“LAU laloaboio diba lasi!” Momo be Creation Drama ena piksa idia itaia murinai, unai bamona idia hereva. Unai piksa be nega maorona ai idia halasia, bona idia itaia taudia ese idia laloaboio diba lasi. Hitler ena gavamani ese Europe ai Iehova ena taunimanima ia do dagedage henia lasi neganai, momo be Creation Drama idia itaia dainai, Iehova ena ladana idia hanamoa. To, unai Creation Drama be dahaka?

Lagani 1914 ai, Brooklyn, New York, U.S.A. dekenai, Iehova ena taunimanima edia hedikwota ese Photo-Drama of Creation idia halasia. Unai piksa be hora 8 lalonai idia hahedinaraia. Ia be mai ena slaid, kala bona regerege danu. Tanobada hegegemadai taunimanima milioni momo ese unai Photo-Drama idia itaia. Danu lagani 1914 ai, piksa kwadogina ta ladana Eureka Drama idia halasia. To lagani 1920 bamona ai, tadikaka edia piksa halasia kohudia idia dika. To taunimanima momo idia ura dikadika Photo-Drama idia itaia lou. Hegeregere, Ludwigsburg, Germany ai, idia noho taudia idia henanadai, “Edena negai Photo-Drama do umui hahedinaraia lou?” Tadikaka be dahaka do idia karaia?

Taunimanima dekenai Photo-Drama idia hahedinaraia lou totona, lagani 1922 bamona ai, Germany ena Betele tadikaka ese film be France amo idia hoia, bona slaid be Leipzig bona Dresden ai idia noho kampani amo idia hoidia. Unai gaudia be Photo-Drama ena slaid gunadia haida ida idia gaukaralaia hebou.

Miusiki ia diba momo tadikaka, Erich Frost ese miusiki ia torea, bona piksa idia hahedinaraia neganai idia gadaralaia. Piksa ena hereva be Creation bukana ena kahana haida amo idia abia. Unai dainai Photo-Drama matamatana idia karaia neganai, idia gwauraia Creation Drama.

Unai piksa ena lata be hora 8 bona hanuaboi ta ta ai ena kahana ta ta idia hahedinaraia. Unai piksa be Dirava ese gau ibounai ia karaia matamaia negana, Baibel bona idaunegai sivaraidia haida, bona tomadiho koikoi ese taunimanima ia hakaua kerere dalana ia hahedinaraia. Creation Drama be Austria, Germany, Luxemburg, Switzerland, bona gabu ma haida ai idia noho German taudia dekenai idia hahedinaraia.

Erich Frost ia gwau: “Unai piksa ai hahedinaraia gabuna ai, miusiki ai gadaralaia hebou tadikaka taihu lau hamaorodia, laga-ani negana ai helai taudia dekenai iseda buka bona buklet namodia do ai hariharilaia. Unai dala amo buka bona buklet momo herea ai hariharilaia.” Johannes Rauthe be Poland bona hari idia  gwauraia Czech Republic ai unai piksa ia hahedinaraia, bona ia laloatao momo ese edia adres idia henia, tadikaka ese idia lou henidia totona. Tadikaka ese unai taudia idia lou henidia neganai, momo be Baibel ena sivarai idia abia dae.

Lagani 1930 lalodiai, hutuma be ruma badadia idia hahonua Creation Drama idia itaia totona, bona taoni lalonai momo ese Iehova ena Witnes taudia idia herevalaia. Germany ena brens ofesi ese Creation Drama be nega momo ia hahedinaraia dainai, lagani 1933 ia abia neganai, kahirakahira taunimanima 1 milioni bamona ese unai piksa idia itaia vadaeni. Käthe Krauss ia gwau: “Unai piksa ai itaia totona uda lalonai ai raka, ororo ai daekau, bona koura ai hanaia. Dina ta ta ai kilomita 10 ai raka lao piksa ai itaia bena ai giroa. Dina faiv lalonai unai bamona ai karaia.” Else Billharz ia gwau: “Creation Drama lau itaia murinai, hereva momokani lau ura henia matamaia.”

Alfred Almendinger ia gwau, ena sinana be unai drama ia itaia neganai, “ia moale bada dainai Baibel ta ia hoia bona inai hereva ‘pegatori’ ia tahua.” To Baibel lalonai unai hereva ia davaria lasi dainai, ena dubu ia rakatania bona gabeai ia bapatiso. Erich Frost ia gwau: “Creation Drama dainai hutuma be hereva momokani idia abia dae.”​—⁠3 Ioa. 1-3.

Creation Drama idia itaia taudia edia namba ia bada daekau lalonai, Europe ai taunimanima hutuma danu be Nazi pati idia durua, bona hekwakwanai bada idia havaraia matamaia. Lagani 1933 ai, Germany ai Witnes taudia edia gaukara idia koua matamaia. Unai nega amo ela bona lagani 1945, Tanobada Tuarina Iharuana ena dokona, Europe ai Iehova ena hesiai taudia be dagedage bada idia davaria. Erich Frost be lagani eit lalonai dibura ruma ai ia noho. To idia ruhaia murinai, ia be Germany Betele, Wiesbaden dekenai ia gaukara. Momokani, Creation Drama be nega maorona ai idia halasia, badina unai ese Keristani taudia momo edia abidadama ia hagoadaia, unai amo Tanobada Tuarina Iharuana ai idia davaria hahetoho idia haheaukalaia diba!​—⁠Orea ena histori Germany amo.