1. Dahaka dainai Baibel ita abidadama henia be mai anina bada?

 BAIBEL stiuden ta be haroro gaukara ia do hamatamaia lasi neganai, namona be ia abia dae momokani Baibel be Dirava ena Hereva. a Namona be ita ibounai ese eda hereva bona kara amo ita hahedinaraia Baibel ita abidadama henia. Bema ita be Baibel ita abidadama henia bona haroro ai ita gaukaralaia namonamo, ma haida do ita durua Iehova idia dibaia bona mauri hanaihanai idia abia totona.

2. Dahaka dainai ita “dibaia gaudia” ita badinaia noho be mai anina bada?

² Aposetolo Paulo ia hahedinaraia Dirava ena Hereva be mai anina bada. Timoteo ia tore henia ia gwau: “Oi dibaia gaudia do oi badinaia noho.” Timoteo ia “dibaia gaudia” be Baibel ena hereva momokanidia, bona unai ese ena abidadama sivarai namona dekenai ia hagoadaia. Baibel amo ita dibaia gaudia ese iseda abidadama idia hagoadaia, bona ita dekenai aonega ia henia hahemauri ita abia totona. (2 Tim. 3:14, 15) Timoteo Iharuana 3:16 (duahia) ese ia hahedinaraia Baibel be Dirava amo ia mai. To, unai siri amo dahaka gau ma haida ita dibaia? Ita ese unai siri ena hereva badadia ta ta do ita herevalaia, unai amo do ita abia dae momokani, Iehova ena hahediba herevadia be “maoromaoro.”​—⁠Sal. 19:8.

3-5. (a) Pentekoste 33 C.E. ai, Petero be tok ta ia henia murinai, dahaka ia vara bona dahaka dainai? (b) Dahaka dainai Tesalonika ai momo be hereva momokani idia abia dae? (c) Iseda haroro gaukara dekenai taunimanima edia lalohadai be dahaka?

³ Iesu ese Israela besena ia hamaoroa: “Umui dekenai peroveta taudia, aonega taudia bona hadibaia taudia lau siaia inai.” (Mat. 23:34) Iesu be ena hahediba taudia ia herevalaia unai. Idia ia hadibaia haroro gaukara ai Toretore Helagadia idia gaukaralaia totona. Pentekoste 33 C.E. ai, aposetolo Petero be Ierusalema ai taunimanima vairadiai tok ta ia henia.  Ena tok lalonai Heberu Toretoredia edia hereva haida ia gaukaralaia. Petero ese unai siri edia anina ia gwauraia hedinarai neganai, momo be iena “hereva ese edia kudouna ia gwadaia.” Edia kara dika amo idia helalo-kerehai bona Dirava idia noia edia dika ia gwauatao totona. Unai dina ai, taunimanima 3,000 bamona be Keristani taudia ai idia lao.​—⁠Kara 2:37-41.

⁴ Paulo be Ierusalema sibona dekenai lasi, to hanua idauidau ai Sivarai namona ia harorolaia, bona ita dekenai ia be haheitalai namona. Makedonia ena siti, Tesalonika ai Paulo be sinagoga ai idia tomadiho Iuda taudia ia haroro henidia. Sabati toi lalonai, Paulo be “Toretore Helagadia ia herevalaia namonamo, bona ia hahedinaraia goevagoeva bona unai toretore amo ia hamomokania, Keriso be hisihisi ia abia be namo bona mase amo ia toreisi lou.” Dahaka ia vara? Iuda taudia haida bona Grik taudia momo be abidadama taudia ai idia lao.​—⁠Kara 17:1-4.

⁵ Hari, momo idia itaia ita be Baibel ita gaukaralaia eda hahediba herevadia ita hamomokania totona. Hegeregere, Switzerland ai iseda taihu ta be ruma tauna dekenai Baibel siri ta ia duahia murinai, ruma tauna ese ia nanadaia, ia gwau: “Oi be edena dubu?” Taihu ia haere: “Lau bona egu turana be Iehova ena Witnes taudia.” Ruma tauna ia gwau: “Unai be momokani, badina Iehova ena Witnes taudia sibona be egu ruma idia mai bona Baibel idia duahia.”

6, 7. (a) Edena dala ai tok idia henia taudia ese Baibel idia gaukaralaia namonamo diba? (b) Dahaka dainai Baibel stiuden ita stadi henia neganai, Baibel ita gaukaralaia namonamo be mai anina bada?

