1. Aposetolo Paulo be Keristani ginigunadia ia tore henidia neganai, nega momo dahaka ia gwau?

 NEGA momo aposetolo Paulo be Keristani taudia ginigunadia ia tore henidia neganai, ia gwau ia ura kongrigeisen taudia be Dirava bona Keriso ese do idia abia dae diba lalohadaina idia hahedinaraia. Hegeregere, Galatia kongrigeisen dekenai ia gwau: “Tadikaka e, kara namodia umui hahedinaraia noho lalonai, namona be iseda Lohiabada Iesu Keriso ena hebogahisi hereadaena be umui ida ia noho. Amen.” (Gal. 6:18) Iena hereva, “kara namodia umui hahedinaraia noho” ena anina be dahaka?

2, 3. (a) Paulo ese inai hereva “lalohadai” ia gaukaralaia neganai, ia be dahaka ia herevalaia? (b) Ita ta ta ese edena henanadai ita lalodia be namo?

² Paulo ese inai hereva “lalohadai” ia gaukaralaia neganai, ia be iseda kara bona laloa dalana ia herevalaia. Lalohadai ese iseda hereva bona kara ia biagua. Hegeregere, reana tau ta be ia manau, ma haida ia laloa bada, ia hebogahisi, hariharibada bona ma haida edia dika ia gwauatao. Baibel ia gwau, “lalomanau bona dagedage lasi karadia” ita hahedinaraia bona ita “badu haraga lasi” be namo. (1 Pet. 3:4; Aon. 17:27) Hegeregere, ta be ena hereva dalana amo ma haida ia hahisia, ia badu haraga, moni ia laloa bada, eiava ia ura lasi sisiba ia kamonai. To, ma haida be matabodaga lalohadai idia abia, o Dirava idia gwau-edeede henia.

³ Unai dainai Paulo ese inai hereva, “Lohiabada be oi hahedinaraia laloa dalana ida ia noho” ia gwauraia neganai, ena tadikaka ia hagoadaia Keriso do idia tohotohoa, bona Dirava hamoalea karadia do idia karaia. (2 Tim. 4:22; Kolose 3:9-12 duahia.) Namona be ita sibona ita nanadaia: ‘Lau be edena bamona lalohadai lau hahedinaraia? Edena bamona egu lalohadai lau haidaua diba, Dirava lau hamoalea totona? Edena dala ai kongrigeisen taudia haida lau durua diba, Dirava hamoalea karadia idia karaia totona?’ Mani sanflaoa  ena uma gabu ta oi laloa. Flaoa ta ta be mai edia hairai bona edia kala ese uma ena toana ia hahairaia. Ita be unai sanflaoa ta bamona, a? Ita gaukara goada kongrigeisen ibounai ita hahairaia totona, a? Namona be ita hekwarahi unai bamona ita karaia totona. Inai stadi lalonai do ita itaia, edena dala ai Dirava hamoalea karadia ita karaia diba.

4. “Tanobada ena laloa dalana” be dahaka?

⁴ Baibel ia gwau: “Ita be tanobada ena laloa dalana ita abia lasi, to Dirava amo ia mai laumana ita abia, unai amo Dirava ese mai moale ida ita dekenai ia henia gaudia do ita diba.” (1 Kor. 2:12) “Tanobada ena laloa dalana” be dahaka? Ia be Efeso 2:2 ese ia herevalaia gauna hegeregerena, ia gwau: “Guna umui be inai nega oromana taudia ese idia karaia karadia umui badinaia, unai be taunimanima ia biagua hodahodana ena lohia tauna ena ura hegeregerena. Unai hodahoda eiava lalohadai be hari kamonai lasi taudia edia lalona dekenai ia gaukara.” Unai “hodahoda” o “tanobada ena laloa dalana” be tanobada taudia edia laloa dalana ia herevalaia. Hodahoda korikorina bamona, ia be gabu ibounai ia noho. Hegeregere, hari inai negai momo edia lalohadai be, ‘Lau ura lasi ta ese lau do ia hamaoroa dahaka do lau karaia!’ eiava ‘Oi be mai emu maoro, oi hereva be namo!’ Idia be tanobada ena “kamonai lasi taudia.”

