‘Diabolo ena tarapu amo umui raka siri.’​—⁠2 TIM. 2:26.

EDENA BAMONA DO OI HAERE?

Bema hanaihanai ma haida oi gwauraia dika, dahaka oi karaia be namo?

Pilato bona Petero edia sivarai amo dahaka ita dibaia?

Edena dala ai emu kerere dainai oi mamia hemarai bona lalomanoka karana oi dadaraia diba?

1, 2. Inai stadi lalonai edena tarapu toi do ita herevalaia?

 DIABOLO ia ura Iehova ena taunimanima ia tarapua. To, ia be labana tauna amo ia idau, badina ia tarapua taudia ia alaia lasi. Satani ena ura badana be ia tarapua tauna ese iena ura do ia karaia.​—⁠2 Timoteo 2:24-26 duahia.

² Labana tauna be animal tarapua totona, dala idauidau ia gaukaralaia. Hegeregere, reana lahi ta ia karaia unai amo animal be ena komu gabuna amo ia raka-lasi, bona ia tarapua diba. Eiava ia ese varo ta amo animal ia tarapua. Eiava tarapu ia hunia bona animal be ia itaia lasi bona ia moia neganai, tarapu ese ia hamasea. Diabolo be Dirava ena taunimanima ia tarapua totona, dala idauidau ia gaukaralaia danu. Bema ita ura lasi iena tarapu lalonai ita moru, namona ita gima bona iena tarapu edia toana ita dibaia. Inai stadi ai Diabolo ese ia gaukaralaia tarapu toi dadaraia dalana do ita herevalaia. Unai tarapu be (1) hereva naria namonamo lasi karana, (2) haida gari henia bona edia hereva badinaia karana, bona (3) eda kerere dainai ita mamia hemarai karana. Stadi gabena ese Satani ena tarapu ma haida do ia herevalaia.

HEREVA NARIA NAMONAMO LASI KARANA DADARAIA

3, 4. Dahaka do ia vara bema eda hereva ita naria namonamo lasi? Haheitalai gwauraia.

³ Animal be uda lalonai idia komu neganai gau ta ese idia ia hadikaia lasi. Labana tauna be uda ena kahana ta ai lahi ia karaia, unai amo animal be edia komu gabuna amo do idia raka-lasi, bena ia tarapudia diba. Kongrigeisen lalonai tadikaka taihu be gau ta ese ia hadikaia lasi. To, laulau dalanai Diabolo ia ura kongrigeisen lalonai lahi ta ia karaia, unai amo tadikaka taihu be kongrigeisen do idia rakatania, bena Diabolo ese idia ia tarapua. Danu, bema ita naria namonamo lasi, ita be Diabolo ita durua diba. Edena dala ai unai ia vara diba?

 ⁴ Aposetolo Iamesi ia gwau iseda malana be lahi ta bamona. (Iamesi 3:6-8 duahia.) Bema eda hereva ita naria namonamo lasi, ita be kongrigeisen lalonai lahi badana ta ita karaia bamona. Edena dala ai? Mani inai haheitalai oi laloa: Kongrigeisen hebouna ai tadikaka ia hahedinaraia, taihu ta be idia abia hidi regula painia gaukara ia karaia totona. Hebou murinai, pablisa rua be unai idia herevalaia. Pablisa ta ese unai painia matamata ia hanamoa, to pablisa ma ta ia gwau unai taihu ia painia, badina ia ura kongrigeisen lalonai ladana bada ia abia. Vadaeni, dahaka oi laloa, edena pablisa oi ura tura henia? Oibe, oi itaia diba edena pablisa ena hereva dalana ese kongrigeisen lalonai hekwakwanai ia havaraia diba.

