“Diabolo ena koikoi karadia ibounai [amo] umui gini goada.” ​—⁠EFE. 6:11.

EMU HAERE BE DAHAKA?

Edena dala ai Keristani tauna ese moni bona kohu momo ura henia ena tarapu ia dadaraia diba?

Dahaka ese headava Keristani tauna ia durua diba heudahanai ena tarapu lalonai ia moru lasi totona?

Moni bona kohu momo ura henia bona heudahanai karana ita dadaraia neganai, dahaka hahenamo ita davaria diba?

1, 2. (a) Dahaka dainai Satani be horoa taudia bona “mamoe ma haida” ia inai henia? (b) Inai stadi lalonai edena tarapu rua do ita herevalaia?

 SATANI be Iehova ena hesiai taudia ia inai henidia bada. Ia be tanobada ai horoa orena taudia ia tuari henidia noho. (Apok. 12:17) Idia be mai gari lasi ida haroro gaukara idia gunalaia, bona taunimanima dekenai idia hahedinaraia Satani be inai tanobada ena lohia. Diabolo ese “mamoe ma haida” ia inai henia danu. Idia be horoa taudia idia durua bona edia helaro be tanobada ai do idia mauri hanaihanai. (Ioa. 10:16) Satani be ena mauri hanaihanai helarona ia haboioa dainai, ia badu dikadika. Herevana ita be horoa taudia eiava “mamoe ma haida,” to eda inai tauna be Satani. Ia ura ita do ia tarapua.​—⁠1 Pet. 5:8.

² Satani be unai ia karaia totona tarapu idauidau ia gaukaralaia. Ia ese taunimanima “edia lalona ia hadiburaia” dainai, sivarai namona idia dadaraia bona iena tarapu idia itaia lasi. To, Diabolo ese Basileia ena sivarai namona idia abia dae taudia ia tarapua danu. (2 Kor. 4:3, 4) Vanegai stadi ese Satani ena tarapu toi ita dadaraia dalana ia hahedinaraia. Unai tarapu be: (1) Hereva naria namonamo lasi karana, (2) ma haida gari henia bona edia hereva badinaia karana, bona (3) kara dika ta ita karaia dainai ita hemarai bada karana. Inai stadi lalonai, ita ese Satani ena tarapu ma rua ita dadaraia diba dalana do ita herevalaia. Unai tarapu be moni bona kohu momo ura henia karana bona heudahanai karana.

MONI BONA KOHU MOMO URA HENIA KARANA ENA TARAPU

3, 4. Edena dala ai inai nega ena lalohekwarahi gaudia ita laloa momo dainai, moni bona kohu momo ita tahua diba?

³ Iesu ena haheitalai ta lalonai, ia ese ava ginigini lalonai ia tubu uhe ia herevalaia. Ia gwau ta be Basileia ena sivarai  ia kamonai diba, “to inai nega oromana ena lalohekwarahi gaudia bona taga ena koikoi siahuna ese Basileia ena hereva ia koua bena huahua ia atoa lasi.” (Mat. 13:22) Oibe, Satani ese moni bona kohu momo ura henia karana ia gaukaralaia ita ia tarapua totona.

⁴ Gau rua ese ‘Basileia ena hereva idia koua’ diba. Idia ta be “inai nega oromana ena lalohekwarahi gaudia,” o dina ta ta ai tauanina durua gaudia abia ena lalohekwarahi. “Dina gabediai nega aukadia do idia vara” dainai, lalohekwarahi gaudia be momo. (2 Tim. 3:1) Tauanina durua gaudia oi hoia be hegeregere lasi, badina gau ibounai edia davana be bada eiava oi be moni gaukara lasi. Eiava nega vaira totona oi lalohekwarahi bona sibona oi nanadaia, ‘Lau buruka bona lau gaukara diba lasi neganai, egu moni be do ia hegeregere tauanina durua gaudia abia totona, a?’ Haida be idia hekwarahi bada moni momo idia haboua totona, badina idia laloa unai amo edia ura gaudia ibounai do idia abia diba.