5. Israela taudia haida be edena lalohadai kererena idia hahedinaraia?

⁵ Idaunega amo ema bona hari, taunimanima be unai bamona lalohadai idia abia. Mose ena negai, Kora be Israela gunalaia taudia ia gwau-edeede henidia. Hegeregere, ia ese hahelaga taudia​—Arona bona ena natudia​—ia gwauraia dika. Reana Kora ese edia kerere haida ia itaia. Eiava Kora ia laloa Mose ese idia dekenai maduna ia henia, badina idia be iena varavara. Kora be Iehova ese ia abia hidi taudia ia matauraia lasi, badina ia gwau: “Umui ruaosi ese mai hekokoroku danu ai umui gunalaia noho! . . . Badina dahaka umui ruaosi ese mai siahu bada danu Lohiabada ena orea taudia umui biagua noho?” (Num. 16:3) Datana bona Abirama danu be Mose dekenai idia maumau idia gwau, Mose ia ura idia do ia lohiaia. Mose ia ura idia do ia hereva henia neganai, idia gwau: “Do ai mai lasi.” (Num. 16:12-14) Iehova be unai gwau-edeede taudia edia lalohadai ia moalelaia lasi dainai, idia ibounai ia hamasea.​—Num. 16:28-35.

6. Aposetolo edia negai, tatau haida be edena lalohadai kererena idia abia? Bona dahaka idia karaia?

⁶ Aposetolo edia negai, tatau haida danu be “lohia taudia idia dadaraia.” Idia ese kongrigeisen idia gunalaia taudia idia hereva dika henidia. (Iuda 8) Idia laloa kongrigeisen lalonai idia ese maduna momo idia abia be maoro. Bona idia ese ma haida idia doria, Dirava ese ia abia hidi kongrigeisen gunalaia taudia idia matauraia lasi totona.​—3 Ioane 9, 10 duahia.

7. Edena lalohadai kererena dainai ita naria namonamo be namo?

⁷ Kongrigeisen lalonai unai bamona lalohadai ia noho lasi be namo. Unai dainai, namona be ita ibounai ese unai bamona lalohadai kererena ita dadaraia. Mose bona aposetolo Ioane edia negai idia noho tau badadia bamona, hari idia noho elda taudia be goevadae lasi taudia danu. Nega haida elda taudia be kerere idia karaia, bona unai ese ita ia hahisia diba. Bema ita dekenai unai bamona ia vara, namo lasi tanobada taudia edia lalohadai ita abia bona ita gwau, ‘Unai tadikaka idia hahemaoro henia be namo!’ Namona be ita laloatao, Iehova be elda taudia edia kerere maragidia ia laloaboio diba. Ita danu be unai bamona ita karaia diba, a? Nega haida elda taudia be kerere badadia ia karaia tauna durua totona idia lao neganai, kerere tauna ia ura lasi idia ida ia herevahereva, badina ia be unai elda taudia haida edia kara haida dekenai ia moale lasi. Unai be hegeregere, gorere tauna ta be ia ura lasi doketa ta amo muramura ia abia, badina ia be unai doketa ena kara ta ia ura henia lasi.

8. Edena siri ese ita idia durua elda taudia dekenai lalohadai maorona ita abia totona?

 ⁸ Unai bamona lalohadai kererena ita dadaraia totona, namona be ita laloatao Iesu ena “imana idibana ai hisiu 7 idia noho.” Unai “hisiu” be kongrigeisen lalonai idia noho elda taudia ibounai ia laulaulaia, bona Iesu ese ena ura hegeregerena ai ia gaukaralaidia diba. (Apok. 1:16, 20) Iesu be Keristani kongrigeisen ena Kwarana dainai, elda ibounai huanai dahaka ia vara be ia diba. “Iena matana be lahi ena hururuhururu bamona” bona gau ibounai ia itaia. Unai dainai, bema elda ta ia kerere, Iesu ese dala do ia karaia, unai amo nega korikorina bona dala maorona ai sisiba ia abia. (Apok. 1:14) To Iesu be unai ia do karaia lasi neganai, ena “imana idibana ai” idia noho hisiu, elda taudia unai, ita matauraia be namo. Paulo ia gwau: “Umui idia hakaua taudia do umui kamonai henia, bona idia henunai do umui noho, badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.”​—Heb. 13:17.

9. (a) Keristani tauna be sisiba ia abia neganai, reana dahaka lalohadai do ia abia? (b) Sisiba ita abia neganai, dahaka lalohadai maorona ita abia be namo?

