Kingdom Hall lalonai atoa siri tauna be edeseni ia helai ita lalohekwarahilaia be anina lasi. Inai magasin ena atikol momo ese tama sina idia hagoadaia, idia ida ruma dekenai ia noho atoa siri merona do idia durua Iehova dekenai ia giroa lou totona. Hegeregere, Gima kohorona, May 1, 1989 rau 21 bona 22 ese ia hahedinaraia, bema atoa siri merona be tama sina edia ruma ai ia do noho, ia ida Baibel stadi idia karaia diba. Unai amo edia natuna mero do idia durua ena kara ia hanamoa totona. a

Kingdom Hall lalonai helai totona, atoa siri merona be mai hemataurai ida ena tama sina ida ia helai diba. Taravatu be lasi atoa siri tauna be Kingdom Hall murinai ia helai totona. Unai dainai, herevana tama sina be edeseni idia helai, to atoa siri merona be idia ida ia helai be kerere lasi. Tama sina be edia natuna idia laloa bada dainai, idia ura hebou dekenai hereva ia kamonai namonamo. Unai dainai, idia ida ia helai neganai, ia idia durua diba.

To, edena bamona bema atoa siri merona be ena tama sina edia ruma ai ia noho lasi? Anina be hebou ai ena tama sina ida do ia helai lasi, a? Guna inai magasin ena atikol momo ese Keristani taudia be edia ruma ai idia noho lasi atoa siri varavara idia bamoa lasi karana idia herevalaia. b To, hebou dekenai atoa siri merona be ena famili ida mai hemataurai ida ia helai karana be idau, badina unai kara be ia idia bamoa kava karana lasi. Bema famili taudia be lalohadai maorona idia badinaia, bona Baibel ena sisiba hegeregerena atoa siri merona idia bamoa kava lasi, vadaeni Kingdom Hall lalonai ia be ena famili ida ia helai be kerere lasi.​—1 Kor. 5:11, 13; 2 Ioa. 11.

Bema atoa siri tauna be Kingdom Hall ai ena varavara eiava tadikaka o taihu ta ida mai hemataurai ida ia helai, unai ita maumauraia be maoro lasi. Kingdom Hall lalonai ta ia helai gabuna dekenai taravatu ita karaia neganai, hekwakwanai idauidau idia vara diba. Bema Kingdom Hall ai tadikaka taihu bona varavara taudia be atoa siri karana dekenai Baibel ena hakaua herevadia idia badinaia, bona atoa siri merona ena helai gabuna ese ma haida ia hahekwakwanaia lasi, vadaeni edeseni ia helai ita maumauraia be maoro lasi. c