1. Iehova ena hesiai taudia haida be edena henanadai idia gwauraia?

 LAGANI momo lalonai Iehova ia hesiai henia bona hekwakwanai momo ia haheaukalaia taihu burukana ta ia henanadai, “Lau do mauri noho lalonai dokona do ia ginidae, eiava?” Lagani momo lalonai Iehova idia hesiai henia taudia haida danu be unai bamona idia henanadai. Ita be Dirava ese gau ibounai do ia hamatamataia bona hari ita davaria hekwakwanai do ia haorea negana, ita naria noho. (Apok. 21:5) Badina momo dainai ita abia dae Satani ena tanobada dikana be kahirakahira do ia ore, to mai haheauka ida unai dina ita naria noho be mai ena hekwarahi.

2. Edena henanadai edia haere do ita tahua?

² Baibel ia gwau ita haheauka be namo. Namona be mai haheauka ida Iehova ese ia makaia negana ita naria, bona ita abia dae momokani ia gwauhamatalaia gaudia do ia hagugurua. Unai bamona ita karaia neganai, idaunegai abidadama taudia bamona, Dirava ese ia gwauhamatalaia gaudia do ita abia. (Heberu 6:11, 12 duahia.) Iehova be haheauka karana ia hahedinaraia danu. Ia ese kara dika be idaunegai ia haorea diba, to ia be nega maorona ia naria noho. (Roma 9:20-24) Dahaka dainai ia haheauka? Edena dala ai Iesu be ena Tamana ena haheauka karana ia tohotohoa? Bona edena dala ai ita dekenai Iesu be haheitalai namona? Dahaka dainai Iehova bamona ita haheauka be namo? Reana nega haida ita laloa Iehova be ia metairametaira bona kara ta do ia karaia haraga lasi. To, ataiai ita herevalaia henanadai edia haere ita diba neganai, unai ese iseda haheauka bona abidadama karana do ia hagoadaia.

3, 4. (a) Dahaka dainai Iehova be haheauka karana ia hahedinaraia? (b) Adamu bona Heva idia gwau-edeede neganai, Iehova be dahaka ia karaia?

³ Iehova be guba bona tanobada ia lohiaia tauna maorona  bona bema ia ura, hekwakwanai ibounai ia haorea haraga diba. To, ia be badina namona ta dainai ia haheauka noho. Eden umana ai ia vara gwau-edeede karana dainai, henanadai badadia haida idia vara bona guba bona tanobada taudia ibounai dekenai edia haere be mai anina bada. Iehova ia haheauka badina ia diba nega bada lalonai, unai henanadai do ia haerelaidia be namo. Iehova be guba bona tanobada ai idia noho taudia ibounai edia lalohadai bona kara ia diba dainai, ia karaia gaudia ese ita dekenai namo do idia mailaia.​—⁠Heb. 4:13.

⁴ Iehova ena ura be Adamu bona Heva edia natudia ese tanobada do idia hahonua. Satani ese Heva ia dibagania, bena Adamu ia gwau-edeede neganai, Dirava be ena ura ia haidaua lasi. Ia daradara lasi, kara ta ia karaia kava lasi, bona taunimanima ia dadaraia lasi. To, Dirava ese taunimanima bona tanobada totona ena ura do ia hagugurua dalana be ia abia hidi vadaeni. (Isa. 55:11) Iehova ia haheauka bona sibona ena kara ia biagua dainai, iena ura ia hagugurua diba bona do ia hamomokania iena lohia dalana be maoro. Danu, lagani tausen momo lalonai ia naria vadaeni, ena palani ena kahana haida ia hagugurua totona.

5. Iehova ia haheauka dainai, taunimanima be dahaka hahenamo idia davaria diba?

⁵ Iehova ia haheauka ena badina ta be, ia ura momo ese mauri hanaihanai do idia abia. Hari, ia be “hutuma bada” taudia edia roho mauri dalana ia hegaegaelaia noho. (Apok. 7:9, 14; 14:6) Iseda haroro gaukara amo Iehova be taunimanima ia boiria, iena Basileia bona ena kara maoromaoro taravatudia idia dibaia totona. Taunimanima dekenai Basileia ena sivarai be “sivarai namona.” Oibe, unai be sivarai namo hereana! (Mat. 24:14) Iehova ese ia veria mai taudia ta ta be tanobada hegegemadai oreana lalonai idia vareai, bona kara maoromaoro idia ura henia taudia idia bamoa. (Ioa. 6:44-47) Iseda lalokau Diravana ese unai gaudia ibounai ia karaia, badina ia ura taunimanima ia durua iena lalonamo idia abia totona. Danu, ia be taunimanima haida ia abia hidi ena guba gavamani lalonai idia lohia totona. Unai taudia be guba ai idia lohia neganai, tanobada ai idia noho kamonai taudia do idia durua idia goevadae, bona mauri hanaihanai idia abia totona. Unai dainai Iehova be ia haheauka noho lalonai, ia gaukara goada ena gwauhamata ia hagugurudia totona. Unai be iseda namo dainai ia karaia.

