1. (a) Taunimanima be hadibaia hereva idia kamonai neganai, edena bamona idia kara? (b) Hekokoroku tauna ena kara be edena bamona?

 TAUNIMANIMA be hadibaia herevadia idia kamonai neganai, edia kara be idauidau. Hegeregere, haida be dagi bada taudia edia hereva idia abia dae haraga, to edia mauri lagani tamona taudia o ladana maragi taudia edia hadibaia herevadia idia dadaraia. Haida be matahakani o sisiba idia abia neganai idia lalohisihisi, lalomanoka, o idia hemarai. To, ma haida be unai matahakani o sisiba ese ia hagoadadia bona edia kara idia haidaua. Dahaka dainai taunimanima edia kara be idauidau? Badina ta be idia hekokoroku. Hekokoroku tauna be ia lalomaoromaoro lasi bona sisiba ia dadaraia dainai, namo ta do ia davaria lasi.—Aon. 16:18.

2. Dahaka dainai Keristani taudia korikoridia be Baibel ena sisiba idia laloa bada?

² To, Keristani taudia korikoridia be idau, badina idia ese Baibel ena sisiba idia laloa bada. Iehova ena hadibaia herevadia amo diba bona laloparara ita abia dainai, moni bona kohu momo ura henia karana, matabodaga bona drag eiava inuinu kekero karana ita dadaraia diba. (Aon. 20:1; 2 Kor. 7:1; 1 Tes. 4:3-5; 1 Tim. 6:6-11) Danu, Dirava ena hadibaia herevadia ita badinaia neganai ita moale.—Isa. 65:14.

3. Edena dala ai Salamo torea tauna ena kara ita tohotohoa diba?

³ Iseda hetura karana eda guba Tamana ida ia goada noho totona, eda mauri lalonai iena sisiba ita badinaia noho be gau badana. Namona be salamo torea tauna ita tohotohoa, ia gwau: “Oiemu oda hereva be nega ibounai lau dogoatao noho, badina inai hereva be egu kudouna ena moale gauna.” (Sal. 119:111) Salamo torea tauna bamona, oi ura Iehova ena sisiba oi badinaia, a?  Ena be nega haida ita abia sisiba ita moalelaia lasi, to namo lasi ita lalohisihisi. Iehova ena aonega sisiba ita abidadama henidia diba! Unai ita karaia diba daladia toi mani ita herevalaia.

4. Davida be ena mauri lalonai hanaihanai dahaka ia karaia?

⁴ Ena be King Davida be ena mauri lalonai nega haida ia moale bona nega haida ia lalohisihisi, to ia be hanaihanai ena Havaraia Tauna ia abidadama henia. Ia gwau: “Egu Dirava e, oi dekenai lau abidadama henia noho.” (Sal. 25:2) Dahaka ese Davida ia durua ena guba Tamana ia abidadama henia totona?

5, 6. Davida ena guriguri amo ita itaia, ia bona Iehova edia hetura karana be edena bamona?

⁵ Momo be hekwakwanai badadia idia davaria negadia sibona ai Dirava idia guriguri henia. Idia be turadia haida bamona, moni eiava heduru idia ura negadia sibona ai, oi idia hereva henia. To, daudau lasi murinai oi laloparara, reana idia be oi idia lalokau henia momokani lasi. Davida be unai bamona lasi. Ena hetura karana Iehova ida ese ia hahedinaraia ena mauri ibounai—nega namodia bona dikadia ai—Iehova ia abidadama bona lalokau henia.—Sal. 40:8.

⁶ Davida ese Iehova ia hanamoa bona tanikiu henia dalana mani oi laloa, ia gwau: “[Iehova] e, aiemai Lohiabada, tanobada ena kahana ibounai lalonai, oiemu ladana be namo herea. Oiemu hairaina, be guba dekenai oi atoa vadaeni.” (Sal. 8:1) Oibe, Davida ena hereva ese ia hamomokania ia bona ena guba Tamana edia hetura karana be ia goada. Davida be Dirava ena siahu bona hairai bada ia laloa dainai, “dina ena hora ibounai” lalonai Iehova ia hanamoa.—Sal. 35:28.