5. Edena dala ai “taga ena koikoi siahuna” ese ita ia tarapua diba?

⁵ Iesu ia herevalaia gauna ma ta be “taga ena koikoi siahuna.” Unai bona mauri ena lalohekwarahi gaudia dainai, ita be moni bona kohu momo ura henia karana ena tarapu lalonai ita moru diba. Momokani, Baibel ia gwau, ‘moni ese ita ia gimaia’ diba. (Had. 7:12) Anina be moni ese ita ia durua diba eda dabu gaudia ita hoia totona. To, taga taudia ai ita lao totona ita hekwarahi be aonega karana lasi. Taunimanima momo idia laloparara taga taudia ai idia lao totona idia hekwarahi neganai, moni bona kohu momo ura henia karana ena tarapu lalonai idia moru. Danu, haida be moni bona kohu edia igui hesiai taudia ai idia lao.​—⁠Mat. 6:24.

6, 7. (a) Gaukara gabunai dahaka ia vara diba, unai amo moni bona kohu momo tahua urana oi abia diba? (b) Keristani tauna ta be ovataim gaukara totona idia nanadaia neganai, dahaka ia laloa be namo?

⁶ Ena be oi diba lasi, to reana moni bona kohu momo abia urana be emu kudouna lalonai ia vara matamaia. Mani inai haheitalai oi laloa. Emu bosi be oi dekenai ia mai bona ia gwau: “Lau be sivarai namona ta lau mailaia! Kampani be kontraka badana ta ia abia, bona oi be hua haida lalonai ovataim gaukara do oi karaia. To, oi dekenai lau gwauhamata emu pei do ai habadaia.” Unai hereva dekenai dahaka do oi laloa? Momokani, emu ruma bese ena tauanina durua gaudia oi abia be mai anina bada, to emu maduna be unai sibona lasi. (1 Tim. 5:8) Gau ma haida oi laloa danu be namo. Nega hida ovataim gaukara do oi karaia? Emu moni gaukara dainai Dirava tomadiho henia karadia, hegeregere kongrigeisen heboudia bona ruma bese ena tomadiho do oi reaia, a?

⁷ Namona be mai anina bada gaudia oi laloa. Ovataim amo do oi abia monina, eiava emu  hetura karana Iehova ida be mai anina bada? Emu mauri lalonai Basileia gaudia do oi tahua guna lasi badina oi ura moni momo oi abia, a? Bema oi naria namonamo lasi, moni bona kohu momo tahua karana ese oi bona emu ruma bese emui hetura karana Iehova ida, ia hadikaia diba. To bema oi dekenai unai ia vara vadaeni, dahaka ese oi ia durua diba?​—⁠1 Timoteo 6:9, 10 duahia.

8. Edena Baibel sivaraidia ese ita idia durua diba iseda mauri dalana ita tahua namonamo totona?

⁸ Bema ita ura lasi moni bona kohu momo ura henia karana ese ita ia tarapua, namona be nega ibounai iseda mauri dalana ita tahua namonamo. Namo lasi Esau ita tohotohoa, badina ia be Iehova ena gwauhamata ia lalodia bada lasi. (Gen. 25:34; Heb. 12:16) Danu, ita ura lasi Iesu ese ia hereva henia taga tauna ita tohotohoa. Iesu ese ia hamaoroa namona be ena kohu ibounai ia hoihoilaia, ogogami taudia dekenai moni ia henia, bona Iesu ena murinai do ia raka. To, ia be unai hereva ia kamonai neganai, mai lalohisihisi ida ia lao badina ena kohu be momo herea. (Mat. 19:21, 22) Unai tau be ena moni bona kohu ese ia tarapua bamona. Ia be tau hereadaena, Iesu, ena hahediba tauna ai ia lao diba, to unai hahenamo ia abia dae lasi! Namona be ita naria namonamo, namo lasi ita be Iesu ena murinai ita raka ena hahenamo ita haboioa danu.

