1, 2. Hahediba taudia be edena peroveta herevadia dainai reana idia daradara, bona dahaka dainai?

 IESU ese ena hahediba taudia ia hamaoroa dubu helaga be do idia hadikaia. Iena hereva dainai Petero, Iamesi, Ioane bona Andrea be idia lalohekwarahi. (Mar. 13:1-4) Unai dainai Iesu idia nanadaia: “Ai oi hamaoroa, unai gaudia be edena negai do idia vara, bona do oi noho negana bona inai nega oromana ena dokona ena toana be dahaka?” (Mat. 24:1-3) Iesu ena haere ai, Ierusalema idia do hadikaia lasi neganai idia vara gaudia sibona ia gwauraia lasi, to Satani ena tanobada dikana ena dokona ai do idia vara toa haida ia herevalaia danu. Iesu ia gwau, hekwakwanai momo do idia vara hegeregere tuari, hitolo bada, bona kara dika be do ia bada. To, Iesu be gau namona ta ia herevalaia danu. Ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”​—⁠Mat. 24:7-14.

² Iesu ena hahediba taudia be ia ida Basileia ena sivarai namona harorolaia gaukarana idia moalelaia. (Luka 8:1; 9:1, 2) Bona reana Iesu ena hereva idia laloatao, ia gwau: “Uma aniani gogoa gaukarana be bada, to gaukara taudia be momo lasi. Unai dainai gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.” (Luka 10:2) To reana idia laloa: ‘Edena bamona “tanobada ibounai dekenai” do ita haroro bona “bese ibounai” ese sivarai namona do idia kamonai? Gaukara taudia be edeseni amo do idia mai?’ Iesu ena hahediba taudia be Mataio 24:14 ia guguru dalana dekenai do idia hoa!

3. Dahaka dainai ita dekenai Luka 21:34 ena hereva be mai anina bada? Bona edena henanadai ita lalodia be namo?

³ Iesu ena peroveta herevana be hari ia guguru  noho. Tanobada hegegemadai, Witnes taudia milioni momo be Basileia ena sivarai namona idia harorolaia noho. (Isa. 60:22) To danu, Iesu ia gwau haida ese edia mauri lalonai haroro gaukara do idia atoa guna lasi. Bona idia be gau momo dekenai do idia bisi dainai, do idia “lalohekwarahi.” (Luka 21:34 duahia.) Ita dekenai Iesu ena hereva be mai anina bada, badina hari, Dirava ena taunimanima haida be mai anina bada gaudia idia atoa guna lasi. Edia moni gaukara, edukeisen bona moni bona kohu dekenai idia karaia abia hidi amo unai ita itaia. Haida be spot gadara bona moale karadia dekenai nega bada idia haorea. Haida be dina ta ta ena lalohekwarahi gaudia dainai Dirava ena hesiai gaukara idia goadalaia lasi. Sibona oi nanadaia: ‘Lauegu hesiai gaukara be edena bamona? Egu mauri lalonai Dirava ena ura lau atoa guna, a?’

4. (a) Paulo be Filipi Keristani taudia totona dahaka ia gurigurilaia? Bona dahaka dainai idia totona ia guriguri be namo? (b) Inai stadi bona stadi gabena ai dahaka do ita herevalaia? Edena dala ai ita do ia durua?

⁴ Aposetolo edia negai, Keristani taudia idia hekwarahi edia mauri lalonai Dirava ena hesiai gaukara idia atoa guna totona. Unai dainai, aposetolo Paulo be Filipi Keristani taudia totona ia guriguri, “unai amo mai anina bada gaudia do [idia] diba.” (Filipi 1:9-11 duahia.) Aposetolo Paulo bamona, guna Keristani taudia momo be “mai gari lasi ida Dirava ena hereva idia harorolaia.” (Fili. 1:12-14) Unai hegeregerena, hari ita momo be mai gari lasi ida Dirava ena Hereva ita harorolaia noho. To, ita hagoadaia totona, hari Iehova ese ena orea ia gaukaralaia Mataio 24:14 ena hereva ia hagugurua dalana do ita herevalaia. Unai ese ita do ia durua ita haroro goadagoada totona. Iehova ena orea be dahaka ia karaia noho, bona unai ese edena dala ai ita bona eda ruma bese ia durua? Stadi gabena ese ita do ia durua, Iehova ena hesiai gaukara ai ita haheauka, bona iena orea ena hakaua dalana ita badinaia totona.