6. (a) Noa ena negai, edena dala ai Iehova ese haheauka karana ia hahedinaraia? (b) Hari, edena dala ai Iehova ese haheauka karana ia hahedinaraia noho?

⁶ Ena be ma haida ese Iehova idia habadua karadia idia karaia, to ia do haheauka noho. Hegeregere, Noa ena negai gwau-edeede taudia dekenai ia karaia karana mani ita laloa. Iehova ena “lalohisihisi be ia bada momokani,” badina tanobada ai matabodaga bona dagedage karadia idia bada herea, bona taunimanima idia ura kara dika sibona idia karaia. (Gen. 6:2-8) Dirava ese unai kara dika ia raraia sibona lasi, to ena lalona ia hadaia Abata do ia mailaia, bona gwau-edeede taudia ibounai do ia haorea. Iehova be mai haheauka ida Abata ia naria noho lalonai, Noa bona ena famili edia roho mauri dalana ia hegaegaelaia. (1 Pet. 3:20) Nega maorona ai, Iehova ese Noa ia hamaoroa Abata be do ia mai bona Noa dekenai lagatoi karaia dalana ia hadibaia. (Gen. 6:14-22) Danu, Iehova ia ura Noa ese ma haida ia hadibaia, kahirakahira Dirava ese Abata badana do ia mailaia. Baibel ia gwau, Noa be “kara maoromaoro ia harorolaia tauna.” (2 Pet. 2:5) Iesu ia gwau iseda nega be Noa ena nega bamona. Iehova be inai tanobada dikana do ia haorea negana ia makaia vadaeni, to unai “dina bona hora” be ta ia diba lasi. (Mat. 24:36) Hari inai negai, Iehova ese ita dekenai gaukara ia henia taunimanima dekenai roho mauri dalana ita harorolaia totona.

7. Iehova be ia metairametaira bona ena gwauhamata ia hagugurudia haraga lasi, a?

⁷ Unai ese ia hahedinaraia Iehova ia haheauka noho lalonai ia be gaukara ma haida ia karaia danu. Namo lasi ita laloa, ia be ita ia laloa bada  lasi eiava ia ura lasi ita ia durua. Unai be lalohadai kererena! To, inai tanobada dikana lalonai, ita buruka ita lao eiava hekwakwanai ita davaria neganai, reana unai bamona ita laloa diba. Reana, ita lalomanoka o ita laloa Dirava be ia metairametaira bona ena gwauhamata ia hagugurudia haraga lasi. (Heb. 10:36) To, namona be inai ita laloatao: Iehova be badina namodia dainai ia haheauka noho, bona inai nega ia gaukaralaia ena hesiai taudia ia durua totona. (2 Pet. 2:3; 3:9) Hari, ita be Iesu ese ena Tamana ena haheauka karana ia tohotohoa dalana do ita herevalaia.

8. Edena dala ai Iesu ese haheauka karana ia hahedinaraia?

⁸ Idaunega amo ema bona hari, Iesu be mai moale ida Dirava ena ura ia karaia noho. Satani ia gwau-edeede neganai, Iehova be ena lalona ia hadaia ena Natuna be tanobada do ia mai bona Mesia ai do ia lao. Mani oi laloa, Iesu be mai haheauka ida lagani tausen momo lalonai tanobada dekenai do ia mai negana ia naria. (Galatia 4:4 duahia.) Ia naria noho lalonai ia noho kava lasi. To, ena Tamana ese ia henia gaukarana ia karaia goadagoada. Danu tanobada ia mai neganai, ia diba peroveta herevadia hegeregerena, Satani ese iena mase dalana do ia karaia. (Gen. 3:15; Mat. 16:21) Ia be hisihisi bada ia haheaukalaia ela bona ia mase, badina ia diba unai be Dirava ena ura. Ena be ia be Dirava ena Natuna, to ia manau bona mai ura bada ida hisihisi ia haheaukalaia. Oibe, Iesu be Dirava ia badinaia goevagoeva, bona ia ita tohotohoa be namo.​—⁠Heb. 5:8, 9.

9, 10. (a) Iesu be Iehova ia makaia negana ia naria noho lalonai, dahaka ia karaia? (b) Edena dala ai Iesu ena haheitalai ita tohotohoa diba?

