1. “Hutuma bada” taudia ese dahaka do idia moalelaia?

 KARA maoromaoro bona hebogahisi gavamani siahuna ta ese lagani 1,000 lalonai, taunimanima dekenai gau namodia momo do ia mailaia. Unai gau namodia be “hutuma bada” taudia ese do idia moalelaia. Inai tanobada dikana be “hisihisi badana” ai do ia ore, to hutuma bada taudia be do idia roho mauri.​—⁠Apok. 7:9, 14.

2. Idia hanaia lagani 6,000 lalonai, taunimanima edia mauri be edena bamona?

² Idia hanaia lagani 6,000 lalonai taunimanima be sibona idia lohiaia, to hisihisi bada idia davaria noho. Idaunegai Baibel ia gwau: “Taunimanima haida ese ma haida idia biagua noho, bona idia hisihisi henidia noho.” (Had. 8:9) To, hari be edena bamona? Tuari bona gwau-edeede karadia, ogogami, gorere, tanobada hadikaia karadia, siahu bona keru negadia idia idau, bona hekwakwanai ma haida idia vara noho. Gavamani taudia idia gwau, bema tanobada hadikaia karadia ita hadokoa lasi, dika bada do ia vara.

3. Lagani 1,000 Lohia Negana lalonai dahaka do ia vara?

³ Mesia Basileiana ena King, Iesu bona 144,000 taudia idia lohia neganai, tanobada hadikaia karadia bona taunimanima dekenai idia vara dika ibounai be do idia ore. Lagani 1,000 Lohia Negana lalonai, Iehova Dirava ena gwauhamata be do ia guguru. Ia gwau: “Lau ese tanobada matamata bona guba matamata lau karaia noho, bona kara gunadia be do idia laloa lou lasi, do idia laloaboio momokani.” (Isa. 65:17) Vaira negana ai dahaka gau namodia do idia vara? Baibel ena peroveta herevadia ese ita idia durua, unai hahenamo idauidau ita lalopararalaia totona, ena be ita do “itaia lasi” o idia do vara lasi.​—⁠2 Kor. 4:18.

4. Hari, momo be edeseni idia noho?

⁴ Taunimanima ibounai idia ura idia bona edia famili be sibodia edia ruma ai do idia noho, bona gau ta dainai do idia gari lasi. To hari, taunimanima be sibodia edia ruma idia abia be auka. Hutuma be siti dekenai idia noho. Momo be setelmen ai ruma dikadia ai idia noho, eiava ruma tamona lalonai bese rua o toi idia noho. Madi, ena be momo idia ura sibodia edia ruma idia abia, to idia hegeregere lasi.

5, 6. (a) Edena dala ai Isaia 65:21 bona Mika 4:4 edia hereva do ia guguru? (b) Edena dala ai unai hahenamo ita abia diba?

⁵ Mesia Basileiana ia lohiaia neganai, taunimanima ibounai be sibodia edia ruma ai do idia noho. Peroveta tauna Isaia ia gwau: “Idia ese edia ruma do idia haginia, bona unai ruma lalonai do idia noho. . . . Bona idia ese vain umadia do idia hadoa, vadaeni vain ena anina, uaina do idia inua.” (Isa. 65:21, 22) To unai sibona lasi, idia be gau namodia ma haida do idia moalelaia danu. Hari, taunimanima haida be sibodia edia ruma ai idia noho, bona haida be mai edia ruma badadia. To idia lalohekwarahi, badina reana gabeai edia moni be hegeregere lasi, unai ruma idia noholaia totona. Eiava, idia lalohekwarahi dika raskol taudia ese edia ruma idia makohia bona kohu idia henaoa. To, Mesia Basileiana ia lohia neganai, ta be unai gaudia do ia lalohekwarahilaia lasi. Peroveta tauna Mika ia gwau: “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.”​—⁠Mika 4:4.