5, 6. (a) Dahaka dainai Iehova ese matahanai amo ena hesiai taudia haida dekenai guba oreana ia hahedinaraia? (b) Esekiela ena matahanai lalonai dahaka ia itaia?

⁵ Iehova ese Baibel lalonai gau haida ia herevalaia lasi. Hegeregere, ia ese iunives eiava taunimanima edia harana ia gaukara dalana ia herevalaia lasi. To, ia torea herevadia ese ita idia durua iena ura ita lalopararalaia, bona ia ita kamonai henia totona. (2 Tim. 3:16, 17) Ita moale badina Iehova ese ena guba oreana be ita dekenai ia herevalaia. Isaia, Esekiela, Daniela, bona Apokalupo bukadia ese Iehova ena guba oreana idia herevalaia dalana be hoa gauna. (Isa. 6:1-4; Ese. 1:4-14, 22-24; Dan. 7:9-14; Apok. 4:1-11) Dahaka dainai Iehova ese ita dekenai unai ia hahedinaraia?

⁶ Iehova ia ura hanaihanai do ita laloatao, ita be guba bona tanobada oreana ta lalonai ita noho. Iehova ena guba oreana be ia gaukara goada noho Iena ura ia karaia totona. Hegeregere, Esekiela be matahanai ta lalonai kariota badana ta ia itaia, bona unai kariota be Iehova ena guba oreana ia laulaulaia. Unai kariota be ia heau haraga momokani bona ena heau dalana ia haidaua haraga diba. (Ese. 1:15-21) Danu, ia ese kariota dekenai ia Guia Tauna ia itaia. Esekiela ia gwau: “Unai Tau lau itaia, iena tauanina ena ataiai kahana be lahi ese ia hadiaria noho auri laboralabora bamona.” Ma ia gwau: “Ia be Lohiabada dekena amo ia mai diari badana, Dirava  ena hairaina ia hedinaraia gauna.” (Ese. 1:25-28) Esekiela be reana unai matahanai ia itaia neganai, ia hoa maragi lasi! Ia itaia Iehova be ena orea ia biagua bona ena lauma helaga amo ia hakaua. Unai kariota ena heau dalana ese Iehova ena guba oreana ena gaukara dalana ia hahedinaraia goevagoeva!

7. Edena dala ai Daniela ena matahanai ese eda abidadama Iehova bona Iesu dekenai ia hagoadaia?

⁷ Daniela danu be matahanai ta ia itaia, bona unai ese eda abidadama Iehova bona Iesu dekenai ia hagoadaia. Ia itaia Iehova, “Mauri Noho Hanaihanai Tauna,” be terona ta mai ena uili latanai ia helai. (Dan. 7:9) Iehova ia ura Daniela do ia itaia Iena orea be ia heau noho, anina be, Iena ura ia karaia noho. Bena Daniela ese Iesu ia itaia, “iena toana be taunimanima edia toana bamona.” Iehova ese Iesu dekenai siahu ia henia, tanobada oreana ia biagua totona. Iesu be lagani haida sibona lalonai taunimanima do ia lohiaia lasi, to “iena siahu be do ia noho hanaihanai, bona iena basileia be do ia doko diba lasi.” (Dan. 7:13, 14) Unai matahanai ese ita ia durua, Iehova ita abidadama henia bona ia karaia gaudia ita lalopararalaia totona. Ia ese ena Natuna, Iesu ia abidadama henia dainai, “siahu bona mataurai bona dagi bada” ia henia. Unai dainai, ita danu ese Iesu, eda Gunalaia Tauna, ita abidadama henia diba.

