Simplified Watchtower—Dahaka Dainai Idia Karaia?
LAGANI momo lalodiai, tanobada hegegemadai momo be Watchtower ese ia durudia bada. July 2011 ai, simplified Watchtower idia halasia matamaia. July 15, 2011 ena Gima Kohorona ese simplified Watchtower ia herevalaia, ia gwau: “Unai magasin matamata be lagani tamona lalonai do ai tohoa, bona bema momo ese idia ura henia, do ai printaia noho.”
Hari, mai moale ida ai ura umui ai hadibaia, ai be simplified Watchtower do ai printaia noho. Ia be French, Portuguese, bona Spanish gado ai do ai halasia danu.
DAHAKA DAINAI MOMO ESE IDIA URA HENIA
South Pacific motumotu ai haida idia gwau, simplified Watchtower ese tadikaka momo ia durua, standard Watchtower idia lalopararalaia totona. Tano ma ta ai taihu ta ia gwau, ia bona ena famili be nega bada idia haorea stadi atikol ai idia noho herevadia be diksenari ai idia tahua, bona edia anina idia lalopararalaia totona. To hari, unai nega idia gaukaralaia stadi atikol ai idia noho Baibel siri ta ta edia anina idia lalopararalaia totona.
Tano ma ta ai taihu ta ia gwau, ia bona ena famili be nega bada idia haorea stadi atikol ai idia noho herevadia be diksenari ai idia tahua, edia anina idia lalopararalaia totona
United States ai, taihu ta be guna iunivesiti dekenai ia sikuli bona ia gwau, lagani 18 lalonai ia gwauraia herevadia bona torea herevadia be sikuli bada idia lao taudia sibona ese idia lalopararalaia diba. Ia gwau: “Lau gwauraia herevadia bona egu lalohadai be ma haida ese idia lalopararalaia be auka. Bona lau laloparara egu hereva bona lalohadai lau haidaua be namo.” Simplified Watchtower ese unai taihu ia durua, ma haida dekenai Baibel ia hadibaia namonamo totona. Ia gwau: “Simplified Watchtower ese lau ia durua bada. Idia torea herevadia be auka lasi dainai, lau idia durua hereva momokani be ma haida dekenai auka lasi dalanai lau harorolaia totona.”
England ai, lagani 1972 ai ia bapatiso taihu ta ia gwau: “Simplified Watchtower ena stadi ginigunana lau duahia neganai, lau mamia Iehova be egu badinai ia helai, ena imana be egu pagana ai ia atoa, bona magasin ai duahia hebou. Unai be tama ta ese ena natuna dekenai sivarai ta ia duahia bamona.”
United States ena Betele ai ia gaukara taihu ta, be lagani 40 gunanai ia bapatiso, bona ia gwau ia be Simplified Watchtower ese ia durua Baibel ia lalopararalaia namonamo totona. Hegeregere, September 15, 2011 ena stadi magasin lalonai ia hedinarai maua ladana, “Some Expressions Explained” ai Heberu 12:1 ese ia herevalaia “witnes orea badana” ena anina idia herevalaia neganai, idia gwau: “Idia be momo herea dainai ta ese ia duahidia diba lasi.” Taihu ia gwau, unai ese ia ia durua unai siri ena anina ia lalopararalaia totona. Taihu ese pura ta ta ena Gima Kohorona stadi ia herevalaia danu. Ia gwau, ena be natu maragina ta ena haere be Simplified Watchtower amo ia duahia, to ia gwauraia herevadia be standard Watchtower amo idia idau dainai, helai taudia dekenai unai natu maragina ena haere be hereva matamatadia bamona.
Betele taihu ta ia gwau, hari ia be kongrigeisen ai natudia edia haere ia moalelaia, badina Simplified Watchtower ese idia ia durua, mai edia kudouna ibounai ida idia haere totona. Ma ia gwau: “Edia haere ese lau ia durua bada.”
Lagani 1984 ai ia bapatiso taihu ta ia gwau, ia be Simplified Watchtower ia moalelaia bada. Ia gwau: “Lau mamia inai magasin be lau totona idia torea. Lau ia durua lau duahia gaudia lau lalopararalaia totona. Hari, lau be mai gari lasi ida Gima Kohorona Stadi ai lau haere diba.”
TULU NAMONA TAMA SINA TOTONA
Sina ta, ena natuna mero ena mauri lagani be seven, ia gwau: “Egu natuna ida Gima Kohorona Stadi ai hegaegaelaia be mai ena hekwarahi, badina nega bada lau haorea ia dekenai sentens ta ta edia anina lau gwauraia hedinarai totona.” Edena dala ai Simplified Watchtower ese unai hahine ia durua? Ia gwau: “Lau moale badina hari, egu natuna be magasin ena paragraf ta ta ia duahia namonamo diba. Bona magasin ena hereva be auka lasi bona ena sentens be idia kwadogi dainai, egu natuna be ia laloparara bona stadi ia moalelaia. Hari, egu natuna be hebou totona sibona ena haere ia hegaegaelaia, bona stadi lalonai ia kamonai namonamo ela bona hebou ibounai ia ore.”
Sina ta ia moale, badina hari ena natuna mero be stadi atikol ia lalopararalaia diba
Sina ta, ena natuna kekeni ena mauri lagani be nain, ia gwau: “Guna, emai natuna ai durua ena haere ia hegaegaelaia totona. To hari, ia be sibona ena haere ia hegaegaelaia. Ia dekenai gau ibounai ai herevalaia lasi, badina ia laloparara. Hari, ia ese Gima Kohorona Stadi ia moalelaia bada.”
NATUDIA EDIA LALOHADAI
Natudia momo idia laloa Simplified Watchtower be idia totona idia karaia. Rebecca, ena mauri lagani be 12 kekeni, ia gwau: “Mani inai Simplified Watchtower umui halasia noho. Lau be inai maua ladana, ‘Some Expressions Explained’ lau moalelaia bada. Natudia ese unai idia lalopararalaia be auka lasi.”
Nicolette, ena mauri lagani be seven kekeni ena lalohadai danu be Rebecca bamona. Ia gwau: “Guna, lau ese standard Watchtower lau lalopararalaia be auka. To hari, lau be haere momo lau henia diba.” Emma, ena mauri lagani be nain kekeni, ia gwau: “Simplified Watchtower ese lau bona egu tadina, ena mauri lagani be siks merona, ia durua bada. Hari ai be gau momo ai lalopararalaia diba. Tanikiu!”
Oibe, Simplified Watchtower ese momo ia durua, badina ena hereva bona sentens idia lalopararalaia haraga diba. Simplified Watchtower ese momo ia durua Baibel idia lalopararalaia totona, bona standard Watchtower ida do ai printaia noho. Lagani 1879 amo standard Watchtower idia printaia matamaia, bona ia be taunimanima momo ia durua bada.