7. Hanaihanai Iehova ita guriguri henia ena namo be dahaka?

⁷ Davida bamona eda abidadama Iehova dekenai ia goada totona, namona be hanaihanai ia ita hereva henia. Baibel ia gwau: “Dirava kahirakahira do umui lao bona ia be umui kahirakahira do ia mai.” (Iam. 4:8) Danu, guriguri amo Dirava kahirakahira ita lao be lauma helaga ita abia dalana badana ta.—1 Ioane 3:22 duahia.

8. Dahaka dainai eda guriguri lalonai hereva tamona ita gwauraia loulou lasi be namo?

⁸ Iehova oi guriguri henia neganai, hereva tamona oi gwauraia loulou, a? Bema oibe, namona be oi do guriguri lasi lalonai, nega oi atoa do oi gwauraia herevadia oi laloa totona. Bema ita be eda turana o varavara ta dekenai hereva tamona ita gwauraia loulou, iseda hereva do ia moalelaia, a? Reana do ia ura lasi iseda hereva ia kamonai, ani? Momokani, bema Iehova ena hesiai taudia be mai edia kudouna ibounai ida idia guriguri, Iehova be do ia kamonai. To, namo lasi eda guriguri lalonai hereva tamona ita gwauraia loulou.

9, 10. (a) Eda guriguri lalonai dahaka gaudia ita gwauraia diba? (b) Dahaka ese ita ia durua diba guriguri namodia ita gwauraia totona?

⁹ Bema ita ura Dirava kahirakahira ita lao, namo lasi eda guriguri lalonai anina lasi gaudia ita gwauraia. Iseda kudouna ai idia noho gaudia ibounai be Iehova dekenai ita gwauraia neganai, ita ia durua Ia kahirakahira ita lao bona ita abidadama henia. To, eda guriguri lalonai dahaka gaudia ita gwauraia be namo? Baibel ia gwau: “Gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” (Fili. 4:6) Anina be eda mauri lalonai idia vara gaudia ibounai o iseda hetura karana Dirava ida ita gurigurilaia diba.

¹⁰ Baibel ai abidadama hesiai tatau bona hahine haida edia guriguri ita duahia neganai, heduru ita abia diba. (1 Sam. 1:10, 11; Kara 4:24-31) Salamo bukana lalonai  guriguri bona ane momo idia noho, bona idia lalonai moale bona lalohisihisi herevadia idia torea. Unai guriguri ita stadilaidia karana ese ita do ia durua guriguri namodia ita gwauraia totona.

11. Dahaka dainai Baibel ena sisiba ita laloa dobu be namo?

¹¹ Davida ia gwau: “Lohiabada ena hadibaia herevadia be momokani vadaeni. Idia ese aonega lasi taudia dekenai, aonega idia henia.” (Sal. 19:7) Oibe, ena be iseda diba be bada lasi, to Dirava ena hakaua herevadia ita badinaia neganai do ita aonega. Bema ita ura eda mauri lalonai Iehova ita badinaia noho, Baibel ena sisiba haida ita laloa dobu be namo. Hegeregere, Baibel ena hakaua herevadia ita laloa dobu neganai, ita idia durua sikuli o gaukara gabudiai ita davaria hedibagani ita hanaia totona. Danu, ita ia durua Dirava ena taravatu rara bona gini siri karana dekenai ita badinaia, bona hemataurai dabua ita abidia hidi. Unai gaudia dekenai Dirava ena lalohadai ita abia dainai, hekwakwanai idia vara neganai abia hidi maorodia do ita karaia.—Aon. 15:28.

12. Edena henanadai ese ita do idia durua Dirava ena hadibaia herevadia ita badinaia totona?

¹² Dirava ena gwauhamata do idia guguru negana ita naria noho lalonai, eda mauri lalonai Dirava ena ura ita atoa guna, a? Hegeregere, ita abia dae momokani Babulonia Badana be kahirakahira do ia ore, a? Vaira negana ai do ita abia hahenamo, hegeregere paradaiso ai mauri hanaihanai do ita abia helarona ita do dogoatao noho, a? Haroro gaukara ita do goadalaia noho bona sibona eda ura gaudia ita tahua lasi, a? Toreisi lou helarona, Iehova ena ladana hahelagaia karana bona ena lohia siahuna abia isi karana ita laloa bada, a? Unai henanadai ita lalodia dobu neganai, salamo torea tauna bamona, Dirava ena ‘oda herevadia be nega ibounai do ita dogoatao noho.’—Sal. 119:111.

