Lagani 49 C.E. ai, “kongrigeisen ena du” taudia Petero, Iamesi bona Ioane ese Paulo bona Banaba dekenai gaukara ta idia henia. Idia hamaorodia ena be idau bese taudia do idia haroro henidia, to ogogami Keristani taudia do idia lalodia danu. (Gal. 2:9, 10) Edena dala ai unai gaukara idia karaia?

Paulo ena revareva lalonai unai gaukara idia karaia dalana ia herevalaia. Hegeregere, Korinto tadikaka dekenai ia gwau: “Lau ura umui dekenai helaga taudia durua totona moni haboua karana lau herevalaia. Galatia kongrigeisen taudia lau hadibaia hegeregerena, umui danu be unai bamona do umui karaia. Pura ibounai edia dina ginigunadia ai, umui ta ta ese moni sisina do umui haboua, umui dekenai ia noho gauna hegeregerena, vadaeni lau ginidae neganai, moni do umui haboua lasi. To unuseniai lau ginidae neganai, umui ese revareva amo umui abia hidi taudia do lau siaia, bona emui harihari gauna be Ierusalema dekenai do idia abia lao.”​—⁠1 Kor. 16:1-3.

Paulo ena revareva iharuana ai, Korinto tadikaka dekenai moni idia haboua ena badina ia gwauraia lou. Ia gwau: “Umui dekenai idia noho gau momo amo edia dabu gaudia do umui henia.”​—⁠2 Kor. 8:12-15.

Lagani 56 C.E. ai, Paulo ese Roma Keristani tadikaka ia tore henidia neganai, moni haboua gaukarana be kahirakahira ia ore. Ia gwau: “Harihari lau ura Ierusalema dekenai lau lao, helaga taudia lau hesiai henia totona. Makedonia bona Akaia ai idia noho tadikaka be mai moale ida edia kontribusen idia henia, Ierusalema ai helaga taudia huanai idia noho ogogami taudia totona.” (Roma 15:25, 26) Unai murinai, Paulo ese iena maduna ia hagugurua. Badina Ierusalema dekenai ia giroa bona idia dogoatao neganai, Gavana Feliki ia hamaoroa: “Egu bese taudia dekenai heduru gaudia lau mailaia bona boubou gaudia lau henia.”​—⁠Kara 24:17.

Paulo ese Makedonia taudia ia herevalaia neganai, Keristani taudia ginigunadia edia lalohadai ia hahedinaraia, ia gwau: “Idia be sibona edia ura dainai ai idia noia loulou, edia harihari gauna do idia henia.” Paulo ese Korinto tadikaka ia hagoadaia unai bamona do idia karaia danu, ia gwau: “Ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.” Dahaka dainai kongrigeisen taudia be unai hariharibada karana idia hahedinaraia? Badina idia ura “helaga taudia edia dabu gaudia [idia] henia” bona “unai gaukara dainai taunimanima momo ese Dirava idia tanikiu henia bada.” (2 Kor. 8:4; 9:7, 12) Iseda hariharibada karana amo unai ita karaia diba. Kara namodia ia karaia bona sibona ena namo ia tahua lasi tauna be, Iehova Dirava ese do ia hanamoa bada.​—⁠Aon. 10:22.

Aposetolo Paulo ena nega bamona, hari momo ese edia ‘moni sisina idia haboua,’ maua ladana “Tanobada Ibounai Gaukarana Durua Monina” lalonai idia udaia totona. (1 Kor. 16:2) Hua ta ta iboudiai, kongrigeisen ese unai moni be edia tano ai ia noho Iehova ena Witnes taudia edia brens ofesi dekenai idia siaia. Emu tano ai Iehova ena Witnes taudia ese idia gaukaralaia ofesi ta dekenai, emu moni oi siaia diba danu. Idia gaukaralaia ofesi ena ladana oi diba totona, emu tano ai ia noho Iehova ena Witnes taudia edia brens ofesi oi tore henia diba. Brens ofesi ena adres be www.pr418.com/ho dekenai oi davaria diba. Inai harihari gaudia oi siaia diba:

KONTRIBUSEN MONINA MAI TARAVATUNA

• Taunimanima ese moni idia henia diba, trust fund ai do ia noho totona. To bema nega ta, henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens ofesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.