1. Nega momo kongrigeisen heboudia ai dahaka gaudia ita stadilaia? Bona edena dala ai unai ese ita ia durua?

 GIMA KOHORONA stadi totona oi hegaegae neganai, reana oi sibona dekenai inai bamona oi hereva, “Guna inai ai stadilaia vadaeni.” Bema oi be nega daudau lalonai, Iehova ena Witnes taudia edia kongrigeisen heboudia dekenai oi lao, reana oi itaia gau haida be idia herevalaia loulou. Nega momo ita be Dirava ena Basileia, Iesu ena mauri davalaia boubouna, haroro gaukara, bona kara namodia hegeregere lalokau bona abidadama ita stadilaia. Unai gaudia ita stadilaia hanaihanai karana ese ita ia durua, Dirava ena hadibaia herevadia ita badinadia totona.—Iam. 1:22.

2. (a) Dirava ena hadibaia hereva be dahaka? (b) Edena dala ai Dirava ena hadibaia hereva be taunimanima edia amo ia idau?

² Heberu gado herevana idia hahanaia “hadibaia hereva” be Dirava ese ena taunimanima dekenai ia henia taravatu, oda herevadia, bona hahegani ia herevalaia. Taunimanima edia taravatu be hanaihanai idia haidaua, to Dirava ena taravatu o oda herevadia be ia haidaua diba lasi bona ita abidadama henia diba. Momokani, guna Dirava ese Israela taudia dekenai ia henia taravatu haida be hari ita badinaia lasi. To, namo lasi ita laloa unai taravatu be kerere dainai, ita badinaia lasi. Badina Salamo torea tauna ia gwau: “Oiemu hadibaia hereva be nega ibounai idia maoromaoro.”—Sal. 119:144.

3, 4. (a) Iehova ena hadibaia herevadia ese dahaka idia hahedinaraia danu? (b) Israela taudia be unai oda herevadia idia badinaia neganai, dahaka namo do idia davaria?

³ Reana oi itaia nega haida Iehova ena hadibaia hereva ese idia hahedinaraia gau dikana ta do ia vara. Israela besena be hanaihanai Dirava ena peroveta taudia amo hadibaia herevadia idia abia. Hegeregere, Gwauhamata Tanona  dekenai idia vareai gwauraia neganai, Mose ese idia ia hadibaia, ia gwau: “Do umui naria namonamo, haida ese umui do idia hakaua kerere, idau dirava dekenai do umui tomadiho henia garina, bona idau dirava edia hesiai gaukara do umui karaia garina. Bema unai bamona umui karaia neganai, Lohiabada ena badu umui dekenai do ia vara.” (Deu. 11:16, 17) Baibel ese ia hahedinaraia Dirava be ena taunimanima ia durua totona, hadibaia herevadia momo ia gwauraia.

⁴ Danu, nega momo Iehova ese Israela taudia ia oda henidia ia idia gari henia, kamonai henia bona ena ladana idia hahelagaia totona. (Deu. 4:29-31; 5:28, 29) Bema unai oda herevadia idia badinaia, hahenamo momo do idia davaria.—Lev. 26:3-6; Deu. 28:1-4.

5. Dahaka dainai Dirava be King Hesekaia totona ia tuari?

⁵ Israela taudia be hekwakwanai idia davaria neganai, Dirava ese ena gwauhamata ia hagugurua. Hegeregere, Asuria ena King Senakeriba be Iuda ia tuari henia bona ia ura King Hesekaia ia alaia neganai, Iehova ese aneru ta ia siaia idia ia durua totona. Hanuaboi tamona lalonai, aneru ese Asuria tuari taudia 185,000 ia alaia mase, bona Senakeriba be mai hemarai ida ia giroa lou. (2 Siv. 32:21; 2 Kin. 19:35) Dahaka dainai Dirava be King Hesekaia totona ia tuari? Baibel ia gwau: “Badina be Hesekaia ese Lohiabada ia badinaia namonamo, bona Lohiabada . . . amo ia raka siri lasi momokani. Hesekaia ese Lohiabada ena Taravatu ibounai . . . ia badinaia namonamo.”—2 Kin. 18:1, 5, 6.

