1, 2. Petero ese daidia ia gwauraia “Dirava ena abia hidi taudia”? Bona dahaka dainai gabeai ia gwauraidia, “noho daudau lasi” taudia?

 IESU ia mase bena lagani 30 murinai, aposetolo Petero be revareva ta ia torea. Unai revareva be ‘Ponto, Galatia, Kapadokia, Asia, bona Bitunia edia gabu idauidau ai nega sisina idia noho taudia, Dirava ena abia hidi taudia’ unai, dekenai ia torea. (1 Pet. 1:1) Petero ese unai revareva be horoa taudia dekenai ia torea, badina idia be ‘idia vara lou bona mauri noho helarona’ idia abia, Keriso ida guba ai idia lohia totona. (1 Petero 1:3, 4 duahia.) To dahaka dainai, gabeai Petero ia gwau idia be ‘idau tano taudia bamona bona do idia noho daudau lasi’? (1 Pet. 2:11) Hari, tanobada hegegemadai Iehova ena Witnes taudia haida sibona idia gwau idia be horoa taudia. To, dahaka dainai ita ibounai ese Petero ena hereva ita laloa bada be namo?

² Aposetolo edia negai idia noho horoa taudia idia gwauraia “noho daudau lasi” taudia be maoro. Horoa taudia be tanobada ai do idia noho hanaihanai lasi. Aposetolo Paulo be “seri maragi” tauna ta, bona ia hahedinaraia horoa taudia be guba ai do idia noho. Ia gwau: “To iseda noho gabuna be guba, bona unai gabu ai iseda hahemauri tauna ita naria noho, Lohiabada Iesu Keriso unai.” (Luka 12:32; Fili. 3:20) Anina be horoa taudia idia mase murinai, idia be Satani ena tanobada idia rakatania, bona guba ai mase diba lasi maurina idia abia. (Filipi 1:21-23 duahia.) Unai dainai, idia ita gwauraia diba tanobada ai do idia “noho daudau lasi” taudia.

3. Edena henanadai ita laloa danu be namo?

³ To “mamoe ma haida” be edena bamona? (Ioa. 10:16) Baibel ia hahedinaraia edia helaro be tanobada ai do idia noho ela bona hanaihanai. To, dahaka dainai  ita gwau idia danu be “noho daudau lasi” taudia?

4. Taunimanima ese saiens, moni bona politikol daladia amo dahaka idia haorea diba lasi?

⁴ Iehova ese Satani ena tanobada dikana ia do haorea lasi dainai, taunimanima ibounai​—⁠Keristani taudia danu​—⁠be Satani ena gwau-edeede karana dainai idia hisihisi noho. Roma 8:22 ia gwau: “Ita diba, havaraia gaudia ibounai be idia taitai bona idia hisihisi hebou noho ema bona hari.” Taunimanima haida idia ura saiens, moni bona politikol daladia idia gaukaralaia taunimanima edia mauri idia hanamoa totona. To, idia ese taunimanima edia hisihisi idia haorea diba lasi.

5. Lagani 1914 amo taunimanima milioni momo be dahaka idia karaia, bona dahaka dainai?

⁵ Lagani 1914 amo taunimanima milioni momo be edia lalona idia hadaia, Dirava ese ia abia hidi King, Iesu Keriso ena lohia henunai idia noho totona. Idia be tanobada ena lasi bona idia ura lasi Satani ena tanobada idia durua. To, edia mauri bona kohu ibounai idia gaukaralaia, Dirava ena Basileia idia durua totona.​—⁠Roma 14:7, 8.

6. Dahaka dainai ita gwau diba, Iehova ena Witnes taudia ibounai be idau tano taudia?

⁶ Tano 200 mai kahana lalonai, Iehova ena Witnes taudia be sitisen namodia. Herevana edeseni idia noho, to idia be idau tano taudia bamona idia noho. Idia be edia tano ena politikol karadia, eiava hekwakwanai idauidau lalonai idia vareai lasi. Danu, idia abia dae Dirava ena gwauhamata hegeregerena, idia be tanobada matamatana ena sitisen ai do idia lao. Idia moale badina idia be inai tanobada dikana ai, nega sisina sibona do idia noho.