⁹ Elda taudia ese ta idia sisiba henia o ena maduna idia kokia neganai, unai tauna ese do ia hahedinaraia diba ia be lalohadai maorona o kererena ia abia. Tadikaka matamatana ta be dagedage karadia idia hahedinaraia vidio gadara ia gadaralaia dainai, elda taudia ese mai manau  ida idia sisiba henia. To, ia be sisiba ia abia dae lasi bona Baibel ena taravatu ia badinaia lasi dainai, iena hesiai maduna idia kokia. (Sal. 11:5; 1 Tim. 3:8-10) Unai murinai, tadikaka be ma haida ia hamaoroa ia be elda edia abia hidi ia moalelaia lasi. Danu, ia ese brens ofesi dekenai revareva ia torea bona elda taudia ia gwauraia dika. Ma danu, kongrigeisen ai haida ia doria toho brens ofesi idia tore henia totona. Namona be ita laloatao, bema iseda kerere dainai ekskius momo ita gwauraia, unai ese kongrigeisen ena maino ia hadikaia diba bona ta do ia durua diba lasi. Danu, sisiba ita abia neganai, unai be nega namona iseda manoka gaudia ita diba, bona mai manau ida sisiba do ita abia dae.​—Lalohisihisi ena Ane 3:28, 29 duahia.

10. (a) Iamesi 3:16-18 ese edena dala ai lalohadai kererena bona lalohadai maorona ia herevalaia? (b) Dirava amo ia mai aonega ita abia neganai, dahaka do ia vara?

¹⁰ Iamesi 3:16-18 ese ia hahedinaraia, kongrigeisen lalonai edena lalohadai kererena ita dadaraia bona edena lalohadai maorona ita hahedinaraia be namo. Ia gwau: “Badina mama bona badu idia vara neganai, heiriheiri bona dika gaudia ibounai danu do idia vara. To atai amo ia mai aonegana ia abia tauna ena kara ginigunana be inai: Ia kara goeva. Danu ia be maino tauna, ia laloa maoromaoro, hereva ia badinaia haraga, ia be mai ena hebogahisi bada, bona huahua namodia ia hahedinaraia, taunimanima edia toana ia laloa lasi bona ia koikoi lasi. Danu, maino idia karaia taudia be maino negana lalonai, kara maoromaoro huahua ena uhe idia hadoa.” Bema Dirava amo ia mai aonega ita abia, iena kara namodia do ita tohotohoa. Unai dala amo, ita ese ta ta ita hagoadaia lalohadai maorona ita abia totona, bona kongrigeisen ai maino do ia noho.

11. (a) Bema ita be lalohadai maorona ita abia, dahaka kara do ita dadaraia? (b) Davida ena haheitalai amo dahaka ita dibaia?

¹¹ Namona be ita laloatao, Iehova ia ura elda taudia ese ‘Dirava ena kongrigeisen do idia hakaua.’ (Kara 20:28; 1 Pet. 5:2) Herevana ita be elda taudia o lasi, to namona be Dirava ena dala ita matauraia. Herevana dagi o maduna badana ita abia lasi, to bema lalohadai maorona ita hahedinaraia, do ita lalohisihisi lasi. King Saulo ia diba Davida ese iena king dagina do ia abia neganai, Saulo be “Davida dekenai ia mama.” (1 Sam. 18:9) King Saulo be lalohadai kererena ia abia bona ia ura Davida do ia hamasea. Unai dainai, namo lasi Saulo ita tohotohoa badina ia be dagi bada abia karana ia laloa bada. To, namona be Davida ita tohotohoa, badina ena be hahetoho momo ia davaria, to ia be hanaihanai Dirava ese ia abia hidi taudia ia matauraia.​—1 Samuela 26:23 duahia.

12. Dahaka ita karaia diba kongrigeisen ai lalotamona ita hagoadaia totona?

¹² Ita ta ta eda lalohadai be idauidau dainai, nega haida ta ta ita habadua diba. Elda taudia huanai unai ia vara diba. Baibel ese ita ia sisiba henia lalohadai maorona ita abia be namo. Ia gwau: “Umui ta ta dekenai hemataurai hahedinaraia karana do umui gunalaia” bona “Namo lasi sibona emui matana ai umui aonega.” (Roma 12:10, 16) Anina be namo lasi ita gwau iseda lalohadai sibona be maoro, to do ita abia dae gau ta hamaoromaoroa totona, dala idauidau ita badinaia diba. Kongrigeisen ai lalotamona karana ita hagoadaia totona, gau badana be ita hekwarahi ma haida edia laloa dalana ita lalopararalaia totona.​—Fili. 4:5.

13. Hekwakwanai ta hamaoromaoroa totona eda lalohadai ita gwauraia murinai, dahaka ita karaia be namo? Edena Baibel sivarai ese ita ia durua?

