1. Taunimanima haida ese idau tano taudia be edena bamona idia laloa? Dahaka dainai unai be lalohadai kererena?

 VANEGAI stadi ai, ita ese taunimanima be idau tano taudia idia ura henidia lasi karana ita herevalaia. Reana idia laloa idia ese idau tano taudia idia hereaia, to unai be hemataurai lasi lalohadaina. Tau ta ese ma ta ia hereaia lasi. Buklet ta (The Races of Mankind) ia gwau: “Baibel ena hereva bamona, bese idauidau taudia be tadikaka korikoridia.” Hegeregere, ena be tadikaka rua edia toana be idau to sina tamona ese ia havaradia.

2, 3. Iehova ese Israela taudia ida idia noho idau tano taudia be edena bamona ia laloa?

² Baibel negadiai, Iehova ese gwauhamata ta ia karaia, Israela taudia be ena abia hidi besena ai ia halaoa totona. Ena be Israela taudia be Iehova Dirava ena abia hidi besena, to Taravatu ia gwau idia ese Israela lasi taudia do idia kara namo henidia bona matauraidia be gau badana. Hari ita ese unai ita kara ita tohotohoa be namo. Namona be Keristani taudia ese idau tano taudia idia inai henia lasi. Dahaka dainai? Aposetolo Petero ia gwau: “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.”​—⁠Kara 10:34, 35.

³ Idaunegai, Israela taudia ida idia noho idau tano taudia be namo idia davaria. Dahaka dainai? Badina Iehova ese idia ia abia dae. Gabeai, aposetolo Paulo ese Iehova ia herevalaia, ia gwau: “Ia be Iuda taudia sibona edia Dirava, a? Ia be idau bese taudia edia Dirava lasi, a? Lasi, ia be idau bese taudia edia Dirava danu.”​—⁠Roma 3:29; Ioe. 2:32.

4. Dahaka dainai “Dirava ena Israela” besena lalonai, ta be idau tano tauna ta bamona idia kara henia lasi?

⁴ Dirava be horoa Keristani taudia edia kongrigeisen  ida kontraka matamatana ia karaia murinai, Israela bese korikorina ia dadaraia. Bona horoa Keristani taudia edia kongrigeisen be “Dirava ena Israela” ai ia halaoa. (Gal. 6:16) Paulo ia gwau unai bese matamatana lalonai, “Grik o Iuda tauna be lasi, eiava kopina utua o kopina utua lasi karana be lasi, danu idau tano tauna, Sitia tauna, igui hesiai tauna, eiava ura kwalimu tauna be lasi, to Keriso be gau ibounai bona ia be ibounai lalonai.” (Kol. 3:11) Unai dainai, horoa Keristani taudia edia kongrigeisen lalonai, ta be idau tano tauna ta bamona idia kara henia lasi.

5, 6. (a) Dahaka dainai haida ese Isaia 61:5, 6 ena anina idia daradaralaia? (b) Isaia ese ia herevalaia “Lohiabada ena hahelagaia taudia” bona “idau bese taudia” be daidia? (c) Edena dala ai “Lohiabada ena hahelagaia taudia” bona “idau bese taudia” idia gaukara hebou?

⁵ Haida be reana Isaia karoa 61 ese ia gwauraia peroveta herevana idia laloa. Unai peroveta herevana be hari Keristani kongrigeisen lalonai ia guguru noho. Unai karoa ena siri 6 ia gwau haida be “Lohiabada ena hahelagaia taudia” ai do idia lao. To, siri 5 ia gwau “idau bese taudia” o idau tano taudia unai, be “hahelagaia taudia” do idia durua, bona idia ida do idia gaukara hebou. Dahaka dainai unai siri ese “idau bese taudia” ia herevalaia?