7. Edena dala ai bona edeseniai Dirava idia badinaia taudia be mauri hanaihanai do idia abia?

⁷ Kahirakahira, Iesu Keriso ese Satani ena tanobada dikana do ia haorea. Keriso ena gavamani goevadaena ese kara dika bona hisihisi do ia haorea. Danu, ia ese Iehova ena lohia siahuna idia dadaraia taudia ibounai do ia hamasedia. Bena Dirava idia badinaia taudia be tanobada Paradaisona ai do idia mauri ela bona hanaihanai. (Apokalupo  21:1-5 duahia.) Unai neganai Dirava ese ia havaraia gaudia ibounai be hisihisi amo do ia ruhadia, bona taunimanima ibounai be “Dirava ena natudia edia ura kwalimu hereadaena do idia abia.”​—⁠Roma 8:21.

8, 9. Petero ia gwau, “tauanina ena ura do umui dadaraia” ena anina be dahaka?

⁸ Petero be Keristani taudia edia kara ia herevalaia neganai, ia gwau: “Lalokau taudia e, umui be idau tano taudia bamona bona do umui noho daudau lasi dainai, umui lau hagoadaia, tauanina ena ura do umui dadaraia noho. Unai ura be umui idia tuari henia noho.” (1 Pet. 2:11) Unai sisiba be horoa Keristani taudia totona, to “mamoe ma haida” ese idia badinaia danu be namo.

⁹ Tauanina ena ura haida ita karaia be kerere lasi, bema iseda Havaraia Tauna ena ura hegeregerena ita karaia. Unai bamona ita karaia neganai, eda mauri do ita moalelaia. Momokani, tauanina ena ura gaudia haida hegeregere, aniani bona inuinu gaudia ita moalelaia diba. Danu, tura namodia ida moale karadia maorodia ita karaia hebou. Bona headava taudia sibona ese mahuta hebou karana idia karaia be goeva bona maoro. (1 Kor. 7:3-5) To Petero ia gwau, eda “tauanina ena ura” be ita “ia tuari henia noho.” Anina be dahaka? Ia be tauanina ena ura dikadia ia herevalaia. Iehova ese do ita noho namonamo dalana bona tauanina ena ura be dala maorona ai ita hagugurua dalana be ita dekenai ia hadibaia. Namona be eda tauanina ena ura do ita biagua, unai amo iseda hetura karana Dirava ida do ia dika lasi. Bema tauanina ena ura be dala kereredia ai ita hagugurua, mauri hanaihanai helarona ita haboioa diba.

10. Edena dala idauidau ai Satani ia ura Keristani taudia ia tarapua?

¹⁰ Satani ia ura do ita laloaboio ita be inai tanobada dikana ai, do ita “noho daudau lasi.” Satani ia ura kohu momo ita tahua, matabodaga karadia ita karaia, sibona eda ladana ita abia isi, sibona eda ura ita tahua guna, bona eda bese ita abia isi. To, namona be ita laloparara unai gaudia ibounai be Satani ena tarapu. Bema eda lalona ita hadaia bona tauanina ena ura dikadia ita dadaraia, unai ese ia hahedinaraia ita ura lasi Satani ena tanobada dikana ita durua, bona ita be tanobada ai do ita “noho daudau lasi” taudia. Ita ura gauna badana be, Dirava ena kara maoromaoro tanobada matamatana ai do ita noho ela bona hanaihanai. Unai dainai, namona be ita gaukara goada unai hahenamo ita abia totona.

11, 12. Haida ese idau tano taudia be edena bamona idia laloa? Haida ese Iehova ena Witnes taudia be edena bamona idia laloa?

