1, 2. Ita, Iehova ena Witnes taudia sibona ese dahaka hahenamo ita abia, bona emu hemami be edena bamona?

 TA BE gaukara badana ta ia karaia dainai ahuna (Nobel Prize) ta idia henia neganai, ia dekenai unai be hahenamo badana. Hegeregere, haida be unai ahuna idia abia badina tuari besedia huanai maino idia havaraia. To, Dirava ese haida ia siaia taunimanima do idia durua Ia ida maino do idia karaia ena gaukara be hahenamo badana!

² Ita, Iehova ena Witnes taudia sibona be unai hahenamo badana ita abia. Dirava bona Iesu ese iseda gaukara idia gunalaia dainai, taunimanima dekenai ita gwau: “Dirava ida maino umui karaia.” (2 Kor. 5:20) Iehova ese ita ia gaukaralaia taunimanima be ia dekenai ita veria mai totona. Unai dainai, tano 235 mai kahana ai taunimanima milioni momo ita durua noho, Dirava idia tura henia bona mauri hanaihanai helarona idia abia totona. (Tito 2:11) Mai eda lalona ibounai ida “mauri ranuna idia ura taudia ibounai” ita boiria, “mauri ranu idia inua be namo, ia be davana lasi.” (Apok. 22:17) Unai gaukara ita laloa bada bona karaia namonamo dainai, taunimanima ese ita idia gwauraia ‘mai ura bada ida kara namodia idia karaia’ taudia. (Tito 2:14) Hari, eda kara namodia amo taunimanima be Iehova dekenai ita veria mai daladia do ita herevalaia. Unai dala namona ta be iseda haroro gaukara.

3. Iehova be “mai ura bada ida” dahaka do ia karaia?

³ Isaia be Dirava ena Natuna be king ai do ia lao, bona taunimanima totona do ia karaia gau namodia ia herevalaia neganai, ia gwau: “Inai kara be Siahu Ibounai Lohiabada ese [“mai ura bada ida,” NW] do ia karaia momokani.” (Isa. 9:7) Unai siri ena hereva ese ia hahedinaraia eda guba Tamana ia ura bada taunimanima do ia hamauria. Iehova ena haheitalai dainai mai eda kudouna, goada bona ura ibounai  ida Basileia harorolaia gaukarana ita goadalaia be gau badana. Unai dala amo ita be Iehova ena ura bada karana ita tohotohoa. Ita be Iehova ida ita gaukara hebou dainai, eda lalona ita hadaia vadaeni eda noho dalana hegeregerena sivarai namona do ita harorolaia, a?​—⁠1 Kor. 3:9.

4. Edena dala ai Iesu be haroro goadagoada tauna?

⁴ Iesu ena haheitalai ita laloa danu be namo. Ia be haroro goadagoada tauna. Ena be dagedage ia davaria, to ia haroro goadagoada ela bona ia mase. (Ioa. 18:36, 37) Iena mase dinana ia kahirakahira neganai, ia gaukara goadagoada ma haida ia durua Dirava idia dibaia totona.

5. Edena dala ai Iesu be “vain uma naria tauna” bamona?

⁵ Lagani 32 C.E. ai, Iesu be inai parabole ia gwauraia: Uma biaguna ta be ena vain umana ai fig auna ta ia hadoa, to lagani toi lalonai huahua ia atoa lasi. Ia ese vain uma naria tauna ia hamaoroa fig auna do ia utua, to vain uma naria tauna ia noinoi do ia utua lasi, to lagani tamona lalonai au ena badinai boromakau ena tage do ia atoa. (Luka 13:6-9 duahia.) Iesu be unai haheitalai ia gwauraia neganai, haida sibona be iena hahediba taudia ai idia lao vadaeni. Unai haheitalai hegeregerena, Iesu, “vain uma naria tauna” unai, be ena nega orena​—⁠hua siks bamona​—⁠ia gaukaralaia Iudea bona Perea dekenai ena haroro gaukara ia habadaia totona. Iesu ena mase dinana ia kahirakahira neganai, ia tai badina ia itaia iena hanua taudia be ena hereva “idia kamonai, to kara ta idia karaia lasi.”​—⁠Mat. 13:15; Luka 19:41.