5. Bema ita ura eda hereva dalana ita hanamoa, dahaka ita karaia be namo?

⁵ Edena dala ai eda hereva dalana ita hanamoa diba? Iesu ia gwau: “Kudouna dekenai idia honu gaudia be uduna ese ia gwauraia.” (Mat. 12:34) Gau ginigunana be iseda kudouna ai idia noho gaudia do ita tahua namonamo. Hegeregere, bema ita kamonai tadikaka ta be kongrigeisen lalonai gaukara momo ia karaia, ita laloa ia be Iehova hamoalea totona unai ia karaia, a? Eiava ita laloa ia be sibona ena ladana abia isi totona unai ia karaia? Bema ita laloa ia be sibona ena ladana abia isi totona Iehova ia hesiai henia, namona be ita laloatao, Diabolo be Iobu dekenai unai bamona ia laloa danu. (Iobu 1:9-11) Namo lasi iseda tadikaka dekenai lalohadai kererena ita abia. To, namona be ita tahua dahaka dainai ita be unai lalohadai kererena ita abia. Badina namona ta dainai unai bamona ita laloa, a? Eiava tanobada taudia edia lalohadai kereredia ese eda lalona ia hadikaia, a?​—⁠2 Tim. 3:1-4.

6, 7. (a) Ma haida ita gwauraia dika ena badina ma haida mani oi gwauraia. (b) Ma haida ese ita idia hereva dika henia neganai, dahaka ita karaia be namo?

⁶ Ma haida ita gwauraia dika ena badina ma haida mani ita herevalaia. Badina ta be reana ita heagi bona ita ura ita karaia gaudia be haida ese do idia itaia. Ma haida ita gwauraia dika karana amo ita ura hahedinaraia ita be idia ita hereaia. Eiava ekskius herevadia ita gwauraia badina ita diba gaukara ta ita karaia lasi. Eiava haida ita gwauraia dika badina reana ita hekokoroku, mama o ita mamia ita be hegeregere lasi idia karaia gauna ita karaia totona. To, unai bamona lalohadai ibounai ese dika ia havaraia.

⁷ Reana ita laloa, ma haida ita gwauraia dika be maoro, badina ita idia gwauraia dika bona eda lalona idia hahisia. Ena be eda lalona ia hisihisi, to edia dika davana ita henia be maoro lasi. Unai ese hekwakwanai do ia habadaia. Diabolo ia ura unai ita karaia, to Dirava be unai bamona kara ia ura henia lasi. (2 Tim. 2:26) Namona be Iesu ita tohotohoa. “Ia idia hereva dika henia neganai, idia ia hereva dika henia lou lasi. . . . to ia hahemaoro maoromaoro tauna ena imana dekenai ia sibona ia atoa.” (1 Pet. 2:21-23) Iesu ia diba  Iehova ese iena ura dalana ai bona negana ai ia do ia durua. Ita danu be Iehova dekenai ita tabekau be namo. Kongrigeisen lalonai maino bona lalotamona do ia noho totona, ma haida dekenai hagoadaia hereva namodia ita gwauraia be namo.​—⁠Efeso 4:1-3 duahia.

MA HAIDA GARI HENIA BONA EDIA HEREVA BADINAIA KARANA DADARAIA

8, 9. Dahaka dainai Pilato be gwaumaoro ia henia Iesu idia hamasea totona?

⁸ Tarapu lalonai ia moru animal be dala lasi ia heau mauri totona. Unai hegeregerena, bema ta be ma haida ia gari henia bona edia hereva ia badinaia, idia ese ia idia biagua unai. (Aonega Herevadia 29:25 duahia.) Hari, tatau rua edia sivarai do ita herevalaia. Idia be taunimanima idia gari henia bona edia hereva idia badinaia. Edia sivarai amo gau haida do ita dibaia.

⁹ Roma Gavana Pontio Pilato ia diba Iesu be kerere ta ia karaia lasi, unai dainai ia ura ia ruhaia. Ia gwau: “Inai tauna be kerere ta ia karaia lasi ia mase totona.” To, gwaumaoro ia henia Iesu idia hamasea totona. Dahaka dainai unai bamona ia karaia? Badina Pilato be taunimanima ia gari henia bona edia hereva ia badinaia. (Luka 23:15, 21-25) Idia ese Pilato idia doria edia ura gauna do ia karaia totona bona idia boiboi, idia gwau: “Bema inai tauna oi ruhaia, oi be Kaisara ena turana lasi”! (Ioa. 19:12) Reana Pilato ia gari badina bema Keriso ia ruhaia, ena dagi amo do idia kokia o do idia hamasea. Unai dainai, ia ese edia hereva ia badinaia bona Diabolo ena ura ia karaia.

