1, 2. Kahirakahira edena tuari korikorina do ia vara? Unai tuari lalonai ita be dahaka do ita karaia lasi?

 OCTOBER 30, 1938 ai, United States dekenai taunimanima milioni momo be reidio drama ta idia kamonaia. Unai drama lalonai nius ripota ena kahana idia karaia taudia idia gwau, haida be planeti ladana, Mars amo idia diho mai bona Tanobada idia hadikaia. Momo idia laloa tuari korikorina ta ia vara dainai, idia gari bona kara idauidau idia karaia edia inai taudia amo sibona idia gimaia totona.

² Kahirakahira, tuari korikorina ta do ia vara. To, momo be unai totona idia do hegaegae lasi. Unai be Aramagedono tuarina​—⁠Dirava ese inai tanobada dikana do ia haorea tuarina. Unai be reidio drama ta bamona lasi. Ita diba unai tuari be do ia vara momokani, badina Baibel ese ia perovetalaia. (Apok. 16:14-16) Unai tuari ai ita be do ita tuari lasi. To, Iehova ese ena siahu do ia gaukaralaia hoa dalanai ita ia hamauria totona.

3. Edena peroveta herevana do ita stadilaia, bona dahaka dainai ita dekenai unai be mai anina bada?

³ Sekaraia karoa 14 ena peroveta herevana ta ese Aramagedono tuarina ia herevalaia goevagoeva. Ena be unai peroveta herevana be lagani 2,500 gunanai idia torea, to ita dekenai ia be mai anina bada. (Roma 15:4) Unai peroveta herevana ese lagani 1914 ai, Iesu be guba ai ia lohia matamaia negana amo, Dirava ena taunimanima dekenai idia vara gaudia ia herevalaia. Kahirakahira do idia vara gau namodia ia herevalaia danu. Ia ese “koura badana ta” bona “mauri ranudia” ia herevalaia. (Sek. 14:4, 8; BHḡ) Inai stadi lalonai do ita tahua, unai koura be dahaka bona edena dala ai Iehova ese ena taunimanima be unuseniai do ia gimadia. Danu, do ita tahua unai mauri ranudia edia anina be dahaka, bona edena dala ai ita idia durua diba.  Unai ranu do ita inua karana do ita lalopararalaia sibona lasi, to do ita ura unai ranu ita inua danu. Hari mani unai peroveta herevana ita herevalaia.​—⁠2 Pet. 1:19, 20.

4. (a) “Iehova ena dina” be edena negai ia matamaia? (b) Lagani 1914 do lasi neganai, horoa taudia be dahaka idia harorolaia? Politikol bona tomadiho gunalaia taudia be dahaka idia karaia?

⁴ Sekaraia karoa 14 ena hamatamaia herevana be “Iehova ena dina” ia herevalaia. (Sekaraia 14:1, 2, NW.) Unai dina be dahaka? Unai be Iehova ena dina bona lagani 1914 ai ia matamaia. Unai lagani ai Iesu be guba ai Dirava ena Basileia ena King ai ia lao. (Apok. 1:10; 11:15) Lagani momo lalonai, horoa Keristani taudia be haroro gaukara lalonai idia gwau, “idau bese edia nega” be lagani 1914 ai do ia ore. Danu, idia gwau lagani 1914 murinai, tanobada ai hekwakwanai momo do idia vara, guna bamona lasi. (Luka 21:24) “Idau bese” taudia be unai haroro herevana idia kamonaia, a? Lasi. To, politikol bona tomadiho gunalaia taudia ese unai horoa taudia idia kirikirilaia bona dagedage henia. Ita gwau diba, unai gunalaia taudia be Siahu Ibounai Diravana idia kirikirilaia, badina unai horoa taudia be Dirava ena Basileia ena gwaukau taudia.​—⁠Heb. 12:22, 28.

5, 6. (a) Dirava ena taunimanima idia inai henia taudia be dahaka idia karaia? (b) “Hanua dekenai do noho taudia” be daidia?

