1, 2. Dahaka dainai Tanobada Tuarina Iharuana dokonai, Iehova ena Witnes taudia 230 be Mase Rakana amo idia mauri?

 TANOBADA Tuarina Iharuana ena dokonai, Nazi gavamani be ia kwalimu lasi dainai, palani ia karaia dibura kamepa ai idia noho taudia tausen momo ia hamasea totona. Tuari taudia ese Sachsenhausen dibura kamepa dekenai idia noho taudia do idia fosia sisima idia noho gabudia dekenai do idia raka lao. Unuseniai sisima dekenai do idia atodia, bena davara dekenai sisima do ia hamutudia. Gabeai, unai palani ladana idia gwauraia Mase Rakana.

² Sachsenhausen dibura kamepa dekenai idia noho taudia 33,000 idia fosia, kilomita 250 do idia raka ela bona davara badinai ia noho taoni ladana Lübeck. Unai dibura taudia huanai be tano idauidau 6 amo idia mai Iehova ena Witnes taudia 230 idia raka danu. Idia ibounai edia tauanina ia manoka badina idia hitolo bona gorere. To, edena dala ai eda tadikaka be unai Mase Rakana amo idia mauri? Tadikaka ta ia gwau: “Hanaihanai ta ta ai hagoadaia ai raka noho totona.” Dirava amo ia mai “siahuna, taunimanima edia siahu ia hereaia gauna,” bona ta ta lalokau henia karana ese idia ia durua idia mauri totona.—2 Kor. 4:7.

3. Dahaka dainai ta ta ita hagoadaia be gau badana?

³ Hari, ita be Mase Rakana ta dekenai ita raka lasi, to hahetoho momo ita davaria. Lagani 1914 ai, Dirava ena Basileia ia lohia matamaia neganai, Iesu ese Satani be guba amo ia negea diho tanobada dekenai, bona Satani “ia badu dikadika, badina ia diba iena nega be ia kwadogi.” (Apok. 12:7-9, 12) Aramagedono ia kahirakahira noho lalonai, Satani be hahetoho bona hedibagani idauidau ia gaukaralaia, iseda hetura karana Iehova ida ia hadikaia totona. Danu, dina ta ta ai lalohekwarahi gaudia idauidau ita davaria. (Iobu 14:1; Had. 2:23) Bona nega haida, herevana dahaka ita karaia to unai hekwakwanai idauidau dainai ita lalomanoka bona ita mamia ita hegeregere lasi. Tadikaka ta ena sivarai mani ita laloa. Lagani  momo lalonai ia ese momo ia hagoadaia, Iehova idia abidadama henia noho totona. To ia buruka neganai, ia bona ena adavana be idia gorere dainai, tadikaka ia lalomanoka. Unai dainai, ta ta ita hagoadaia bona ‘Dirava amo ia mai siahuna’ ita abia be gau badana.

4. Bema ita ura ma haida ita hagoadaia, edena sisiba ita badinaia be namo?

⁴ Bema ita ura ma haida ita hagoadaia, namona be aposetolo Paulo ena sisiba Heberu Keristani taudia dekenai ita badinaia. Ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona. Bona iseda hebou karana ita rakatania lasi, vaia haida ese idia karaia bamona, to do ita hagoadaia heheni, bona unai kara do ita habadaia noho, badina umui itaia unai dina be ia kahirakahira noho.” (Heb. 10:24, 25) Edena dala ai unai sisiba ita badinaia diba?

5. “Ta ta ibounai do ita laloa” ena anina be dahaka? Bona edena dala ai unai kara ita hahedinaraia diba?

⁵ Inai hereva “ta ta ibounai do ita laloa” ena anina be, “ma haida edia dabu gaudia do ita laloa.” Bema eda tadikaka be Kingdom Hall ai ita hedavari henia sibona, o idia ida anina lasi gaudia sibona ita herevalaia, edia dabu gaudia do ita diba lasi. Momokani, ita ura lasi ‘ma haida edia mauri ai idia vara gaudia lalonai do ita vareai,’ eiava ‘ita kikilaia.’ (1 Tes. 4:11; 1 Tim. 5:13) To, bema ita ura eda tadikaka ita hagoadaia, idia ita diba namonamo be gau badana. Anina be edia mauri dalana, kara, goada bona manoka gaudia, bona edia lalohadai hereva momokani dekenai do ita diba. Namona be idia mamia ita be edia turadia bona idia ita lalokau henia. Anina be hekwakwanai o lalomanoka idia davaria negadia sibona lasi, to nega ma haida ai danu idia ita bamoa be namo.—Roma 12:13.

