1, 2. (a) Dahaka ese oi ia durua abia hidi oi karaia Dirava oi hesiai henia totona? (b) Iseda Keristani ahuna dainai edena henanadai do ita herevalaidia?

 ITA milioni momo be abia hidi maorona ita karaia vadaeni. Ita ura Iehova Dirava ita hesiai henia, bona Iesu Keriso ena haheitalai ita tohotohoa. (Mat. 16:24; 1 Pet. 2:21) Ita ese Dirava dekenai ita karaia gwauhamata ita laloa maragi lasi. Ita be Baibel ena hereva ibounai ita stadilaia namonamo murinai, unai abia hidi ita karaia. Unai dainai, ita be Iehova bona ‘ia siaia tauna, Iesu Keriso idia diba’ taudia ese do idia abia ahuna dekenai gau momo ita dibaia, bona unai ese iseda abidadama ia hagoadaia.​—⁠Ioa. 17:3; Roma 12:2.

² Eda hetura karana Iehova ida ia goada noho totona, namona be Iehova ese ia moalelaia abia hidi ita karaia. Inai stadi ai, mai anina bada henanadai do ita herevalaidia: Iseda Keristani ahuna be dahaka? Unai ahuna be edena bamona ita laloa be namo? Dahaka ita karaia diba unai ahuna ita abia totona? Dahaka ese ita do ia durua abia hidi maorodia ita karaia totona?

3. (a) Horoa taudia edia ahuna be dahaka? (b) “Mamoe ma haida” edia ahuna be dahaka?

³ Keristani taudia haida sibona be “ia bodaga diba lasi, ia miro lasi bona ia boio diba lasi” ahuna do idia abia. Unai ahuna be Keriso ida guba ai do idia lohia. (1 Pet. 1:3, 4) To, unai ahuna idia abia totona, idia “vara lou” be gau badana. (Ioa. 3:1-3) To, Iesu ena “mamoe ma haida,” horoa taudia idia durua Dirava ena Basileia idia harorolaia taudia unai, edia ahuna be dahaka? (Ioa. 10:16) Mamoe ma haida be Adamu bona Heva ese idia haboioa ahuna do idia abia. Idia be tanobada paradaisona  ai do idia mauri hanaihanai; unuseniai hisihisi, mase bona taitai be lasi. (Apok. 21:1-4) Unai dainai, Iesu be ia ida idia hasatauroa tauna ia hamaoroa: “Hari dina oi lau hamaoroa momokani, oi be lau ida Paradaiso ai do ita noho.”​—⁠Luka 23:43.

4. Ita be edena hahenamo ita moalelaia noho?

⁴ Hari, ita ese eda ahuna ena kahana haida ita moalelaia noho. Ita be “Keriso Iesu ia henia mauri davana” ita abidadama henia dainai, Dirava ita tura henia bona maino ai ita noho. (Roma 3:23-25) Baibel ena gwauhamata namodia edia anina ita lalopararalaia diba. Danu ita moale, badina ita be tanobada hegegemadai tadikaka oreana lalonai ita noho. Momokani, Iehova ena Witnes tauna ta ai ita lao be hahenamo badana. Unai dainai iseda ahuna ita laloa bada be gau badana!

5. Satani be Dirava ena taunimanima ia dibagania totona dahaka ia karaia? Bona dahaka ese ita do ia durua iena tarapu ita dadaraidia totona?

⁵ To, eda ahuna ita haboioa lasi totona, namona be Satani ena tarapu ita dadaraidia. Satani be hanaihanai dala ia tahua Dirava ena taunimanima ia dibagania totona, unai amo abia hidi kereredia idia karaia bona edia ahuna do idia haboioa. (Num. 25:1-3, 9) Satani ia diba ia be kahirakahira Iehova ese do ia hamasea dainai, ia hekwarahi noho ita ia dibagania totona. (Apokalupo 12:12, 17 duahia.) Bema ita ura ‘Diabolo ena koikoi karadia ibounai dekenai ita gini goada,’ namona be iseda ahuna ita laloa bada. (Efe. 6:11) Isako ena natuna Esau ese ena ahuna ia laloa bada lasi sivaraina amo mai anina bada gaudia ita dibaia.

6, 7. Esau be daika, bona dahaka ahuna ia abia diba?