¹¹ Petero be do idia “noho daudau lasi” Keristani taudia edia kara ia herevalaia, ia gwau: “Tanobada taudia huanai kara namodia do umui karaia noho, vadaeni ena be idia gwau umui be kara kerere taudia, to emui kara namodia idia itaia dainai Dirava do idia hanamoa, ia be sekea gaukara totona ia mai negana ai.” (1 Pet. 2:12) Idau tano taudia be edia tano dekenai idia noho lasi, to tano ma ta ai nega sisina idia noho taudia. Edia gado, vairana ena toana, kara, bona dabua be idau dainai, nega haida taunimanima ese idia hereva dika henidia, bona idia laloa idia be taunimanima dikadia. To, edia kara namodia amo haida ese do idia itaia idia be taunimanima namodia.

¹² Unai hegeregerena, Keristani taudia korikoridia be edia neiba amo idia idau. Hegeregere, idia ese gau namodia idia herevalaia bona moale karadia maorodia idia  abia hidi. Edia dabua ena toana be idau dainai, taunimanima idia diba idia be Keristani taudia. Unai dainai, taunimanima ese Witnes taudia idia gwauraia dika. To, ma haida ese Witnes taudia idia hanamoa, badina idia be kara namodia idia hahedinaraia.

13, 14. Inai hereva “tau ta ese ia karaia kara namodia ese idia hamomokania, ia be aonega tauna,” ena anina be dahaka? Haheitalai haida gwauraia.

¹³ Iseda kara namodia dainai, ma haida do idia laloparara ita idia gwauraia dika be maoro lasi. Iesu sibona ese Dirava ia badinaia goevagoeva. To taunimanima ese ia idia samania, idia gwau ia be kara dikadia ia karaia. Hegeregere, haida idia gwau: “Ia be aniani bona wain inua momo tauna, takisi gogoa taudia bona kara dika taudia edia turana.” To, iena kara namodia amo ia hahedinaraia ia be unai bamona tauna lasi. Ia gwau: “Tau ta ese ia karaia kara namodia ese idia hamomokania, ia be aonega tauna.” (Mat. 11:19) Hari danu, unai be momokani. Hegeregere, Selters, Germany ai, Betele badinai idia noho taudia haida idia laloa Betele famili ena noho dalana be idau. To, Selters ena taoni naria tauna badana be Betele famili ia durua, ia gwau: “Unuseni idia gaukara Witnes taudia edia mauri dalana be idau, to idia ese ma haida edia mauri dalana idia hadikaia lasi.”

¹⁴ Haheitalai ma ta be Moscow, Russia ai haida idia gwau Iehova ena Witnes taudia be kara dikadia idia karaia. Idia gwau Witnes taudia be famili idia hapararaia, ma haida idia doria sibona idia hamasea totona, bona medikol heduru idia abia dae lasi. To June 2010 ai, Strasbourg, France ai, European Court of Human Rights (ECHR) be hahemaoro ta ia karaia, bona ia hahedinaraia Moscow siti ese Iehova ena Witnes taudia edia tomadiho karadia bona edia hebou ia koua be maoro lasi. ECHR ia gwau, Russia ena kota ese Iehova ena Witnes taudia dekenai kerere ta idia davaria lasi, to Moscow ena taravatu aukadia idia gaukaralaia kerere, Witnes taudia idia panisia totona.

15. Keristani taudia korikoridia ese edena hakaua herevana idia badinaia?

¹⁵ Petero ia gwau, Keristani taudia ese kara ma ta idia karaia be namo. Tanobada hegegemadai Iehova ena Witnes taudia be unai idia karaia. Petero ia gwau: “Lohiabada dainai siahu taudia ibounai henunai do umui noho, herevana ia be siahu bada king, eiava gavana taudia.” (1 Pet. 2:13, 14) Ita be Satani ena tanobada dikana ena kahana lasi. To, Paulo ena hereva bamona, mai eda ura ida “gavamani ibounai be Dirava ese ia henia dagi idauidau hegeregerena” ita matauraia. Bona bema edia taravatu be Dirava ena taravatu ia utua lasi, vadaeni ita badinaia diba.​—⁠Roma 13:1, 5-7 duahia.

16, 17. (a) Dahaka ese ia hahedinaraia ita be gavamani ita gwau-edeede henia lasi? (b) Gavamani taudia haida be dahaka idia gwau?

