1. Momo be inai hereva igui hesiai taudia idia kamonai neganai, dahaka lalohadai idia abia?

 LAGANI 2,500 gunanai, Grik toretore tauna ta ia gwau, ta be sibona ia abia hidi lasi igui hesiai tauna ai ia lao totona. Hari, taunimanima be unai lalohadai idia abia dae danu. Momo be inai hereva igui hesiai taudia idia kamonai neganai, inai lalohadai idia abia: Taunimanima be ma haida ese idia guia bona mai dagedage ida idia doria edia hesiai gaukara idia karaia totona, bona edia gaukara amo edia biaguna sibona idia hanamoa.

2, 3. (a) Iesu ese ena hesiai taudia be edena bamona ia kara henidia? (b) Inai stadi ai edena henanadai do ita herevalaidia?

² Iesu ia gwau ena murinai idia raka taudia be manau hesiai taudia. To, ia ese idia do ia guia bona dagedage henia lasi. Danu, idia do ia matauraia bona gaukara namona do ia henia. Iesu ese ia herevalaia “hesiai tauna” ta ena sivarai mani ita laloa. Keriso be kahirakahira do ia mase neganai, ia gwau “hesiai tauna mai ena kamonai, bona mai ena kara maoromaoro” dekenai maduna badana ia henia.​—⁠Mat. 24:45-47, BH.

³ Luka ese ena buka lalonai, unai hesiai tauna ia gwauraia “kohu naria tauna.” (Luka 12:42-44 duahia.) Hari inai negai, Keristani taudia momo be “kohu naria tauna” ena orea taudia lasi. To, Baibel ia hahedinaraia dala ma ta ai, Keristani taudia ibounai be kohu naria taudia danu. Dirava ena hesiai gaukara lalonai, dahaka maduna idauidau ita huaia? Eda maduna idauidau be edena bamona ita laloa? Unai henanadai ita haerelaidia totona, Baibel negadiai idia noho kohu naria taudia edia maduna mani ita herevalaia.

4, 5. Baibel negadiai kohu naria taudia edia maduna be dahaka? Haheitalai haida gwauraia.

⁴ Baibel negadiai, kohu naria tauna be ena biaguna ese ia  abidadama henia hesiai tauna. Unai dainai, biaguna ese ia dekenai gaukara momo ia henia bona ia ese biaguna ena ruma bona bisinesi ia naria. Ia ese ena biaguna ena ruma, moni bona hesiai taudia ma haida edia gaukara ia naria. Haheitalai ta be Aberahamo ena kohu naria tauna, Eliesere. Reana, ia be Aberahamo ese ia siaia Mesopotamia dekenai Isako ena adavana ta ia tahua totona. Unai be maduna badana!​—⁠Gen. 13:2; 15:2; 24:2-4.

⁵ Aberahamo ena tubuna Iosepa be Potifara ena kohu naria tauna. (Gen. 39:1, 2, NW) To gabeai, Iosepa danu be mai ena kohu naria tauna, bona Baibel ia gwau ia be Iosepa ena “hesiai tauna badana.” Unai hesiai tauna ese Iosepa ena tadikaka ten ia welkam henidia, bona edia dabu gaudia ia henia. Danu, Iosepa ia ura ena tadikaka ia tohodia neganai, unai hesiai tauna ese ia durua bona siliva kapusi be Beniamina ena puse lalonai ia udaia. Unai ese ia hahedinaraia, biagudia momo be edia kohu naria taudia idia abidadama henia.​—⁠Gen. 43:19-25; 44:1-12.

6. Elda taudia edia maduna idauidau be dahaka?

⁶ Lagani handred haida murinai, aposetolo Paulo ia gwau elda taudia be Dirava ena gaukara idia naria taudia. (Tito 1:7) Idia be “Dirava ena mamoe oreana” idia naria dainai, idia ese kongrigeisen idia gunalaia. (1 Pet. 5:1, 2) Momokani, Dirava ena orea lalonai elda taudia be maduna idauidau idia huaia. Hegeregere, elda momo be kongrigeisen tamona lalonai idia gaukara. Loaloa naria taudia be kongrigeisen momo lalonai idia gaukara. Brens Komiti taudia be tano ta ena kongrigeisen ibounai idia naria. To, namona be idia gaukara goada edia maduna idia huaia namonamo totona. Badina elda ibounai ese Dirava vairanai, “edia gaukara ena anina do idia gwauraia hedinarai.”​—⁠Heb. 13:17.