¹³ Anina be kongrigeisen lalonai kara kererena ta ita itaia neganai, ita gwauraia hedinarai be maoro. Aposetolo edia negai, kongrigeisen tadikaka taihu momo be gau ta dekenai idia lalotamona lasi. Tadikaka ese “dala idia karaia, Paulo, Banaba, bona idia haida be Ierusalema ai idia noho aposetolo bona tau badadia dekenai do idia daekau lao, unai hepapahuahu idia herevalaia totona.” (Kara 15:2) Momokani, unai hekwakwanai hamaoromaoroa totona, tadikaka  edia lalohadai be idauidau. To, idia ta ta be edia lalohadai idia gwauraia hedinarai, bona lauma helaga ena heduru amo abia hidi idia karaia murinai, idia ibounai be unai abia hidi dekenai idia lalotamona. Unai dainai kongrigeisen taudia be tadikaka edia revareva idia davaria murinai, “unai hereva ese idia hagoadaia dainai idia moale” bona “edia abidadama ia goada.” (Kara 15:31; 16:4, 5) Unai hegeregerena, hari bema iseda lalohekwarahi gauna be elda taudia dekenai ita herevalaia, namona be ita abia dae momokani idia be gau ibounai do idia laloa namonamo bona abia hidi ta do idia karaia, iseda lalohekwarahi idia hamaoromaoroa totona.

14. Ma haida ita kara henia neganai, edena dala ai lalohadai maorona ita hahedinaraia diba?

¹⁴ Ma haida ita kara henia neganai, lalohadai maorona ita hahedinaraia be namo. Hegeregere, bema haida ese ita idia hahekwakwanaia bona edia dika ita gwauatao haraga, namo ita havaraia diba. Baibel ia gwau: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia.” (Kol. 3:13) Unai hereva, “bema ta be badina ta dainai ma ta dekenai ia maumau” ese ia hahedinaraia, nega haida badina maorodia dainai ita be ma haida dekenai ita badu diba. To, namo lasi ta ena kerere maragidia dainai ita badu, badina unai ese kongrigeisen ena maino ia hadikaia diba. Gau badana be Iehova do ita tohotohoa bona mai iseda ura ida eda tadikaka edia dika ita gwauatao, bona idia ida Dirava ita hesiai henia.

15. (a) Iobu ena sivarai amo dika gwauatao karana dekenai dahaka ita dibaia? (b) Edena dala ai guriguri karana ese ita ia durua, lalohadai maorona ita hahedinaraia totona?

¹⁵ Iobu ena sivarai amo dika gwauatao karana ita dibaia. Iena tura namodia toi be ia idia hagoadaia lasi, to ia idia hereva dika henia. To, Iobu ese edia dika ia gwauatao. Dahaka ese Iobu ia durua? Baibel ia gwau: “Iobu ese iena turana toi dainai ia guriguri.” (Iobu 16:2; 42:10) Ma haida totona ita guriguri neganai, iseda lalohadai idia dekenai do ia idau. Bema eda tadikaka taihu ibounai totona ita guriguri, Iesu ese idia ia lalokau henia hegeregerena, ita danu be idia do ita lalokau henia. (Ioa. 13:34, 35) Danu, namona be Dirava ena lauma helaga totona ita guriguri. (Luka 11:13) Lauma helaga ese ita do ia durua ma haida dekenai Keristani kara namodia ita hahedinaraia totona.​—Galatia 5:22, 23 duahia.

16, 17. Oi ura edena bamona lalohadai do oi hahedinaraia?

¹⁶ Bema ita gaukara goada lalohadai namona ita hahedinaraia totona, unai ese kongrigeisen do ia durua bada. Reana inai stadi ese oi ia durua bona oi laloparara ma haida oi hagoadaia totona, emu kara oi haidaua be namo. Vadaeni, namona be Baibel ena hereva hegeregerena emu kara oi haidaua. (Heb. 4:12) Paulo ia ura kongrigeisen dekenai haheitalai namona ia hahedinaraia, ia gwau: “Egu lalomamina be ia goeva. To unai ese ia hamomokania lasi lau be kara maoromaoro tauna, lau ia hahemaoro henia tauna be Iehova.”​—1 Kor. 4:4.

¹⁷ Namona be ita ibounai ese ta ta ita hagoadaia heheni, kongrigeisen lalonai lalohadai namona ita hahedinaraia totona. Unai ita karaia totona, namona be Dirava ena kara namodia ita tohotohoa bona sibona eda lalohadai dekenai ita tabekau lasi. Bema ita ese ma haida edia dika ita gwauatao haraga bona ita lalonamo henidia, ita bona eda tadikaka taihu huanai maino do ia noho. (Fili. 4:8) Unai bamona ita karaia neganai, Iehova bona Iesu be ita dekenai do idia moale.​—File. 25.