⁶ Dahaka ita karaia be namo Basileia henunai ita noho totona? Momokani, ita ibounai ita ura sibona eda ruma ai ita noho. To, namo lasi ruma namona abia totona abitorehai badana ita karaia, bena davana ita haloua diba lasi. Namona be eda mauri dalana amo ita hahedinaraia, ita be Iehova ena gwauhamata ita naria noho. Iesu be sibona ia herevalaia, ia gwau: “Uda sisia be mai edia kohua bona guba manudia be mai edia ruma, to taunimanima ena Natuna ena kwarana ia atoa gabuna be lasi.” (Luka 9:58) Iesu be ruma hairaina ta ia haginia eiava ia hoia diba. To, dahaka dainai unai bamona ia karaia lasi? Badina ia ura lasi ena mauri lalonai Basileia atoa guna karana be gau ta ese ia koua. Namona be Iesu ena haheitalai ita tohotohoa, bona kohu momo lasi maurina ita noholaia.​—⁠Mat. 6:33, 34.

7. Iehova ese Adamu bona Heva dekenai dahaka oda ia henia?

⁷ Iehova ese tanobada ai gau ibounai ia havaraia murinai, taunimanima ia havaraia. Ia ese ena Gaukara Karaia Namonamo Tauna, Iesu dekenai taunimanima ia havaraia ena badina ia gwauraia. Ia gwau: “Taunimanima ita karaia namo, iseda toana bona iseda laulau hegeregerena. Davara gwarume bona ataiai manudia bona boromakau, bona tano dekenai idia rau gaudia ibounai, ia ese do ia biagua.” (Gen. 1:26) Dirava ese Adamu bona Heva ia oda henidia animal idia naria bona biagua totona. Gabeai, taunimanima ibounai ese unai idia karaia danu.

8. Hari inai negai, animal edia kara be edena bamona?

⁸ Taunimanima ese animal ibounai idia biagua bona maino ai idia noho diba, a? Momo be animal haida hegeregere, sisia bona pusikasi idia ura henia. To, uda ai idia noho animal be edena bamona? Saiens taudia haida be uda ai idia noho animal idia stadilaia, bona idia gwau animal haida be mai edia hemami. Ita diba animal be ma  haida ese idia hagaria neganai, idia heau o idia badu. To, lalokau idia hahedinaraia diba, a? Saiens taudia idia gwau, animal haida be edia natuna idia naria neganai, lalokau idia hahedinaraia.

9. Vaira negana ai, edena dala ai animal edia kara do ia idau?

⁹ Baibel ia gwau, taunimanima bona animal huanai maino do ia noho. Dahaka dainai unai hereva dekenai ita hoa lasi be namo? (Isaia 11:6-9; 65:25 duahia.) Ita laloatao Abata murinai, Noa bona ena ruma bese be lagatoi amo idia raka-lasi neganai, Iehova ese ia hamaorodia: “Tanobada ena boroma gaudia idauidau ibounai . . . be umui dekenai do idia gari.” Unai dainai, animal momo be sibona idia gimaia totona, taunimanima amo idia heau. (Gen. 9:2, 3) To, Iehova ese animal amo unai gari karana ia kokia diba, bena matamanai taunimanima bona animal huanai ia noho maino do ia vara lou. (Hos. 2:18) Tanobada ai do idia noho taudia ibounai dekenai, unai be moale negana!

10. Dahaka dainai taunimanima idia tai?

¹⁰ Solomona ia itaia taunimanima dekenai kara dika momo idia vara, bona idia ia durua tauna ta be lasi. Unai dainai, mai hebogahisi ida ia gwau: “Haida ese idia dagedage henidia taudia idia tai noho, bona tau ta ese ia durudia lasi.” (Had. 4:1) Hari, unai bamona kara dika be idia bada idia lao noho. Momokani, ita ibounai be badina idauidau dainai ita tai. Hegeregere, nega haida ita moale neganai ita tai, to nega momo ita lalohisihisi dainai ita tai.

11. Edena Baibel sivarai oi duahia neganai, oi hebogahisi bada?

¹¹ Baibel lalonai, taitai taudia edia sivarai momo idia noho. Hegeregere, Sara ena mauri lagani be 127 neganai ia mase, bona “Aberahamo be ruma dekenai ia raka vareai, Sara totona ia taitai.” (Gen. 23:1, 2) Naomi be ena ravana ruaosi ia bamahuta henidia neganai, “idia tai dikadika.” Bena Naomi ese idia ia hereva henia lou neganai, “idia taitai lou.” (Ruta 1:9, 14) King Hesekaia ia gorere bada herea bona toana be do ia mase neganai, Dirava ia guriguri henia bona “ia tai bada herea.” Iehova ese ena taitai ia kamonai bona ena gorere ia hanamoa. (2 Kin. 20:1-5) Bona aposetolo Petero ese Iesu ia gorea ena sivarai ita duahia neganai, ita hebogahisi danu. Petero be kokoroku ena boiboi ia kamonai neganai, “murimuri dekenai ia lao bona ia tai dikadika.”​—⁠Mat. 26:75.

