Baibel ese ita ia sisiba henia, ia gwau: “Kudouna amo idia mai gaudia be lalohadai dikadia, ala-ala, heudahanai, matabodaga karadia, henaohenao, hereva koikoi, Dirava ena ladana hadikaia herevadia.” (Mat. 15:19) Eda kudouna ai ita laloa gaudia ese ita idia koia diba, Dirava ese ia ura henia lasi karadia ita karaia totona. Bona reana kerere ita karaia murinai, ita laloparara eda kudouna ese ita ia koia vadaeni. Kerere ita do karaia lasi neganai, dahaka ese ita do ia durua eda kudouna ena ura ita diba totona?

Dina ta ta Baibel oi duahia bona ena hereva oi laloa dobu.

Aposetolo Paulo ia gwau: “Dirava ena hereva be ia mauri noho, bona ia be mai ena siahu bona mai ena matana rua tuari kaia ia hereaia momokani. Bona tau ta ia gwadaia neganai, ena lalona momokani ai ia vareai bona unai tauna ena lalona bona iena kara toana ia hapararaia.” Baibel ese ta “ena kudouna ai idia noho lalohadai bona ura ibounai ia tahua diba.” (Heb. 4:12) Baibel ita stadilaia neganai, namona be iseda lalohadai bona kara ita tahua. Unai ese ita do ia durua, eda kudouna ena ura ita diba namonamo totona. Unai dainai, dina ta ta Baibel ita duahia bona ena hereva ita laloa dobu be gau badana. Unai ese ita do ia durua, Iehova ena laloa dalana ita abia totona.

Baibel ena hereva ita badinaia neganai, unai ese eda lalomamina do ia hadibaia. Iseda lalomamina  be ita lalonai ia hereva gadona ta bamona. Ita ia hamaoroa kara ta be kerere, bona ita ia koua ekskius ita tahua lasi, kara dikana ta ita karaia totona. (Roma 9:1) Danu, Baibel lalonai haheitalai momo idia noho ita “idia hadibaia totona.” (1 Kor. 10:11) Unai haheitalai amo diba ita abia neganai, abia hidi kereredia do ita karaia lasi. Heduru do ita abia daladia ma haida be dahaka?

Dirava oi guriguri henia oi do ia durua emu kudouna ena ura oi diba totona.

Iehova be taunimanima edia “kudouna ia tahua tauna.” (1 Siv. 29:17, NW) Ia be “iseda kudouna ia hereaia bona gau ibounai ia diba.” (1 Ioa. 3:20) Dirava be ita ia diba namonamo. Bema mai momokani ida iseda lalohekwarahi, hemami, bona ura be guriguri amo Iehova dekenai ita gwauraia, ia ese ita do ia durua eda kudouna ena ura ita diba totona. Danu, Dirava ita noia diba ita dekenai “laloa goevagoeva” ia henia totona. (Sal. 51:10) Unai dainai, Iehova ena heduru ita abia totona, guriguri be mai anina bada.

Keristani heboudia dekenai oi kamonai namonamo.

Hebou ai kamonai namonamo karana ese ita do ia durua, eda kudouna ena ura ita diba totona. Momokani, reana hebou ibounai lalonai gau matamatadia do ita dibaia lasi, to bema hanaihanai ita lao, Baibel ena hakaua herevadia do ita lalopararalaidia namonamo. Hebou amo ita abia sisiba ese ita idia durua eda kudouna ena ura ita dibaia, bena eda kara haida ita haidaua diba. Danu, tadikaka taihu edia haere amo heduru bada ita abia diba. (Aon. 27:17) To, bema hanaihanai eda tadikaka taihu ida ita hebou lasi, ita be sibona do ita laloa bada bona abia hidi kereredia ita karaia diba. (Aon. 18:1) Unai dainai sibona oi nanadaia, ‘Keristani heboudia ibounai lau lao, bona lau kamonai namonamo, a?’​—⁠Heb. 10:24, 25.

Eda kudouna ese dala idauidau ai ita ia koia diba. Mani unai dala foa ita herevalaia: (1) Moni bona kohu ura henia karana, (2) alkahol gaukaralaia karana, (3) turadia abia hidi karana, bona (4) ita karaia moale karadia.

Moni bona kohu ura henia karana.

Ita ibounai ita ura aniani, dabua bona noho gabuna ita abia, bona unai be kerere lasi. To, Iesu ese ita ia hadibaia eda mauri lalonai moni bona kohu ita atoa guna lasi be namo. Iesu ese ena parabole ta lalonai, taga tauna ta ia herevalaia. Ia ena aniani haboua rumadia be witi amo idia honu bona gabu be lasi witi ma haida ia haboua totona. Unai dainai ia ura unai ruma ia kokidia bona badadia ia haginia. Bena sibona dekenai ia gwau: “Unuseniai egu witi bona egu gau namodia ibounai do lau haboua, bena lau sibona dekenai do lau gwau: ‘Lagani momo totona gau momo lau haboua, vadaeni do lau laga-ani, do lau aniani, do lau inuinu, bona sibona do lau hamoalea.’” To, unai taga tauna be mai anina bada gauna ta ia laloaboio: Bema unai hanuaboi ai ia mase, ia karaia gaukara ibounai be anina lasi.​—⁠Luka 12:16-20.

