1, 2. Dahaka dainai hari koikoi karadia be bada herea, bona edena dala ai idia hedinarai? (Laulau ginigunana itaia.)

 TANOBADA be koikoi karadia amo ia honu. To, unai be hoa gauna lasi, badina Baibel ese ia hahedinaraia goevagoeva Satani Diabolo be koikoi bada tauna, bona inai tanobada be ia ese ia biagua. (1 Tim. 2:14; 1 Ioa. 5:19) Inai tanobada dikana ena dokona ia kahirakahira lalonai, Satani be ia badu dikadika, badina ia diba iena “nega be ia kwadogi.” (Apok. 12:12) Unai dainai, ita diba Satani ese ia biagua taudia be edia koikoi herevadia bona karadia do idia habadaia. Edia ura badana be Iehova ena hesiai taudia do idia koia.

² Iehova ena Witnes taudia bona idia abia dae herevadia dekenai momo ese niuspepa, televisen bona Intanet amo koikoi herevadia idia gwauraia. Unai koikoi herevadia be tanobada hegegemadai idia halasia, bona idia abia dae taudia be Iehova ena taunimanima idia badu henidia.

3. Dahaka ese ita ia durua ma haida edia koikoi herevadia ita dadaraia totona?

³ Iseda inai tauna ena koikoi daladia ita dadaraia totona, Dirava ese ita dekenai Baibel ia henia bona ia be “mai ena namo . . . gau idauidau hamaoromaoroa totona.” (2 Tim. 3:16) Paulo ena revareva ta ese ia hahedinaraia Tesalonika tadikaka haida be koikoi herevadia idia abia dae. Idia dekenai ia gwau: “Umui ai noia, emui laloa namonamo karana umui haboioa haraga lasi.” (2 Tes. 2:1, 2) Paulo ena sisiba amo dahaka ita dibaia, bona edena dala ai eda mauri lalonai unai ita badinaia diba?

4. Edena dala ai Tesalonika tadikaka idia diba “Iehova ena dina” do ia mai? Hari, ita be edena dala ai hadibaia herevadia ita abia?

⁴ Paulo ese ena revareva ginigunana be Tesalonika  kongrigeisen dekenai ia torea neganai, “Iehova ena dina” ena mai ia herevalaia. Ia ura lasi ena tadikaka be idia hegaegae lasi bona idia daradara. To, idia ia hamaoroa “diari ena natudia” bamona, do idia ‘noga noho bona edia laloa maoromaoro karana do idia dogoatao noho.’ (1 Tesalonika 5:1-6 duahia.) Hari, ita be Babulonia Badana, tanobada ena tomadiho koikoi ibounai, ena moru negana ita naria noho. Unai negai Iehova ena dina badana do ia matamaia. Ita moale badina ita be Iehova ese ena ura do ia hagugurua dalana ita lalopararalaia. Danu, hanaihanai kongrigeisen amo nega korikori ai hadibaia hereva ita abia ita laloa maoromaoro noho totona. Unai hadibaia hereva ita badinaia karana ese ita ia hagoadaia, ‘mai eda darana ida Dirava ena hesiai gaukara helagana do ita karaia.’—Roma 12:1.

5, 6. (a) Paulo ese Tesalonika tadikaka dekenai ia siaia revareva iharuana lalonai, dahaka ia herevalaia? (b) Kahirakahira Dirava ese Iesu amo dahaka do ia karaia, bona edena henanadai ita lalodia be namo?

⁵ Paulo ese Tesalonika tadikaka dekenai revareva ginigunana ia siaia murinai, revareva iharuana ma ia siaia. Unai revareva lalonai, ia gwau hisihisi badana ia mai neganai Iesu ese “Dirava idia diba lasi taudia dekenai, bona iseda Lohiabada Iesu ena sivarai namona idia kamonai henia lasi taudia dekenai” hahemaoro do ia karaia. (2 Tes. 1:6-8) Tesalonika Iharuana ena karoa 2 ese ia hahedinaraia unai kongrigeisen taudia haida be idia “lalohekwarahi,” badina idia laloa Iehova ena dina be kahirakahira do ia ginidae. (2 Tesalonika 2:1, 2 duahia.) Idia be Iehova ese ena ura do ia hagugurua daladia haida idia lalopararalaia lasi. Paulo ese gabeai unai ia herevalaia, ia gwau: “Iseda diba be sisina sibona, bona peroveta herevadia edia kahana sibona ita gwauraia. To gau ibounai ita diba neganai, unai diba sisina be do ia ore.” (1 Kor. 13:9, 10) To Paulo, Petero bona horoa tadikaka ma haida idia torea sisiba ese unai Keristani taudia idia durua idia abidadama noho totona.