⁶ Lagani 4,000 gunanai, Rebeka ese hekapa, Esau bona ena tadina Iakobo ia havaraia. Idia ruaosi idia tubu daekau neganai, edia kara bona ura be idau. Baibel ia gwau: “Esau be labana ia diba momo tauna, bona uda dekenai loaloa tauna, to Iakobo be [“kara maoromaoro tauna,” NW] bona ia be ruma dekenai noho tauna.” (Gen. 25:27) Iakobo be kara maoromaoro tauna, badina Dirava ia badinaia bona kerere ta ia karaia lasi.

⁷ Esau bona Iakobo edia mauri lagani be 15 neganai, edia tubuna Aberahamo ia mase. To, Iehova ese Aberahamo dekenai ia karaia gwauhamata ia laloaboio lasi. Gabeai, Iehova ese unai gwauhamata be Isako dekenai ia gwauraia lou. Ia hahedinaraia Aberahamo ena garana dainai, tanobada besedia ibounai ese namo do idia davaria. (Genese 26:3-5 duahia.) Unai gwauhamata ese ia hahedinaraia Mesia​—⁠Genese 3:15 (BHḡ) ese ia herevalaia “garana” unai​—⁠be Aberahamo ena bese amo do ia vara. Esau be Isako ena vara guna natuna dainai, unai gwauhamata hegeregerena Mesia be ena bese amo do ia vara. Esau be unai hahenamo ia abia diba, to ia be unai ia laloa bada, a?

8, 9. (a) Esau be ena vara guna ahuna dekenai, dahaka abia hidi ia karaia? (b) Lagani haida murinai, Esau be dahaka ia lalopararalaia bona dahaka ia karaia?

⁸ Dina ta Esau be labana gabuna amo ia giroa mai neganai, ia itaia Iakobo be “aniani ia nadua noho.” Esau be Iakobo dekenai ia gwau: “Unai aniani kakakaka oi henia, lau ania, badina lau be hitolo mase.” To Iakobo ia haere, ia gwau, “Bema oiemu vara guna ena hanamoa oi henia lau dekenai, aniani do lau henia.” Esau be dahaka abia hidi ia karaia? Ia gwau: ‘Be, lau be kahirakahira do lau mase, lauegu vara guna ena ahuna be edena bamona lau do ia durua?’ Oibe, Esau be aniani totona ena vara guna ahuna ia hoihoilaia! To, Iakobo ia ura Esau ese ena hereva do ia hamomokania, unai dainai ia hamaoroa: “Oi gwauhamata guna.” Maoromaoro, Esau be ena vara guna ahuna ia hoihoilaia. Unai murinai, “Iakobo ese paraoa bona vasiahu ia henia. Vadaeni ia aniani, ia  inuinu, gabeai ia toreisi, ia rakatania. Esau ese iena vara guna ena hanamoa, be unai bamona dala dekenai ia negea.”​—⁠Gen. 25:29-34.

⁹ Lagani haida murinai, Isako be kahirakahira do ia mase neganai, Rebeka be dala ia karaia Iakobo ese Esau ena vara guna ahuna do ia abia. Gabeai, Esau ia laloparara ia be abia hidi kererena ia karaia bona Isako ia noia, ia gwau: “Lau danu, tamagu e, oi hanamoa. . . . Lau dekenai hanamoa ta ia noho lasi, a?” To Isako ese ia hamaoroa, Iakobo dekenai ia henia hahenamo be do ia haidaua lasi neganai, “Esau ia tai dikadika.”​—⁠Gen. 27:30-38.

10. Dirava ese Esau bona Iakobo be edena bamona ia laloa, bona dahaka dainai?

¹⁰ Esau ena sivarai amo dahaka ita dibaia? Ia be tauanina ena ura sibona ia laloa bada, to ena vara guna ahuna dainai gabeai do idia vara hahenamo ia lalodia bada lasi. Unai ese ia hamomokania ia be Dirava ia lalokau henia lasi. Danu, ena kara dainai ena natudia dekenai do idia vara gaudia ia laloa lasi. To Iakobo be idau, badina ia ese ena ahuna ia laloa bada. Hegeregere, ia ura headava neganai, ena tama sina edia sisiba ia badinaia. (Gen. 27:46–28:3) Iakobo ese unai abia hidi ia karaia bona ia haheauka dainai, Iehova ese ia hanamoa bona Mesia be ena bese amo ia vara. Dirava ese Esau bona Iakobo be edena bamona ia laloa? Peroveta tauna, Malaki amo Iehova ia gwau: “Lau ese Iakobo mai iena tubuna taudia lau lalokau henia vadaeni. Bona Esau mai iena tubuna taudia lau ura henia lasi.”​—⁠Mal. 1:2, 3.

