1. Dahaka dainai Suria bona Israela edia king edia palani ia guguru lasi?

 LAGANI 762 B.C.E. bona 759 B.C.E. huanai, Israela ena king bona Suria ena king be Iuda basileiana idia tuari henia. Idia ura Ierusalema idia hadikaia, King Ahasa be ena terona amo idia kokia bona Davida ena bese amo ia mai lasi tauna ta be King ai do idia halaoa. (Isa. 7:5, 6) To, unai palani be ia guguru lasi. Iehova ia gwauhamata Davida ena tubuna ta be do ia lohia ela bona hanaihanai, bona Dirava be ia koikoi diba lasi.—Ios. 23:14; 2 Sam. 7:16.

2-4. Edena dala ai Isaia 7:14, 16 ia guguru: (a) Lagani 700 B.C.E. lalodiai? (b) Iesu ena negai?

² Matamanai, toana be Suria bona Israela edia tuari oreadia ese Iuda basileiana do idia hadarerea. Dina tamona lalonai Ahasa ena tuari taudia goadadia 120,000 bona ena natuna Maseaia idia alaia mase! (2 Siv. 28:6, 7) To, Iehova be unai tuari ia itaia noho bona ena gwauhamata Davida dekenai ia laloatao. Unai dainai peroveta tauna Isaia amo King Ahasa dekenai hagoadaia herevana ia siaia.

³ Isaia ia gwau: “Kekeni ta, tau ia do diba lasi, be do ia rogorogo, natuna ta do ia havaraia, mero ta, bona iena ladana do idia atoa, Emanuela.  . . Unai mero be kerere negea, bona maoro abia hidi daladia ia do diba lasi neganai, unai oi idia hagaria king taudia [Suria bona Israela] edia tano be do idia anina lasi.” (Isa. 7:14, 16) Unai peroveta herevana ena kahana ginigunana be Mesia ena vara negana ia herevalaia, bona unai be maoro. (Mat. 1:23) To, Iesu ena negai Suria bona Israela edia king ese Iuda basileiana idia tuari henia lasi. Unai dainai, ita gwau diba Emanuela ia perovetalaia herevana ena guguru negana ginigunana be Isaia ena negai. Edena dala ai?

⁴ Isaia ese unai peroveta herevana ia gwauraia guna,  bena gabeai ena adavana ia rogorogo bona natuna mero ta ia havaraia. Ena ladana idia hatoa Mahere-salala-hasa-basa. Reana ia be Isaia ese ia perovetalaia merona, “Emanuela.” a Baibel negadiai beibi idia vara neganai, ladana ta idia henia mai anina bada negana ta idia laloatao totona. To, iena tama sina bona varavara ese ladana idauna ma ta ai idia boiria danu. (2 Sam. 12:24, 25) To, gau ta ese ia hamomokania lasi Iesu dekenai unai ladana Emanuela idia henia.—Isaia 7:14; 8:3, 4 duahia.

5. King Ahasa be dahaka abia hidi kererena ia karaia?

⁵ Israela bona Suria idia ura Iuda basileiana idia tuari henia lalonai, Asuria danu ia ura unai tano ia abia. Unai negai, Asuria be tanobada ena basileia badana. Isaia 8:3, 4 ena hereva hegeregerena, Asuria ena king be Iuda basileiana ia do tuari henia lasi neganai, “Damaseko ena davana bada kohu namona ibounai bona Samaria ena kohu” do ia abia lao. King Ahasa be Dirava ena hereva Isaia amo ia abidadama henia lasi bona Asuria ena heduru ia tahua. To gabeai, Asuria ese Iuda besena ia biagua auka. (2 Kin. 16:7-10) Ahasa be Iuda besena ena gunalaia tauna, to idia ia gimaia lasi! Namona be ita sibona ita nanadaia, ‘Lau be mai anina bada abia hidi lau ura karaia neganai, Dirava eiava taunimanima lau tabekau henia?’—Aon. 3:5, 6.

6. Ahasa bona Hesekaia edia lohia dalana edia idau mani oi gwauraia.

⁶ Ahasa be lagani 746 B.C.E ai ia mase, bona ena natuna Hesekaia ia lohia matamaia. Unai negai, Iuda taudia be idia ogogami bona Iehova tomadiho henia karana idia rakatania. King Hesekaia ia lohia neganai, ia karaia gauna ginigunana be dahaka? Iuda besena ena taga ia habadaia, a? Lasi. Hesekaia be Dirava ia lalokau henia bona Iuda besena ia gunalaia tauna namona. Ia karaia gauna ginigunana be tomadiho goevana ia haginia lou, bona Iuda besena ia durua Iehova idia tura henia lou totona. Hesekaia be Dirava ena ura ia lalopararalaia neganai, karaharaga unai ia badinaia. Ita dekenai ia be haheitalai namona!—2 Siv. 29:1-19.