6. Dahaka ese elda do ia durua tadikaka taihu ia “laloa” totona?

⁶ Baibel ia gwau, kongrigeisen elda taudia be mai edia ura bada ida ‘Dirava ena mamoe oreana do idia naria’ be namo. (1 Pet. 5:1-3) Elda taudia ese unai gaukara idia karaia namonamo totona, tadikaka taihu idia diba namonamo be gau badana. (Aonega Herevadia 27:23 duahia.) Bema elda taudia idia hahedinaraia idia ura tadikaka taihu idia durua bona edia hebamo idia moalelaia, tadikaka taihu do idia gari lasi elda taudia edia heduru idia tahua totona. Danu, unai ese dala ia kehoa tadikaka taihu be edia hemami korikorina idia gwauraia hedinarai totona, unai amo elda ese heduru maorona idia henia diba.

7. Bema lalomanoka tauna ta be ia “badu kava,” dahaka ita laloatao be namo?

⁷ Paulo be Tesalonika taudia dekenai ia gwau: “Manoka taudia do umui durua.” (1 Tesalonika 5:14 duahia.) Inai hereva “manoka taudia” anina be idia lalometau bona lalomanoka taudia. Aonega Herevadia 24:10 ia gwau: “Bema hekwakwanai neganai oi manoka neganai, oiemu goada be maragimaragi momokani.” Nega haida ia lalomanoka tauna be ia “badu kava.” (Iobu 6:2, 3) Reana do ia laloa namonamo lasi bona ia hereva kava. Keristani kekeni ta Rachelle, ena sinana be lalometau gorerena ia davaria. Rachelle ia gwau: “Nega momo Sinagu be hereva amo lau ia gwauraia dika. Unai bamona ia hereva neganai lau be sibona lau hagoadaia Sinagu ena kara korikori lau laloatao totona—ia be lalokau, hebogahisi, bona heabidae hahine. Lau laloparara lalometau idia davaria taudia be hisihisi havaraia hereva momo idia gwauraia, to idia ura momokani lasi unai hereva idia gwauraia. Iseda hereva eiava kara ta amo davana do ita haloua be dika momokani.” Aonega Herevadia 19:11 ia gwau: “Tau ta ena aonega ese haheauka ia henia noho, vadaeni ia  badu haraga lasi. Bema tau ta ese oi dekenai ia kara dika, do oi laloaboio be kara namona momokani.”

8. Daika dekenai eda lalokau ita “hahedinaraia” be namo, bona dahaka dainai?

⁸ Bema tadikaka ta be ena kerere ia hamaoromaoroa vadaeni, to unai kerere dainai ia do hemarai bona lalohisihisi noho, edena dala ai ia ita “laloa” be namo? Paulo be Korinto kongrigeisen lalonai ia noho helalo-kerehai tauna ia herevalaia, ia gwau: “Mai hebogahisi ida ia umui gwauatao bona umui hagoadaia be namo, vadaeni unai bamona tauna ena lalohisihisi ese ia do ia hadikaia ore lasi. Unai dainai umui lau hagoadaia, namona be ia dekenai umui hahedinaraia, ia umui lalokau henia.” (2 Kor. 2:7, 8) Tadikaka do ia diba lasi ita be ia ita “laloa” bona ita lalokau henia, unai dainai iseda kara o hereva amo ita hahedinaraia be namo.

9. Ta ta ita hagoadaia, “ita lalokau heheni bona kara namodia ita karaia,” ena anina be dahaka?

⁹ Paulo ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona.” Namona be eda tadikaka taihu ita hagoadaia, unai siri ena hereva idia badinaia totona. Hegeregere, bema lahi be ia bodo ia lao, reana au do ita atoa hebou, bona lahi do ita hiriria ia bada totona. (2 Tim. 1:6) Unai hegeregerena, namona be ita ese eda tadikaka ita hagoadaia Dirava bona edia neiba dekenai lalokau idia hahedinaraia totona. Ma haida dekenai hanamoa herevadia ita gwauraia neganai, unai ese do ia durudia kara namodia idia karaia totona.