Eda mauri lagani ia bada ia lao neganai, reana ita laloa momo, ita ura moni sisina ita haboua sibona ita naria totona. Unai dainai, reana ekskius do ita tahua moni gaukara ai ita ovataim, hebou ita reaia, ita haroro momo lasi, bona eda Keristani maduna idauidau ita huaia lasi. Eiava reana ita be matamata bona ita diba ful-taim hesiai gaukara be mauri dala hereadaena.  To, reana ita laloa moni gaukara ita karaia bona moni haida ita haboua guna, bena gabeai painia gaukara ita karaia diba. Bema unai bamona oi laloa, namona be oi laloatao: Hari be nega namona, Dirava ena hesiai gaukara ita karaia goadagoada, badina ita diba lasi kerukeru do ita mauri noho o lasi.

Alkahol gaukaralaia karana.

Aonega Herevadia 23:20 ia gwau: “Kekero muramura momo idia inua taudia, danu do oi inua hebou lasi.” Bema oi ura dikadika alkahol oi inua, reana ekskius do oi karaia alkahol oi inua hanaihanai totona. Hegeregere, reana do oi gwau: ‘Alkahol lau inua lau kekero totona lasi, to lau ura lau moale sibona.’ Bema unai bamona oi laloa, namona be mai momokani ida emu kudouna ena ura oi dibaia, bona namo lasi emu kudouna ese oi ia koia.

Turadia ita abia hidi karana.

Dina ta ta ai sikuli, moni gaukara, o haroro gaukara ai ita ese Iehova idia hesiai henia lasi taudia ita davaria. To, namo lasi idia ida nega bada ita haorea o idia be eda tura namodia ai ita halaoa. Reana ekskius do ita karaia bona ita gwau idia be mai edia kara namodia momo. To Baibel ia gwau: “Namo lasi ma haida ese umui idia hakaua kerere. Hebamo dikadia ese ta ena kara namodia idia hadikaia diba.” (1 Kor. 15:33) Ranu mirona sisina ese ranu namona ia hadikaia hegeregerena, Dirava idia lalokau henia lasi taudia bamoa karana ese iseda hetura karana Iehova ida ia hadikaia diba. Bena reana tanobada taudia edia lalohadai, hereva, kara, bona dabua do ita tohotohoa.

Ita karaia moale karadia.

Hari inai nega ena teknoloji dainai, moale karadia idauidau davaria be auka lasi. To Keristani tauna dekenai, unai bamona moale karadia momo be namo lasi. Paulo ese Keristani taudia ia hamaoroa, namona be kara mirodia idia herevalaia lasi. (Efe. 5:3) To, bema ita ura dikadika miro gauna ta ita itaia o kamonai be edena bamona? Reana ekskius idauidau do ita karaia bona do ita gwau, moale karadia ita karaia be kerere lasi, bona do ita karaia moale karadia be ita sibona ese ita abia hidi diba. To, namona be hanaihanai Paulo ena sisiba ita badinaia, bona miro gaudia ita itaia o kamonai henia lasi.

Ena be eda kudouna ese ita ia koia bona eda kara kereredia dainai ekskius ita karaia, to nega ia noho eda kara ita haidaua totona. (Efe. 4:22-24) Mani haheitalai rua ita itaia.

Miguel a be moni bona kohu dekenai ena lalohadai ia haidaua. Ia gwau: “Lau, egu adavana bona natuna, ai noho tanona dekenai taunimanima be kohu matamatadia abia karana idia laloa bada. Unai dainai nega bada lau atoa kohu momo lau abia totona, bona lau laloa kohu momo tahua karana ena tarapu ai do lau moru lasi.” To gabeai, Miguel ia laloparara iena lalohadai be kerere. Iehova ia guriguri henia ia do ia durua ena lalohadai ia haidaua totona. Miguel ma ia gwau: “Iehova lau hamaoroa lau bona egu famili ai ura Ia do ai hesiai henia. Abia hidi ai karaia, kohu momo lasi maurina do ai noholaia bona pablisa momo lasi gabuna ta dekenai do ai lao. Daudau lasi ai be painia gaukara ai karaia. Ai laloparara emai mauri ai moalelaia totona, tauanina durua gaudia haida sibona ai abia be hegeregere.”

Lee be tura kereredia ia bamoa momo. Ia dekenai ia vara gauna ese ia hahedinaraia, ita ura henia bona karaia gaudia ita laloa namonamo be mai anina bada. Lee ia gwau: “Egu gaukara dainai idau tano amo idia mai taudia lau bamoa momo. Lau diba unai bisinesi heboudia ai do idia inuinu, to lau ura idia lau bamoa. Nega momo kahirakahira lau kekero, to gabeai unai kara dainai lau lalohisihisi. Lau laloparara egu kara lau haidaua be namo. Baibel ena sisiba bona elda taudia edia heduru herevadia ese lau idia durua dainai, lau laloparara lau be Iehova idia lalokau henia lasi taudia lau bamoa. Hari, unai bisinesi heboudia dekenai lao lao lasi, to telefon amo lau rini henidia bona bisinesi gaudia ai herevalaia.”

Oibe, namona be mai momokani ida eda kara ita tahua bona eda kudouna ena ura korikori ita diba. Edena dala ai unai ita karaia diba? Namona be Iehova ita guriguri henia, badina ia be iseda kudouna ai ita ‘laloa hunia gaudia ibounai ia diba.’ (Sal. 44:21) Danu ita dekenai Baibel ia noho. Baibel be hevarivari bamona, ita duahia neganai ita do ia durua, iseda kudouna ena ura ita dibaia totona. (Iam. 1:22-25) Ma danu, Keristani heboudia bona Baibel buka idauidau amo, Iehova ena sisiba ita abia. Unai gaudia ibounai ese ita idia durua diba, eda kudouna ita gimaia bona kara maorodia ita karaia noho totona..