9, 10. Baibel ena hereva hegeregerena, edena dala ai moni bona kohu ita laloa be namo?

⁹ Moni bona kohu momo ura henia karana ese ita ia koia lasi totona, namona be Iesu ita kamonai henia. Ia gwau: “Namo lasi umui lalohekwarahi bona umui gwau, ‘Dahaka do ita ania?’ eiava, ‘Dahaka do ita inua?’ eiava ‘Dahaka dabua do ita hahedokilaia?’ Badina unai gaudia ibounai be tanobada taudia ese idia tahua goadagoada noho. To emui guba Tamana ia diba umui be unai gaudia umui abia be namo.”​—⁠Mat. 6:31, 32; Luka 21:34, 35.

¹⁰ Bema ita ura lasi moni bona kohu momo ura henia karana ena tarapu lalonai ita moru, namona be Baibel torea tauna, Aguru, ena lalohadai ita abia. Ia gwau: “Ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia.” (Aon. 30:8) Aguru ia laloparara tauanina durua gaudia abia totona moni be mai anina bada, to ia diba moni bona kohu ese taunimanima idia koia diba. Namona be ita laloparara tanobada ena lalohekwarahi gaudia bona taga ena koikoi siahuna ese eda hetura karana Iehova ida ia hadikaia diba. Bema iseda mauri lalonai, moni bona kohu ita laloa momo, unai ese eda nega bona goada do ia haorea, bena Basileia do ita tahua guna lasi. Unai dainai, gau badana be ita naria namonamo, namo lasi moni bona kohu momo ura henia karana ese ita ia tarapua!​—⁠Heberu 13:5 duahia.

HEUDAHANAI​—⁠IA HUNIA GURI BADANA

11, 12. Edena dala ai Keristani ta be gaukara gabunai heudahanai ena tarapu lalonai ia moru diba?

¹¹ Bema labana taudia idia ura animal goadana ta idia tarapua, idia ese animal ia raka lao raka mai dalana dekenai guri badana ta idia geia, bena au rigidia bona tano amo idia koua. Satani be unai bamona tarapu ta ia gaukaralaia momo ia hamorua totona. Unai tarapu be heudahanai karana. (Aon. 22:14; 23:27) Keristani taudia haida be idia naria namonamo lasi dainai, unai tarapu lalonai idia moru. Keristani headava taudia haida be tau o hahine idauna ma ta idia ura henia dainai, heudahanai ena tarapu lalonai idia moru.

¹² Reana emu gaukara gabuna ai, tau o hahine idauna ma ta oi ura henia diba. Tahua gaukarana ta ese ia hahedinaraia, hahine foa amo rua bamona bona tatau foa amo toi bamona, be edia gaukara turana ta ida idia heudahanai. Emu gaukara gabunai tatau o hahine ida oi gaukara hebou, a? Edena dala ai idia oi kara henia? Taravatu haida oi atoa, unai amo tau o hahine idauna ma ta ura henia ena hemami oi dadaraia, a?  Hegeregere, reana taihu ta be nega momo ena gaukara tauna ta ida ia herevahereva. Reana ia be turana namona ta dainai, taihu ese iena headava lalonai idia vara hekwakwanai be ia dekenai ia gwauraia. Eiava tadikaka ta be ena gaukara hahinena ta ia bamoa momo. Reana tadikaka do ia laloa: “Inai hahine be egu lalohadai ia abia dae bona lau hereva neganai ia kamonai, bona lau ia matauraia. Egu adavana be lau dekenai unai bamona ia karaia be namo!” Bema unai tadikaka bona taihu idia naria namonamo lasi, heudahanai ena tarapu lalonai idia moru diba.