⁵ Sekaraia ese Dirava ena taunimanima idia inai henia taudia be inai bamona ia perovetalaia: “Idia ese Ierusalema do idia abia.” “Ierusalema” be Dirava ena Basileia ia laulaulaia. Tanobada ai idia do noho horoa taudia be unai Basileia ena taunimanima. (Fili. 3:20) Tanobada Tuarina Ginigunana ai, Iehova ena orea idia naria tadikaka be pulisi ese idia abia bona Atlanta, Georgia, U.S.A ena dibura ruma ai idia atoa neganai, unai be hegeregere Ierusalema idia “abia.” Horoa taudia be edia inai taudia ese idia dagedage henia, edia buka bona magasin idia taravatua, bona edia haroro gaukara idia koua toho. Unai be hegeregere, dagedage taudia ese Ierusalema ena ruma kohudia idia “dadia.”

⁶ Ena be Dirava ena taunimanima idia inai henia taudia idia dagedage bona koikoi herevadia idia gwauraia, to idia ese tomadiho momokani idia haorea diba lasi. Horoa taudia haida be idia gini goada. Sekaraia ia peroveta bamona, idia be “hanua dekenai do noho taudia,” bona idia ura lasi “hanua dekena amo do idia siaia lao.”

7. Edena dala ai horoa taudia edia abidadama ese ita ia durua?

⁷ Tanobada Tuarina Ginigunana ia ore neganai, Dirava ena taunimanima dagedage henia karana ia doko, a? Lasi. Sekaraia ese ia perovetalaia dagedage karana ia doko lasi. (Apok. 12:17) Hegeregere, Tanobada Tuarina Iharuana lalonai, iseda tadikaka be dagedage bada idia davaria. Horoa taudia edia abidadama karana ese ita ia durua, ita davaria hahetoho idauidau ita haheaukalaia totona. Hegeregere eda abidadama dainai eda ruma taudia, gaukara turadia, o sikuli turadia ese ita idia dagedage henia. (1 Pet. 1:6, 7) Herevana edeseniai ita noho, to namona be Iehova ita badinaia noho, bona eda inai taudia ita gari henidia lasi. (Fili. 1:27, 28) Ena be haida ese ita idia inai henia, to edena dala ai ita noho namonamo diba?​—⁠Ioa. 15:17-19.

8. (a) Baibel lalonai, nega haida ororo be dahaka ia laulaulaia? (b) “Olive Ororo” ese dahaka ia laulaulaia?

⁸ Ita dibaia vadaeni Ierusalema, be Dirava ena Basileia ia laulaulaia. To, “Olive Ororo, . . . Ierusalema ena dina daekau kahanai” be dahaka ia laulaulaia? Edena  dala ai “Olive Ororo be do ia parara, kahana kahana do ia lao,” bena ororo rua ai do ia lao? Dahaka dainai Iehova ese unai ororo ia gwauraidia, “lauegu ororo”? (Sekaraia 14:3-5 duahia.) a Baibel lalonai, nega haida ororo be basileia o gavamani idia laulaulaidia. Danu, nega momo Baibel ia gwau Iehova ena gimaia karana bona hahenamo be Dirava ena ororo amo idia mai. (Isa. 11:9; Isa. 25:6, 7) Unai dainai, Olive Ororo be Iehova ese guba bona tanobada ia lohia siahuna ia laulaulaia.

9. Olive Ororo ia parara bena “kahana kahana do ia lao,” ena anina be dahaka?

⁹ Sekaraia ia gwau Olive Ororo ia parara neganai, “kahana kahana do ia lao.” Unai ena anina be dahaka? Anina be Iehova be lohia dalana iharuana ia haginia, mai anina bada gauna ta ia karaia totona. Unai lohia dalana iharuana danu be Dirava ena, bona Iesu Keriso be ena King. Unai lohia daladia rua be Iehova ena dainai, ia ese unai ororo rua ia gwauraidia “lauegu ororo.”​—⁠Sek. 14:4, 5, NW.