11. (a) Dahaka dainai Keristani taudia dekenai Esau ena sivarai be mai anina bada? (b) Dahaka dainai Paulo be matabodaga karana ia herevalaia neganai, Esau ena ladana ia gwauraia danu?

¹¹ Hari inai negai, Keristani taudia dekenai Esau ena sivarai be mai anina bada, a? Oibe. Aposetolo Paulo ese Keristani taudia ia hagoadaia, do idia naria namonamo. Ia gwau: “Namo lasi umui huanai matabodaga tauna ta eiava helaga gaudia ia laloa bada lasi tauna ta ia noho, Esau bamona, ia ese aniani tamona totona iena vara guna ahuna ia henia.” (Heb. 12:16) Keristani taudia ibounai dekenai unai sisiba be mai anina bada. Namona be ita ese helaga gaudia ita laloa bada, unai amo tauanina ena ura gaudia ese ita do idia biagua lasi bona iseda Keristani ahuna do ita dogoatao noho. Dahaka dainai Paulo be matabodaga karana ia herevalaia neganai, Esau ena ladana ia gwauraia danu? Badina bema ta be Esau bamona, reana helaga gaudia do ia laloa bada lasi to tauanina ena ura hamoalea karadia, hegeregere matabodaga karana do ia karaia.

12. (a) Satani be edena dala ai ita ia dibagania toho? (b) Hedibagani ita davaria neganai, edena Baibel sivaraidia ese ita do idia durua, abia hidi maorona ita karaia totona?

¹² Ita be Iehova ena hesiai taudia dainai, namona be ita gaukara goada matabodaga karadia ita dadaraia totona. Bona namona be ita guriguri Iehova Dirava ese ita do ia gimaia, unai amo hedibagani lalonai do ita moru lasi. (Mat. 6:13) Momokani, ita ura inai matabodaga tanobadana lalonai ita gini goada, to Satani ia ura eda hetura karana Iehova ida ia hadikaia. (Efe. 6:12) Ia be inai tanobada ena dirava dainai, ia ese tauanina ena ura dikadia ia gaukaralaia ita ia dibagania totona. (1 Kor. 10:8, 13) Hegeregere, bema ta ese oi ia dibagania matabodaga karana ta oi karaia totona, dahaka abia hidi do oi karaia? Esau bamona unai hedibagani lalonai do oi moru, a? Eiava Iakobo ena natuna Iosepa be Potifara ena adavana ese ia dibagania neganai ia karaia bamona, unai hedibagani do oi dadaraia vaitani?​—⁠Genese 39:10-12 duahia.

13. (a) Hari, edena dala ai haida be Iosepa idia tohotohoa, bona ma haida be Esau idia tohotohoa? (b) Esau ita tohotohoa lasi totona, dahaka ita karaia be namo?

¹³ Iseda tadikaka taihu momo be hedibagani negadiai idia karaia abia hidi ese ia hahedinaraia idia be Esau eiava Iosepa bamona. Momo be abia hidi maorona idia karaia bona Iehova idia hamoalea. (Aon. 27:11) To, tadikaka taihu haida be hedibagani idia davaria neganai, Esau bamona, edia Keristani ahuna idia laloa lasi. Lagani ta ta ai, momo be matabodaga karadia idia karaia dainai, sisiba aukana idia abia eiava orea amo idia atoa siri. Hari, eda kudouna ita hegaegaelaia be mai anina bada, unai amo hedibagani ita davaria neganai, ita gini goada diba! (Sal. 78:8) Mani gau rua ita herevalaia. Idia be magu badana ta bamona hedibagani amo ita do idia gimaia, bona ita do idia durua abia hidi maorodia ita karaia totona.

