“DIRAVA ena hereva be ia mauri noho, bona ia be mai ena siahu.” (Heb. 4:12) Unai siri amo aposetolo Paulo ese ia hahedinaraia, Baibel ena hereva be mai ena siahu taunimanima edia kudouna ia hamarerea bona edia mauri ia haidaua totona.

Aposetolo taudia idia mase murinai, aposteit karana ia bada bona taunimanima be Baibel ena hereva ena siahu dekenai, lalohadai kereredia idia abia matamaia. (2 Pet. 2:1-3) Unai negai, dubu gunalaia taudia ese taunimanima idia hadibaia, Baibel dekenai meamea siahuna ia noho. Profesa Harry Y. Gamble ia gwau lagani 200 C.E. murinai, Dubu Tauna Badana Origen ese taunimanima ia hadibaia hereva helagadia ese ta idia durua diba. Origen ia gwau bema meamea herevadia be mai edia siahu, ita gwau diba Dirava ena lauma helaga amo idia torea herevadia, edia siahu be bada herea. John Chrysostom be lagani 400 C.E. bamona ai ia noho bona ia gwau, bema ruma ta ai Baibel ia noho, Diabolo be unai ruma kahirakahira ia lao diba lasi. Ma ia gwau, haida be sibona idia gimaia totona, Evanelia bukadia edia siri haida be edia aiona ai idia atoa. Profesa Gamble ia gwau, Katolik Dubu Tauna Badana ma ta Augustine ese taunimanima ia hadibaia, bema ta be kwarana ia hisihisi, ena pilo henunai Ioane ena Evanelia bukana ia atoa diba. Unai hahediba herevadia dainai, taunimanima ese Baibel be meamea bukana ta bamona idia gaukaralaia matamaia. To, oi be edena bamona? Baibel be meamea gauna ta bamona oi gaukaralaia oi ia gimaia totona, a?

Taunimanima ese dala kererena ma ta ai Baibel idia gaukaralaia. Idia gwau, herevana edena rau idia kehoa, to unai rau ai idia itaia siri ginigunana ese idia do ia hadibaia, dahaka do idia karaia. Hegeregere, Profesa Gamble ia gwau, nega ta Augustine ia kamonai natuna ta ia gwau: “Abia bona duahia, abia bona duahia.” Augustine ia abia dae, unai be hegeregere Dirava ese ia hamaoroa ena Baibel do ia kehoa, bona ia itaia siri ginigunana do ia duahia.

Unai bamona dala ai Baibel idia gaukaralaia edia hekwakwanai idia hamaoromaoroa taudia haida oi diba, a? Momokani, Baibel ena heduru idia tahua be namo, to meamea dalanai Baibel idia gaukaralaia be kerere.

Iesu ese ena hahediba taudia dekenai ia gwauhamata, lauma helaga ese idia do ia durua ia gwauraia gaudia ibounai idia “laloa lou” totona. (Ioa. 14:26) Unai dainai, Baibel ena heduru ita abia totona, edena siri ginigunana ita kehoa bona duahia be gau badana lasi. To, gau badana be Baibel amo ita dibaia gaudia do ita badinaia.

Taunimanima ese Baibel be meamea gauna ta bamona idia gaukaralaia, dika amo sibona idia gimaia, hekwakwanai idia hamaoromaoroa, eiava vaira negana idia dibaia totona. To Baibel ia gwau, meamea karadia ita karaia be kerere. (Lev. 19:26; Deu. 18:9-12; Kara 19:19) Bema Baibel be dala maorona ai ita gaukaralaia, ita ia durua diba. Baibel ese meamea dalanai ita do ia durua lasi. To, mauri namona ita moalelaia totona, Baibel ita stadilaia be mai anina bada. Momo be Baibel amo diba maorona idia abia dainai, unai ese idia ia durua namo bona dika idia diba totona, edia kara dikadia idia rakatania, edia famili maurina idia moalelaia, bona Baibel ia Havaraia Tauna idia tura henia.