13. Edena dala ai kongrigeisen lalonai tau o hahine idauna ma ta ura henia karana ia vara diba?

¹³ Kongrigeisen lalonai tau o hahine idauna ma ta ura henia karana ia vara diba danu. Keristani headava tauna ta bona ena adavana dekenai unai ia vara. Daniel bona ena adavana, Sarah be regula painia taudia. a Daniel be elda tauna ta bona ia gwau kongrigeisen lalonai idia henia gaukara ibounai ia abia dae sibona. Ia ese matamata taudia faiv ia stadi henia bona idia toi be idia bapatiso. Ma haida ese unai bapatiso matamata tadikaka idia hagoadaia be namo. To, Daniel be kongrigeisen gaukaradia dekenai ia bisi dainai, Sarah ese nega momo unai tadikaka ia durudia. To, ma haida ese Sarah idia hagoadaia danu be namo, bona nega momo unai tadikaka ese ia idia durua. Unai kara be tarapu dikana ta bamona. Daniel ia gwau: ‘Hua ta ta ibounai egu adavana ia hekwarahi bada ma haida ia hagoadaia totona. To, ma haida ese ia idia hagoadaia danu be namo. Unai negadiai, egu adavana lau laloa bada lasi dainai, unai hekwakwanai ia vara. Egu adavana be unai tadikaka matamata ta ida ia heudahanai. Lau bisi bada dainai lau itaia lasi, egu adavana ena hetura karana Iehova ida be ia manoka ia lao.’ Edena dala ai oi be unai bamona hekwakwanai oi dadaraia diba?

14, 15. Dahaka ese Keristani headava taudia ia durua diba heudahanai ena tarapu idia dadaraia totona?

¹⁴ Heudahanai ena tarapu oi dadaraia totona, emu adavana badinaia karana ena anina oi laloa dobu be namo. Iesu ia gwau: “Dirava ese ia hakapua taudia be ta ese do ia hapararaia lasi be namo.” (Mat. 19:6) Namo lasi oi laloa emu kongrigeisen gaukaradia be mai anina bada, to emu adavana oi laloa bada lasi. Bema anina lasi gaudia oi karaia dainai, emu adavana oi bamoa momo lasi, emui headava ia dika diba. Reana oi bona emu adavana be heudahanai ena tarapu lalonai umui moru diba.

¹⁵ Aposetolo Petero ia gwau: “Dirava ena mamoe oreana, emui henari henunai idia noho be do umui naria. Ta ese umui ia doria dainai lasi, to sibona emui ura dainai do umui karaia. Koikoi dalanai kohu abia totona do umui karaia lasi, to mai emui ura bada ida umui karaia.” (1 Pet. 5:2) Bema oi be elda ta, kongrigeisen oi naria be namo. To, namo lasi idia dekenai nega bada oi halusia dainai, emu adavana oi bamoa momo lasi. Kongrigeisen taudia oi durudia, to emu adavana oi dadaraia be maoro lasi. Unai ese emui headava ia hadikaia diba. Daniel ia gwau: ‘Namo lasi kongrigeisen gaukaradia dekenai oi bisi bada herea, to emu ruma bese oi dadaraia.’

16, 17. (a) Gaukara gabuna ai Keristani tauna be edena dala ai do ia hahedinaraia ia be heudahanai karana ia ura henia lasi? (b) Dirava Ena Lalokau bukana karoa 11, paragraf 17 be Keristani headava taudia dekenai dahaka sisiba ia henia?