¹⁶ Iehova ena Witnes taudia be inai tanobada  lalonai “noho daudau lasi” taudia bamona idia noho. To, idia be gavamani idia gwau-edeede henia lasi bona taunimanima idia gwauraidia dika lasi. Iehova ena Witnes idia abia dae taunimanima be mai edia lalohadai idauidau, hegeregere edena gavamani ia lohia be maoro eiava edena dala ai hekwakwanai do idia haorea. Momokani, tomadiho oreadia haida be politikol karadia lalonai idia vareai, to Iehova ena Witnes taudia sibona be unai idia karaia lasi. Idia ese gavamani idia doria lasi edia lohia dalana idia haidaua totona. Iehova ena Witnes taudia idia ura lasi gavamani idia gwau-edeede henia, bona ma haida idia doria lasi unai idia karaia totona.

¹⁷ Petero ia gwau, “king umui matauraia.” Unai dainai, Keristani taudia be gavamani taudia idia kamonai henia bona idia matauraia. (1 Pet. 2:17) Gavamani taudia haida idia gwau, Iehova ena Witnes taudia be idia gwau-edeede lasi. Hegeregere, Germany ena palamen memba ta, ia gwau ena be Iehova ena Witnes taudia be Nazi taudia ese idia dagedage henia, to kara namo idia hahedinaraia noho. Danu, edia abidadama idia dogoatao auka bona mai hemataurai ida dibura taudia ma haida idia kara namo henidia. Ia gwau, Germany ai unai kara namodia be mai anina bada, badina hari haida be idau tano taudia idia kara auka henidia. Bona bema ta ena tomadiho o politikol lalohadai ia idau neganai, idia kara auka henia danu.

18. (a) Dahaka dainai iseda tadikaka taihu ibounai ita lalokau henidia be auka lasi? (b) Haida ese Iehova ena Witnes taudia edia kara dainai dahaka idia gwau?

¹⁸ Aposetolo Petero ia gwau: “Tadikaka oreana ibounai umui lalokau henia, Dirava umui gari henia.” (1 Pet. 2:17) Iehova ena Witnes taudia be Dirava idia gari henia dainai, idia ura lasi ia idia habadua karana ta idia karaia. Unai ese idia ia durua Dirava ena ura idia karaia totona. Idia moale badina idia be tanobada hegegemadai tadikaka oreana ida Iehova idia hesiai henia hebou. Idia ese “tadikaka oreana ibounai” idia lalokau henia. Hari inai negai, momo be ma haida lalokau henia karana idia hahedinaraia lasi. Unai dainai, murimuri taudia be ita ta ta huanai ia noho lalokau karana idia itaia neganai, idia hoa. Hegeregere, lagani 2009 ai Germany ai idia karaia intanesinol hebouhebou ta dekenai, loaloa taudia ia hakaua hahinena ta be ia hoa, badina iseda tadikaka be ta ta dekenai kara namo idia hahedinaraia. German tadikaka taihu be idau tano amo idia mai tadikaka taihu dekenai lalokau idia hahedinaraia bona idia durudia. Unai hahine ia gwau, guna ia be unai bamona orea ta ia itaia lasi. Distrik hebouhebou ai, murimuri taudia be Iehova ena Witnes taudia edia kara namo idia itaia dainai, unai bamona hereva ta idia gwauraia oi kamonai, a?

19. Namona be eda lalona ita hadaia, dahaka ita karaia totona? Bona dahaka dainai?

¹⁹ Inai stadi ai ita itaia bamona, dala momo ai Iehova ena Witnes taudia ese idia hahedinaraia, idia be Satani ena tanobada dikana ai idia “noho daudau lasi” taudia. Danu, edia lalona idia hadaia unai bamona do idia noho ela bona dokona. Edia helaro ia goada dainai idia abia dae momokani, kahirakahira idia be Dirava ena kara maoromaoro tanobadana ai do idia noho ela bona hanaihanai. Oi be mai emu ura ibounai ida unai tanobada matamatana oi naria noho, a?