10. Ororo ruaosi huanai ia noho “koura badana” ese dahaka ia laulaulaia?

¹⁰ Sekaraia ia peroveta, Olive Ororona ia parara neganai, ena kahana ta be mirigini kahana ia lao, bona kahana ma ta be diho kahana ia lao, to Iehova be unai ororo ruaosi edia latanai ia gini. Unai ororo ruaosi edia huanai o Iehova ena aena henunai, be “koura badana” ta ia vara. Unai koura be dahaka? Ia be Dirava ena gimaia karana ia laulaulaia. Ororo ruaosi huanai ia noho kourana lalonai taunimanima idia noho namonamo hegeregerena, Iehova ena hesiai taudia be Ia bona ena Natuna edia lohia henunai idia noho namonamo. Iehova ese tomadiho momokanina do ia gimaia dainai, gau ta ese do ia hadikaia lasi. Olive Ororona be edena negai ia parara? Unai be lagani 1914 ai Iesu be guba ai ia lohia matamaia neganai ia vara. Danu, Sekaraia ia peroveta, Iehova ena taunimanima be unai “koura badana” dekenai do idia heau lao. Unai be edena negai ia vara matamaia?

11, 12. (a) Edena negai Dirava ena taunimanima be koura dekenai idia heau lao matamaia? (b) Dahaka ese ia hahedinaraia Iehova be ena taunimanima ia gimaia?

¹¹ Iesu ese ena murinai idia raka taudia ia hadibaia: “Egu ladana dainai bese ibounai ese umui do idia inai henia.” (Mat. 24:9) Lagani 1914 ai, nega dokona ia matamaia ema bona hari, unai kara be ia bada herea. Ena be Tanobada Tuarina Ginigunana lalonai, horoa taudia be edia inai taudia ese idia dagedage henia bada, to tomadiho momokani idia haorea lasi. Lagani 1919 ai, Dirava ena taunimanima be Babulonia Badana​—⁠tanobada ena tomadiho koikoi ibounai​—⁠amo idia raka siri. (Apok. 11:11, 12) b Unai lagani ai, Dirava ena taunimanima be koura badana dekenai idia heau lao matamaia.

¹² Lagani 1919 amo ema bona hari, Iehova be tanobada hegegemadai tomadiho momokani idia badinaia taudia ia gimaia noho. Lagani momo lalodiai, gavamani momo be Iehova ena Witnes taudia edia haroro gaukara idia koua o edia buka bona magasin idia taravatua toho. Tano haida ai unai ia do vara noho. To Iehova ese tomadiho momokani ia gimaia dainai, gavamani ese idia hadikaia ore diba lasi. Herevana gavamani be dahaka do idia karaia, to  Iehova ese ena siahu hereadaena amo Iena taunimanima do ia gimaia noho.​—⁠Deu. 11:2.

13. Edena dala ai Iehova ena gimaia kourana lalonai ita noho diba? Dahaka dainai, hari unai koura lalonai ita noho be mai anina bada?

¹³ Bema Iehova ita abidadama henia noho, ita be iena gimaia kourana lalonai do ita noho. Ia bona ena Natuna ese ita do idia gimaia dainai, gau ta eiava tau ta ese ita do ia “dadia lasi” o henaoa lasi. (Ioa. 10:28, 29) Iehova ese ita ia durua, unai amo ita be Ia bona ena Natuna edia lohia dalana ita badinaia diba. Kahirakahira do ia vara hisihisi badana lalonai, Dirava ena heduru ita abia be gau badana. Unai dainai, hari Iehova ena gimaia kourana lalonai ita noho be mai anina bada.

14, 15. Iehova ena “tuari dinana” lalonai, “koura badana” lalonai idia noho lasi taudia be edena bamona?

¹⁴ Inai tanobada dikana ena dokona ia kahirakahira lalonai, Satani ese Dirava ena taunimanima dagedage henia karadia ia habadaia noho. To kahirakahira ia ese ena dagedage karana ginigabena do ia karaia. Unai ia vara neganai, Iehova be do ia tuari bona ena taunimanima idia inai henia taudia ibounai do ia haoredia vaitani. Sekaraia ia peroveta bamona, unai be Dirava ena “tuari dinana.” Unai tuari ese do ia hamomokania, Iehova be Tuari Tauna hereadaena.​—⁠Sek. 14:3, BHḡ.