7. Edena dala ai Keristani taudia ibounai be kohu naria taudia?

⁷ Kamonai Keristani taudia momo be elda taudia lasi, to edena dala ai ita diba idia be kohu naria taudia danu? Aposetolo Petero ese Keristani taudia ibounai dekenai revareva ta ia torea, ia gwau: “Umui ta ta ese harihari gauna umui abia hegeregerena, naria taudia namodia bamona, Dirava ena amo umui abia hebogahisi hereadaena do umui gaukaralaia ta ta umui hesiai henia totona. Unai hebogahisi hereadaena be dala idauidau ai ia hedinarai.” (1 Pet. 1:1; 4:10) Dirava be mai ena hebogahisi dainai, ita ibounai dekenai harihari gaudia hegeregere diba, kara namodia, gau namodia, bona aonega ia henia. Unai gaudia ita gaukaralaia diba iseda tadikaka taihu ita durua totona. Unai dainai, Dirava ena hesiai taudia ibounai be kohu naria taudia. Bona ia diba ita dekenai ia henia harihari gaudia do ita gaukaralaia namonamo.

8. Ita be kohu naria taudia dainai edena point ita laloatao be namo?

⁸ Hari, ita ese point badadia toi do ita herevalaia. Keristani taudia o kohu naria taudia ese unai point idia laloatao be namo. Ginigunana be: Ita ibounai be Dirava ena bona ia ita hamoalea be gau badana. Paulo ia gwau: “Umui be umui sibona emui lasi, badina be Dirava ese dava bada gauna amo umui ia hoia.” Unai dava bada gauna be, Keriso ena mauri davalaia boubouna. (1 Kor. 6:19, 20) Ita be Iehova ena dainai, ena taravatu ita badinadia be gau badana, bona unai ita karaia be auka lasi. (Roma 14:8; 1 Ioa. 5:3) Ita danu be Keriso ena hesiai taudia. Baibel negadiai idia noho kohu naria taudia hegeregeredia, ita danu be mai eda ura kwalimu. To, ita be sibona eda ura hegeregerena unai ura kwalimu ita gaukaralaia lasi. Namona be Dirava ena hakaua herevadia ita badinaia. Oibe, herevana Dirava ena orea lalonai dahaka maduna ita huaia, to ita ibounai be Dirava bona Keriso edia hesiai taudia.

9. Iesu ese biaguna bona ena hesiai tauna edia gaukara hebou dalana be edena bamona ia gwauraia?

⁹ Iesu be ena hahediba taudia dekenai hesiai tauna ta ena sivarai ia gwauraia. Unai ese  ita ia durua biaguna bona ena hesiai tauna edia gaukara hebou dalana ita lalopararalaia totona. Unai hesiai tauna be uma dekenai ia gaukara ela bona adorahi ai ruma dekenai ia giroa lou. Ena biaguna be ia dekenai do ia gwau, ‘Oi mai haraga bona aniani patana dekenai oi helai,’ a? Lasi, to ia dekenai ia gwau: ‘Lauegu adorahi aniani totona gau ta oi hegaegaelaia, bona emu gaukara dabua do oi hahedokilaia bona lau do oi hesiai henia ela bona egu aniani bona inuinu lau haorea, unai murinai oi be do oi aniani bona inuinu.’ Unai sivarai amo Iesu be ena hahediba taudia dekenai dahaka ia hadibaia? Iesu ia gwau: ‘Umui danu, umui dekenai idia henia gaukara ibounai umui haorea neganai, umui gwau, “Ai be anina lasi hesiai taudia. Ai karaia be maoro gaukarana be ai karaia haorea unai.”’​—⁠Luka 17:7-10.

10. Dahaka ese ia hahedinaraia, Iehova be iseda hesiai gaukara ia laloa bada?

¹⁰ Momokani, Iehova be ia totona ita karaia gaudia ibounai ia laloa bada. Baibel ese ita ia hagoadaia, ia gwau: “Dirava ena kara be ia gageva lasi, ia ese emui gaukara bona iena ladana totona umui hahedinaraia lalokauna, do ia laloaboio lasi.” (Heb. 6:10) Iseda diba bona goada hegeregerena, Iehova ese ita ia noia iena hesiai gaukara ita karaia totona. Ma danu, unai gaukara ita karaia be auka lasi bona ia be iseda namo totona. To, Iesu ena parabole bamona, hesiai tauna be biaguna ena ura ia atoa guna bona sibona ena ura ia karaia lasi. Unai hegeregerena, Dirava ita gwauhamata henia neganai, abia hidi ita karaia eda mauri lalonai iena ura sibona do ita atoa guna. Unai oi abia dae, a?

11, 12. Edena bamona kara ita karaia, bona edena bamona kara ita dadaraia be namo?