13. Dahaka dainai Keristani ginigunadia ese gau haida idia lalopararalaia be auka? Haheitalai ta gwauraia.

¹³ Baibel ese ia gwauraia gaudia haida be reana hari do ita lalopararalaia lasi, badina Iehova dekenai ia be nega maorona lasi edia anina ia hahedinaraia totona. Iesu be ena aposetolo taudia ia hamaoroa loulou, ia be hisihisi do ia abia bena do idia hamasea. (Mataio 12:40; 16:21 duahia.) Matamanai, aposetolo taudia be ena hereva idia lalopararalaia lasi. To, ia mase, ia toreisi lou bona idia dekenai ia hedinarai murinai, “ia ese Buka Helaga ena anina ia hadibaia idia dekenai, ela bona edia lalona idia kehoa.” (Luka 24:44-46; Kara 1:3) Danu, Iesu ena murinai idia raka taudia be Pentekoste 33 C.E. ai, lauma helaga be edia latanai ia bubua neganai, idia laloparara Dirava ena Basileia be guba ai do ia lohia.—Kara 1:6-8.

14. Ena be lagani 1900 murinai, tadikaka be gau haida idia lalopararalaia lasi, to dahaka haheitalai namona idia hahedinaraia?

¹⁴ Unai hegeregerena, lagani 1900 murinai Keristani taudia korikoridia haida be “dina gabediai” do idia vara gaudia dekenai lalohadai kereredia idia abia. (2 Tim. 3:1) Hegeregere lagani 1914 ai, haida idia laloa guba dekenai do idia daekau negana be kahirakahira. To unai ia vara lasi neganai, tadikaka be Baibel idia tahua namonamo bena idia laloparara, sivarai namona harorolaia gaukarana idia karaia guna be namo. (Mar. 13:10) Unai dainai, lagani 1922 ai tadikaka J. F. Rutherford, haroro gaukara ia gunalaia tauna, ese Cedar Point, Ohio, U.S.A. ai idia karaia intanesinol hebouhebou dekenai helai taudia ia hamaoroa: “Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro, Pavapava bona iena basileia umui harorolaia.” Unai nega amo, “Basileia ena sivarai namona” harorolaia gaukarana be  Iehova ena hesiai taudia edia maka badana ai ia lao.—Mat. 4:23; 24:14.

15. Dirava ese ena taunimanima ia kara henia dalana ita laloa dobu neganai, edena dala ai unai ese ita ia durua?

¹⁵ Iehova ese idaunegai bona hari, ena taunimanima dekenai ia karaia gwauhamatadia ia hagugurudia dalana ita laloa dobu be namo. Unai ese ita do ia durua ita abia dae momokani vaira negana ai, Iehova be ena ura do ia hagugurua. Dirava ena hadibaia herevadia ese ita idia durua, eda lalona bona kudouna ai iena peroveta herevadia do idia guguru daladia ita laloa totona. Unai bamona ita karaia neganai, iena gwauhamata ita abidadama henidia.

16. Mai kudouna ibounai ida Dirava ita hesiai henia neganai, dahaka hahenamo do ita abia?

¹⁶ Iseda Dirava Iehova be siahu bada bona gaukara Diravana. Salamo torea tauna ia gwau: “Iehova e, daika ena siahu be oiemu siahu hegeregerena?” Ma ia gwau: “Oiemu imana be mai ena goada, bona oiemu imana idibana be atai momokani.” (Sal. 89:8, 13, NW) Unai dainai, Basileia totona ita gaukara goada neganai, Iehova be unai ia laloa bada bona eda hekwarahi ia hanamoa. Ia itaia ena hesiai taudia—tatau o hahine, matamata o buruka—be idia lahedo lasi, to ‘nega ibounai idia gaukara noho.’ (Aon. 31:27) Iseda Havaraia Tauna bamona, ita danu be tiokratik gaukaradia dekenai ita bisi noho. Mai kudouna ibounai ida Dirava ita hesiai henia neganai, ita moale bona Iehova ia moale danu.—Salamo 62:12 duahia.

17, 18. Edena dala ai Iehova badinaia karana ese ita do ia durua ita abidadama henia totona? Haheitalai gwauraia.

