Oi abia dae Iesu be hahediba tauna hereadaena, ani? Reana oi ese Iesu ena hahediba daladia haida hegeregere, henanadai bona haheitalai gaukaralaia dalana oi tohotohoa vadaeni. To, nega haida Iesu ese gau ta ia herevalaia neganai, ma gau ta ida ia hahegeregerea bona ena idau ia hahedinaraia danu.

Vaia, momo be gau ta idia herevalaia neganai, ma gau ta ida idia hahegeregerea bena ena idau idia hahedinaraia. Reana oi danu be unai bamona oi karaia momo. Hegeregere do oi gwau, “Idia gwau biku ibounai be idia mage; to inai be idia do kasiri.” Eiava, “Guna ia be hemarai kekeni maragina, to hari ia hereva momo.”

Nega momo oi gwauraia herevana ta ena idau oi hahedinaraia totona, inai hereva, “to” oi gaukaralaia. Reana gau ma haida do oi herevalaia danu, oi gwauraia gauna ena anina ia hedinarai bona kamonai taudia ese idia lalopararalaia.

Gado haida ai, gau ta be ma ta ida idia hahegeregerea lasi bona ena idau idia hahedinaraia lasi. To, gau ta ena idau ita hahedinaraia be mai anina bada. Dahaka dainai? Badina Baibel lalonai unai bamona herevahereva daladia idia gaukaralaia momo. Iesu ese unai ia karaia momo, hegeregere ia gwau: “Taunimanima ese lamepa idia gabua neganai, bosea amo idia koua lasi, to lamepa ena atoa gauna dekenai idia atoa.” “Taravatu . . . edia hereva hadikaia totona lau mai, lasi, to hagugurua totona lau mai.” “Umui kamonai vadaeni idaunegai idia gwau: ‘Oi heudahanai lasi.’ To umui lau hamaoroa, bema tau ta be hahine ta ia raraia . . . ” “Umui kamonai vadaeni idaunegai idia gwau: ‘Matana ena davana be matana bona isena ena davana be isena.’ To umui lau hamaoroa, kara dika tauna umui inai henia lasi. Bema ta ese emu vairana idibana ia pataia, laurina danu oi henia.”​—⁠Mat. 5:15, 17, 27, 28, 38, 39.

Baibel siri ma haida ai unai dala idia gaukaralaia danu. Oi idia durua diba hereva ta oi lalopararalaia, eiava gau ta karaia namonamo dalana idia hahedinaraia. Bema oi be tama ta, mani inai hereva oi laloa: “Tamadia e, emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.” (Efe. 6:4) Bema Aposetolo Paulo ia gwau sibona, tama (sina) be Dirava ena matahakani amo natuna ia hadibaia, unai be aonega herevana bona ia momokani. To, unai hereva ena anina ia hedinarai namonamo totona, Paulo ia gwau, ‘natudia umui habadua lasi, to idia tubu noho lalonai, Iehova ena matahakani bona sisiba amo idia umui hadibaia.’

Gabeai, Paulo ma ia gwau: “Ita be taunimanima ida ita heatu lasi, to . . . guba ai idia noho lauma dikadia ida ita heatu noho.” (Efe. 6:12) Unai siri idia torea dalana amo ita laloparara ita be heatu badana lalonai ita noho, badina ita be taunimanima ida ita heatu lasi, to lauma dikadia ida ita heatu.

Efeso bukana lalonai, Paulo be nega momo gau ta ia herevalaia neganai, ma gau ta ida ia hahegeregerea bena ena idau ia hahedinaraia. Unai ese ita ia durua Paulo ena hereva ita lalopararalaia, bona do ita diba dahaka do ita karaia.

Rau 4 bona 5 ai, Paulo ese Efeso karoa 4 bona 5 lalonai gau ta be ma gau ta ida ia hahegeregerea, bona ena idau ia hahedinaraia siridia oi duahia bona moalelaia diba. Unai siri ta ta oi duahia neganai, namona be emu mauri oi laloa. Sibona oi nanadaia: ‘Egu lalohadai korikorina be dahaka? Unai ia vara neganai, dahaka do lau karaia? Unai siri hegeregerena, ma haida ese lau idia itaia neganai, idia laloa lau be edena bamona tauna?’ Bema oi itaia siri ta ese emu kara ia herevalaia, bona oi hamaoromaoroa be namo, vadaeni unai oi karaia be namo. Namona be unai siri ese oi ia durua emu kara oi hanamoa totona.

Reana unai maua be emu ruma bese ena tomadiho lalonai oi gaukaralaia diba. Namona be famili ibounai ese unai siri idia duahia guna. Bena ta ese siri ena kahana ginigunana ia duahia, bona ma haida be ena kahana iharuana idia laloatao toho bona idia gwauraia. Unai murinai, siri ena kahana iharuana umui badinaia diba daladia umui herevalaia. Momokani, kara ta be ma kara ta ida ia hahegeregerea bona ena idau ia hahedinaraia siridia umui herevalaia neganai, unai ese matamata bona buruka taudia ia durua famili lalonai bona gabu ma haida ai Keristani kara namodia idia hahedinaraia.

Kara ta be ma kara ta ida ia hahegeregerea bona ena idau ia hahedinaraia siridia oi diba namonamo neganai, Baibel lalonai do oi davaridia haraga bona haroro gaukara ai oi gaukaralaia diba. Reana ruma tauna dekenai do oi gwau: “Momo idia gwau, taunimanima ta ta be mai edia mase diba lasi soulina, to mani ita itaia Baibel be dahaka ia gwau.” Eiava Baibel stadi oi karaia neganai, stiuden tauna oi nanadaia: “Inai gabu ai momo idia laloa Dirava bona Iesu be tau tamona; to Baibel be dahaka ia gwau? Bona oi be edena hereva oi abia dae?”

Oibe, Baibel lalonai siri momo ese kara ta be ma kara ta ida idia hahegeregerea bona ena idau idia hahedinaraia. Unai ese ita ia durua Dirava ena dala ai ita raka bona unai bamona siri ita gaukaralaia diba haida ita durua, Baibel ena hereva momokani idia diba totona.