararalaia totona. b Tama sina e, Ruma Bese ena Tomadiho lalonai unai bamona siri umui stadilaia be namo. Emui tahua gauna be ruma taudia ta ta do umui durua, bena do idia laloparara Dirava ese taravatu bona hakaua herevadia ia atoa, badina ita ia lalokau henia. (Sal. 119:72) Emu  ruma bese ida unai bamona stadi dalana umui badinaia neganai, emui hetura karana Iehova ida bona umui ta ta huanai do ia goada.

15. Edena bamona oi diba oi be aonega bona laloparara tauna?

¹⁵ Edena bamona oi diba oi be aonega bona laloparara tauna? Dala ta be emu laloa dalana be Dirava ena hesiai taudia namodia haida, hegeregere Davida, ena laloa dalana ida oi hahegeregerea. King Davida ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” (Sal. 40:8) Danu, Salamo 119 ia torea tauna ia gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.” (Sal. 119:97) Namona be oi hekwarahi Iehova ena taravatu oi ura henia noho totona. Anina be oi guriguri, Baibel oi stadilaia, bona oi laloa dobu. Danu, oi itaia emu mauri lalonai Iehova ena taravatu oi badinaia o ura henia neganai, hahenamo momo do oi davaria.​—⁠Sal. 34:8.

DIRAVA IA HENIA URA KWALIMU OI GIMAIA!

16. Dirava ia henia ura kwalimu ita gimaia totona, dahaka ita laloatao be namo?

¹⁶ Idaunega amo ema bona hari, tanobada besedia be edia ura kwalimu gimaia totona idia tuari. Unai hegeregerena, namona be ita danu be Dirava ia henia ura kwalimu ita gimaia totona ita tuari! Laloatao, oi tuari henia gaudia be inai: Satani, tanobada ena lalohadai dikadia, emu goevadae lasi tauanina bona emu kudouna. (Ier. 17:9; Efe. 2:3) To, Iehova ese oi ia durua diba unai tuari lalonai oi kwalimu totona. Nega ibounai kara maorona oi karaia neganai, inai gau rua oi hagugurua: (1) Iehova ena kudouna do oi hamoalea. (Aon. 27:11) (2) Oi laloparara “taravatu goevadaena, ura kwalimu gauna unai,” oi badinaia be mai ena namo, bona unai ese emu lalona ia hagoadaia “mauri ia lao henia dalana” oi badinaia totona. Danu nega vairai, Iehova ese ia idia abidadama henia taudia ibounai dekenai ia gwauhamatalaia ura kwalimu korikorina do oi abia.​—⁠Iam. 1:25; Mat. 7:13, 14.

17. Bema ita kerere, dahaka dainai ita lalometau lasi be namo? Edena dala ai Iehova ese ita ia durua?

¹⁷ Momokani, ita ibounai be nega haida ita kerere. (Had. 7:20) Unai ia vara neganai, namo lasi oi lalometau bona oi laloa oi be anina lasi. Bema kerere oi karaia, oi hamaoromaoroa eiava elda taudia edia heduru oi tahua. Iamesi 5:15 ia gwau, elda taudia edia “guriguri mai abidadama ese gorere tauna do ia hanamoa bona Iehova ese ia do ia hatorea isi. Danu, bema ia be kara dikadia ia karaia, Dirava ese ena dika do ia gwauatao.” Namona be oi laloatao, Iehova be hebogahisi Diravana bona ia ura oi be kongrigeisen lalonai oi noho, badina emu kudouna dekenai gau namona ta ia itaia. (Salamo 103:8, 9 duahia.) Bema mai emu kudouna ibounai ida Iehova oi hesiai henia, ia ese hanaihanai oi do ia durua.​—⁠1 Siv. 28:9.

18. Iehova ese ita ia gimaia totona dahaka ita karaia be namo?

¹⁸ Iesu ena hanuaboi ginigabena ai, ena aposetolo taudia 11 ida ia guriguri bona ena Tamana ia noia idia ia gimaia totona. Ia gwau: “Dika Tauna dainai idia do oi gimaia.” (Ioa. 17:15) Iesu be aposetolo taudia ia naria hegeregerena, hari danu ia ese ena murinai idia raka taudia ibounai ia naria. Unai dainai ita diba momokani Iehova be Iesu ena guriguri hegeregerena, inai nega aukana lalonai ita do ia gimaia. Aonega Herevadia 2:7, 8 ia gwau: “Dirava ese kara maoromaoro mai laloa momokani taudia, ia durua bona ia gimaia noho. Dirava ese . . . iena helaga momokani taudia edia dala, be ia naria namonamo noho.” Iehova ena taravatu ita badinaia be mai ena hekwarahi. To, Iehova idia badinaia taudia sibona ese mauri hanaihanai bona ura kwalimu korikorina do idia moalelaia. (Roma 8:21) Ena be haida ese oi idia koia toho, to Dirava oi badinaia noho!

[Footnotes]

[Study Questions]

[Pictures on page 14]

Hari, Abesaloma bamona taudia be edena bamona do ita dibaia bona dadaraia?