6. Dahaka dainai haroro gaukara ita goadalaia be namo?

⁶ Nega dokona ia kahirakahira momokani dainai, haroro gaukara ita goadalaia be namo. (Daniela 2:41-45 duahia.) Ita be Iehova ena Witnes taudia be hahenamo badana! Tanobada hegegemadai ita sibona ese hekwakwanai ibounai do idia ore dalana ita harorolaia. Niuspepa torea tauna ta ia gwau inai henanadai be ta ese ia haerelaia diba lasi: “Dahaka dainai taunimanima namodia dekenai gau dikadia idia vara?” Iseda maduna be kudou maoro taudia dekenai Baibel amo haere maorodia ita henia. Unai gaukara be hahenamo badana. Haroro gaukara ita karaia neganai, Dirava “ena lauma amo [ita] hururuhururu” be namo. (Roma 12:11) Iehova ese iseda haroro gaukara ia hanamoa dainai, ma haida ita durua ia idia dibaia bona lalokau henia totona.

7, 8. Edena dala ai sibona ita henia karana amo Iehova ita hanamoa diba?

⁷ Aposetolo Paulo dekenai ia vara bamona, reana eda haroro gaukara dainai, hanuaboi momo ita “mahuta lasi” bona nega haida ita “aniani lasi.” (2 Kor. 6:5) Tadikaka taihu haida be haroro gaukara idia atoa guna dainai, sibona edia ura gaudia idia dadaraia. Hegeregere, painia taudia be edia mauri lalonai haroro gaukara idia atoa guna, bona sibona idia naria totona pat-taim gaukara idia karaia danu. Misinari taudia danu be sibona idia henia, idau tano ai haroro gaukara idia karaia. (Fili. 2:17) Elda taudia danu be Iehova ena mamoe idia naria totona, nega haida idia aniani lasi o mahuta namonamo lasi. Danu, eda kongrigeisen ai buruka taudia bona gorere taudia haida idia noho, to idia hekwarahi hebou idia mai bona idia haroro totona. Idia ibounai edia haheitalai namona ese ita ia hamoalea, ani? To unai sibona lasi, ma haida ese unai idia itaia neganai, idia laloparara iseda haroro gaukara be mai anina bada.

⁸ United Kingdom ai, Witnes lasi tauna ta be niuspepa ta dekenai revareva ia torea, ia gwau: “Taunimanima be dubu idia abidadama henia lasi. . . . Dubu ena haroro taudia be dina ta ta ai dahaka idia karaia? Idia be Keriso ia karaia bamona idia karaia lasi. Idia lao lasi taunimanima idia haroro henidia totona. . . . Iehova ena Witnes taudia edia orea sibona be taunimanima ia laloa bada. Ruma-ta-ruma-ta idia lao, taunimanima idia hedavari henia bona hereva momokani idia harorolaia.” Inai tanobada ai momo be sibona edia ura idia laloa bada, to ita be haroro gaukara totona sibona eda ura gaudia ita  dadaraia karana amo Iehova Dirava ita hanamoa.​—⁠Roma 12:1.

9. Dahaka ese ita do ia durua haroro gaukara ai mai ura ida kara namodia ita karaia totona?

⁹ Bema haroro gaukara ai ita manoka ita lao, dahaka ita karaia be namo? Ita ia durua gauna ta be, haroro gaukara dainai Iehova ese ia karaia gau namodia ita laloa. (Roma 10:13-15 duahia.) Taunimanima idia roho mauri totona idia ese Iehova idia abidadama henia bona iena ladana dekenai idia boiboi be namo. To, edena dala ai Dirava ena ladana idia boiria diba, bema ita haroro henidia lasi? Unai ita lalopararalaia neganai, ita do ia hagoadaia mai ura ida kara namodia do ita karaia, bona Basileia ena sivarai namona do ita harorolaia goadagoada.

10. Edena dala ai kara namodia ese taunimanima be Iehova dekenai idia veria mai diba?

¹⁰ Taunimanima be Dirava dekenai ita veria mai totona, haroro gaukara ita karaia sibona be hegeregere lasi. To, Keristani kara namodia ita hahedinaraia danu be gau badana. Paulo ia gwau: “Dala ta dekenai ta ai hahekwakwanaia lasi, unai amo taunimanima ese emai hesiai gaukara do idia gwauraia dika lasi.” (2 Kor. 6:3) Eda hereva bona kara namodia ese Dirava ena hadibaia dalana idia hahairaia, bona ma haida ia veria Iehova idia tomadiho henia totona. (Tito 2:10) Nega momo kudou-maoro taudia be iseda kara namodia idia itaia dainai, hereva momokani idia abia dae.