6. Edena dala ai King Iosaia be Iehova ia abidadama henia?

⁶ Iehova ena oda herevadia ia badinaia tauna ma ta be King Iosaia. Iena mauri lagani be eit neganai, “ia be Iehova vairanai ia kara maoromaoro . . . ia raka siri lasi, idibana kahana ai eiava lauri kahana ai.” (2 Siv. 34:1, 2, BHḡ) Iosaia ese Iuda tanona ai idia noho kaivakuku ibounai ia hadikaia ore, bona tomadiho momokani ia haginia lou. Unai kara amo ia hahedinaraia ia be Iehova ia abidadama henia. Ena karaia dainai, ia bona Iuda besena ibounai be hahenamo idia abia.—2 Sivarai 34:31-33 duahia.

7. Israela taudia be Iehova ena hadibaia hereva idia badinadia lasi neganai, dahaka ia vara?

⁷ To madi, Dirava ena taunimanima be hanaihanai iena hadibaia herevadia idia abidadama henia lasi. Lagani handred momo lalodiai Iehova ena taravatu idia badinaia lasi. Edia abidadama ia manoka neganai, ma haida ese idia veridia dirava koikoidia idia tomadiho henia totona.  (Efe. 4:13, 14) Bona Dirava ena hadibaia hereva idia abidadama henidia lasi neganai, hisihisi idia davaria.—Lev. 26:23-25; Ier. 5:23-25.

8. Israela taudia edia haheitalai ese edena dala ai ita ia durua?

⁸ Israela taudia edia haheitalai ese edena dala ai ita ia durua? Hari, Dirava ena hesiai taudia danu be sisiba bona matahakani idia abia. (2 Pet. 1:12) Hanaihanai Baibel ita duahia amo Dirava ena taravatu ita dibaia. Dirava ese ita dekenai ura kwalimu ia henia dainai, abia hidi ita karaia diba ena taravatu do ita badinadia o lasi. (Aon. 14:12) Iehova ena hadibaia herevadia ita abidadama henia, bona ita badinadia ena namo mani ita herevalaia.

9. Tano gagaena ai, edena dala ai Iehova ia hahedinaraia ia ese Israela taudia ia naridia bona ia hakaudia?

⁹ Israela taudia be lagani 40 lalonai “taunimanima idia noho lasi tano dikana bona mai garina” ai idia loaloa neganai, Iehova ese idia do ia hakaua, naria, bona gimaia daladia ibounai ia gwauraia hedinarai lasi. To idia ia hadibaia loulou, ia idia abidadama henia bona ena hadibaia herevadia idia badinaia diba. Tano gagaena ai, Iehova ese dina ai ori ia gaukaralaia bona hanuaboi ai lahi ia gaukaralaia, unai amo ia hahedinaraia ia ese Israela taudia ia naridia bona ia hakaudia. (Deu. 1:19; Eso. 40:36-38) Danu, ia ese edia mauri durua gaudia ia henia. Baibel ia gwau: “Edia dabua danu idia dika lasi, bona edia aena be idia gudu lasi.” Oibe, “edia aniani bona gau be hegeregere.”—Neh. 9:19-21.

10. Hari, Iehova be edena dala ai ena taunimanima ia hakaua noho?

¹⁰ Dirava ena hesiai taudia be kahirakahira kara maoromaoro tanobada matamatana lalonai do idia vareai. To, ita abia dae momokani Iehova ese ita do ia durua “hisihisi badana” amo ita roho mauri totona, a? (Mat. 24:21, 22; Sal. 119:40, 41) Momokani, hari Iehova be ori o lahi ia gaukaralaia lasi tanobada matamatana ai ita ia hakaua vareai totona. To, ia ese iena orea ia gaukaralaia ita do ia durua ita gima noho totona. Hegeregere, eda hetura karana Iehova ida ia goada totona, iena orea ese nega ibounai ita ia hagoadaia Baibel duahiduahi bona Ruma Bese ena Tomadiho ita karaia, bona hebou bona haroro do ita lao hanaihanai. Eda mauri dalana ita haidaua vadaeni, unai gaudia ita karaia totona, a? Unai ita karaia neganai, eda abidadama do ia goada bona do ita hegeregere tanobada matamatana lalonai ita vareai totona.

11. Edena dala idauidau ese idia hamomokania Iehova be iseda namo ia laloa bada?

¹¹ Danu, Dirava ena orea amo idia mai hadibaia herevadia ese ita idia durua, eda mauri lalonai abia hidi maorodia ita karaia totona. Hegeregere, ita idia hagoadaia lalohadai maorona ita abia bona kohu momo lasi maurina ita noholaia, unai amo gau momo do ita lalohekwarahilaia lasi. Danu, ita idia hadibaia dabua maorodia do ita hahedokilaia, moale karadia namodia do ita abia hidi, bona edukeisen dekenai abia hidi maorona do ita karaia. Ma danu, ita idia hadibaia eda ruma, motuka bona Kingdom Hall do ita naria namonamo, bona disasta negadiai dahaka do ita karaia. Unai ibounai ese idia hamomokania Iehova be iseda namo ia laloa bada.