¹⁷ Edena dala ai Iehova badinaia karana ese ita do ia durua ia ita abidadama  henia totona? Israela taudia be kahirakahira Gwauhamata Tanona ai idia vareai sivaraina mani oi laloa. Iehova ese Taravatu Mauana idia huaia hahelaga taudia ia hamaoroa, Ioridane Sinavai lalonai do idia gini. To, taunimanima be sinavai kahirakahira idia lao neganai, idia itaia medu bada ia diho dainai sinavai be ia abata. Israela taudia be dahaka do idia karaia? Sinavai badinai do idia kamepa bona wiki haida do idia naria ela bona sinavai ia kaukau, a? Lasi, idia ese Iehova idia abidadama henia bona ena hadibaia herevadia idia badinaia. Bena dahaka ia vara? Baibel ia gwau: “To hahelagaia taudia ese edia aena be sinavai ena ranu dekenai idia atoa neganai, sinavai ena heau ia doko momokani. . . . Bona Israela taudia ibounai be tano kaukau dekenai idia raka hanaia neganai, hahelagaia taudia, Lohiabada ena Taravatu Maua idia huaia noho taudia, be tano kaukau dekenai idia gini, Ioridane Sinavai ena huana dekenai.” (Ios. 3:12-17) Israela taudia idia itaia unai abata ia ore bona tano ia kaukau neganai, idia moale bada! Momokani, Israela taudia be Iehova ena hadibaia herevadia idia badinaia dainai, edia abidadama ia goada.

¹⁸ Momokani hari, Iehova be ena taunimanima totona unai bamona hoa karadia ia karaia lasi, to ia idia badinaia dainai ia hanamodia. Dirava ena lauma helaga ese goada ia henidia, unai amo tanobada hegegemadai Basileia sivaraina idia harorolaia diba. Bona Iesu, Iehova ena Witnes tauna badana, ese ena hahediba taudia ia gwauhamata henidia unai gaukara lalonai idia do ia durua. Ia gwau: “Umui lao, bese ibounai taudia be hahediba taudia ai umui halaoa, . . . lau be dina iboudiai umui ida do lau noho ela bona inai nega oromana ena dokona.” (Mat. 28:19, 20) Iehova ena Witnes taudia haida be hemarai o gari taudia, to idia gwau lauma helaga ena heduru dainai, haroro gaukara ai taunimanima idauidau idia hereva henia diba.—Salamo 119:46; 2 Korinto 4:7 duahia.

19. Ena be ita gorere o buruka dainai ita haroro momo lasi, to dahaka ita laloatao be namo?

¹⁹ Tadikaka bona taihu haida be idia gorere o buruka dainai, idia haroro momo lasi. To, namona be idia diba, Iehova, “hebogahisi Tamana bona lalogoada ibounai ia henia Diravana,” ese edia noho dalana ia lalopararalaia. (2 Kor. 1:3) Ia ese Basileia durua totona ita karaia gaukara ibounai ia laloa bada. Namona be ita ibounai ita laloatao hahemauri ita abia totona, Keriso ena mauri davalaia boubouna ita abidadama henia be mai anina bada.—Heb. 10:39.

20, 21. Edena dala idauidau ai Iehova ita abidadama henia diba?

²⁰ Iehova tomadiho henia totona, eda hesiai gaukarana lalonai eda nega, goada bona kohu, ita gaukaralaia diba. Oibe, mai iseda kudouna ibounai ida ita ura ‘evanelia tauna ena gaukara ita karaia.’ (2 Tim. 4:5) Mai moale ida unai ita karaia, badina ma haida ita durua “hereva momokani ena diba maoromaoro do idia abia.” (1 Tim. 2:4) Iehova ita matauraia bona hanamoa karana ese iseda abidadama ia hagoadaia. (Aon. 10:22) Oibe, unai ese ita ia hagoadaia, herevana dahaka ia vara to iseda havaraia tauna do ita abidadama henia noho.—Roma 8:35-39.

²¹ Ita herevalaia vadaeni bamona, Iehova ita abidadama henia bona ena hakaua hereva namodia ita abia dae totona, gau haida ita karaia be namo. Namona be guriguri amo eda abidadama ita hagoadaia. Danu, Iehova ese idaunegai ena ura ia hagugurua bona vaira negana ai do ia hagugurua daladia ita laloa dobu. Bona tomadiho karadia amo eda abidadama ita hagoadaia. Oibe, Iehova ena hadibaia herevadia be do idia noho ela bona hanaihanai. Unai dainai bema ita badinadia, ita danu be do ita mauri hanaihanai!