14. Edena henanadai ese ita do idia durua, kara dika ita inai henia bona kara namo ita dogoatao auka totona?

¹⁴ Gau ginigunana be, ita ura karaia karana ese gabeai do ia havaraia hekwakwanai ita laloa guna. Bema Iehova ita lalokau henia, ia amo ita abia Keristani ahuna do ita laloa bada. Bema ita be ta ita lalokau henia, do ita ura lasi ena lalona ita hahisia, to ita ura ia ita hamoalea. Unai dainai, namona be kara dika ese gabeai do ia havaraia hekwakwanai ita laloa guna. Namona be ita laloa, bema unai kara dika ita karaia, ita bona ma haida dekenai dahaka do ia vara. Namona be sibona ita nanadaia: ‘Bema unai lau karaia, lau bona Iehova emai hetura karana be edena bamona? Egu famili do idia moale, a? Egu tadikaka taihu be dahaka do idia laloa? Egu kara ese ma haida do ia hahekwakwanaia, a?’ (Fili. 1:10) Danu, namona be sibona ita nanadaia: ‘Miniti haida lalonai lau karaia matabodaga karana ena moale ese gabeai do ia havaraia lalohisihisi ia hereaia, a? Lau ura Esau bamona do lau tai dikadika, badina gabeai lau laloparara abia hidi kererena lau karaia, a?’ (Heb. 12:17) Bema unai henanadai ita lalodia namonamo, unai ese ita do ia durua ‘kara dika do ita inai henia, bona kara namo do ita dogoatao auka.’ (Roma 12:9) Bema Iehova ita lalokau henia momokani, do ita gaukara goada iseda ahuna ita gimaia totona.​—⁠Sal. 73:28.

15. Dahaka ese ita do ia durua hedibagani ita dadaraidia, bona eda hetura karana Iehova ida ita gimaia totona?

¹⁵ Dala iharuana be, ita hegaegae hedibagani ita dadaraia totona. Iehova ese ita dekenai heduru daladia momo ia henia, unai amo ita ese tanobada ena hedibagani ita dadaraidia bona eda hetura karana Ia ida ita gimaia diba. Iena heduru daladia haida be inai: Baibel stadilaia karana, Keristani  heboudia, haroro gaukara bona guriguri. (1 Kor. 15:58) Hanaihanai guriguri amo eda hemami be Iehova dekenai ita gwauraia bona hanaihanai haroro gaukara ita karaia neganai, ita hegaegae hedibagani ita dadaraidia totona. (1 Timoteo 6:12, 19 duahia.) Bema unai gaudia ita karaia goadagoada, eda magu do ia goada hedibagani ita koua totona. (Gal. 6:7) Aonega Herevadia bukana ena karoa 2 ese unai ia herevalaia.

16, 17. Dahaka ese ita ia durua abia hidi maorodia ita karaia totona?

¹⁶ Aonega Herevadia bukana ena karoa 2 ese ita ia hagoadaia, aonega bona laloa namonamo karana ita abia be namo. Unai kara namodia ese ita idia durua, tauanina ena ura ita biagua bona matabodaga karadia do ita karaia lasi. To mai eda lalona ibounai ida unai ita karaia be namo. Baibel ese unai ia hamomokania, ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese aonega totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba. Badina be Lohiabada ese aonega, be oi dekenai ia henia noho, bona iena uduna dekena amo, diba bona laloa kehoa idia mai noho.”​—⁠Aon. 2:1-6.

¹⁷ Bema unai siri ena hereva ita badinaia, abia hidi maorodia do ita karaia. Ita ese hedibagani ita dadaraidia diba, bema Iehova ena hereva hegeregerena eda lalohadai ita haidaua, bema hanaihanai Dirava ena heduru totona ita guriguri, bona bema Dirava ena aonega be idia hunia dava bada kohudia bamona ita tahua.

18. Oi ura dahaka do oi karaia noho bona dahaka dainai?

¹⁸ Iehova ese unai kara namodia idia ura hahedinaraia taudia dekenai diba, laloparara, laloa kehoa bona aonega ia henia. Danu, unai kara namodia ita ura henia bona hahedinaraia neganai, Iehova kahirakahira do ita lao. Iehova be iseda turana namona dainai, hedibagani ita davaria neganai, ia ese ita do ia gimaia. Iehova kahirakahira ita lao bona ia ita gari henia karana ese ita do ia gimaia, kara dika ita karaia lasi totona. (Sal. 25:14; Iam. 4:8) Eda hetura karana Iehova ida bona ia ese ita dekenai ia henia aonega herevadia ese ita do idia durua, abia hidi maorodia ita karaia totona. Unai amo Ia do ita hamoalea bona eda Keristani ahuna do ita gimaia.