1, 2. Oi be abia hidi karaia karana oi manadalaia, a? Oi karaia vadaeni abia hidi haida dekenai dahaka oi laloa?

 DINA ta ta ita be abia hidi momo ita karaia. Abia hidi karaia karana dekenai dahaka oi laloa? Taunimanima haida idia ura idia sibona ese abia hidi do idia karaia. Idia ura lasi ma haida ese idia totona abia hidi idia karaia. To, haida be idia daradara dainai, mai anina bada abia hidi idia karaia lasi. Haida be buka haida idia duahia, eiava moni bada idia negea sisiba idia henia taudia amo heduru idia abia totona.

² Ita momo ita diba, ena be gau haida dekenai ita be maoro lasi abia hidi ita karaia totona, to ita sibona eda mauri lalonai abia hidi ita karaia diba. (Gal. 6:5) Bona ita laloparara nega haida ita karaia abia hidi be kerere, bona namo idia havaraia lasi.

3. Abia hidi ita karaia totona, edena hakaua herevadia ita badinaia be namo? Dahaka dainai nega haida abia hidi ita karaia be mai ena hekwarahi?

³ Ita, Iehova ena hesiai taudia ita moale, badina ena hakaua herevadia ese ita idia durua eda mauri lalonai mai anina bada abia hidi maorodia ita karaia totona. Ita diba bema unai hakaua herevadia ita badinaia, eda abia hidi ese Iehova do idia hamoalea bona namo do ita davaria. To, Baibel be ita davaria hekwakwanai maragimaragidia ibounai ita hamaoromaoroa daladia ia herevalaia lasi. Bema unai bamona hekwakwanai ta ia vara, dahaka do ita karaia? Hegeregere, Baibel ia gwau ita henaohenao lasi be namo. (Efe. 4:28) To haida idia gwau, bema ta be ia dabu dainai ma ta ena kohu ia abia bona unai be dava bada gauna lasi, unai be kerere lasi. Vadaeni, edena dala ai abia hidi do ita karaia, bema haida idia gwau unai hekwakwanai dekenai Baibel be hakaua herevana ta ia henia lasi? Dahaka ese ita do ia durua?

4. Abia hidi ta ita ura karaia neganai, haida be dahaka sisiba do idia henia?

⁴ Bema tadikaka o taihu ta ita hamaoroa ita be mai anina bada abia hidi ta do ita karaia, reana ita do ia hamaoroa ita laloa maoromaoro guna be namo. Unai be sisiba namona, ani? Baibel ese ita ia hagoadaia abia hidi do ita karaia haraga lasi. Ia gwau: “Laloa haraga taudia be do idia ogogami.” (Aon. 21:5) To, laloa maoromaoro karana ena anina be dahaka? Ena anina be nega do ita atoa ita ura karaia gauna ita laloa namonamo, gabeai abia hidi ita karaia, a? Momokani, unai ese ita do idia durua abia hidi maorodia ita karaia totona, to unai sibona be hegeregere lasi. Gau ma haida ita karaia danu be namo.—Roma 12:3; 1 Pet. 4:7.

5. Dahaka dainai laloa maoromaoro karana ita hahedinaraia be auka?

⁵ Ita ibounai be goevadae lasi taudia dainai, laloa maoromaoro karana ita hahedinaraia be auka. (Sal. 51:5; Roma 3:23) Ma danu, guna ita momo eda lalohadai be Satani ese ia “hadiburaia” dainai, Iehova bona ena kara maoromaoro taravatudia ita diba lasi. (2 Kor. 4:4; Tito 3:3) Unai dainai, ena be ita ese nega daudau lalonai gau ta ita laloa, to bema ita be sibona eda lalohadai dekenai ita tabekau, abia hidi kererena ita karaia diba.—Aon. 14:12.