11. Dahaka dainai kara namodia hahedinaraia totona ita guriguri be namo?

¹¹ Ena be iseda kara namodia dainai taunimanima be hereva momokani do idia abia dae, to bema kara dika ita karaia, do idia ura lasi Iehova idia dibaia. Unai dainai, herevana ita be gaukara gabunai, ruma ai, o sikuli gabunai, namona be eda kara ita naria namonamo. Unai amo taunimanima ese eda haroro gaukara do idia gwauraia dika lasi. Danu, bema “mai iseda ura ida kara dika ita karaia,” dika bada ia vara diba.  (Heb. 10:26, 27) Unai ita lalopararalaia neganai, Iehova do ita guriguri henia ita ia durua kara namodia ita hahedinaraia totona, unai amo ma haida dekenai ita be haheitalai namona. Tanobada ia dika ia lao noho lalonai, kudou-maoro taudia do idia itaia, daidia be “Dirava ena gaukara idia karaia” bona daidia be “iena gaukara idia karaia lasi.” (Mal. 3:18) Oibe, Keristani kara namodia amo taunimanima edia lalona ita veria diba, Dirava idia tura henia totona.

12-14. Edena dala ai dagedage negadiai ita gini goada karana ese haida ia durua diba hereva momokani idia abia dae totona? Haheitalai ta gwauraia.

¹² Paulo be Korinto taudia ia tore henidia neganai, ia hamaorodia ia be haroro gaukara dainai idia dadabaia, hisihisi ia davaria, bona dibura ruma ai idia atoa. (2 Korinto 6:4, 5 duahia.) Eda abidadama idia tohoa gaudia ita haheaukalaia karana ese ma haida ia durua diba, hereva momokani idia abia dae totona. Mani inai sivarai ita laloa: Angola ena hanua ta ai haida idia ura Iehova ena Witnes taudia ibounai idia hamasea. Tadikaka ta mai ena adavana bona kamonai taudia 30 be kongrigeisen hebou ta idia karaia noho lalonai, dagedage taudia ese idia abidia bona idia kwadidia ela bona edia kopina amo rara ia diho. Hahine bona natudia dekenai unai idia karaia danu. Dagedage taudia idia ura hanua taudia do idia hagaria, unai amo Iehova ena Witnes taudia do idia kamonai henia lasi. To unai murinai, hanua taudia be Witnes taudia dekenai idia lao bona Baibel stadi totona idia henanadai! Unai dainai, Basileia harorolaia gaukarana ia bada, Witnes taudia edia namba ia bada daekau bona hahenamo momo idia davaria.

¹³ Unai sivarai ese ia hahedinaraia bema haida idia itaia ita be dagedage negadiai ita gini goada, idia ese hereva momokani do idia abia dae. Petero bona aposetolo taudia ma haida edia gini goada karana ese momo ia durua, Dirava idia tura henia totona. (Kara 5:17-29) Ita danu, bema dagedage negadiai kara maoromaoro ita badinaia, eda sikuli turadia, gaukara turadia o famili taudia ese sivarai namona idia abia dae diba.

¹⁴ Iseda tadikaka haida be hanaihanai dagedage idia davaria. Hegeregere Armenia ai, tadikaka 40 bamona be edia gini siri karana dainai dibura ruma ai idia atodia. Bona toana be vaira huadia ai ma haida be dibura rumana ai do idia atoa danu. Eritrea ai, Iehova ena hesiai taudia 55 be dibura ruma ai idia atodia, idia haida edia mauri lagani be 60 ia hanaia vadaeni. South Korea ai, Witnes taudia 700 mai kahana be edia abidadama dainai dibura ruma ai idia atodia. Unai hekwakwanai be lagani 60 lalonai ia vara. Namona be ita guriguri tano idauidau ai hahetoho badadia idia davaria tadikaka do idia gini goada totona. Unai amo Iehova ena ladana do idia hanamoa, bona ma haida idia durua hereva momokani idia abia dae totona.​—⁠Sal. 76:8-10.

15. Edena dala ai kara momokani ita hahedinaraia dainai, haida ese hereva momokani idia abia dae diba? Ekspiriens ta gwauraia.