¹¹ Point badana iharuana be: Ita ibounai be kohu naria taudia dainai, ita badinaia taravatu be hegeregere. Momokani, Iehova ena orea lalonai haida ese idia huaia maduna be ma haida ese idia abia lasi. To, gau momo dekenai ita badinaia taravatudia be hegeregere. Hegeregere, Iehova ena hesiai taudia ese ta ta idia lalokau henia be gau badana. Iesu ia gwau, bema ta ta ita lalokau henia, taunimanima do idia diba ita be iena hahediba taudia. (Ioa. 13:35) To, namona be ita gaukara goada iseda tadikaka taihu sibona lasi, to Witnes lasi taudia ita lalokau henidia danu. Oibe, ita ibounai ese unai ita karaia be namo.

¹² Dirava ia ura kara namodia ita karaia, bona Baibel ese ia taravatua gaudia ita dadaraia. Paulo ia gwau: “Matabodaga taudia, kaivakuku idia tomadiho henia taudia, heudahanai taudia, hahine edia kara bamona idia karaia tatau, tatau ida idia mahuta hebou tatau, henaohenao taudia, mataganigani taudia, inuinu kekero taudia, hereva dika taudia, bona henaohenao taudia be Dirava ena Basileia do idia abia lasi.” (1 Kor. 6:9, 10) Momokani, Dirava ena taravatu ita badinaia be mai ena hekwarahi, to bema ita gaukara goada, hahenamo momo do ita davaria. Hegeregere, do ita gorere momo lasi, eda hetura karana ma haida ida do ita moalelaia, bona eda hetura karana Dirava ida be do ia goada.​—⁠Isaia 48:17, 18 duahia.

13, 14. Dirava ese Keristani taudia ibounai dekenai dahaka gaukara ia henia? Bona unai gaukara dekenai emu lalohadai be dahaka?

¹³ Danu, namona be ita laloatao kohu naria tauna be gaukara momo ia karaia. Ita danu be mai eda gaukara momo. Dirava ese ita dekenai dava bada harihari gauna ta ia henia. Hereva momokani be ita dekenai ia hadibaia, bona ia ura ma haida dekenai ita hadibaia danu. (Mat. 28:19, 20) Paulo ia gwau, Keristani taudia be Keriso ena hesiai taudia bona ‘Dirava ena hunia hereva helagana idia naria taudia.’ (1 Kor. 4:1) Paulo ia diba ia be “hunia hereva helagana” o Baibel ena hereva momokani ia abia dainai, ma haida dekenai ia hadibaia be namo. Iena Biaguna, Iesu Keriso ia ura Paulo be unai ia karaia.​—⁠1 Kor. 9:16.

 ¹⁴ Hereva momokani be ma haida dekenai ita hadibaia neganai, ita hahedinaraia idia ita lalokau henia. To, ita ta ta be dina ibounai ita haroro diba lasi, badina iseda noho daladia be idauidau. Bona Iehova be unai ia diba. To, mai anina bada gauna be, eda goada hegeregerena ena hesiai gaukara ita karaia. Unai amo ita hahedinaraia, Dirava bona eda dekena taudia ita lalokau henia.

15-17. (a) Dahaka dainai kohu naria tauna ese ena gaukara ia karaia namonamo be namo? (b) Edena dala ai Iesu ia hahedinaraia, eda gaukara ita karaia namonamo lasi neganai, hekwakwanai ia vara diba?

¹⁵ Point badana ihatoina be: Iseda gaukara ita karaia namonamo neganai, ita hahedinaraia ita be Dirava ita badinaia. Kohu naria tauna be reana mai ena kara namodia bona diba, to unai gaudia be anina lasi bema Dirava ia kamonai henia lasi, bona ena maduna ia huaia namonamo lasi. Danu, bema ia ese Dirava ia badinaia, ena gaukara do ia karaia namonamo bona ena biaguna do ia hamoalea. Paulo ia gwau: “Unai naria taudia amo idia tahua gauna be inai: Namona be idia ese edia gaukara idia karaia momokani.”​—⁠1 Kor. 4:2.

¹⁶ Ita diba bema Dirava ita badinaia, ia ese ita do ia hanamoa. To bema ia ita badinaia lasi, ia ese ita do ia lalonamo henia lasi. Iesu ese ia gwauraia moni parabolena ese unai ia hahedinaraia. Biaguna ta be ena moni amo ‘bisinesi idia karaia’ taudia dekenai ia moale bona ia hanamodia bada. To, kamonai lasi hesiai tauna dekenai ia gwau, ia be kara dika, lahedo bona anina lasi hesiai tauna. Biaguna ese ena moni ia abia giroa bona unai hesiai tauna be murimuri ai ia negea.​—⁠Mataio 25:14-18, 23, 26, 28-30 duahia.