10. Dahaka dainai Petero ia gwau Keriso ia diba lasi?

¹⁰ Aposetolo Petero be Iesu ena turana namona ta, bona mai gari lasi ida ma haida ia hadibaia Iesu be Mesia. (Mat. 16:16) Ena be hahediba taudia haida be Iesu ena hereva idia lalopararalaia lasi dainai ia idia rakatania, to Petero be Iesu ia rakatania lasi. (Ioa. 6:66-69) Bona Iesu ena inai taudia be ia abia totona idia mai neganai, Petero be Iesu ia gimaia totona ena tuari kaia ia gaukaralaia. (Ioa. 18:10, 11) To, gabeai ia be taunimanima ia gari henia dainai, ia gwau Iesu Keriso ia diba lasi. Oibe, taunimanima gari henia karana be tarapu ta bamona, bona aposetolo Petero be nega kwadogina lalonai unai tarapu lalonai ia moru.​—⁠Mat. 26:74, 75.

11. Edena tarapu ita dadaraia be namo?

¹¹ Namona be Keristani taudia ibounai idia gaukara goada, ma haida edia laloani herevadia idia dadaraia totona. Reana ofesi dekenai iseda bosi o ma haida be ita idia doria ita henaohenao o matabodaga karadia ita karaia totona. Keristani matamata taudia be edia sikuli turadia ese idia doria eksam lalonai idia koikoi, ponografi idia itaia, kuku o drag dikadia idia ania, kekero muramura idia inua, o matabodaga karadia idia karaia totona. Taunimanima ita gari henia bona edia laloani herevadia ita badinaia be tarapu ta. Dahaka ese ita do ia durua unai tarapu ita dadaraia totona?

12. Pilato bona Petero edia sivarai amo dahaka gaudia ita dibaia?

¹² Pilato bona Petero edia haheitalai amo dahaka gaudia ita dibaia? Pilato be Keriso ia diba namonamo lasi. Ia diba Iesu be kerere ta ia karaia lasi, bona ia be ma haida bamona lasi. To, Pilato be hekokoroku tauna bona Dirava momokanina ia lalokau henia lasi. Unai dainai, ia auka lasi Diabolo ese Pilato ia veria iena ura gauna ia karaia totona. Petero be hereva momokani ia diba bona Dirava ia lalokau henia. To, nega haida Petero ia hekokoroku, taunimanima ia gari henia bona edia hereva ia badinaia. Iesu idia do dogoatao lasi neganai, Petero ia gwau: “Ena be idia ibounai do idia moru, to lau be do lau moru lasi.” (Mar. 14:29) Bema Petero be Salamo torea tauna bamona Dirava dekenai ia tabekau, gabeai idia vara hahetoho ia hanaia diba. Salamo torea tauna, ia gwau: “Lohiabada be lau dekenai ia noho, vadaeni lau gari lasi. Taunimanima be edena bamona lau do idia hadikaia diba?” (Sal. 118:6) Iesu ena hanuaboi ginigabena ai, ia be Petero bona aposetolo ma rua ida Getesemane umana dekenai idia lao. Iesu ese ia hamaorodia  do idia noga noho, to Petero bona unai aposetolo rua be idia mahuta. Iesu ese idia ia hanogaia bona, ia gwau: “Namona be umui gima noho bona umui guriguri, unai amo hedibagani lalonai do umui vareai lasi.” (Mar. 14:38) To Petero ia mahuta lou, bona gabeai taunimanima ia gari henia dainai ia gwau Iesu ia diba lasi.