6. Dahaka ese ita do ia durua laloa maoromaoro karana ita hahedinaraia totona?

⁶ Ena be iseda tauanina bona lalohadai be idia goevadae lasi, to Iehova, iseda guba Tamana, be gau ibounai dekenai ia goevadae. (Deu. 32:4) Ita moale badina ia ese dala ia kehoa, eda lalohadai ita haidaua bona laloa maoromaoro karana ita hahedinaraia totona. (2 Timoteo 1:7 duahia.) Ita Keristani taudia ese mai aonega ida eda lalohadai bona kara ita biagua be namo. Unai dainai, namona be eda lalona ita biagua, bona Iehova ena lalohadai, hemami bona kara ita tohotohoa.

7, 8. Ena be hahetoho ita davaria, to abia hidi maorona ita karaia diba, a? Sivarai ta gwauraia.

⁷ Mani inai haheitalai oi laloa. Moni gaukara totona tano ma ta dekenai idia lao tama sina momo ese idia havaraia beibi matamata, be edia hanua dekenai idia siaia varavara ese idia naria totona. Unai amo idia be moni gaukara idia karaia noho, bona moni momo idia haboua diba. a Tano ma ta ai ia noho hahine ta be beibi mero ta ia havaraia. Unai nega ai, ia be Baibel stadi ia matamaia bona ia goada ia lao. Turadia bona varavara taudia ese ia bona ena adavana idia doria beibi be hanua dekenai do idia siaia, adavana ena tama sina ese idia naria totona. To, unai hahine be ena Baibel stadi amo ia laloparara, Dirava ese ia bona ena adavana dekenai maduna ia henia edia natuna idia naria totona. (Sal. 127:3; Efe. 6:4) Ia be momo idia karaia bamona, ena natuna be hanua dekenai do ia siaia, a? Eiava, ia ese Baibel ena hadibaia herevadia do ia badinaia, ena be unai bamona ia karaia neganai ena pei do ia maragi bona haida ese do idia kirikirilaia? Bema unai be oi, dahaka do oi karaia?

⁸ Unai hahine matamata be ia lalohekwarahi dainai, Iehova ena heduru totona ia guriguri. Ia ia stadi henia taihu bona kongrigeisen taudia ida ia herevahereva murinai, Iehova ena lalohadai ia lalopararalaia. Danu, ia laloparara bema ena beibi be idia amo ia daudau, unai ese ena tubu dalana ia hadikaia diba. Baibel ena hereva ia tahua murinai, ia laloparara ena beibi ia siaia be abia hidi kererena. Danu, ena adavana ia itaia kongrigeisen taudia ese ia idia durua bona edia beibi be ia tubu namonamo. Unai  dainai, stadi ia abia dae bona ena adavana ida hebou ia lao matamaia.

9, 10. Laloa maoromaoro karana ena anina be dahaka, bona edena dala ai unai ita hahedinaraia diba?

⁹ Unai haheitalai ese ia hahedinaraia, laloa maoromaoro karana ena anina be ita sibona o ma haida edia lalohadai ita badinaia sibona lasi, to gau ma haida ita karaia be namo. Iseda goevadae lasi lalona bona kudouna be dina gauna (watch) bamona, ia heau haraga eiava ia heau metairametaira diba. Bema unai dina gauna ita badinaia sibona, hekwakwanai ita davaria diba. (Ier. 17:9) Unai dainai, Iehova ena taravatu ese eda laloa dalana bona hemami idia biagua be namo.—Isaia 55:8, 9 duahia.

¹⁰ Baibel lalonai inai aonega sisibana ita davaria diba: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aon. 3:5, 6) Unai siri ia gwau, “oi sibona oiemu diba do oi abidadama henia lasi,” bona ma ia gwau, “[Iehova] do oi laloa.” Oibe, Iehova sibona be laloa maoromaoro tauna. Unai dainai, abia hidi ita ura karaia neganai, Baibel amo iena lalohadai ita tahua be gau badana. Bena Baibel ena hereva hegeregerena, iseda abia hidi do ita karaia. Bema ita ura ita laloa maoromaoro, namona be Iehova ena laloa dalana ita tohotohoa.