¹⁵ Eda mauri lalonai kara momokani ita badinaia neganai, ma haida edia lalona ita veria diba hereva momokani idia dibaia totona. (2 Korinto 6:4, 7 duahia.) Hegeregere, mani inai ekspiriens oi laloa: Taihu ta be basi davana ia ura karaia neganai, ena turana ese ia hamaoroa basi davana do ia karaia lasi, badina idia be gabu daudau idia lao lasi. To, taihu ia gwau herevana idia be gabu daudau idia lao lasi, to basi ena davana ia karaia be maoro. Ena turana be basi amo ia diho murinai, basi draiva be taihu ia nanadaia: “Oi be Iehova ena Witnes hahinena ta, a?” Taihu ia haere: “Io, dahaka dainai oi henanadai?” Basi draiva ia gwau: “Lau kamonai oi bona emu turana be basi ena davana umui herevalaia, bona lau diba Iehova ena Witnes taudia sibona be basi ena davana idia karaia, bona gau ibounai dekenai idia kara momokani.” Hua haida murinai Kingdom Hall ai tau ta be taihu dekenai ia lao, bona ia gwau, “Lau oi  laloatao, a? Lau be basi draiva bona guna oi lau hereva henia. Emu kara dainai, egu lalona lau hadaia Iehova ena Witnes taudia ida Baibel do lau stadilaia matamaia.” Oibe, taunimanima be iseda kara momokani karana idia itaia neganai, ita harorolaia sivarai namona do idia abia dae.

16. Edena dala ai boga-auka, lalokau bona hebogahisi karadia amo taunimanima be Iehova dekenai ita veria mai diba? Haheitalai ta gwauraia.

¹⁶ Ita ese boga-auka, lalokau bona hebogahisi ita hahedinaraia neganai, taunimanima be Iehova dekenai ita veria mai diba. Iseda kara namodia idia itaia taudia haida idia ura Iehova, ena ura, bona ena taunimanima idia dibaia. Oibe, Keristani korikoridia ese edia lalohadai bona kara amo Dirava idia hanamoa. To, dubu gunalaia taudia momo be unai bamona lasi. Edia dubu taudia idia koia, edia moni idia henaoa bona dava bada ruma bona motuka idia hoia. Hegeregere, dubu gunalaia tauna ta ese ena sisia ena ruma ai air condition ia atoa. Oibe, Keristani taudia koikoidia momo be Iesu ena hahegani Mataio 10:8 ai idia badinaia lasi. To, idaunegai Israela ena hahelaga taudia dikadia bamona, “moni do idia abia totona, Taravatu ena anina idia gwauraia.” Edia hahediba herevadia momo be Baibel amo idia abia lasi. (Mika 3:11) Unai dainai, ta idia durua lasi Dirava ena turana ai ia lao totona.

17, 18. (a) Edena dala ai iseda kara namodia amo Iehova ita hanamoa diba? (b) Dahaka ese oi ia veria kara namodia oi karaia noho totona?

¹⁷ To, kudou maoro taudia idia itaia ita ese Baibel ena hereva momokani ita hadibaia, bona eda dekena taudia ita kara namo henia neganai, idia ura Dirava idia tura henia. Hegeregere, nega ta painia tadikaka ta be haroro gaukara ai vabu ta ia davaria. To, unai vabu be ia ura lasi kamonai bona tadikaka ia hamaoroa, “Oi pidipidi neganai lau be vadavada ai lau gini bona kisini ena golobu lau senisia noho.” Tadikaka ia gwau: “Namo lasi oi sibona oi noho neganai unai oi karaia, dika hekwakwanai ta ia vara.” Tadikaka ese unai vabu ena golobu ia senisia, bena ia lao. Unai murinai, vabu ena natuna mero be sivarai ia kamonai neganai ia hoa bada, bona tadikaka ia tahua do ia tanikiu henia totona. Gabeai, unai mero be Baibel stadi ia abia dae.

¹⁸ Dahaka dainai oi ura kara namodia do oi karaia noho? Badina reana oi laloparara haroro gaukara ita goadalaia, bona gau ibounai be Dirava ena ura hegeregerena ita karaia neganai, Iehova ita hanamoa bona haida ita durua idia roho mauri totona. (1 Korinto 10:31-33 duahia.) Danu, haroro gaukara ita goadalaia bona mai ura bada ida kara namodia ita karaia, badina ita ura hahedinaraia ita be Dirava bona taunimanima ita lalokau henia. (Mat. 22:37-39) Bema mai eda ura ida kara namodia ita hahedinaraia, hahenamo momo do ita abia bona eda mauri do ita moalelaia. Danu, ita be mai moale ida vaira negana ita naria noho. Unai negai taunimanima be mai edia ura ida tomadiho momokani do idia badinaia, bona iseda Havaraia Tauna, Iehova do idia hanamoa.