⁶ Ma haida ita hadibaia neganai, edena dala ai Baibel ita gaukaralaia namonamo diba? Bema oi be tok ta do oi henia, namona be Baibel siri oi gaukaralaia. Namo lasi oi ura gaukaralaia siri oi herevalaia sibona, pepa ta o kompiuta amo oi duahia. To, gau badana be emu Baibel amo unai siri oi duahia, bona kamonai taudia oi noia edia Baibel idia kehoa totona. Siri ena anina oi herevalaia, bona oi hahedinaraia edena dala ai unai siri ese kamonai taudia ia durua diba, Iehova kahirakahira idia lao totona. Namo lasi taunimanima idia laloparara lasi haheitalai ita gaukaralaia, o ekspiriens ita gaukaralaia kava helai taudia idia kiri totona, to namona be unai nega ita gaukaralaia Baibel ita herevalaia namonamo totona.

⁷ Iseda Baibel stiuden ita hadibaia neganai, dahaka ita laloatao be namo? Baibel stadi ita karaia neganai, stadi bukana lalonai idia torea siri ibounai ita duahia be namo. Namona be stiuden ita noia unai siri ia duahia totona. Bona siri ena anina ita herevalaia neganai, namo lasi ita sibona ita hereva, to ia dekenai nega ita henia ena lalohadai ia gwauraia totona. Namo lasi ita hamaoroa dahaka do ia abia dae, o dahaka do ia karaia, to namona be henanadai maorodia ita henia, unai amo ia ita durua Baibel ena hereva ia lalopararalaia namonamo totona. b

8. Paulo ena hekwakwanai be dahaka?

⁸ Kongrigeisen elda taudia edia maduna be kerere taudia do idia sisiba o matahakani henia. (1 Tim. 5:20; Tito 1:13) To, namona be ita sibona ese eda kara ita hamaoromaoroa danu. Paulo be Keristani tauna namona bona ena lalomamina be ia goeva. (2 Tim. 1:3) To ia gwau: “Egu tauanina lalonai taravatu ma ta ia noho, bona unai taravatu be egu lalona ai ia noho taravatuna ia tuari henia, bona inai kara dika ena taravatu ese igui hesiai tauna bamona lau ia hakaua.” Do ita itaia Paulo be dahaka ia karaia ena manoka gaudia ia hanaia totona.​—⁠Roma 7:21-25 duahia.

9, 10. (a) Reana Paulo ena manoka gaudia be dahaka? (b) Edena dalana ai Paulo ese unai manoka gaudia ia hanaia?

⁹ Paulo ese ena manoka gaudia ia herevalaia lasi, to ia gwau ia be taunimanima ia matauraia lasi. (1 Tim. 1:13) Paulo be Keristani tauna ai ia do lao lasi neganai, ia ese Keristani taudia ia dagedage henia. Ia gwau, “idia dekenai lau badu dikadika.” (Kara 26:11) Paulo be ena badu biagua  dalana ia dibaia, to reana nega haida ia hekwarahi ena hemami bona hereva ia biagua totona. (Kara 15:36-39) Dahaka ese Paulo ia durua ena kara ia hamaoromaoroa totona?

¹⁰ Paulo ese Korinto taudia ia tore henia neganai, ena kara ia hamaoromaoroa dalana ia herevalaia. (1 Korinto 9:26, 27 duahia.) Ia gaukara goada ena manoka gaudia ia hamaoromaoroa totona. Ita gwau diba Paulo be Toretore Helagadia amo sisiba ia tahua, Iehova ena heduru ia noia unai sisiba ia badinaia totona, bona ia gaukara goada unai ia karaia totona. c Iena haheitalai ese ita ia durua diba, badina ita danu ita hekwarahi noho iseda manoka gaudia ita hanaia totona.

11. Edena dala ai sibona ita “tahua noho” bema ita be hereva momokani ena dala ai ita raka eiava lasi?

¹¹ Namo lasi ita laloa eda goada be hegeregere, bona do ita moru lasi. Namona be sibona ita “tahua noho,” ita be hereva momokani ena dala ai ita raka noho eiava lasi. (2 Kor. 13:5) Kolose 3:5-10 o unai bamona sirina ta ita duahia neganai, sibona do ita nanadaia: ‘Lau hekwarahi noho egu manoka gaudia lau hamaoromaoroa totona, a? Eiava lau be Iehova ese ia inai henia gaudia lau ura henia matamaia, a? Hegeregere, kompiuta dekenai Web sait dikana ta ia hedinarai neganai, karaharaga lau koua, a? Eiava lau be Web sait dikadia lau tahua, a?’ Bema eda mauri lalonai Baibel ena sisiba ita badinaia dalana ita laloa, unai ese ita do ia durua “ita noga noho bona iseda laloa maoromaoro karana ita dogoatao noho.”​—⁠1 Tes. 5:6-8.

12, 13. (a) Inai hereva “gau idauidau hamaoromaoroa” ena anina be dahaka? Edena dala ai Iesu ita tohotohoa diba? (b) Ma haida ida hekwakwanai ita hamaoromaoroa neganai, edena bamona hereva dalana ita dadaraia be namo?