7. Dahaka dainai Levi taudia ese King Hesekaia ena heduru idia abia be gau badana?

⁷ Levi taudia be tomadiho goevana haginia lou karana dekenai, mai anina bada gaukarana do idia karaia. Unai dainai Hesekaia be idia ida ia hebou bona ia hadibadia ia ese idia do ia durua. Mani oi laloa, unai hebou lalonai abidadama Levi taudia be idia moale bada bona idia tai, badina edia King ia gwau: “Lohiabada ese umui ia abia hidi, iena hesiai gaukara do umui karaia.” (2 Siv. 29:11) Oibe, Levi taudia edia gaukara badana be taunimanima do idia durua, Dirava momokanina do idia tomadiho henia!

8. Edena dala ai Hesekaia ese Iuda taudia ia durua Iehova idia tomadiho henia lou totona? Bona dahaka ia vara?

⁸ Hesekaia ese Iuda bona Israela taudia ibounai ia boiria Pasova ariana idia karaia totona. Unai murinai dina seven be Hatubua Lasi Paraoa Ariana idia karaia. Idia moale bada dainai, unai aria be ma dina seven idia karaia. Baibel ia gwau: “Ierusalema hanua lalonai moale be bada herea, badina be king Solomona, Davida ena natuna, ena nega dekena amo ia mai, kara unai bamona be Ierusalema dekenai ia hedinaraia lasi.” (2 Siv. 30:25, 26) Unai aria ese taunimanima ibounai ia hagoadaia bada! Sivarai Iharuana 31:1 ia gwau: “Aria ena kara ibounai ia ore, vadaeni Israela taudia ibounai be . . . dirava koikoi edia nadi du idia hamakohia maragimaragi, Asera ena hahine dirava ena kaivakuku idia utua diho, bona ataiai idia noho tomadiho gabudia bona boubou patadia idia hadikaia ore.” Edia kara amo idia hahedinaraia idia be Iehova dekenai idia giroa lou, bona unai  ese idia ia durua gabeai do idia vara hekwakwanai totona idia hegaegae.

9. (a) Edena dala ai Israela ena palani ia guguru lasi? (b) King Senakeriba ese Iuda basileiana dekenai dahaka ia karaia?

⁹ Isaia ena peroveta herevana hegeregerena, Asuria ese Israela ena not kahana basileiana ia hadarerea bona hanua taudia be igui hesiai taudia ai ia halaoa. Unai amo Israela basileiana ena palani, Davida ena bese amo ia mai lasi tauna ta be king ai do idia halaoa, be ia guguru lasi. Asuria ena palani be dahaka? Idia ura Iuda basileiana do idia hadarerea danu. Baibel ia gwau: “King Hesekaia ese king dagi ia dogoatao lagani 14 neganai, Senakeriba, Asuria ena king ese Iuda hanua, mai edia magu hanuadia, ia tuari henia, bona ia halusidia.” King Senakeriba ese Iuda hanuadia ibounai 46 ia hadareredia. Bema oi be unai negai Ierusalema dekenai oi noho, reana do oi gari bada. Asuria ena tuari oreana be haraga momokani Iuda ena hanua ta ta ia hadarerea!—2 Kin. 18:13.

10. Dahaka dainai Mika 5:5, 6 ese Hesekaia ia hagoadaia?

¹⁰ Hesekaia ia diba dika bada do idia davaria. To, ia be ena tamana Ahasa bamona lasi. Hesekaia be Iehova dekenai ia tabekau, bona Dirava momokanina idia diba lasi besedia edia heduru ia tahua lasi. (2 Siv. 28:20, 21) Ia ese peroveta tauna Mika ena hereva ia laloatao. Mika ia gwau: “Asuria tuari taudia ese . . . iseda hanua edia magu idia makohia neganai, ita ese mamoe naria taudia 7 do ita haginia, bona taunimanima gunalaia taudia 8. Bona idia ese tuari [“kaia,” NW] ena goada dekena amo Asuria do idia halusia.” (Mika 5:5, 6) Unai hereva ese Hesekaia ia hagoadaia, badina ia hahedinaraia Iehova ese tuari orea idauna ta do ia gaukaralaia Asuria ia hadarerea totona.

11. “Mamoe naria taudia 7” bona “gunalaia taudia 8” ena peroveta herevana, be edena negai do ia guguru vaitani?