8. Esekiela bona Isaia be Iehova ena guba oreana ena matahanai idia itaia neganai, dahaka idia laloa? Unai matahanai ese ita idia durua dahaka ita karaia totona?

⁸ Iehova ena guba oreana ena matahanai ita laloa neganai, eda hemami be edena bamona? Esekiela bamona, ita  danu be Iehova ese ia karaia noho gaudia ita laloa neganai, ita hoa, ani? (Ese. 1:28) Peroveta tauna Isaia be guba ai idia vara gaudia ena matahanai ta ia itaia danu. Dirava ese ia noia ma haida dekenai do Ia karaia gaudia do ia harorolaia neganai, Isaia be mai lalona ibounai ida unai gaukara ia abia dae. (Isaia 6:5, 8 duahia.) Isaia ia diba Iehova ese do ia durua dainai, gau ta ese ena peroveta gaukara ia koua diba lasi. Isaia bamona, ita danu ita ura Iehova ena orea ita durua dainai eda hesiai gaukara ita habadaia. Momokani, Iehova ena ura ia karaia noho oreana ida ita gaukara hebou be hahenamo badana!

9, 10. Dahaka dainai Iehova ese tanobada oreana ta ia haginia?

⁹ Iehova be ena Natuna amo tanobada oreana ta ia haginia, bona unai orea be guba oreana ida ia gaukara hebou. Unai tanobada oreana ia haginia, unai amo Mataio 24:14 ese ia herevalaia gaukarana ia karaia diba. Dahaka dainai? Mani badina toi ita herevalaia.

¹⁰ Badina ginigunana be, Iesu ia gwau ena hahediba taudia be “tanobada ena daudau momokani gabudia dekenai” do idia haroro. (Kara 1:8) Badina iharuana be, haroro gaukara do idia karaia taudia ese Baibel amo hadibaia bona hagoadaia herevadia idia abia be namo. (Ioa. 21:15-17) Badina ihatoina be, hebou idia karaia diba, unai amo Iehova idia tomadiho henia bona haroro daladia idia dibaia. (Heb. 10:24, 25) Iesu ena murinai idia raka taudia ese unai ibounai idia karaia totona, edia gaukara idia karaia namonamo be gau badana.

11. Edena dala ai Iehova ena orea ita durua diba?

¹¹ Edena dala ai Iehova ena orea ita durua diba? Dala namona ta be, haroro gaukara idia gunalaia tadikaka ita abidadama henidia, badina Iehova bona Iesu ese unai tadikaka idia abidadama henidia danu. Unai tadikaka be edia nega bona goada idia gaukaralaia diba, tanobada ena hekwakwanai idia hamaoromaoroa totona. To, idia be unai bamona idia karaia lasi. Iehova ena tanobada oreana ena gaukara badana mani ita herevalaia.

12, 13. Edena dala ai elda taudia ese edia maduna idia huaia? Dahaka dainai unai ese oi ia durua?

¹² Tanobada hegegemadai, lo elda taudia be maduna idia abia edia tano dekenai haroro gaukara idia naria bona gunalaia totona. Idia ura abia hidi ta idia karaia neganai, Baibel ena hakaua herevadia idia tahua. Unai dala amo idia dekenai Baibel be ‘lamepa bona diari bamona edia raka dalana ia hadiaria.’ Danu, Iehova ena heduru totona idia guriguri.​—⁠Sal. 119:105; Mat. 7:7, 8.

¹³ Aposetolo edia negai idia noho elda taudia hegeregerena, iseda negai haroro gaukara idia naria elda taudia ese “Dirava ena hereva hadibaia gaukarana” idia laloa bada. (Kara 6:4) Idia moale badina idia itaia edia tano ai bona tanobada hegegemadai, haroro gaukara ia bada ia lao noho. (Kara 21:19, 20) Idia ese Dirava ena taunimanima totona taravatu momo idia atoa lasi. To, Baibel bona lauma helaga ena hahekau henunai, edia kara amo idia hahedinaraia idia ura sivarai namona be gabu ibounai do ia lao. (Kara 15:28 duahia.) Unai dainai kongrigeisen taudia ibounai dekenai, elda  taudia be haheitalai namona.​—⁠Efe. 4:11, 12.