11. Ta be abia hidi maorodia ia karaia totona, dahaka ia karaia be namo?

¹¹ Abia hidi maorona karaia bona badinaia dalana ita dibaia be mai ena hekwarahi. Stadi matamata o vanegai sibona idia bapatiso taudia dekenai unai be momokani. Baibel ia gwau idia be “natuna maragidia” bamona, to idia goada idia lao diba. Natu maragina ese raka dalana ia dibaia matamaia dalana mani ita laloa. Ia be metairametaira ia raka ela bona ia manada. Stadi matamata o vanegai sibona ia bapatiso tauna ia ura abia hidi ia karaia be unai bamona danu. Aposetolo Paulo ese “taunimanima badadia” be inai bamona ia gwauraia, “idia ese edia darana idia gaukaralaia karana amo, sibodia idia hadibaia, unai amo maoro bona kerere edia idau idia  dibaia diba.” Unai siri dekenai inai hereva, “gaukaralaia” bona “hadibaia” ena anina be, stadi matamata o vanegai sibona ia bapatiso tauna be hanaihanai do ia hekwarahi abia hidi maorodia karaia dalana ia dibaia totona.—Heberu 5:13, 14 duahia.

12. Edena dala ai abia hidi maorodia karaia dalana ita dibaia diba?

¹² Matamanai ita herevalaia bamona, dina ta ta ai ita be abia hidi momo, badadia o maragidia, ita karaia. Tahua gaukara ta ese ia hahedinaraia, iseda abia hidi 40 pesen bamona be ita laloa namonamo lasi, to ita karaia sibona. Hegeregere, daba ta ta ai abia hidi oi karaia, edena bamona dabua do oi hahedokilaia. Reana do oi laloa unai be gau maragina sibona bona oi haraga dainai, oi laloa namonamo lasi bona abia hidi oi karaia. To, namona be oi abia hidi dabua do oi laloa namonamo, badina unai ese do ia hahedinaraia oi be Iehova ena hesiai tauna o lasi. (2 Kor. 6:3, 4) Dabua ta oi hoia gwauraia neganai, reana oi be sitaelo matamata dabua oi tahua. To, namona be inai oi laloa: Inai be hemataurai dabua, a? Iena davana be bada, a? Unai bamona ita karaia amo eda darana ita hadibaia, bona unai ese ita do ia durua mai anina bada gaudia dekenai abia hidi maorodia ita karaia totona.—Luka 16:10; 1 Kor. 10:31.

13. Dahaka ese ita do ia durua, ita karaia abia hidi be mai iseda ura ibounai ita badinaia totona?

¹³ Ena be abia hidi maorodia ita karaia, to ita badinaia be mai ena hekwarahi. Hegeregere, haida idia ura kuku ania karana idia hadokoa, to idia kwalimu lasi badina edia lalona ia goada lasi unai idia karaia totona. Namona be ita karaia abia hidi be mai iseda ura ibounai ida ita badinaia. Haida idia gwau iseda ura ena goada be eda tauanina ena masolo bamona. Bema ita eksasais o gaukaralaia momo, iseda masolo be do ia goada ia lao, to bema lasi, ena goada do ia ore. Dahaka ese ita do ia durua ita karaia abia hidi be mai iseda ura ibounai ida ita badinaia totona? Namona be Iehova dekenai ita tabekau.—Filipi 2:13 duahia.

14. Dahaka dainai Paulo be mai goada ida kara namo ia karaia?

¹⁴ Paulo ia mamia ia karaia abia hidi ia badinaia be mai ena hekwarahi. Ia gwau: “Kara namo karaia urana be lau lalonai ia noho, to lau hegeregere lasi unai lau karaia totona.” Ia diba dahaka ia karaia be namo, to nega haida unai ia karaia totona be auka. Ia gwau: “Lauegu kudouna ai Dirava ena taravatu lau moalelaia momokani. To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatuna ia tuari henia, bona inai kara dika ena taravatu ese igui hesiai tauna bamona lau ia hakaua.” Ia be dala lasi, a? Lasi, durua tauna ta ia noho. Ia gwau: “Iesu Keriso, iseda Lohiabada amo Dirava lau tanikiu henia!” (Roma 7:18, 22-25) Danu ia gwau: “Lau dekenai siahu ia henia tauna amo goada lau abia gau ibounai lau karaia totona.”—Fili. 4:13.