¹² Baibel be inai hereva “gau idauidau hamaoromaoroa” ia gaukaralaia neganai, ena anina be gau ta do ita hanamoa o hamaoromaoroa. Nega haida iseda kara o hereva amo ma haida ita hahisia, bona unai ita hamaoromaoroa be namo. Hegeregere, Iuda tomadiho gunalaia taudia be idia maumau idia gwau, Iesu be “takisi gogoa taudia bona kara dika taudia” ia kara namo henidia. Iesu be unai hekwakwanai ia hamaoromaoroa ia gwau: “Idia gorere lasi taudia be doketa idia tahua lasi, to idia gorere taudia sibona ese idia tahua. Umui lao bona inai hereva ena anina do umui tahua: ‘Hebogahisi lau ura, to boubou gauna lasi.’” (Mat. 9:11-13) Danu, Iesu ese mai haheauka bona hebogahisi ida taunimanima ibounai dekenai Dirava ia herevalaia. Unai dainai, manau taudia idia laloparara, Iehova be ‘bogahisihisi bona hariharibada Diravana, badu dekenai ia haraga lasi, to bogahisihisi bona lalokau dekenai ia haraga.’ (Eso. 34:6) Unai dainai, taunimanima momo be sivarai namona idia abidadama henia.

¹³ Ma haida ita durua neganai, namona be Iesu ita tohotohoa. Ia lalohisihisi tauna be reana mai badu ida do ia hereva auka ia gwau: ‘Lau ura oi lau sisiba henia.’ To, unai bamona kara be 2 Timoteo 3:16 ena sisiba hegeregerena lasi. Baibel ia gwau ma haida ida hekwakwanai ta ita hamaoromaoroa neganai, edia hemami ita laloa be namo. Bema ta ita hereva auka henia, iseda hereva be “tuari kaia ia gwadaia noho bamona.” Iseda hereva ese unai tauna do ia hahisia, bona reana do ia durua lasi.​—⁠Aon. 12:18.

14-16. (a) Edena dala ai elda taudia ese ma haida idia durua edia hekwakwanai idia hamaoromaoroa totona? (b) Dahaka dainai tama sina ese Baibel idia gaukaralaia be namo, natudia idia hamaoromaoroa totona?

¹⁴ Baibel amo hekwakwanai ita hamaoromaoroa neganai, edena dala ai haheauka bona hebogahisi ita hahedinaraia diba? Mani inai oi laloa: Tau ta bona ena adavana be idia hepapahuahu momo dainai, elda ta amo heduru idia tahua. Elda tauna be tau o hahine ena kahanai do ia gini lasi, bona ia sibona ena lalohadai do ia gwauraia lasi edia hekwakwanai hamaoromaoroa totona. To, Baibel ena hakaua herevadia  do ia gaukaralaia, unai amo do idia laloparara edena dala ai edia hepapahuahu idia hamaoromaoroa diba. Reana elda tauna ese Ruma Bese Ena Moale Havaraia Dalana bukana ena karoa 3 ai idia noho hakaua herevadia ia gaukaralaia diba. Unai idia herevalaia neganai, reana unai tau bona hahine do idia laloparara edia kara haida idia haidaua be namo. Gabeai, elda be unai tau bona hahine do ia nanadaia edia headava maurina be edena bamona, bena heduru ma haida ia henia diba.

 ¹⁵ Edena dala ai tama sina ese edia natudia idia durua diba, lalohadai maorona idia abia totona? Mani oi laloa, emu natuna kekeni be turana matamata ta ia davaria. To, oi diba iena turana be abia hidi kereredia ia karaia. Matamanai, emu natuna ena turana ena kara oi tahua namonamo be namo. Bema oi be emu natuna kekeni ena namo oi laloa, ia ida oi herevahereva be namo. Inai buka Questions Young People Ask​—⁠Answers That Work, Volium 2 ai idia noho Baibel ena hakaua herevadia oi gaukaralaia diba. Namona be nega bada oi atoa ia oi bamoa totona. Haroro gaukara eiava ruma bese ida moale karadia umui karaia neganai, namona be iena kara oi itaia namonamo. Bema mai hebogahisi bona haheauka ida ia oi hereva henia, do ia diba oi be ia oi lalokau henia bona laloa bada. Emu sisiba ese ia do ia durua ena mauri lalonai, tura namodia bona abia hidi maorodia ia karaia totona.

¹⁶ Daidia danu be iseda heduru idia abia be namo? Bema haida be edia helt idia laloa momo, edia moni gaukara idia haboioa dainai idia lalometau, o Baibel ena hahediba herevana ta idia daradaralaia, mai haheauka bona hebogahisi ida idia ita durua diba. Bema Dirava ena Hereva ita gaukaralaia hekwakwanai ita hamaoromaoroa totona, dala idauidau ai namo do ita davaria.