⁶ Unai “Lohiabada ena hahelagaia taudia” be “toreisi lou ginigunana” idia abia horoa Keristani taudia. Danu, “idia be Dirava bona Keriso edia hahelaga taudia bona lagani 1,000 lalonai Keriso ida do idia lohia.” (Apok. 20:6) Abidadama Keristani taudia momo edia helaro be tanobada Paradaisona ai do idia noho. Idia be guba helarona idia abia taudia idia bamoa bona idia gaukara hebou. Tanobada helarona idia abia taudia be “Dirava ena Israela” oreana lalonai idia noho lasi dainai, idia be “idau bese taudia” bamona. To idia be mai moale ida gogoa gaukara lalonai “Lohiabada ena hahelagaia taudia” ida ‘mamoe idia naria,’ ‘tano idia gaukaralaia’ bona ‘vain uma idia naria.’ Anina be ma haida dekenai hereva momokani idia harorolaia bona hadibaia, unai amo horoa taudia idia durua Dirava idia hanamoa totona. Horoa taudia bona “mamoe ma haida” ese taunimanima dekenai hereva momokani idia hadibaia, bona idia durua idia dibaia gaudia idia badinaia totona.​—⁠Ioa. 10:16.

7. Edena dala ai Keristani taudia be Aberahamo, bona guna Dirava idia abidadama henia taudia bamona?

⁷ Vanegai ena stadi ai ita itaia Keristani momokanidia be idau tano taudia bamona, badina idia be Satani ena tanobada dikana lalonai do idia “noho daudau lasi.” Idia be Aberahamo bona guna Dirava idia abidadama henia taudia bamona. Unai taudia idia ura lasi Satani ena tanobada idia durua, badina “idia be idau taudia” bona tanobada ai do idia “noho daudau lasi.” (Heb. 11:13.) Herevana guba o tanobada helarona ita abia, to Aberahamo hegeregerena, Iehova ita tura henia diba. Baibel bukana ta ia torea tauna Iamesi ia gwau: “‘Aberahamo ese Iehova ia abidadama henia, bona ia ese ia gwauraia maoromaoro,’ bona ia idia gwauraia ‘Iehova ena turana.’”​—⁠Iam. 2:23.

8. Iehova ese Aberahamo dekenai dahaka gwauhamata ia karaia? Bona Aberahamo ena lalohadai unai gwauhamata dekenai be dahaka?

⁸ Dirava ia gwauhamata Aberahamo bona ena garana amo tanobada besedia ibounai do ia hanamoa. Unai gwauhamata be bese ibounai totona. (Kara 3:25 duahia.) Ena be unai gwauhamata be Aberahamo do ia mase murinai ia guguru, to ia abia dae momokani unai do ia vara. Lagani 100 lalonai, Aberahamo bona ena ruma bese be tano idauidau ai idia noho, to ia ese Iehova ia rakatania lasi.

9, 10. (a) Edena dala ai Aberahamo ita tohotohoa diba? (b) Dahaka ita karaia diba taunimanima ita durua totona?

⁹ Ena be Aberahamo ia diba lasi edena negai Iehova ena gwauhamata do ia guguru, to ia ese Iehova ia lalokau henia bona ia tomadiho henia noho. Hanaihanai ia laloatao ia be do ia noho daudau lasi dainai, ia be unai tano taudia edia mauri dalana ia badinaia lasi. (Heb. 11:14, 15) Namona be Aberahamo ena haheitalai ita tohotohoa. Eda mauri lalonai kohu momo, ladana bada, o moni gaukara namona ita abia be gau badana lasi. Tanobada taudia edia mauri dalana ita badinaia be aonega karana lasi, badina inai tanobada be kahirakahira do ia ore. Aberahamo bamona, ita ese gau namona ta ita naria noho. Unai dainai, mai haheauka ida ita naria ela bona Dirava ena gwauhamata ibounai do idia guguru.​—⁠Roma 8:25 duahia.