⁶ Paulo ese Keristani taudia ia durua totona, ia gwau aposteit karana bona “taravatu utua tauna” do idia hedinarai guna, bena gabeai Iehova ena dina do ia ginidae. a  Unai murinai, ena nega korikori ai Lohiabada Iesu ese koikoi herevadia idia abia dae taudia ibounai “do ia hadikaia ore.” Aposetolo Paulo ia hahedinaraia unai dika do idia davaria, badina “hereva momokani dekenai edia lalokau idia hahedinaraia lasi.” (2 Tes. 2:3, 8-10) Unai dainai, namona be sibona ita nanadaia: ‘Lau be hereva momokani lau lalokau henia bada, a? Lau be tanobada hegegemadai Dirava ena taunimanima totona idia karaia Gima Kohorona bona pablikeisen ma haida lau stadilaia, unai amo Baibel ena diba matamatadia lau lalopararalaia, a?’

7, 8. (a) Keristani taudia ginigunadia be dahaka hekwakwanai idia davaria? (b) Hari, dahaka ese Keristani taudia momokanidia ia hakaua kerere diba?

⁷ Keristani taudia be aposteit bona edia koikoi herevadia sibona amo dika do idia davaria lasi. Paulo be Timoteo ia tore henia ia gwau, “moni ura henia bada karana be dika idauidau ibounai edia ramuna.” Bena ma ia gwau, “unai idia ura henia bada dainai, haida ese abidadama idia rakatania bona hisihisi momo amo idia sibodia idia gwadaia.” (1 Tim. 6:10) Danu, “tauanina ena kara dikadia” ese Keristani taudia idia hakaua kerere diba.—Gal. 5:19-21.

⁸ Unai dainai, ita laloparara dahaka dainai Paulo ese Tesalonika tadikaka ia sisiba henia, “aposetolo koikoidia” amo do idia naria namonamo. Idia haida be ‘hereva momokani idia mogea, bona hahediba taudia idia hakaua siri, edia murinai idia raka totona.’ (2 Kor. 11:4, 13; Kara 20:30) Gabeai, Iesu ese Efeso kongrigeisen ia hanamoa, badina idia ese unai bamona ‘kara dika taudia idia ura henia lasi momokani.’ Efeso tadikaka ese unai taudia ‘edia kara idia tahua’ bona idia davaria idia be aposetolo koikoidia. (Apok. 2:2) Paulo ese Tesalonika tadikaka dekenai ia siaia revareva iharuana lalonai, ia gwau: “Tadikaka e, Lohiabada Iesu Keriso ena ladanai umui dekenai inai hadibaia herevadia ai henia, dala maorona ai idia raka lasi tadikaka ibounai amo do umui noho daudau.” Bena ia ese ‘idia ura lasi gaukara’ Keristani taudia ia herevalaia. (2 Tes. 3:6, 10) Bema unai taudia amo do idia noho daudau, vadaeni aposteit taudia danu idia dadaraia be gau badana! Oibe, unai bamona taudia idia tura henia karana be mai ena dika, unai dainai idia dadaraidia be namo. Hari, unai bamona ita karaia danu be gau badana.—Aon. 13:20.

9. Ta be sibona ena lalohadai ia gwauraia eiava elda taudia o ma haida ia gwauraia dika neganai, dahaka dainai ita dadaraia be namo?

⁹ Hari, kahirakahira hisihisi badana do ia vara bona inai tanobada dikana do ia ore. Unai dainai ita dekenai Keristani ginigunadia ese idia abia sisiba be mai anina bada. Namona be “Dirava ena hebogahisi hereadaena [ita] abia dae bona ena badina [ita] laloaboio lasi.” Badina bema ita laloaboio, mauri hanaihanai do ita abia lasi. (2 Kor. 6:1) Bema kongrigeisen hebou ai ta be sibona ena lalohadai ia gwauraia, eiava elda taudia o ma haida ia gwauraia dika bona ia ura ena hereva ita kamonai, namona be ia ita dadaraia.—2 Tes. 3:13-15.

