December 2009 ai, Russia ena Suprim Kota ese hahemaoro ia karaia, Iehova ena Witnes taudia edia orea Taganrog ai do idia koua bona edia Kingdom Hall do idia abia. Danu ia gwau, iseda buka bona magasin idauidau 34 be gavamani gwau-edeede henia herevadia idia halasia. Unai hahemaoro herevana, bona idia lalohisihisi Witnes taudia edia laulau be Iehova ena Witnes taudia edia Web sait dekenai idia atoa. Unai laulau lalonai natudia haida idia hedinarai danu.

Hua haida murinai, Russia ai Administrative Center of Jehovah’s Witnesses be Queensland, Australia, ai idia noho famili ta amo boksi bona revareva ta idia abia. Unai famili be Web sait dekenai kota ena hahemaoro herevana idia duahia. Edia revareva ai idia gwau: “Tadikaka e, Russia tadikaka taihu ese mai abidadama ida edia hahetoho idia haheaukalaia karana ese emai natudia Cody bona Larissa edia kudouna ia hamarerea. Idia ruaosi ese kadi bona revareva haida idia torea, bona ai be harihari gaudia haida ai haboua bona Taganrog dekenai idia noho natudia totona ai siaia. Ai ura Taganrog ai idia noho natudia idia diba, tanobada ena kahana ma ta ai natudia haida danu be mai abidadama ida Iehova idia hesiai henia, bona idia lalodia noho. Emai natudia be edia lalokau idia siaia.”

Taganrog ai idia noho natudia be harihari gaudia idia davaria murinai, Australia ai idia noho famili dekenai edia tanikiu revareva idia siaia. Russia ena brens ofesi ai ia gaukara tadikaka ta be “natudia maragidia edia uduna amo” idia gwauraia hagoadaia herevadia ese ena kudouna ia hamarerea. Unai dainai, Cody bona Larissa dekenai revareva ia torea, ia gwau: “Taunimanima badadia bona natudia be kerere ta idia karaia lasi, to panisi idia abia neganai, idia moale lasi. Taganrog ai iseda tadikaka taihu be kerere ta idia karaia lasi, to edia Kingdom Hall idia abia bona unai dainai idia lalohisihisi. To, goada idia abia diba, bema idia itaia tanobada ena kahana ta ai ma haida be idia idia laloa noho. Emui lalokau bona hariharibada karana dainai, umui ai tanikiu henia!”​—Sal. 8:2.

Ita ibounai be tanobada hegegemadai tadikaka oreana lalonai ita noho, bona ta ta lalokau heheni karana ese ita ia durua hahetoho bona hekwakwanai ita haheaukalaidia totona. Kota dekenai ma haida idia gwau, Iehova ena Witnes taudia edia buka bona magasin ese ma haida inai henia herevadia idia halasia. Loea bona diadi taudia be unai hereva idia hepapahuahulaia noho, to iseda natudia ese mai manau ida idia hahedinaraia, idia be ma haida idia laloa bada, bona bese o kastom idauidau dainai parara karana idia dadaraia. Idia ese Iesu ena hereva idia hamomokania, ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.”​—Ioa. 13:35.