13. Edena dala ai taunimanima edia laloani herevadia ita dadaraia diba?

¹³ Pilato bona Petero edia sivarai amo ita ese mai anina bada gauna ma ta ita dibaia: Taunimanima ita gari henia lasi bona edia laloani herevadia ita dadaraia totona, namona be diba ita abia, ita manau, Dirava ita lalokau bona gari henia. Bema Baibel amo diba maorona ita abia, mai gari lasi ida ma haida vairanai eda abidadama ita herevalaia diba. Unai ese ita do ia durua taunimanima gari henia karana ita dadaraia totona. Namo lasi ita laloa, ita sibona eda goada be hegeregere. Namona be ita manau bona ita laloparara, taunimanima edia laloani herevadia ita dadaraia totona, Dirava ena heduru ita abia be gau badana. Namona be Iehova ena lauma helaga totona ita guriguri. Bona Dirava ita lalokau henia dainai, ena taravatu ita badinaia bona namo lasi eda kara dainai, taunimanima ese Iehova ena ladana idia hadikaia. Danu, hahetoho ita do davaria lasi neganai ita hegaegae be namo. Hegeregere, eda natudia ida do ita guriguri hebou, bona ita hadibadia hahetoho idia davaria neganai dahaka idia karaia be namo.​—⁠2 Kor. 13:7. a

EDA KERERE DAINAI ITA MAMIA HEMARAI KARANA DADARAIA

14. Satani ia ura eda kerere gunadia dainai dahaka ita mamia?

¹⁴ Nega haida labana tauna ese animal ia raka loaloa gabuna ai, nadi metauna be au ta dekenai ia tauadae, bona tano dekenai waia ta ia atoa. Bema animal ese unai waia ia moia, unai nadi be animal latanai ia moru bona ia hamasea. Bema kerere ta ita karaia dainai ita hemarai bada bona lalomanoka, reana ita mamia nadi ta be ita latanai ia moru, bona ita ia “botaia patapata” bamona. (Salamo 38:3-5, 8 duahia.) Satani ia ura do ita laloa, ita be goevadae lasi taudia bona Iehova ese ita ia hebogahisi henia diba lasi, bona ita hegeregere lasi Dirava ena taravatu do ita badinaia totona.

15, 16. Edena dala ai emu kerere dainai oi mamia hemarai bona lalomanoka karana oi dadaraia diba?

¹⁵ Edena dala ai emu kerere dainai oi hemarai bada bona lalomanoka karana oi dadaraia diba? Bema kerere ta oi karaia, karaharaga emu hetura karana Iehova ida oi hanamoa lou be namo. Elda taudia dekenai oi lao bona oi noidia oi idia durua totona. (Iam. 5:14-16) Kara haida oi karaia unai kerere oi hamaoromaoroa totona. (2 Kor. 7:11) Bema matahakani oi abia, oi lalomanoka lasi. Iehova ese matahakani ia henia neganai, ia hahedinaraia oi ia lalokau henia. (Heb. 12:6) Namona be emu lalona oi hadaia unai kara dika do oi karaia lou lasi, bona unai kara dekenai oi idia veria lao karadia oi dadaraia danu. Oi helalo-kerehai, emu kara dika oi rakatania bona Dirava ese ia moalelaia karadia oi karaia neganai, namona be oi abia dae momokani Iesu Keriso ena boubou gauna amo Dirava ese emu dika ia gwauatao diba.​—⁠1 Ioa. 4:9, 14.

¹⁶ Ena be Dirava ese haida edia kerere ia gwauatao vadaeni, to idia do lalohisihisi noho. Bema emu hemami be unai bamona, namona be oi laloatao Iesu be ena inai taudia ese idia dogoatao hanuaboina ai, Petero bona aposetolo ma haida be Iesu idia rakatania, to Iehova ese edia kara dika ia gwauatao. Danu, kongrigeisen lalonai tau ta be matabodaga kara dika rohorohona ia karaia dainai idia atoa siri, to gabeai ia helalo-kerehai bona Iehova ese ena dika ia gwauatao. (1 Kor. 5:1-5; 2 Kor. 2:6-8) Baibel lalonai ita duahia, haida be kerere badadia idia karaia to idia helalo-kerehai neganai, Dirava ese edia kara dika ia gwauatao.​—⁠2 Siv. 33:2, 10-13; 1 Kor. 6:9-11.

