1, 2. Iehova ena tanobada bona guba oreana ena matahanai ese ita idia durua dahaka ita karaia totona?

 ITA BE Iehova ena guba bona tanobada oreana lalonai ita noho be hahenamo badana. Esekiela karoa 1 bona Daniela karoa 7 ai ita duahia matahanai, be Iehova ese ena ura hagugurua totona ia karaia noho gaudia idia herevalaia. Iehova ena tanobada oreana be Iesu ese ia hakaua noho, unai orea ese haroro gaukara ia gunalaia, haroro taudia ia hadibaia bona hagoadaia, bona taunimanima ia durua Iehova idia tura henia totona. Unai ita diba dainai Iehova ena orea ita abidadama henia.​—⁠Mat. 24:45.

² Oi be Iehova ena orea ena haheitalai oi tohotohoa bona Dirava ena hesiai gaukara lalonai oi bisi, a? Eiava, reana oi mamia oi be emu hesiai gaukara oi moalelaia lasi. Keristani taudia ginigunadia dekenai unai bamona ia vara danu. Unai dainai, aposetolo Paulo ese idia ia hamaoroa Iesu ena haheitalai idia laloatao be namo. Paulo ia gwau, unai ese idia do ia durua idia ‘hesiku lasi bona idia lalomanoka lasi’ totona. (Heb. 12:3) Vanegai stadi ai, Iehova ena orea ese ia karaia noho gaukara namona ita herevalaia. Iesu ena haheitalai ese Keristani taudia ginigunadia ia hagoadaia hegeregerena, Iehova ena orea ena haheitalai ese hari ita ia durua ita haheauka bona gaukara goada noho totona.

3. Ita hesiku lasi totona dahaka ita karaia be namo? Inai stadi ai dahaka do ita herevalaia?

³ Paulo ia gwau Dirava ena hesiai gaukara ai ita “hesiku” lasi totona, Iehova ena orea ena haheitalai ita laloa sibona be hegeregere lasi, to gau ma haida ita karaia be namo. Ia gwau, “kara namodia ita karaia” noho be namo. (Gal. 6:9) Inai stadi ai, ita be Iehova ena orea ita tohotohoa bona iena hesiai gaukara ita goadalaia totona ita karaia diba gaudia faiv do ita herevalaia. Bena ita itaia bema ita eiava eda ruma bese ese gau haida ita hanamoa be namo.

4. Dahaka dainai ita gwau diba, Keristani heboudia be tomadiho momokani ena kahana badana ta?

⁴ Iehova ena taunimanima dekenai Keristani heboudia be mai anina bada. Guba ai, Iehova be aneru ida ia hebou. (1 Kin. 22:19; Iobu 1:6; 2:1; Dan. 7:10) Idaunegai, Dirava ese Israela taudia ia hamaoroa, namona be idia hebou “vadaeni do idia kamonai, edia lalona be do idia kehoa.” (Deu. 31:10-12) Iesu ena negai, Iuda taudia be sinagoga ai idia hebou Toretore Helagadia idia duahia totona. (Luka 4:16; Kara 15:21) Keristani kongrigeisen ginigunana idia haginia negana amo ema bona hari, hebou karana be iseda tomadiho ena kahana badana ta. Keristani taudia momokanidia be ‘ta ta idia laloa bona hagoadaia, idia lalokau heheni bona kara namodia idia karaia.’ Namona be “ita hagoadaia heheni” badina ita be dina gabediai ita noho.​—⁠Heb. 10:24, 25.

5. Edena dala ai iseda Keristani heboudia ai ta ta ita hagoadaia diba?

⁵ Keristani heboudia ai ta ta ita hagoadaia diba dalana ta be iseda haere karana. Hegeregere, paragraf amo haere ita henia, siri ta ita herevalaia o ekspiriens kwadogina ta amo Baibel ena hakaua herevadia ese ita idia durua dalana ita herevalaia diba. (Sal. 22:22; 40:9) Oibe, herevana lagani hida hereva momokani lalonai ita noho, to hebou ai matamata bona buruka taudia edia haere ita kamonai neganai, ita ia hagoadaia bada.