10, 11. (a) Daidia ese hanamoa hereva idia abia be namo? (b) Edena dala ai hanamoa hereva gwauraia karana ese ta ia durua dala maorona ia badinaia totona? Haheitalai ta gwauraia.

¹⁰ Herevana ita lalomanoka o lasi, to ita ibounai ese hanamoa herevadia ita abia be namo. Elda ta ia gwau: “Egu tamana be nega ta lasi lauegu kara ia hanamoa. Lau bada lau lao neganai lau laloa lau namo lasi. . . Ena be hari egu lagani be 50, to lau moale bema egu turadia ese egu elda gaukarana idia gwauraia namo. . . Lau dekenai idia vara gaudia ese lau idia hadibaia ma haida edia lalona lau hagoadaia be gau badana, bona dala haida lau tahudia edia lalodia lau hagoadaia  totona.” Hanamoa herevadia ese ita ibounai—painia taudia, buruka taudia bona lalomanoka taudia—ia hagoadaia diba.—Roma 12:10.

¹¹ Elda taudia be kerere tauna idia durua neganai, guna ia karaia kara namodia dainai idia hanamoa diba. Unai ese kerere tauna do ia durua ena lalohadai ia haidaua, bona dala maorona ia badinaia totona. (Gal. 6:1) Taihu ta ladana Miriam dekenai unai ia vara. Ia gwau: “Egu turadia namodia haida be hereva momokani idia rakatania, bona unai nega tamona lalonai, egu tamana ena harana dekenai rara varona ta ia dika neganai, lau lalohisihisi bada. Egu daradoko lau hanaia toho totona murimuri merona ta lau bamoa matamaia.” Unai dainai Miriam ia mamia ia be hegeregere lasi Iehova ese do ia lalokau henia totona, bona ia ura hereva momokani ia rakatania. To, elda tauna ta be Miriam ese guna ia karaia hesiai gaukara namona ia herevalaia neganai, unai ese Miriam ena kudouna ia hamarerea. Elda taudia edia heduru ia abia dae, bona ia mamia Iehova ese ia lalokau henia noho. Danu, iena lalokau Iehova totona ia goada lou. Ena hetura karana murimuri merona ida ia hadokoa, bona Iehova ia hesiai henia noho.

12. Dahaka do ia vara bema, iseda tadikaka be ma haida ida ita hahegeregerea, ita gwauraia dika, o ita hahemaraia?

¹² Bema eda tadikaka ita “hagoadaia” Dirava ia hesiai henia totona, namona be ita naria namonamo. Namo lasi iena kara be ma haida ida ita hahegeregerea, o ita gwau henia badina ita atoa taravatudia ia badinaia lasi, o ita hahemaraia badina ena hesiai gaukara ia goadalaia lasi. Reana do ia goada lou, to unai be nega sisina sibona do ia karaia. To, tadikaka ita “hagoadaia” dalana namona be, ia ita hanamoa bona ita durua, unai amo do ia laloparara ia be Dirava ia lalokau henia dainai ia hesiai henia.—Filipi 2:1-4 duahia.

13. Haida ita hagoadaia ena anina be dahaka? (Laulau ginigunana itaia.)

¹³ Namona be ‘do ita hagoadaia heheni, bona unai kara do ita habadaia noho, badina ita itaia Dirava ena dina be ia kahirakahira noho.’ Ma haida ita hagoadaia totona, namona be idia ita durua Dirava hesiai henia karana do idia goadalaia. Ma haida ita hagoadaia lalokau bona kara namodia do idia hahedinaraia be hegeregere, ia bodo ia lao lahina dekenai au ita atoa hebou ia bada totona. Bona ma haida ita hagoadaia karana be hegeregere, lahi ia araia noho o ia bada totona au ma haida ita atoa. Danu, eda tadikaka taihu ita hagoadaia ena anina be, idia ita durua Dirava idia hesiai henia noho totona. Ia lalomanoka tauna ta ita hagoadaia neganai, namona be mai manau bona hebogahisi ida ita hereva henia. (Aon. 12:18) Ma danu, namona be ita “kamonai haraga,” to ita “hereva haraga lasi.” (Iam. 1:19) Bema ita kamonai namonamo, reana iseda tadikaka idia hamanokaia gaudia do ita dibaia, bona edia hekwakwanai hanaia totona, heduru hereva maorona do ita gwauraia.