17. Dahaka dainai matahakani ita abia dae be namo?

¹⁷ Baibel ia gwau: “Ta ese matahakani ia abia neganai, unai ia moalelaia lasi, to ia lalohisihisilaia. To gabeai, unai matahakani amo diba idia abia taudia dekenai maino bona kara maoromaoro ia havaraia.” (Heb. 12:11) Hereva momokani lalonai idia tubu daekau Keristani taudia momo idia gwau, edia tama sina edia matahakani ese idia ia durua bada. Elda taudia ese ita idia henia matahakani be Iehova amo, bona unai ese ita ia durua mauri dalanai ita raka noho totona.​—⁠Aon. 4:13.

18, 19. (a) Dahaka dainai elda taudia dekenai Aonega Herevadia 18:13 ena hereva be mai anina bada? (b) Elda taudia be mai manau bona lalokau ida matahakani idia henia neganai, kerere tauna be dahaka do ia karaia?

¹⁸ Edena dala ai elda bona tama sina be matahakani henia dalana maorona idia dibaia diba? Iehova be ita ia hamaoroa “kara maoromaoro” ai matahakani do ita henia. (2 Tim. 3:16) Anina be ta ita matahakani henia neganai, Baibel ena hakaua herevadia ita gaukaralaia be namo. Baibel ena hakaua hereva badana ta be Aonega Herevadia 18:13 ai, ia gwau: “Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.” Unai dainai, bema ta ese elda taudia ia hamaoroa tadikaka o taihu ta be kara dika badana ta ia karaia, namona be elda taudia ese gau ibounai idia tahua namonamo guna, bena matahakani idia henia. (Deu. 13:14) Unai amo idia hahedinaraia idia be “kara maoromaoro” ai matahakani idia henia.

¹⁹ Danu, Baibel ese elda taudia ia hagoadaia, “mai manau ida” ma haida do idia matahakani henia. (2 Timoteo 2:24-26 duahia.) Oibe, ta ia kerere neganai, unai ese Iehova ena ladana ia hadikaia bona haida ia hahisia diba. To, bema elda be mai badu ida kerere tauna ia sisiba henia, unai ese ia do ia durua lasi. Bema elda be Dirava ia tohotohoa bona mai hebogahisi ida kerere tauna ia hamaoromaoroa, reana unai tauna be do ia helalo-kerehai diba.​—⁠Roma 2:4.

20. Tama sina ese edia natudia idia matahakani henia neganai, edena hakaua herevadia idia badinaia be namo?

²⁰ Tama sina danu ese edia natudia idia matahakani henia neganai, Baibel ena hakaua herevadia idia badinaia be mai anina bada. (Efe. 6:4) Hegeregere, bema tama ta be ta ese ia hamaoroa ena natuna mero be kerere ta ia karaia, dahaka do ia karaia? Namona be gau ibounai ia tahua namonamo guna, unai murinai ena natuna ia matahakani henia. Keristani ruma bese lalonai, mai badu ida natuna dadabaia karana be maoro lasi. “Iehova be lalokau bada bona hebogahisi Diravana,” bona tama sina ese natudia idia matahakani henia neganai, Ia idia tohotohoa be namo.​—⁠Iam. 5:11.

21, 22. Salamo 119:97-104 oi duahia neganai, edena hereva oi moalelaia?

²¹ Idaunegai, Iehova ena hesiai tauna ta be Iehova ena taravatu ia ura henia ena badina ia herevalaia. (Salamo 119:97-104 duahia.) Ia be Dirava ena Hereva ia stadilaia dainai, ia aonega bona gau idauidau ia lalopararalaia namonamo. Danu, Dirava ena hakaua herevadia ia badinaia neganai, momo ese idia badinaia dala kereredia ia dadaraia. Baibel stadilaia karana ia moalelaia bona Baibel ena sisiba ia badinaia neganai namo ia davaria. Iena lalona ia hadaia, ena mauri ibounai lalonai Dirava ena taravatu ia badinaia totona.

²² Oi be Baibel ena hereva oi laloa bada, a? Baibel duahia karana ese oi do ia durua, unai amo do oi abia dae momokani, Dirava ena ura do ia hagugurua. Baibel lalonai idia noho sisiba be Iehova amo, bona ita idia gimaia ita kara dika lasi totona. Danu, Baibel amo ma haida oi durua diba mauri dalana dekenai idia raka bona idia badinaia noho totona. Eda aonega bona lalokau Diravana, Iehova, ita hesiai henia noho lalonai, unai dala idauidau ai Baibel ita gaukaralaia noho be namo.