14, 15. (a) Tanobada hegegemadai, haroro gaukara ita karaia totona dahaka heduru gaudia idia noho? (b) Haroro gaukara durua totona oi karaia gaudia dekenai emu hemami be edena bamona?

¹⁴ Dina ta ta iseda tadikaka be idia gaukara goada buka, magasin, kongrigeisen heboudia bona hebouhebou badadia idia hegaegaelaia totona. Hegeregere, volantia taudia tausen momo be idia gaukara goada buka bona magasin be gado 600 mai kahana ai idia hahanaia totona. Unai dainai, taunimanima momo ese “Dirava ena kara badadia” edia sivarai be ta ta edia gado korikori ai idia duahia. (Kara 2:7-11) Matamata tadikaka bona taihu idia gaukara goada, masini badadia amo unai buka bona magasin idia printaia bona hakapua hebou totona. Unai murinai, unai buka bona magasin be kongrigeisen iboudiai, gunika gabudia danu, dekenai idia siaia lao.

¹⁵ Iseda gabu ai danu, momo be gaukara haida idia karaia, unai amo ita idia durua iseda kongrigeisen ida haroro gaukara ita karaia totona. Hegeregere, haida be Kingdom Hall bona Assembly Hall haginia gaukara idia karaia. Ma haida be gorere taudia bona disasta idia vara gabudia ai idia noho taudia idia durua. Haida be iseda hebouhebou badadia bona maragidia idia naria, bona ma haida be Baibel sikuli idauidau ai hahediba gaukara idia karaia. Dahaka dainai unai gaukara ibounai idia karaia? Badina idia ura ita idia durua sivarai namona ita harorolaia, hereva momokani lalonai ita goada ita lao, bona ma haida ita durua Iehova tomadiho henia taudia ai idia lao totona. Oibe, Iehova ena tanobada oreana be mai anina bada gaudia ia atoa guna!

16. Ruma bese ena tomadiho eiava sibona emu stadi ai, dahaka tahua gaukara oi karaia diba?

¹⁶ Nega ita atoa Iehova ena orea ese ia karaia noho gaukaradia ita laloa totona, a? Emu ruma bese ena tomadiho o sibona emu stadi lalonai, Iehova ena orea dekenai tahua gaukara oi karaia, bona oi dibaia gaudia oi laloa dobu be namo. Hegeregere Isaia, Esekiela, Daniela, bona Ioane ese idia itaia matahanai oi stadilaia neganai do oi moale. Danu, buka ladana Jehovah’s Witnesses​—⁠Proclaimers of God’s Kingdom, magasin bona buka ma haida o DVD amo Iehova ena orea ia gaukara dalana do oi diba.

17, 18. (a) Inai stadi ese edena dala ai oi ia durua? (b) Dahaka henanadai oi laloa be namo?

¹⁷ Iehova ese ena orea amo haroro gaukara ia durua dalana ita laloa dobu be namo. Unai orea namona ida ita gaukara hebou bona mai anina bada gaudia ita atoa guna be gau badana. Unai bamona ita karaia neganai, ita be Paulo bamona do ita laloa, ia gwau: “Dirava ese ai ia hebogahisi henia bona inai hesiai gaukara be ai dekenai ia henia, unai dainai ai hesiku lasi.” (2 Kor. 4:1) Danu, ia ese ena tadikaka ia hagoadaia, ia gwau: “Ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.”​—⁠Gal. 6:9.

¹⁸ Oi sibona eiava emu ruma bese ese gau haida umui haidaua be namo, dina ta ta ai mai anina bada gaudia umui atoa guna totona, a? Emu noho dalana oi haidaua, unai amo emu haroro gaukara oi habadaia diba, a? Wiki vaira ena stadi ai, Iehova ena orea ita tohotohoa bona Iena hesiai gaukara ita karaia goadagoada totona, ita do idia durua gaudia faiv do ita herevalaia.