14. Edena dala ai elda ta ese ia lalomanoka tadikaka ta ia durua?

 ¹⁴ Elda ta ese lagani haida lalonai ia haroro lasi tadikaka ta ia durua dalana mani ita itaia. Elda be tadikaka ena sivarai ia kamonai neganai, ia laloparara toana be tadikaka be Iehova ia do lalokau henia noho. Tadikaka be hanaihanai Gima Kohorona ia stadilaia bona ia hekwarahi hebou ia lao hanaihanai totona. To, kongrigeisen taudia haida edia kara dainai, tadikaka ia lalohisihisi. Elda be tadikaka ia hahemaoro henia haraga lasi, to ia hahedinaraia ia ese tadikaka bona ena famili ia laloa bada. Gabeai, tadikaka ia laloparara ia be guna idia vara hekwakwanai ia laloa momo dainai, unai ese ia koua ia lalokau henia Diravana ia hesiai henia lasi totona. Elda ese tadikaka ia noia haroro gaukara ai idia gaukara hebou totona. Elda ena heduru dainai, tadikaka be ena haroro gaukara ia goadalaia bona gabeai elda maduna ia abia lou.

15. Lalomanoka taudia hagoadaia totona, Iehova ena kara amo dahaka ita dibaia?

¹⁵ Reana lalomanoka tauna ta ena hemami be do ia namo haraga lasi, eiava do ia ura lasi iseda heduru ia abia dae. To, namona be ia ita durua noho. Paulo ia gwau: “Manoka taudia durua noho, bona taunimanima ibounai dekenai do umui haheauka.” (1 Tes. 5:14, An American Translation) Namo lasi manoka taudia dekenai ita hesiku haraga, to idia ita “durua noho” be namo. Guna, hesiai taudia haida idia lalomanoka neganai, Iehova be idia dekenai ia haheauka. Hegeregere, Dirava be Elia dekenai ia haheauka bona ena hemami ia laloa. Iehova ese Elia ia durua dainai, ena hesiai gaukara ia karaia noho diba. (1 Kin. 19:1-18) Danu, Davida be ia helalo-kerehai dainai, Iehova ese ena dika ia gwauatao. (Sal. 51:7, 17) Danu, Salamo karoa 73 ia torea tauna be kahirakahira ena hesiai gaukara ia rakatania, to Dirava ese ia durua. (Sal. 73:13, 16, 17) Ita lalometau o lalomanoka neganai, Iehova be ita dekenai ia hebogahisi bona ia haheauka. (Eso. 34:6) Iena hebogahisi be ‘daba ibounai idia matamata’ bona “do idia doko lasi.” (Lal. 3:22, 23) Iehova ia ura ia do ita tohotohoa bona lalometau taudia dekenai hebogahisi ita hahedinaraia.

16, 17. Tanobada dikana ena dokona ia kahirakahira noho lalonai, dahaka ita karaia be namo, bona dahaka dainai?

¹⁶ Sachsenhausen dibura kamepa idia rakatania taudia 33,000 amo taunimanima tausen momo idia mase. To, Iehova ena Witnes taudia 230 amo ta ia mase lasi. Ta ta idia hagoadaia bona durua dainai, unai Mase Rakana amo idia mauri.

¹⁷ Hari, ita be “mauri ia lao henia dalana” ai ita raka noho. (Mat. 7:14) Kahirakahira, Iehova idia tomadiho henia taudia ibounai be tanobada matamatana lalonai do idia raka vareai. (2 Pet. 3:13) Unai dainai, mauri hanaihanai dalana ai ita raka noho lalonai, ta ta ita hagoadaia be gau badana.