⁹ Iesu be ia toreisi lou murinai, Dirava amo siahu ia abia gau ibounai guba bona tanobada ai ia naria totona. (Mat. 28:18) Iesu ese nega ibounai unai siahu ia gaukaralaia Iehova ese ia makaia negana ai, Iehova ena ura ia hagugurua totona. Iesu be mai haheauka ida Dirava ena idibana kahanai ia helai bona ia naria ela bona lagani 1914 ai, Dirava ese siahu ia henia ena inai taudia ia hahemaoro henia totona. (Sal. 110:1, 2; Heb. 10:12, 13) Kahirakahira ia ese Satani ena tanobada do ia haorea. To ia naria noho lalonai, Iesu be taunimanima ia durua, unai amo Dirava ena lalonamo idia abia bona “mauri ranuna” dekenai ia hakaudia lao.​—⁠Apok. 7:17.

¹⁰ Edena dala ai Iesu ena haheitalai oi tohotohoa diba? Iesu ia diba Iehova be ena ura do ia hagugurua negana ia makaia vadaeni. Ena be Iesu ia ura Tamana ena ura ia karaia, to ia naria ela bona Dirava ese ia makaia negana ia ginidae. Satani ena tanobada dikana do ia ore negana ita naria noho lalonai, ita haheauka be namo. Namona be Dirava ita naria bona hekwakwanai idia vara neganai, ita hesiku haraga lasi. Dahaka ita karaia diba ita haheauka totona?

11. (a) Edena dala ai abidadama bona haheauka karana idia gaukara hebou? (b) Dahaka dainai iseda abidadama ia goada diba?

¹¹ Iesu be tanobada ia do mai lasi neganai, peroveta taudia bona abidadama taudia ma haida ese edia kara amo idia hahedinaraia, goevadae lasi taudia be mai haheauka ida idia naria diba. Edia abidadama ia goada dainai, haheauka karana idia hahedinaraia. (Iamesi 5:10, 11 duahia.) Bema Iehova ena gwauhamata herevadia idia abidadama henia lasi, idia be mai haheauka ida unai gwauhamata edia guguru negana do idia naria lasi. To, hekwakwanai bona hahetoho badadia idia haheaukalaia, badina idia abia dae momokani Iehova be ena gwauhamata do ia hagugurudia. (Heb. 11:13, 35-40) Baibel ese ia hahedinaraia, hari inai negai iseda abidadama hagoadaia gaudia be momo. Iesu be iseda ‘abidadama ia Hagugurua Tauna.’ (Heb. 12:2) Ia ese peroveta herevadia momo ia hagugurua, bona ita ia durua Dirava ena ura ita lalopararalaia totona.

12. Dahaka ita karaia diba eda abidadama ita hagoadaia totona?

 ¹² Dahaka ita karaia diba eda abidadama ita hagoadaia bona ita haheauka noho totona? Gau badana ta be Dirava ena hadibaia herevadia ita badinaia. Hegeregere, emu mauri lalonai Basileia do oi atoa guna ena badina oi laloa dobu be namo. Mataio 6:33 ena hakaua herevana oi badinaia totona, gau haida oi karaia diba, a? Reana emu haroro horadia oi habadaia, eiava emu mauri lalonai gau haida oi haidaua diba. Reana Iehova ese emu hekwarahi ia hanamoa vadaeni, badina oi be iena hadibaia herevadia oi badinaia. Reana ia ese dala ia kehoa Baibel stadi matamata ta oi davaria totona, eiava oi ia durua “Dirava ena maino, laloparara ibounai ia hereaia gauna” oi abia totona. (Filipi 4:7 duahia.) Unai hahenamo idauidau oi laloa neganai, do oi laloparara oi haheauka noho be mai ena namo.​—⁠Sal. 34:8.

13. Edena haheitalai ese abidadama bona haheauka karana idia gaukara hebou dalana ia hahedinaraia?

¹³ Haheitalai ta ese ita do ia durua, abidadama bona haheauka karana idia gaukara hebou dalana ita lalopararalaia totona. Biru tauna be tano ia geia, uhe ia hadoa, bona uma anina ia gogoa gaukarana ia manadalaia neganai, gabeai uma badana do ia karaia. Ena be ia diba do ia naria daudau, to uma ia karaia badina ia diba momokani dokonai uma ena anina do ia gogoa. Unai hegeregerena, Iehova ena hadibaia herevadia ita dibaia, ita badinaia bona anina namona ita davaria neganai, iseda abidadama Iehova dekenai ia goada ia lao. Unai ese ita ia durua ita haheauka noho ela bona vaira negana ai hahenamo do ita abia.​—⁠Iamesi 5:7, 8 duahia.

14, 15. Taunimanima idia davaria hisihisi be edena bamona ita laloa be namo?