12. (a) Iesu be ena hahediba taudia dekenai dahaka ia hadibaia loulou? (b) Iesu be dahaka ia karaia bona Petero ese ia laloaboio lasi? Iesu ena kara amo dahaka ita dibaia?

¹² Keristani ginigunadia be hanaihanai Dirava amo hadibaia herevadia idia abia. Iesu be ena hahediba taudia ia hadibaia loulou, manau karana idia hahedinaraia totona. Ia ese manau karana ia herevalaia sibona lasi, to ena kara amo ia hahedinaraia danu. Ena hanuaboi ginigabena ai, Pasova ariana totona ena aposetolo taudia ia haboua. Bena ena aposetolo taudia idia aniani noho lalonai, Iesu ia toreisi bona edia aena ia  huria. Unai be hesiai taudia edia gaukara. (Ioa. 13:1-17) Ena hahediba taudia ese unai manau karana idia laloaboio lasi. Lagani 30 bamona murinai, aposetolo Petero, ia danu be unai Pasova ariana ai ia noho, ese Keristani taudia ia hagoadaia manau karana idia hahedinaraia totona. (1 Pet. 5:5) Oibe, namona be Iesu ena haheitalai ese ita ia durua, ta ta dekenai manau karana do ita hahedinaraia.—Fili. 2:5-8.

13. Iesu ese ena hahediba taudia ia hadibaia loulou, edena kara badana idia hahedinaraia totona?

¹³ Danu, Iesu be ena hahediba taudia ia hadibaia loulou edia abidadama ia goada be gau badana. Nega ta, Iesu ena hahediba taudia be idia hegeregere lasi mero ta amo demoni idia lulua totona. Unai dainai Iesu idia nanadaia: “Dahaka dainai demoni ai lulua diba lasi?” Iesu ia haere: “Badina emui abidadama be ia maragi. Vadaeni umui lau hamaoroa momokani, bema emui abidadama be mastadi uhena bamona, . . . do umui hegeregere gau ibounai umui karaia totona.” (Mat. 17:14-20) Iesu ena haroro gaukara lalonai, ena hahediba taudia ia hadibaia abidadama be mai anina bada. (Mataio 21:18-22 duahia.) Ita be hanaihanai eda hebouhebou badadia bona kongrigeisen heboudia ita lao eda abidadama ia goada totona, a? Unai hebou ita moalelaidia bona unai be nega namodia eda abidadama Iehova dekenai ita hahedinaraia totona.

14. Dahaka dainai sibona ena ura dadaraia lalokauna ita hahedinaraia be mai anina bada?

¹⁴ Keristani Grik Toretoredia edia siri momo ese ita idia hagoadaia ta ta ita lalokau henia totona. Iesu ia gwau taravatu hereadaena iharuana be inai: “Namona be emu dekena tauna oi lalokau henia, oi sibona oi lalokau henia hegeregerena.” (Mat. 22:39) Unai hegeregerena, Iesu ena tadina Iamesi ia gwau lalokau be “taravatu badana.” (Iam. 2:8) Aposetolo Ioane ia gwau: “Lalokau taudia e, umui dekenai lau torea gauna be taravatu matamatana lasi, to ia be taravatu gunana. Unai be guna umui abia gauna.” (1 Ioa. 2:7, 8) Ioane ese ia herevalaia “taravatu gunana” be dahaka? Ia be ma haida lalokau henia taravatuna. Ia be taravatu “gunana,” badina Iesu ese lagani momo gunanai aposetolo taudia dekenai ia hadibaia vadaeni. Danu ia be taravatu “matamatana,” badina nega vaira ai aposetolo taudia be hahetoho do idia davaria, bona idia ese sibona ena ura dadaraia lalokauna do idia hahedinaraia. Ita moale badina Iehova ena orea ese ita ia durua, sibona ena ura dadaraia lalokauna do ita hahedinaraia, bona tanobada taudia edia mataganigani karana ita dadaraia.