¹¹ “Mamoe naria taudia 7” bona “gunalaia  taudia 8” (“hanua lohiadia,” BHḡ) ena peroveta herevana be Iesu ia vara murinai, dala badana ai ia guguru. Mika ia gwau Iesu be “Israela do ia biagua . . . . Iena tubuna bona iena iduhu be gunaguna idia noho.” (Mika 5:1, 2 duahia.) Oibe, unai peroveta herevana be vaira neganai do ia guguru. Unai negai “Asuria” o inai tauna ese Iehova ena hesiai taudia do ia dagedage henidia. Iehova ese ena Natuna ena lohia henunai, edena tuari oreana do ia gaukaralaia unai inai tauna ia hadarerea totona? Haere be gabeai do ita itaia. To hari mani ita itaia, Asuria ese Iuda basileiana ia tuari henia neganai Hesekaia be dahaka ia karaia, bona iena kara amo dahaka ita dibaia.

12. Hesekaia bona iena durua taudia be dahaka idia karaia Iehova ena taunimanima idia gimaia totona?

¹² Bema ita mamia ita sibona ese hekwakwanai ta ita hamaoromaoroa diba lasi, Iehova be ia noho hegaegae ita ia durua totona. To ia ura ita sibona danu be gau ta do ita karaia, unai hekwakwanai ita hamaoromaoroa totona. Hesekaia be “iena lohia taudia bona iena tuari biagudia” ida ia herevahereva hebou bona abia hidi idia karaia, “Ierusalema ena murimurinai ranu guridia be do idia koua . . . Hesekaia ese mai goada danu Ierusalema ena magu, idia makohia gabudia, ia haginia lou, bona kohoro haida be magu ena latanai ia haginia. Magu ena murimurinai danu be Hesekaia ese magu ta ma ia haginia . . . danu tuari gaudia bona kesi momo herea ia karaia.” (2 Siv. 32:3-5) Unai nega ai, Iehova ese ena taunimanima ia gimaia bona naria totona, tatau goadadia haida hegeregere Hesekaia, iena lohia taudia bona abidadama peroveta taudia ia gaukaralaia.

13. Hesekaia be dahaka mai anina bada gauna ia karaia? Bona ena hereva ese edena dala ai taunimanima ia hagoadaia?

¹³ Hesekaia ese gabeai ia karaia gauna be ranu guridia ia koua bona magu ia haginia lou karana ia hanaia. Ia be Mamoe naria tauna namona dainai, ena taunimanima ia haboua bona hagoadaia. Ia gwau: “Asuria king bona iena tuari taudia totona do umui gari lasi . . . . Badina ita dekenai ia noho siahu ese idia edia siahu ia hereaia noho momokani. Asuria taudia edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.” Hesekaia ese taunimanima ia hadibaia Iehova be idia totona do ia tuari. Unai ese idia ia durua Dirava idia abidadama henia bona edia lalona ia goada. Hesekaia, ena lohia taudia, tuari biagudia bona peroveta taudia Mika bona Isaia ese idia hahedinaraia, idia be mamoe naria taudia namodia, Iehova ese ena peroveta tauna amo ia gwauhamata bamona.—2 Siv. 32:7, 8; Mika 5:5, 6 duahia.

14. Rabesake be dahaka ia gwauraia, bona Iehova ena taunimanima be dahaka idia karaia?

¹⁴ Asuria ena king bona ena tuari taudia be Ierusalema ena saut kahana hanuana, Lakisi dekenai idia kamepa. Bena hereva gwauraia taudia toi ia siaia Iuda besena do idia hamaoroa edia tuari kohudia do idia atoa diho. Hereva gwauraia tauna badana Rabesake, be dala idauidau ai taunimanima edia lalona ia veria. Heberu gado ai Iuda taudia edia lalona ia veria ia gwau, bema edia king idia gwau-edeede henia bona Asuria ena kahanai idia gini, ia ese tano namona do ia henidia bona mauri namona do idia moalelaia. (2 King Taudia 18:31, 32 duahia.) Bena ma ia gwau, idau bese taudia be edia dirava ese idia gimaia lasi hegeregerena, Iehova ese Iuda taudia be Asuria amo do ia gimaia lasi. To, Dirava ena taunimanima be idia aonega bona unai hereva koikoidia idia abia dae lasi. Hari, Iehova ena hesiai taudia be unai bamona idia karaia danu.—2 King Taudia 18:35, 36 duahia.