6. Edena dala haida ai iseda Keristani heboudia ese ita idia durua?

⁶ Iseda hebou badadia bona maragidia ese dala momo ai ita idia durua. Hegeregere, unai hebou ese ita idia durua mai gari lasi ida ita haroro totona, ena be teritori ai taunimanima ese ita idia dagedage henia o idia kamonai lasi. (Kara 4:23, 31) Tok bona Baibel amo ita kamonai hadibaia herevadia ese iseda abidadama idia hagoadaia. (Kara 15:32; Roma 1:11, 12) Iseda tadikaka taihu ida ita noho neganai, unai ese ita dekenai moale korikori bona goada ia henia. (Sal. 94:12, 13) Hakaua Oreana ena Hadibaia Komiti ese Keristani heboudia amo Iehova ena taunimanima hadibaia gaukarana ia naria. Ita moale badina wiki ta ta hebou ai hereva namodia ita kamonai.

7, 8. (a) Keristani heboudia ita lao ena badina badana be dahaka? (b) Keristani heboudia ese edena dala ai oi idia durua?

⁷ Keristani heboudia ita lao ena badina badana be Iehova ita tomadiho henia totona. (Salamo 95:6 duahia.) Ane amo Iehova ena ladana hereadaena ita hanamoa be hahenamo ta! (Kol. 3:16) Danu, hebou ai haere ita henia karana amo Iehova ita hanamoa. Iehova sibona be hegeregere, unai bamona dala idauidau ai ita tomadiho henia totona. (Apok. 4:11) Unai dainai, hari ita laloparara dahaka dainai Baibel ese ita ia hagoadaia, “iseda hebou karana ita rakatania lasi, vaia haida ese idia karaia bamona.”​—⁠Heb. 10:25.

⁸ Keristani heboudia be Iehova ena harihari gauna, bona unai ese ita idia durua ita haheauka ela bona inai tanobada dikana ia haorea. Eda Keristani heboudia be unai bamona ita laloa, a? Bema oibe, vadaeni do ita hekwarahi hebou ibounai ita lao totona, ena be ita bisi bada. (Fili. 1:10) Reana hekwakwanai badana ta ia vara dainai hebou do ita reaia, to hanaihanai hebou ita lao be mai anina bada.

9. Edena bamona ita diba haroro gaukara be mai anina bada?

⁹ Iehova ena orea ita badinaia totona, ita haroro goadagoada be namo. Iesu be tanobada ai ia noho neganai, haroro gaukara ia hamatamaia. (Mat. 28:19, 20) Unai nega amo ema bona hari, haroro  bona hahediba taudia halaoa gaukarana, be Iehova ena tanobada bona guba oreana edia gaukara badana ta. Ekspiriens momo ese idia hahedinaraia, aneru be ita idia durua kudou-maoro taudia ita tahua totona. (Kara 13:48; Apok. 14:6, 7) Iehova ena tanobada oreana ena gaukara badana be haroro gaukara ia gunalaia bona durua. Emu mauri lalonai haroro gaukara oi atoa guna, a?

10. (a) Edena dala ai tadikaka ta ia hahedinaraia, ia ese hereva momokani harorolaia karana ia moalelaia? (b) Edena dala ai haroro gaukara ese oi ia durua, hereva momokani oi ura henia totona?

¹⁰ Haroro gaukara ita goadalaia neganai, iseda ura hereva momokani totona be do ia goada noho. Mitchel be unai bamona ia laloa, ia be lagani momo lalonai elda bona regula painia gaukara ia karaia. Ia gwau: “Lau be taunimanima dekenai hereva momokani harorolaia karana lau moalelaia. Gima Kohorona o Awake matamatadia lau duahia neganai, idia torea dalana dekenai lau hoa. Badina idia torea herevadia amo ta ena hemami idia hadikaia lasi, to duahia tauna dekenai diba bona aonega ia henia, bona ia durua lalohadai maorona ia abia totona. Lau ura itaia haroro ai taunimanima ese unai magasin be edena bamona do idia laloa.” Mitchel ma ia gwau, haroro gaukara ese ia durua ena mauri lalonai mai anina bada gaudia ia atoa guna, bona gau ma haida dekenai ena nega ia haorea kava lasi. Danu, bema Dirava ena hesiai gaukara ai ita bisi, inai dina gabediai ita haheauka diba.​—⁠1 Korinto 15:58 duahia.