¹⁶ Gima Kohorona bona Awake! magasin ese headava Keristani taudia dekenai sisiba namodia momo idia henia, heudahanai karana idia dadaraia totona. Gima Kohorona, October 1, 2006 ia gwau: “Ofesi bona gabu ma haida dekenai, namona be mai laloa kehoa ida ita itaia edena kara ese ma ta tura henia urana ia havaraia diba. Hegeregere, bema oi be tau o hahine ta ida ovataim gaukara oi karaia momo, hahetoho ia vara diba. Oi be headava tauna o hahinena dainai,  namona be oiemu hereva dalana bona toana amo oi hahedinaraia oi be unai bamona hetura karana oi ura lasi. Oi be kara maoromaoro karana oi badinaia dainai, oi ura lasi ta oi hauraia kava eiava oiemu dabua eiava kara dainai, ta be lalohadai kererena ia abia. . . . Namona be emu teibolo dekenai emu adavana bona natudia edia laulau oi atoa, unai ese haida do ia hadibaia oi be emu ruma bese oi laloa bada. Ma haida edia hegahusi karadia oi moalelaia lasi, to mai lalogoada ida oi dadaraia be gau badana.”

¹⁷ Dirava Ena Lalokau bukana karoa 11, paragraf 17 ia gwau, bema headava taudia be edia adavadia ida idia mahuta hebou lasi, to tau o hahine ma ta ida idia mahuta hebou, idia be Dirava ena kara maoromaoro taravatudia idia matauraia lasi. Momokani, taunimanima momo idia laloa heudahanai karana be dika lasi. Ena be tanobada taudia be unai bamona idia laloa, to Keristani taudia be unai lalohadai idia dadaraia. Badina idia laloparara taunimanima lasi, to “Dirava ese heudahanai taudia bona headava hadikaia taudia edia kerere davana do ia henia momokani.” (Heb. 10:31; 12:29) Bema oi headava vadaeni, oi bona emu adavana ese heudahanai karana dadaraia dalana idia herevalaia atikol umui duahia be namo. Iehova be headava ia Hamatamaia tauna, bona headava be helaga. Namona be oi bona emu adavana ese nega umui atoa, emui headava hanamoa daladia umui herevalaia totona. Unai ese do ia hamomokania, helaga gaudia umui laloa bada.​—⁠Gen. 2:21-24.

18, 19. (a) Heudahanai karana ese dahaka dika ia havaraia diba? (b) Emu adavana oi badinaia neganai, dahaka hahenamo umui davaria diba?

¹⁸ Bema tau o hahine idauna ma ta ura henia ena hahetoho oi davaria, unai kara ese ia havaraia dika oi laloa guna be namo. (Aon. 7:22, 23; Gal. 6:7) Matabodaga karadia idia karaia taudia be Iehova idia hamoalea lasi. Edia adavana bona idia sibona dekenai lalohisihisi idia havaraia. (Malaki 2:13, 14 duahia.) To, namona be kara maoromaoro oi badinaia dainai do oi davaria hahenamo oi laloa. Hari, emu mauri oi moalelaia diba, emu lalomamina do ia goeva bona gabeai mauri hanaihanai do oi abia.​—⁠Aonega Herevadia 3:1, 2 duahia.

¹⁹ Salamo torea tauna ia gwau, Dirava ena taravatu idia ura henia bona badinaia taudia be maino ai do idia noho, bona tarapu ta lalonai do idia moru lasi. (Sal. 119:165) Inai nega be nega dikana dainai, namona be hereva momokani do oi ura henia bona ‘emu raka dalana oi naria namonamo, kavakava taudia bamona oi raka lasi, to aonega taudia bamona oi raka.’ (Efe. 5:15, 16) Hari, Satani be tarapu idauidau ia gaukaralaia Dirava ena taunimanima ia tarapudia totona. To, ita “gini goada” bona sibona ita gimaia totona, Iehova ese ita dekenai heduru gaudia momo ia henia, unai amo Satani ena tarapu lalonai do ita moru lasi.​—⁠Efe. 6:11, 16.

[Footnote]

[Study Questions]

[Picture on page 26]

Namo lasi moni bona kohu momo ura henia karana ese oi ia tarapua, bona emu hetura karana Iehova ida ia hadikaia

[Picture on page 29]

Bema ta oi hauraia kava o ena hegahusi karana oi abia dae, heudahanai ena tarapu lalonai oi moru diba