12. Keriso ena Lagani 1,000 Lohia Negana lalonai, dahaka gaudia do ita moalelaia?

¹² Taunimanima dekenai gau dikadia momo idia vara dainai, ma haida ese idia durua bona hagoadaia be namo. Keriso ena Lagani 1,000 Lohia Negana lalonai, Dirava “ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.” (Apok. 21:4.) Ita moale badina unai nega ai, hisihisi ibounai do idia ore. Danu, do ita moale badina Dirava ia gwauhamata mase do ia haorea. Edena dala ai unai do ia vara?

13. Adamu ena kara dika dainai dahaka ia vara?

¹³ Adamu ia kara dika negana amo, mase be King ta bamona taunimanima ia lohiaia noho. Ita be mase amo ia heau mauri diba lasi. Kara dika taudia be mase idia koua diba lasi, bona mase ese lalohisihisi bona taitai bada ia havaraia. (Roma 5:12, 14) Taunimanima milioni momo be mase idia garilaia dainai, edia ‘mauri dinadia ibounai lalonai mase ena igui hesiai’ taudia ai idia lao bamona.​—⁠Heb. 2:15.

14. Mase do ia ore momokani neganai, dahaka do ia vara?

 ¹⁴ Baibel ese “mase . . . do ia ore momokani” negana ia herevalaia. (1 Kor. 15:26) Unai gwauhamata ese orea rua dekenai namo do ia havaraia. Hari idia mauri noho “hutuma bada” taudia, be tanobada matamatana lalonai do idia vareai. Bena unuseniai do idia mauri ela bona hanaihanai. Danu, mase taudia bilioni momo be do idia toreisi lou. Oibe, hutuma bada taudia be mai moale bada ida toreisi lou taudia do idia welkam henia! Baibel lalonai toreisi lou taudia edia sivarai ita duahia neganai, do ita laloparara vaira nega ai toreisi lou be unai bamona do ia vara danu.​—⁠Mareko 5:38-42; Luka 7:11-17 duahia.

15. Emu lalokau tauna ta ia toreisi lou oi itaia neganai, emu hemami be edena bamona?

¹⁵ Mani inai hereva oi laloa, “idia moale bada herea” bona “Dirava idia hanamoa matamaia.” Bema oi be Iesu ese unai taudia ia hatorea isi lou negana ai oi noho, reana oi danu be do oi moale bada. Oibe, iseda lalokau taudia be mase amo idia toreisi lou bona ita itadia neganai, do ita moale bada! Unai dainai Iesu ia gwau: “Nega ia mai noho, guria gabuna lalonai idia noho taudia ibounai ese ena gadona do idia kamonai, bona do idia raka-lasi.” (Ioa. 5:28, 29) Ita ese eda matana amo toreisi lou karana ta ita do itaia lasi. Unai dainai ia vara neganai, ia be hahenamo badana ta.

16. (a) Dahaka dainai mai lalogoada ida vaira negai do ita abia hahenamo, ita herevalaia be namo? (b) Paulo ese Korinto Keristani tadikaka dekenai dahaka hagoadaia herevana ia gwauraia?

¹⁶ Inai nega dikana ai, Iehova idia abidadama henia taudia be vaira neganai mauri namona do idia moalelaia! Ena be vaira nega ai do idia vara  hahenamo ita do itaia lasi, to ita lalodia noho be namo. Unai ese ita do ia durua, mai anina bada gaudia ita atoa guna, tanobada ena lalona veria gaudia ita dadaraia, bona Iehova ita hesiai henia noho totona. (Luka 21:34; 1 Tim. 6:17-19) Unai dainai, iseda ruma bese tomadiho lalonai, tadikaka taihu ida, Baibel stiuden taudia ida bona kamonai taudia ida ita herevahereva neganai, mai lalogoada ida iseda helaro ita herevalaia be namo. Unai amo iseda helaro do ita laloa noho. Aposetolo Paulo ese Keristani tadikaka be unai bamona ia hagoadaia. Iena hereva ese idia ia durua Keriso ena Lagani 1,000 Lohia Negana ena dokonai do idia vara gaudia idia laloa totona. Mani 1 Korinto 15:24, 25, 28 (duahia) ai, Paulo ese ia gwauraia herevadia edia anina oi laloa.