15. Ierusalema taudia ese dahaka idia karaia be namo, bona edena dala ai Iehova ese idia ia hamauria?

¹⁵ Momokani, Hesekaia be ia lalohisihisi, to  ia be idau bese ena king ta amo heduru ia tahua lasi. Ia ese peroveta tauna Isaia amo Iehova ena heduru ia tahua. Isaia ese Hesekaia ia hamaoroa: “[Senakeriba] be inai hanua Ierusalema dekenai diba ta do ia pidia lasi.” (2 Kin. 19:32) Ierusalema taudia idia gari lasi bona idia gini goada be namo, badina Iehova be idia totona do ia tuari. Baibel ia gwau: “Unai hanuaboi, Lohiabada ena aneru be Asuria edia kamepa dekenai ia lao, tuari taudia 185,000 ia alaia mase.” (2 Kin. 19:35) Iuda basileiana be Hesekaia ese ranu guri ia koua bona magu ia haginia lou karana amo lasi, to Iehova ena siahu amo idia kwalimu.

16. Hari, daidia ese (a) Ierusalema ena hanua taudia (b) “Asuria” tauna (c) “mamoe naria taudia 7” bona “gunalaia taudia 8” idia laulaulaia?

¹⁶ “Mamoe naria taudia 7” bona “gunalaia taudia 8” edia peroveta herevana, be dala badana ai iseda negai do ia guguru. Idaunegai, Ierusalema hanua taudia be Asuria ese idia tuari henia. Hari, kahirakahira “Asuria” o inai tauna ta ese Iehova ena taunimanima do ia tuari henidia, bona do ia ura haoredia. Baibel ese unai tuari bona “Goga, Magoga tano tauna” ena tuari, “not kahana ena king” ena tuari bona “tanobada ena king taudia” edia tuari ia herevalaidia. (Ese. 38:2, 10-13; Dan. 11:40, 44, 45, NW; Apok. 17:14; 19:19) Unai be tuari idauidau, a? Lasi. Baibel be tuari tamona ia herevalaia, to ladana idauidau ia gaukaralaia. Iehova ese edena tuari oreana, do ia gaukaralaia unai “Asuria” o inai tauna ia hadarerea totona? Ia ese tuari oreana idauna ta do ia gaukaralaia—“mamoe naria taudia 7” bona “taunimanima gunalaia taudia 8”! (Mika 5:5) Unai mamoe naria taudia bona gunalaia taudia (o “hanua lohiadia,” BHḡ) be kongrigeisen elda taudia. (1 Pet. 5:2) Hari, Iehova ese abidadama elda taudia momo ia gaukaralaia, iena mamoe idia naria bona idia hagoadaia nega vaira ai “Asuria” ena tuari totona do idia hegaegae. b Mika ia gwau, “idia ese tuari [“kaia,” NW] ena goada dekena amo Asuria do idia halusia.” (Mika 5:6) Oibe, do idia gaukaralaia “tuari gaudia” ta be “lauma helaga ena tuari kaia,” Dirava ena Hereva unai.—2 Kor. 10:4; Efe. 6:17.

17. Inai stadi amo elda taudia be dahaka mai anina bada gaudia foa idia dibaia?

¹⁷ Elda taudia ese inai sivarai amo mai anina bada gaudia haida idia dibaia diba: (1) “Asuria” tauna ena tuari dainai do ita hegaegae totona, ita karaia diba mai anina bada gauna be, ita bona eda tadikaka edia abidadama Dirava dekenai do ita hagoadaia. (2) “Asuria” tauna be ita ia tuari henia neganai, namona be elda taudia idia abia dae momokani Iehova be ita do ia hamauria. (3) Reana unai negai, do ita laloa roho mauri totona, Iehova ena orea ese ia henia hadibaia herevadia be idia maoro lasi. To namona be ita ibounai do ita noho hegaegae, ita abia hadibaia herevadia ita badinaia totona, ena be taunimanima idia laloa unai hereva be ia maoro lasi. (4) Hari, tanobada ena edukeisen, moni bona kohu, o taunimanima edia orea idia abidadama henia taudia ese edia lalohadai idia haidaua be namo. Bona namona be elda taudia idia noho hegaegae manoka taudia idia durua totona.

18. Edena dala ai Hesekaia ena sivarai ita laloa karana ese vaira neganai ita do ia durua?

¹⁸ Vaira negana ai, toana be Iehova ena hesiai taudia be durua tauna ta lasi, guna Hesekaia ena negai idia noho Iuda taudia bamona. Unai ia vara neganai, Hesekaia ena hereva ese ita ibounai ia hagoadaia diba. Namona be ita laloatao, eda inai taudia “edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.”—2 Siv. 32:8.