¹⁵ Iehova ena tuari dinana ai, “koura badana” lalonai idia noho lasi taudia be edena bamona? Sekaraia ia peroveta, idia be “hanuaboi” lalonai do idia noho bamona. Anina be Dirava ena lalonamo do idia abia lasi. Sekaraia ma ia gwau: “Edia hosi, doniki badadia, kamelo, bona doniki maragidia, bona boromakau idauidau ibounai” be do idia “keru” bona “aisi” bamona do idia lao. Unai ena anina be, tuari kohudia be anina lasi gaudia ai do idia lao. Sekaraia ia gwau, Iehova ese ena inai taudia be “gorere dikana” ta amo do ia panisidia. Edia matana bona malana be “do idia bodaga lao.” Ita diba lasi unai be gorere korikorina eiava lasi. To ita diba gauna be inai: Eda inai taudia ese ita do idia hadikaia lasi o Dirava ena ladana do idia hadikaia lasi. (Sek. 14:6, 7, 12, 15) “Tanobada ena king taudia mai edia tuari oreadia” be Satani ena kahanai do idia gini. Herevana idia be edeseniai idia noho, to Dirava ese idia ibounai do ia hadikaia ore. (Apok. 19:19-21) “Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho.”​—⁠Ier. 25:32, 33.

16. Ita ta ta ese edena henanadai ita laloa be namo? Hisihisi badana lalonai, dahaka ita karaia be namo?

¹⁶ Nega momo tuari ta ia vara neganai, taunimanima ibounai, idia kwalimu taudia danu, be hisihisi idia davaria. Reana aniani be momo lasi. Reana ruma o kohu idia haboioa. Reana noho dalana ia dika ia lao. Eiava taravatu momo idia noho. Bema unai ia vara ita dekenai, dahaka do ita karaia? Do ita gari, a? Do ita lalomanoka, a? Iehova do ita rakatania, a? Hisihisi badana lalonai, Iehova ena gimaia kourana lalonai ita noho be gau badana. Unai amo ita hahedinaraia Iehova ita abidadama henia, bona ita diba Ia ese ita do ia gimaia.​—⁠Habakuku 3:17, 18 duahia.

17, 18. (a) “Mauri ranudia” be dahaka? (b) “Mase Davara” bona “Davara Badana” be dahaka idia laulaulaia? (c) Emu lalona oi hadaia dahaka do oi karaia totona?

¹⁷ Aramagedono murinai, Keriso ena Basileia amo “mauri ranudia” (BHḡ) do idia aru lao. Unai “mauri ranudia” be, Iehova ese ia henia gaudia ibounai ia laulaulaia​—⁠unai gaudia amo taunimanima idia  mauri hanaihanai diba. Sekaraia ese ia perovetalaia “Mase Davara” bona “Davara Badana” be taunimanima idia laulaulaidia. “Mase Davara” ese guria gabunai idia mase taudia ia laulaulaia. “Davara Badana” lalonai mauri gaudia idia noho dainai, ia ese “hutuma bada” ia laulaulaia​—⁠Aramagedono amo idia roho mauri taudia unai. (Sekaraia 14:8, 9 duahia; Apok. 7:9-15) Unai orea rua lalonai idia noho taudia ibounai be “mauri ranuna ena sinavai” amo “mauri ranudia” do idia inua. Unai dainai, ibounai do idia goevadae bona do idia mauri hanaihanai.​—⁠Apok. 22:1, 2.

¹⁸ Iehova ese inai tanobada dikana ia haorea neganai, ia ese ita do ia gimaia bona kara maoromaoro tanobadana lalonai ita do ia hakaua vareai. Ena be inai tanobada besedia ibounai ese ita idia inai henia, to ita be eda lalona ita hadaia vadaeni, Dirava ena Basileia do ita badinaia bona Iena gimaia kourana lalonai do ita noho.