¹⁰ Hari inai negai, Iehova ese tanobada besedia ibounai ia boiria noho, Aberahamo ena garana amo hahenamo idia abia totona. Iehova ena horoa “hahelagaia taudia” bona “idau bese taudia” o mamoe ma haida, be tanobada hegegemadai gado 600 mai kahana ai taunimanima idia boiria noho, unai hahenamo idauidau idia dibaia totona.

11. Solomona ese bese ibounai ia boiria dahaka idia karaia totona?

¹¹ Lagani 1026 B.C.E. ai, Solomona ese dubu helaga ia hahelagaia neganai ia gwauraia guriguri ese ita ia durua, Iehova ena lalohadai bese idauidau dekenai ita lalopararalaia totona. Solomona ese Iehova ia noia dubu helaga lalonai idia guriguri besedia ibounai edia guriguri do ia kamonai. Idia dekenai, unai be Iehova ese Aberahamo dekenai ia karaia gwauhamata ena hahenamo ta. Solomona ia guriguri ia gwau: “Danu, idau tauna ta, oiemu bese Israela tauna ta lasi, bema oiemu ladana namo herea sivarai ia kamonai dainai, bona oiemu siahu dainai, tano daudau dekena amo do ia mai, bona bema inai Dubu Helaga lalonai do ia guriguri neganai, unai neganai iena guriguri do oi kamonai, bona ia noinoi gauna do oi henia. Unai dekena amo tanobada bese ibounai ese oiemu ladana do idia diba, bona oi dekenai do idia gari, oiemu bese Israela taudia idia karaia hegeregerena. Bona unai neganai danu, bese ibounai  do idia diba, inai lau ese lau haginia Dubu Helaga, be oi dekenai do idia tomadiho henia gabuna momokani.”​—⁠1 Kin. 8:41-43.

12. Dahaka dainai Iehova ena Witnes taudia be idau tano taudia bamona?

¹² Bema tau ta be tano ma ta ia vadivadi henia o tano ma ta dekenai ia noho, ia idia gwauraia idau tano tauna. Iehova ena Witnes taudia be idau tano taudia bamona. Idia be tanobada hegegemadai idia noho, to idia ese Dirava ena guba Basileia bona ena King, Iesu Keriso sibona idia badinaia. Unai dainai ena be ma haida ese idia doria, to idia be politikol karadia lalonai idia vareai lasi.

13. (a) Edena dala ai idau tano tauna inai henia karana ita hadokoa diba? (b) Matamanai, Iehova ia ura taunimanima be edena dala ai ta ta do idia kara henia?

¹³ Nega haida ita itaia tau ta be idau tano tauna, badina ena hereva dalana, kastom, vairana bona dabua ena toana be idau. To, namona be ita tahua edena dala ai ia bona ita be hegeregere. Bema unai bamona ita karaia, ia be idau tano tauna bamona do ita kara henia lasi. Bema tanobada hegegemadai, bese tamona sibona ia noho bona gavamani tamona sibona ia lohia, vadaeni taunimanima be idau tano taudia bamona do idia kara heheni lasi. Matamanai, Iehova ia ura iena lohia henunai, taunimanima ibounai be bese tamona bamona do idia noho. To, taunimanima ese idau tano taudia idia inai henia karana be nega ta do ia ore, a?

14, 15. Iehova ena Witnes taudia edia orea sibona be dahaka ia karaia?

¹⁴ Hari inai negai, taunimanima be sibona edia namo idia laloa, bona idia laloa edia bese ese bese ma haida ia hereaia. To ita moale badina ita diba, taunimanima haida be bese idauidau taudia ibounai idia lalokau henidia. Momokani, do ita hekwarahi eda lalohadai ma haida dekenai ita haidaua totona. TV steiseni badana ta ena biaguna be bese idauidau amo idia mai diba bada taudia ida ia gaukara hebou neganai, ia gwau: “Lau ese tano ma ta amo idia mai taudia be idau tano taudia bamona lau kara henidia lasi, to lau abia dae ai ibounai be tanobada tamona dekenai ai noho taudia.” Unai dainai, ena kampani dekenai taravatu ia atoa inai hereva “idau tano taudia,” do idia gaukaralaia lasi.