¹⁴ Danu, Iehova ena lalohadai ita bona tanobada dekenai ita lalopararalaia neganai, ita haheauka diba. Hegeregere, taunimanima be hisihisi idia davaria neganai, Iehova be dahaka ia laloa? Nega daudau lalonai, Iehova ia itaia taunimanima be hisihisi idia davaria noho bona  unai ese ena lalona ia hahisia. Ena be ia lalohisihisi, to unai ese ia koua lasi kara namodia ia hahedinaraia noho totona. Iehova ese ena Natuna ia siaia “Diabolo ena gaukara ibounai,” bona Satani ese taunimanima dekenai ia havaraia hisihisi ibounai ia haorea totona. (1 Ioa. 3:8) Oibe, kahirakahira Dirava ese hisihisi ibounai do ia haorea vaitani. Unai dainai, ita ura lasi inai tanobada ena kara dika ese iseda abidadama ia hamanokaia. Namo lasi Iehova ena dina ita naria noho lalonai ita hesiku haraga. Danu, namona be Dirava ena gwauhamata ita abidadama henidia. Iehova ese nega ia makaia vadaeni kara dika do ia haorea totona, bona unai nega ai iena ura do ia hagugurua.​—⁠Isa. 46:13; Nah. 1:9.

¹⁵ Inai dina gabedia ai, reana hekwakwanai badadia haida do ita davaria bona unai ese iseda abidadama do ia tohoa. Reana ita bona eda lalokau taudia be dagedage karadia o hekwakwanai ma haida ita davaria. Namo lasi ita badu bona kara ta ita karaia, to namona be gau ibounai be Iehova ena imana ai do ita rakatania. Ita be goevadae lasi taudia dainai, unai bamona ita karaia be mai ena hekwarahi. To, namona be Mataio 26:39 (duahia) ena hereva ita laloatao, bona Iesu ita tohotohoa.

16. Dokona ita naria noho lalonai, dahaka ita karaia be namo?

¹⁶ Dokona do ia mai karana ia daradaralaia tauna be lalohadai kererena ia abia unai. Reana ia laloa sibona ena palani ia karaia be namo, badina Iehova ena gwauhamata be idia do guguru lasi. Reana do ia gwau, ‘Do lau naria bona itaia, Iehova be ena gwauhamata hegeregerena kara ta do ia karaia o lasi.’ Unai lalohadai kererena ese unai tauna ena haheauka karana ia hadikaia diba. Bena ia be inai tanobada ai dagi bada do ia tahua, moni do ia abidadama henia bona Dirava ena Basileia do ia dadaraia. Eiava reana ia ura iunivesiti dekenai ia lao, badina ia ura moni gaukara namona ia abia bona mauri namona do ia moalelaia. To, unai ese ia hahedinaraia unai tauna ena abidadama be ia manoka vadaeni. Idaunegai, haida be edia “abidadama bona haheauka” karana dainai, Iehova ese ia gwauhamatalaia hahenamodia idia abia. Paulo ese ita ia hagoadaia idia ita tohotohoa totona. (Heb. 6:12) Iehova ese ena lalona ia hadaia inai tanobada dikana do ia haorea totona, bona do ia leiti lasi. (Hab. 2:3) To, unai nega ita naria noho lalonai, namona be ita gaukara goada Iehova ena ura ita karaia noho totona. Namona be ita laloatao, ita be dina gabediai ita noho bona eda haroro gaukara ita habadaia be namo. Unai gaukara amo moale bada ita davaria diba.​—⁠Luka 21:36.

17, 18. (a) Mai haheauka ida ita naria noho lalonai, dahaka ita karaia be namo? (b) Bema ita haheauka, dahaka namo do ita davaria?

¹⁷ Herevana ita be hua haida sibona o lagani momo lalodiai Dirava ita hesiai henia, to ita ura unai do ita karaia noho ela bona hanaihanai. Herevana do ita naria daudau, to haheauka karana ese ita do ia durua ita naria noho ela bona inai tanobada ena dokona. Iehova be ita dekenai nega ia henia unai amo do ita hamomokania, ita be iena gwauhamata ita abidadama henia, bona ena be hisihisi ita davaria to ia do ita badinaia noho. (1 Pet. 4:13, 14) Danu, Dirava be ita ia hadibaia noho, unai amo do ita haheauka ela bona dokona, bena do ita roho mauri.​—⁠1 Pet. 5:10.

¹⁸ Iesu be guba bona tanobada ia biagua, bona bema ia oi abidadama henia ia ese oi do ia gimaia bona gau ta ese oi do ia hadikaia lasi. (Ioa. 10:28, 29) Vaira negana o mase dainai do ita gari lasi. Idia haheauka ela bona dokona taudia be do idia mauri. Unai dainai, namo lasi inai tanobada ena laloa dalana ese iseda lalohadai bona abidadama karana Iehova dekenai ia hadikaia. Dirava ia do haheauka noho lalonai, namona be iseda lalona ita hadaia eda abidadama do ita hagoadaia, bona aonega dalanai eda nega do ita gaukaralaia.​—⁠Mat. 24:13; 2 Petero 3:17, 18 duahia.