11. Dahaka dainai buka bona magasin ibounai ita duahia bona laloa dobu be namo?

¹¹ Iehova be ena orea amo ia halasia Baibel buka bona magasin amo ita ia hagoadaia. Reana oi laloatao oi be nega ta iseda buka o magasin ta oi duahia bona oi laloa: ‘Inai hereva be lau ia hagoadaia bada! Toana be Iehova ese tadikaka ia gaukaralaia lau totona inai hereva idia torea!’ Oi be badina namona ta dainai unai bamona oi laloa. Iehova be buka bona magasin ia gaukaralaia ita ia hadibaia bona hakaua totona. Ia gwau: “Lau ese oiemu raka dalana oi dekenai do lau hadibaia.” (Sal. 32:8) Nega ita atoa ita abia buka bona magasin ibounai ita duahia bona laloa dobu totona, a? Unai ese ita do ia durua inai nega dikadia ai ita haheauka, bona Dirava ena hesiai gaukara ita goadalaia noho.​—⁠Salamo 1:1-3; 35:28; 119:97 duahia.

12. Eda buka bona magasin ita laloa bada totona, dahaka ita laloatao be namo?

¹² Tadikaka be edia nega bona goada idia henia, iseda buka bona magasin idia hegaegaelaia totona. Bema unai ita laloatao, eda buka bona magasin do ita laloa bada. Hegeregere, tadikaka be magasin ta idia hegaegaelaia totona tahua gaukara idia karaia, atikol idia torea, idia sekea, bona atikol haida ai do idia gaukaralaia laulau idia abia hidi. Gabeai, unai magasin be kompiuta amo idia siaia lao brens ma haida dekenai gado ta ta ai idia hahanaia totona. Unai gaukara ibounai ia ore murinai, idia printaia o eda Web sait dekenai idia atoa. Unai gaukara ibounai be Hakaua Oreana ena Toretore Komiti ese ia gunalaia. Buka o magasin idia printaia brens ofesi ese unai gaudia be kongrigeisen ibounai dekenai idia siaia lao. Dahaka dainai unai gaukara ibounai idia karaia? Unai dala amo Iehova ena taunimanima be hadibaia bona hakaua herevadia do idia abia, bona edia abidadama do ia goada. (Isa. 65:13) Oibe, Iehova ena orea amo ita abia buka bona magasin ibounai ita duahia be namo.​—⁠Sal. 119:27.

13, 14. Guba ai daidia be Iehova ena orea idia durua? Edena dala ai edia haheitalai ita tohotohoa diba?

¹³ Matahanai ta lalonai, Ioane ia itaia Iesu be hosi kurokurona ta ai ia guia, bona Iehova idia gwau-edeede henia taudia hadarerea totona ia lao. (Apok. 19:11-15) Danu, ia itaia idia toreisi lou vadaeni horoa taudia bona aneru be hosi ai idia guia bona Iesu ena murinai idia heau. Unai ese ia hahedinaraia idia be edia Gunalaia Tauna, Iesu idia durua. (Apok. 2:26, 27) Edia haheitalai amo ita dibaia gauna be, Iehova ena orea idia gunalaia tadikaka ita durua be namo.

