Dahaka dainai Iesu ese headava lasi maurina ia herevalaia? Farisea taudia be headava hadokoa karana idia herevalaia dainai, Iesu ese Iehova ena taravatu headava dekenai ia gwauraia. Mose ena Taravatu lalonai, bema tau ta ia davaria ena adavana be “kara mirona ta” ia karaia, vadaeni tau ese headava hadokoa pepana ia torea diba. To, Iehova be Adamu bona Heva dekenai unai taravatu ia henia lasi. (Deu. 24:1, 2) Iesu ia gwau: “Bema tau ta be ia matabodaga dainai lasi, to badina ma ta dainai ena headava ia hadokoa bona hahine ma ta ia adavaia, ia be ia heudahanai.”​—⁠Mat. 19:3-9.

Hahediba taudia be unai idia kamonai murinai, idia gwau: “Bema tau ta ena noho ena adavana ida be unai bamona, namo lasi idia headava.” Bena, Iesu ia gwau: “Taunimanima ibounai ese edia mauri lalonai unai idia karaia diba lasi, to Dirava ese ia durudia taudia [o “harihari gauna idia abia taudia,” futnout] sibona be unai idia karaia diba. Haida idia headava lasi badina idia vara negana amo edia tauanina ena kahana ia dika, bona ma haida be taunimanima ese idia utua [o “abona idia kokia,” futnout] dainai, to haida be guba Basileia dainai idia headava lasi. Unai bamona mauri dalana ia ura abia dae tauna be unai bamona ia karaia be namo.”​—⁠Mat. 19:10-12.

Greek gado herevana eunou’kos anina be “abona idia kokia.” Eunuko taudia haida be sinana ena bogana amo unai bamona idia vara, eiava aksiden o ma haida ese idia haberoa. Ma haida be eunuko taudia korikoridia lasi, to eunuko taudia edia mauri dalana idia abia hidi. Idia headava diba, to sibona edia hemami idia biagua bona “guba Basileia dainai” idia headava lasi. Iesu bamona, idia ese headava lasi maurina idia abia hidi, unai amo edia nega bada be Basileia ena hesiai gaukara idia karaia diba. Sinana ena bogana amo idia vara neganai, headava lasi lalohadaina be idia dekenai ia noho lasi, bona Dirava ese unai lalohadai ia henidia lasi. To, idia sibona ese unai harihari gauna, o headava lasi mauri dalana idia abia hidi.

Paulo ese Iesu ena hereva ia durua, bona ia gwau Keristani taudia ibounai​—⁠singul bona headava taudia​—⁠ese Dirava idia hesiai henia diba. To, ‘edia lalona idia hadaia do idia headava lasi’ taudia edia mauri be do ia “namo herea.” Edena dala ai? Headava taudia be edia nega bona goada idia haria edia adavana idia hamoalea bona naria totona. To, headava lasi Keristani taudia dekenai unai maduna be lasi dainai, edia nega bada be Lohiabada ena hesiai gaukara idia karaia diba. Unai dainai, idia laloa Dirava amo unai “harihari gauna” idia abia.​—⁠1 Kor. 7:7, 32-38.

Baibel ia hahedinaraia lasi Keristani tauna ta be hoa dalanai headava lasi mauri dalana ia abia. To, ia sibona ese ena lalona ia hadaia do ia headava lasi, unai amo gau ta ese ia koua lasi Basileia gaukaradia ia karaia totona. Unai dainai, hari momo be edia lalona idia hadaia do idia headava lasi, bona ita ibounai ese idia ita hagoadaia be namo.