17, 18. (a) Matamanai, edena dala ai Iehova be “gau ibounai edia kwarana?” (b) Iesu be dahaka do ia karaia maino bona lalotamona ia havaraia lou totona?

¹⁷ Baibel ese lagani 1,000 dokonai do ita abia maurina ia herevalaia neganai, ia gwau, “Dirava be gau ibounai edia kwarana ai do ia lao.” Unai ena anina be dahaka? Mani oi laloa, guna Eden umana ai Adamu bona Heva be Iehova ena maino ruma besena lalonai idia noho. Iehova, Guba bona Tanobada edia Lohia Badana, be ia havaraia gaudia ibounai ia lohiaia. Idia be Iehova ida idia herevahereva, ia idia tomadiho henia bona ia ese ia hanamodia. Unai nega ai, Iehova be “gau ibounai edia kwarana.”

¹⁸ To, Satani ese Adamu bona Heva ia koia bona Iehova idia gwau-edeede henia neganai, edia hetura karana namona ia dika. Lagani 1914 amo, Mesia Basileiana be ia gaukara goada noho, maino bona lalotamona ia havaraia lou totona. (Efe. 1:9, 10) Keriso ena Lagani 1,000 Lohia Negana lalonai, eda matana amo ita do “itaia lasi gaudia” be do idia vara momokani. Bena Keriso ena Lagani 1,000 Lohia Negana ena dokona do ia ginidae. Vadaeni, unai neganai dahaka do ia vara? Ena be Iehova ese Iesu dekenai “siahu” ia henia guba bona tanobada gaudia ibounai ia naria totona, to Iesu ia ura lasi Iehova ena dagi do ia abia. Mai manau ida “ena Dirava bona Tamana dekenai basileia do ia henia hanai.” Iesu ese ena dagi bona siahu do ia gaukaralaia, ‘Dirava, iseda Tamana do ia hanamoa’ totona.​—⁠Mat. 28:18; Fili. 2:9-11.

19, 20. (a) Edena dala ai Mesia Basileiana henunai do idia noho taudia ese idia hahedinaraia, Iehova ena lohia siahuna idia abia dae? (b) Dahaka hahenamo idauidau be vaira negana ai do ita moalelaia?

¹⁹ Unai nega ai, Mesia Basileiana henunai do idia noho tanobada taudia be do idia goevadae. Idia ese Iesu ena haheitalai do idia tohotohoa, bona mai manau ida, Iehova ena lohia dalana do idia abia dae. Danu, hahetoho ginigabena do idia hanaia, bema idia hahedinaraia Iehova ena lohia siahuna idia abia dae. (Apok. 20:7-10) Unai murinai, gwau-edeede taudia ibounai​—⁠aneru o taunimanima​—⁠be Dirava ese do ia haorea vaitani. Unai be moale bada negana! Iehova ena bese taudia, guba bona tanobada ai be ia do idia hanamoa. Bona Iehova be “gau ibounai edia kwarana ai do ia lao” lou.​—⁠Salamo 99:1-3 duahia.

²⁰ Mesia Basileiana ese kahirakahira do ia mailaia hahenamo idauidau oi laloa neganai, oi idia hagoadaia Iehova ena ura oi karaia noho totona, a? Oi hekwarahi tanobada ena gau namodia oi dadaraia, bona Iehova ena hesiai gaukara oi karaia noho, a? Emu abia hidi Iehova ena lohia siahuna do oi durua totona, be ia goada noho, a? Namona be emu kara amo oi hahedinaraia oi ura unai do oi karaia noho. Unai bamona oi karaia neganai, lagani 1,000 lalonai maino bona noho namona do oi moalelaia ela bona hanaihanai!