¹⁴ Unai hegeregerena, hutuma bada taudia be tanobada ai idia do noho Keriso ena horoa tadikakadia idia durua. (Sekaraia 8:23 duahia.) Edena dala ai Iehova ena orea ita durua diba? Dala ta be, Iehova ena orea idia hakaua tadikaka edia hereva ita kamonai. (Heb. 13:7, 17) Iseda kongrigeisen ai idia noho elda taudia ita herevalaia karana amo, ma haida ita durua elda taudia bona edia gaukara idia matauraia totona, a? Iseda natudia ita hadibaia elda idia matauraia bona edia sisiba idia kamonai henia totona, a? Dala ma haida ai Dirava ena orea ita durua diba. Hegeregere, iseda ruma bese ida palani ita karaia tanobada hegegemadai haroro gaukara durua totona kontribusen ita henia, a? (Aon. 3:9; 1 Kor. 16:2; 2 Kor. 8:12) Danu, Kingdom Hall hagoevaia bona hanamoa gaukarana ita durua, a? Iehova ia itaia unai dala idauidau ai iena orea ita durua neganai, ita dekenai ena lauma helaga ia henia. Bona  iena lauma helaga ese ita dekenai goada ia henia, inai nega dokona ai ita haheauka totona.​—⁠Isa. 40:29-31.

15. Dahaka dainai kara maoromaoro badinaia totona ita hekwarahi be namo?

¹⁵ Bema ita ura ita haheauka bona Iehova ena orea ena hakaua dalana ita badinaia, Ia ese ia moalelaia mauri dalana ita badinaia be namo. (Efe. 5:10, 11) Satani, inai tanobada dikana bona iseda manoka gaudia dainai, nega momo ia auka kara maoromaoro ita badinaia totona. Umui tadikaka bona taihu haida be dina ta ta ai umui gaukara goada, emui hetura karana Iehova ida ia goada noho totona. Emui hekwarahi dainai Iehova ese umui ia lalokau henia. Oi hesiku lasi! Bema Dirava ia moalelaia mauri dalana ita badinaia, eda mauri be mai ena anina, do ita moale bona Iena lalonamo do ita abia.​—⁠1 Kor. 9:24-27.

16, 17. (a) Bema kara dika badana ta ita karaia, dahaka ita karaia be namo? (b) Anne ena sivarai amo dahaka ita dibaia?

¹⁶ Bema kara dika badana ta oi karaia, dahaka oi karaia be namo? Namo lasi oi hunia, to heduru oi tahua haraga. Davida be ena kerere ia hunia toho neganai, ia abia hemami mani oi laloa. Ia gwau: “Lauegu tauanina ia maragi lao, dina ibounai lau taitai dainai.” (Sal. 32:3) Bema eda kara dika badadia ita hunia, do ita moale lasi bona reana eda hetura karana Iehova ida do ia dika. To bema eda dika ita gwauraia hedinarai, Dirava ese ita “do ia bogahisihisi henia.”​—⁠Aon. 28:13.

¹⁷ Anne a ena haheitalai mani ita laloa. Anne be do kekeni matamata neganai regula painia gaukara ia karaia, to kara dika haida ia karaia danu. Unai dainai ena lalomamina ese ia kota henia. Ia gwau, “Lau moale lasi bona nega momo lau lalometau.” Dina ta, hebou dekenai Iamesi 5:14, 15 idia herevalaia. Anne ia laloparara heduru ia abia be namo. Dahaka ia karaia? Unai siri ena sisiba ia badinaia bona elda taudia ia hereva henidia. Unai ia karaia be auka, to ia mamia unai be hegeregere ia gorere bona Iehova ese ia dekenai muramura maorona ia henia. Ia gwau, “Unai muramura lau hadonoa be auka, to lau diba egu gorere ia hanamoa diba.” Hari, Anne be mai lalomamina goevana ida Iehova ia hesiai henia goadagoada.

18. Namona be ita gaukara goada dahaka ita karaia totona?

¹⁸ Namona be nega ibounai ita laloatao, inai dina gabedia ai Iehova ena orea lalonai ita noho be hahenamo badana! Iseda famili ida Keristani heboudia ita lao hanaihanai, ita haroro goadagoada, bona iseda buka bona magasin ibounai ita duahia be gau badana. Danu, Iehova ena orea idia gunalaia tadikaka ita durua, bona Iehova ia moalelaia mauri dalana ita badinaia. Bema unai gaudia ita karaia, ita be Iehova ena orea ena hakaua dalana ita badinaia noho, bona do ita hesiku lasi.