15. Dahaka dainai abia hidi maorona ita karaia bona badinaia be gau badana?

¹⁵ Oibe, Dirava ita hamoalea totona, abia hidi maorona ita karaia bona ita badinaia be gau badana. Elia ese Karamele Ororona dekenai Bala idia tomadiho henia taudia bona aposteit Israela taudia dekenai ia gwauraia herevana mani ita laloa. Ia gwau: “Laloa rua ena dala dekenai do umui noho, ela bona edena negai? Bema Lohiabada be Dirava, ia dekenai do umui tomadiho, to bema Bala be Dirava, ia dekenai do umui tomadiho.” (1 Kin. 18:21) Israela taudia idia diba dahaka do idia karaia, to idia be “lalorua” dekenai idia noho. To Iosua be idau. Lagani haida gunanai ia ese Israela taudia ia hamaoroa: “Bema Lohiabada ena  hesiai gaukara dekenai umui daradara neganai, hari dina do umui abia hidi be namo. Edena dirava ena hesiai gaukara do umui karaia? . . . To lau, bona lauegu famili taudia, ai ese Lohiabada sibona ena hesiai gaukara do ai karaia.” (Ios. 24:15) Iosua bona ia idia badinaia taudia be dahaka hahenamo idia abia? Idia ibounai be Gwauhamata Tanona, “rata bona [hani] dekenai ia honu tanona,” ai idia vareai.—Ios. 5:6, BHḡ.

16, 17. Dahaka namo ita abia diba bema Dirava ena ura hegeregerena abia hidi ita karaia? Sivarai ta gwauraia.

¹⁶ Mani, bapatiso matamata tadikaka ta ena sivarai ita laloa. Ia bona ena adavana edia natudia be toi. Nega ta, ena gaukara turana ta ese ia hamaoroa kampani ma ta dekenai do idia gaukara. Badina unai kampani ena pei be bada bona gau namodia momo ia henia danu. Tadikaka be unai ia laloa bona ia gurigurilaia. Ena be ia karaia gaukara dekenai pei bada ia abia lasi, to unai gaukara ia abia hidi badina nega ia noho wikeni ai ena famili ida hebou idia lao bona idia haroro hebou totona. Danu, ia laloa bema moni gaukara matamata ia abia, reana unai bamona sediual do idia badinaia lasi. Bema unai be oi, dahaka do oi karaia?

¹⁷ Tadikaka ese iena hetura karana Iehova ida ia laloa bada dainai, unai gaukara matamata ia abia hidi lasi. Oi laloa unai abia hidi dainai gabeai ia lalohisihisi, a? Lasi. Tadikaka ia laloa ia bona ena famili be Iehova kahirakahira idia noho karana ese pei badana ia hereaia. Unai tadikaka bona ena adavana idia moale badina edia natuna kekeni—ena mauri lagani be ten—ia gwau, ia ese iena tama sina, tadikaka taihu bona Iehova ia lalokau henidia bada, bona ia ura Iehova dekenai ena mauri ia gwauhamatalaia bona bapatiso ia abia. Unai kekeni ia itaia ena tamana be ena mauri lalonai Iehova tomadiho henia karana ia atoa guna, bona unai ese ia ia durua!

18. Dahaka dainai dina ta ta ai abia hidi maorodia ita karaia be namo?

¹⁸ Mose Badana, Iesu Keriso ese lagani momo lalonai, Satani ena tanobada ai, Iehova idia tomadiho henia taudia ia hakaua noho. Iosua Badana, Iesu be ia hegaegae vadaeni, inai tanobada dikana do ia haorea totona, bona ia murinai idia raka taudia be kara maoromaoro tanobada matamatana lalonai do ia hakaudia vareai. (2 Pet. 3:13) Unai dainai, hari be nega namona Iehova ena ura ita dekenai ita lalopararalaia totona. Namo lasi iseda kara, lalohadai, ura bona tahua gaudia gunadia dekenai ita giroa lou. (Roma 12:2; 2 Kor. 13:5) Namona be dina ta ta ai ita karaia abia hidi ese idia hahedinaraia ita be hegeregere, Dirava amo noho hanaihanai hahenamo ita abia totona.—Heberu 10:38, 39 duahia.