Oi Laloatao, A?
Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:
Edena dala ai eda hereva dalana ita hanamoa diba?
Iseda kudouna ai idia noho gaudia do ita tahua namonamo. Namo lasi iseda tadikaka dekenai lalohadai kererena ita abia. To namona be ita tahua, dahaka dainai unai lalohadai kererena ita abia. Ma haida ita gwauraia dika badina ita ura idia ita hereaia, a? Ma haida gwauraia dika karana ese hekwakwanai do ia habadaia sibona.—8/15, rau 21.
Mose ena Taravatu ese edena dala ai Dirava ena lalohadai hahine dekenai ia hahedinaraia?
Idaunegai, Israela hahine be mai edia ura kwalimu, bona gau ma haida idia karaia totona, diba idia abia danu. Danu, taunimanima ese idia laloa bada bona edia maoro idia matauraia.—10/1, rau 5-7.
Iehova ena dina ia kahirakahira lalonai, dahaka do idia vara?
Gavamani taudia do idia gwau, “Maino bona noho namo!” Gavamani oreadia ese “Babulonia Badana” do idia hadikaia ore. “Goga, Magoga tano tauna,” ese Iehova ena taunimanima do ia tuari henia. Aramagedono tuarina do ia vara, bena Keriso ese Satani bona ena demoni be guri dobu masemase lalonai do ia negedia.—9/15, rau 4.
Dahaka dainai tanobada dokona ena dina bona hora ita diba lasi be mai ena namo?
Dina bona hora ita diba lasi ese dala ia kehoa, eda kudouna ai ita laloa gaudia ita hahedinaraia totona. Ita dekenai nega ia henia, Iehova ita hamoalea totona. Ita ia hagoadaia sibona eda ura ita dadaraia, Dirava ita abidadama henia bona Baibel ita badinaia totona. Danu, dala ia kehoa hahetoho ita haheaukalaia bona eda abidadama ita hagoadaia totona.—9/15, rau 24-25.
Iesu ena imana idibana ai idia noho “hisiu 7” be daidia idia laulaulaia?
Unai “hisiu 7” be kongrigeisen lalonai idia noho horoa elda taudia idia laulaulaia. To ita gwau diba, unai “hisiu 7” ese elda taudia iboudiai idia laulaulaia danu.—10/15, rau 14.
Edena dala ai Iesu be Isaia 50:4, 5 ese ia herevalaia manau karana ia hahedinaraia?
Unai siri ese ia hahedinaraia, Iesu be ‘hadibaia hereva ia kamonai namonamo’ bona ‘Lohiabada dekena amo ia raka siri lasi.’ Iesu be mai manau ida ena Tamana ena hahediba herevadia ia kamonai namonamo. Danu, ia ura Dirava momokanina amo diba ia abia, bona ena Tamana be mai manau ida goevadae lasi taudia ia hebogahisi henidia neganai, Iesu be unai kara ia itaia.—11/15, rau 11.