¹⁷ Nega ta Iesu ia hahedinaraia bema eda gaukara ita karaia namonamo lasi, hekwakwanai do ia vara diba. Ia gwau: “Tau ta be ia taga bona  ia be mai ena kohu naria tauna, bona taga tauna idia hamaoroa unai tauna ese ena kohu ia gaukaralaia namonamo lasi. Unai dainai unai tauna ia boiria bona ia gwau, ‘Oi dainai lau kamonai sivaraina be namo lasi. Oi lao oi karaia gaukara ena ripoti oi torea, badina oi be inai ruma do oi naria lasi.’” (Luka 16:1, 2) Kohu naria tauna ese biaguna ena kohu ia gaukaralaia kerere dainai, biaguna ese ia hadokoa. Unai siri amo mai anina bada gauna ta ita dibaia. Namona be ita gaukara goada, Dirava ese ita dekenai ia henia gaukara ita karaia namonamo totona.

18. Dahaka dainai ma haida ida sibona ita hahegeregerea be aonega karana lasi?

¹⁸ Namona be sibona ita nanadaia, ‘Lau be edena bamona kohu naria tauna?’ Ma haida ida sibona ita hahegeregerea be aonega karana lasi. Baibel ia gwau: “Namona be ta ta ese sibona ena kara do ia tahua namonamo, vadaeni ia sibona dekenai do ia moale, bona ma ta ida sibona do ia hahegeregerea lasi.” (Gal. 6:4) Namo lasi ma haida ida sibona ita hahegeregerea, to namona be ita hekwarahi eda gaukara ita hanamoa bona ita karaia namonamo totona. Unai amo do ita hekokoroku lasi, eiava ita lalohisihisi lasi. Danu, reana iseda mauri dalana ia idau, hegeregere ita gorere, ita buruka eiava maduna ma haida dainai, eda goada be guna bamona lasi. Eiava iseda nega bona goada be hegeregere dainai, gaukara momo ita karaia diba. Vadaeni, namona be iseda hesiai gaukara ita habadaia.

19. Bema maduna ta ita abia haraga lasi, dahaka dainai ita lalohisihisi lasi be namo?

¹⁹ Bema kongrigeisen lalonai maduna ita abia lasi, namo lasi maduna idia huaia tadikaka ida sibona ita hahegeregerea. Hegeregere, reana tadikaka ta ia ura elda maduna ia abia, eiava hebouhebou ai tok ia henia. Namona be ia gaukara goada, unai amo do ia hegeregere maduna ia abia totona. To, namo lasi ita lalohisihisi bema maduna ita abia haraga lasi. Badina haida dainai reana nega sisina daudau do ita naria. Mani Mose ena sivarai ita laloa. Ia laloa ia be hegeregere Israela taudia be Aigupito amo do ia hakaudia totona. To ia be lagani 40 ia naria murinai, unai ia karaia. Unai lagani 40 lalodiai, ia ese kara namodia momo ia dibaia, unai amo ia hegeregere gwau-edeede Israela taudia ia gunalaia totona.​—⁠Kara 7:22-25, 30-34.

20. Ionatana ena haheitalai amo dahaka ita dibaia?

²⁰ Reana maduna haida be do ita abia diba lasi. Ionatana dekenai unai bamona ia vara. Ia be Saulo ena natuna dainai, mai ena maoro Israela ena king ai ia lao totona. To, Dirava ese mero matamatana, Davida ia abia hidi king ai do ia lao. Ionatana be dahaka ia karaia? Ia ese Dirava ena abia hidi ia abia dae, bona Davida ia durua dainai kahirakahira ia mase. Davida dekenai ia gwau: “Oi be Israela ena king do oi lao, bona . . . lau ese oiemu iharuana do lau lao.” (1 Sam. 23:17) Ionatana ena haheitalai amo dahaka oi dibaia? Ionatana be Davida ia badu o mama henia lasi, Saulo ia karaia bamona. Namo lasi ita mama bema haida be maduna idia abia, to ita be lasi. To, namona be ita ibounai ita hekwarahi eda hesiai gaukara ita karaia namonamo totona. Ita diba momokani tanobada matamatana lalonai, Iehova ese ena hesiai taudia edia ura gaudia ibounai do ia henia.

21. Dirava ena kohu naria gaukarana be edena bamona ita laloa be namo?

²¹ Namona be ita laloatao, ita be Dirava ena kohu naria taudia bona ia be mai dagedage ida ita ia biagua lasi. To, ia ese ita ia abidadama henia bona matauraia dainai, inai nega dokona ai sivarai namona harorolaia gaukarana be ita dekenai ia henia. Unai gaukara be gabeai do ita karaia lou lasi. Bona ia ese ita dekenai ura kwalimu ia henia, unai amo do ita abia hidi edena dala ai eda hesiai gaukara idauidau do ita karaia. Oibe, kohu naria taudia namodia ai ita lao be namo. Bona ita laloatao, Siahu Ibounai Lohiabada, Iehova, ita hesiai henia be hahenamo badana.