¹⁵ Dirava ese tanobada besedia ibounai ia laloa dalana, be Iehova ena Witnes taudia edia orea sibona ese ia tohotohoa. Idia be Iehova ena lalohadai taunimanima dekenai idia diba dainai, idia ese idau tano taudia idia kara namo henidia danu. Iehova ena Witnes taudia ese idau tano taudia idia inai henia lasi, eiava idia laloa lasi idia be kara dika taudia. To, idia ese taunimanima edia toana bona edia kara idauidau idia moalelaia. Iehova ena Witnes taudia edia  orea sibona ese unai bamona kara namodia ia hahedinaraia. Oi danu be idau tano taudia oi kara namo henia dainai oi moale, a?

16, 17. Apokalupo 16:16 bona Daniela 2:44 idia guguru murinai, mauri be edena bamona?

¹⁶ Kahirakahira, Aramagedono ai tanobada besedia ibounai ese Dirava ena lohia dalana do idia tuari henia. (Apok. 16:14, 16; 19:11-16) Lagani 2,500 mai kahana gunanai, peroveta tauna Daniela ese taunimanima edia gavamani dekenai do ia vara gauna ia herevalaia. Ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”​—⁠Dan. 2:44.

¹⁷ Oi dekenai unai peroveta herevana do ia guguru dalana mani oi laloa. Hari, ita ibounai be idau tano taudia, badina tano ta ta be mai edia hetoana. To Aramagedono murinai, unai tano edia hetoana be do idia noho lasi. Unai nega ai, taunimanima edia toana be idauidau, to unai ese ia hamomokania Iehova be gau idauidau ia havaraia Diravana. Unai vaira nega namona ita naria noho dainai, namona be ita gaukara goada iseda Havaraia Tauna ita hanamoa bona ena ladana ita abia isi.

18. Edena haheitalai ese ia hahedinaraia, Iehova ena Witnes taudia be idau tano taudia bamona idia kara heheni lasi?

¹⁸ Oi laloa taunimanima ese ma haida be idau tano taudia bamona idia kara henia karana be nega ta do ia ore, a? Oibe, ita abia dae momokani unai do ia vara. Hari inai negai, Iehova ena Witnes taudia ese ma haida be idau tano taudia bamona, idia kara henidia lasi. Hegeregere, vanegai brens ofesi maragidia haida be tano ma haida edia brens ofesi ida idia hatamonaia. Unai bamona idia karaia, badina idia ura haroro gaukara idia habadaia. (Mat. 24:14) Momokani, tano ta ta be mai edia hetoana, to unai ese tano idauidau ai idia noho brens ofesi edia gaukara hatamonaia karana ia koua lasi. Ena be Iehova ena Witnes taudia be tano idauidau taudia, to Dirava ena Basileia ena King, Iesu Keriso, ese ia durudia idia gaukara hebou totona. Kahirakahira, ia ese tanobada hegegemadai bese ibounai do ia hatamonadia bona “ia kwalimu.”​—⁠Apok. 6:2.

19. Hereva momokani dainai, Iehova ena Witnes taudia be dahaka idia karaia?

¹⁹ Iehova ena Witnes taudia be tano idauidau amo idia mai bona gado idauidau idia herevalaia. To, hereva momokani ese idia ia hatamonaia bona do idia parara lasi. (Sepanaia 3:9, BHğ duahia.) Tanobada hegegemadai idia be ruma bese badana ta bamona. Ena be hari, idia be inai tanobada dikana ai idia noho, to idia be tanobada ena lasi. Edia lalotamona karana ese ia hamomokania, nega matamata ai idia ese ma haida be idau tano taudia bamona do idia kara henia lasi. Oibe, unai nega ai tanobada taudia ibounai be do idia moale, bona tano bona kopina idauidau taudia be edia tadikaka korikori bamona do idia kara henia.