17. Edena dala ai Iesu ena mauri davalaia boubouna be oi ia durua diba?

 ¹⁷ Iehova ese emu kerere do ia gwauatao bona laloaboio, bema oi helalo-kerehai bona oi abia dae momokani oi do ia hebogahisi henia. To oi laloa, Iesu ena mauri davalaia boubouna be hegeregere lasi, Iehova ese emu dika ia gwauatao totona, a? Bema emu hemami be unai bamona, oi be Satani ena tarapu ma ta lalonai oi moru vadaeni. Diabolo ia ura ita laloa, Iesu ena boubou gauna be hegeregere lasi, Iehova ese iseda dika ia gwauatao totona. To, bema kerere idia karaia taudia idia helalo-kerehai, Dirava ese edia dika ia gwauatao diba. (Aon. 24:16) Iesu ena mauri davalaia boubouna oi abidadama henia neganai, unai ese oi do ia durua oi hemarai bona lalomanoka lasi totona. Danu, oi do ia hagoadaia mai emu kudouna, lalona bona mauri ibounai ida Dirava oi hesiai henia totona.​—⁠Mat. 22:37.

SATANI ENA TARAPU IDAUIDAU ITA DIBA

18. Edena dala ai Diabolo ena tarapu idauidau ita dadaraia diba?

¹⁸ Satani be edena dala ai ita ia tarapua be ia laloa bada lasi. Iena ura badana be ita do ia tarapua bona iena ura do ita karaia. To, ita be Satani ena tarapu idauidau ita diba dainai, ita do ia hadarerea lasi. (2 Kor. 2:10, 11) Bema Dirava ena heduru o aonega totona ita guriguri, Satani ena tarapu lalonai do ita moru lasi. Aposetolo Iamesi ia gwau: “Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be mai hariharibada ida taunimanima ibounai dekenai ia henia, bona ia gwau henidia lasi.” (Iam. 1:5) Bema ita ura Iehova ese ita dekenai aonega ia henia eda hahetoho ita haheaukalaia totona, namona be hanaihanai Baibel ita stadilaia bona eda mauri lalonai ena hakaua herevadia ita badinaia. Danu, igui hesiai tauna ese ia halasia buka bona magasin amo ita dekenai Diabolo ena tarapu idauidau ia hadibaia, bona ita ia durua ita dadaraidia totona.

19, 20. Dahaka dainai kara dika ita inai henia be namo?

¹⁹ Guriguri bona Baibel stadilaia karana ese ita do ia durua kara maoromaoro ita ura henia totona. To, gau badana be kara dika ita inai henia danu. (Sal. 97:10) Sibona eda ura ita badinaia dainai idia vara diba hekwakwanai ita lalodia guna neganai, unai ese ita ia durua kara dikadia ita dadaraia totona. (Iam. 1:14, 15) Namona be kara dika ita inai henia bona kara namo ita ura henia. Unai amo Satani ese ia gaukaralaia tarapu idauidau be iseda lalona do idia veria lasi.

²⁰ Ita moale badina Dirava ese ita ia durua Satani ena tarapu idauidau ita dadaraia totona! Iehova be iena lauma helaga, iena Hereva bona iena orea ia gaukaralaia, “Dika Tauna” amo ita ia hamauria totona. (Mat. 6:13) Stadi gabena ai, Diabolo ese ia gaukaralaia tarapu idaudia rua do ita herevalaia.

[Footnote]

[Study Questions]

[Picture on page 21]

Bema eda hereva ita naria namonamo lasi, ita be kongrigeisen lalonai lahi ita karaia bamona

[Picture on page 24]

Emu kerere dainai oi mamia hemarai be nadi metauna ta bamona, to oi kokia diba