15. Iesu be tanobada dekenai ia mai ena badina badana be dahaka?

¹⁵ Iesu be taunimanima edia namo ia laloa bada. Hegeregere ia ese gorere taudia ia hanamoa, bona mase taudia ia hatorea isi lou. To, Iesu be gorere hanamoa sibona totona tanobada  dekenai ia mai lasi. Iena haroro bona hahediba gaukarana ese taunimanima ia durua bada. Edena dala ai? Hegeregere, Iesu ese edia gorere ia hanamoa taudia bona mase amo ia hatorea isi taudia be gabeai idia buruka bena idia mase. To, Basileia ena sivarai idia abia dae taudia be mai edia dala mauri hanaihanai idia abia totona—Ioa. 11:25, 26.

16. Hari, Iehova ena Witnes taudia edia haroro bona hahediba gaukarana ena bada be edena bamona?

¹⁶ Iesu ese ena hahediba taudia ia hagania: “Umui lao, bese ibounai taudia be hahediba taudia ai umui halaoa.” (Mat. 28:19) Keristani taudia ginigunadia be Iesu ese ia hamatamaia gaukarana idia karaia, bona hari, tanobada hegegemadai unai gaukara ita karaia noho. Iehova ena Witnes taudia seven milioni mai kahana be tano 230 mai kahana lalonai Dirava ena Basileia idia harorolaia goadagoada, bona taunimanima milioni momo ida Baibel idia stadilaia noho. Inai haroro gaukara ese ia hamomokania ita be nega dokona ai ita noho.

17. Paulo bona Petero be dahaka hadibaia hereva idia gwauraia?

¹⁷ Hadibaia herevadia ese Keristani taudia ginigunadia idia durua edia abidadama ia goada totona. Hegeregere, Paulo be Roma ai dibura dekenai ia noho neganai, Timoteo ia hamaoroa: “Lau amo oi kamonai hereva momokani ena lalohadai badana be oi dogoatao noho.” (2 Tim. 1:13) Unai hereva ese Timoteo ia hagoadaia bada. Danu, Petero ese Keristani taudia ia hamaoroa do idia gaukara goada kara namodia hegeregere haheauka, tadikaka lalokau henia karana bona sibona biagua karana idia hahedinaraia totona. Ma danu ia gwau: “Ena be unai gaudia umui diba bona umui dibaia hereva momokani umui dogoatao auka, to hanaihanai lau noho hegaegae umui dekenai unai gaudia lau herevalaia lou totona.”—2 Pet. 1:5-8, 12.

18. Keristani ginigunadia ese hadibaia herevadia be edena bamona idia laloa?

¹⁸ Momokani, Paulo bona Petero ese kongrigeisen dekenai idia torea herevadia be “guna peroveta taudia helagadia ese idia gwauraia herevadia” bamona. (2 Pet. 3:2) To, Keristani ginigunadia be unai hereva idia kamonai neganai idia badu, a? Lasi. Idia laloparara Dirava ese unai hadibaia hereva ia gwauraia, badina ia lalokau henidia bona ia ura ia durudia ia idia abidadama henia totona.—2 Pet. 3:18.

19, 20. Dahaka dainai Iehova ena hadibaia herevadia ita abidadama henia be namo, bona edena dala ai namo ita davaria diba?

¹⁹ Hari, badina momo dainai Baibel lalonai idia noho Iehova ena hadibaia herevadia ita abidadama henia diba. (Iosua 23:14 duahia.) Baibel lalonai Iehova ese lagani tausen momo lalodiai goevadae lasi taudia ia kara henia daladia edia sivarai idia noho. Unai sivarai be ita durua totona idia torea. (Roma 15:4; 1 Kor. 10:11) Danu, iseda negai Baibel ena peroveta herevadia haida idia guguru vadaeni. Peroveta herevadia be idaunegai idia gwauraia hadibaia herevadia bamona. Hegeregere, peroveta herevana ta ia gwau, “nega gabeai” taunimanima milioni momo be Iehova ena tomadiho goevana dekenai do idia aru lao. (Isa. 2:2, 3) Oibe, tanobada ia dika ia lao ese Baibel ena peroveta herevana ia hamomokania. Bona ita herevalaia bamona, tanobada hegegemadai ita karaia haroro gaukarana be Iesu ena hereva ia hamomokania danu.—Mat. 24:14.

²⁰ Guna negadia amo ema bona hari, iseda Havaraia Tauna ia hahedinaraia ia ita abidadama henia diba. Iena hadibaia herevadia ese ita idia durua, a? Iena hadibaia herevadia ita abidadama henia be namo. Rosellen be unai bamona ia karaia. Ia gwau: “Iehova lau abidadama henia neganai, lau itaia ia be mai lalokau ida lau ia durua bona hagoadaia.” Bema Iehova ena hadibaia herevadia ita badinaia, ita danu be hahenamo do ita davaria.