10. Paulo ese Tesalonika tadikaka ia sisiba henidia, dahaka idia dogoatao totona?

¹⁰ Paulo ese Tesalonika tadikaka ia sisiba henia idia “gini goada” bona idia dibaia gaudia do idia dogoatao. (2 Tesalonika 2:15 duahia.) Unai “hadibaia gaudia” be dahaka? Idia be Iesu bona Dirava ena siahu amo Paulo bona ma haida ese idia torea hadibaia herevadia. Idia be tomadiho koikoi edia hadibaia herevadia lasi. Paulo be Korinto tadikaka dekenai ia gwau: “Umui lau hanamoa, badina gau ibounai lalonai umui ese lau umui laloatao, bona umui dekenai lau henia hadibaia herevadia umui badinaia  noho.” (1 Kor. 11:2) Unai hadibaia herevadia be Iesu bona Dirava amo idia mai dainai, ita abidadama henidia diba.

11. Edena dala ai koikoi herevadia ese ma haida edia abidadama idia hamanokaia diba?

¹¹ Paulo ese Heberu tadikaka ia tore henidia neganai, Keristani taudia edia abidadama do ia manoka bona idia gini goada lasi daladia rua ia herevalaia. (Heberu 2:1; 3:12 duahia.) Ia ese “hure oho” bona “raka siri” karana ia herevalaia. Bouti be metairametaira kone amo ia hure oho neganai, reana unai do oi itaia haraga lasi ela bona kone amo ia daudau vadaeni. To danu, tau ta sibona ese ena bouti be kone amo ia doria daudau diba. Unai haheitalai rua ese idia hahedinaraia, bema haida be koikoi herevadia idia abia dae, edia abidadama hereva momokani dekenai be do ia manoka ia lao.

12. Hari inai negai, dahaka gaudia ese eda abidadama idia hamanokaia diba?

¹² Tesalonika tadikaka haida be koikoi herevadia idia abia dae. Ita dekenai unai ia vara diba, a? Hari, nega haorea karadia be momo. Hegeregere, social networking (facebook bona unai bamona gaudia) e-mail duahia bona torea, teks mesiji, moale karadia ma haida, bona spot gadara dekenai eda nega bada ita haorea diba. Unai gaudia ta ese Keristani tauna ena abidadama ia hamanokaia diba. Dahaka do ia vara? Mai kudouna ibounai ida guriguri karana, Baibel stadilaia karana, hebou lao karana bona sivarai namona harorolaia gaukarana ia rakatania diba. Dahaka ita karaia diba unai amo eda laloa namonamo karana do ita haboioa haraga lasi?

13. Baibel ese ia perovetalaia bamona, momo edia lalohadai be dahaka? Dahaka ese ita do ia durua, eda abidadama ia goada noho totona?

¹³ Namona be ita laloatao, ita be “dina gabediai” ita noho. Unai idia abia dae lasi taudia ita tura henia lasi be namo, badina idia ese eda laloa namonamo karana idia hadikaia diba. Aposetolo Petero ese dina gabedia ia herevalaia, ia gwau: “Hevaseha taudia do idia mai bona hevaseha herevadia do idia gwauraia, bona sibodia edia ura hegeregerena do idia kara, bona do idia gwau: ‘Ia gwauhamata do ia mai bona noho, to ia be edeseni? Emai sene taudia be mase lalonai idia mahuta negana amo ema bona hari, gau ta ia idau lasi, Dirava ese gau ibounai ia havaraia negana hegeregerena.’” (2 Pet. 3:3, 4) Dina ta ta ai Baibel ita duahia bona stadilaia karana amo ita laloparara, ita be “dina gabediai” ita noho. Baibel ese ia perovetalaia aposteit karana be idaunegai ia vara, bona hari ia vara noho. “Taravatu utua tauna” be hari ia noho bona Dirava ena hesiai taudia ia dagedage henia noho. Unai dainai, Iehova ena dina ia kahirakahira noho lalonai, ita noga noho be gau badana.—Sep. 1:7.

14. Dahaka dainai Dirava ena hesiai gaukara lalonai ita bisi karana ese ita ia gimaia?

¹⁴ Iseda laloa namonamo karana ita haboioa haraga lasi dalana ta be, hanaihanai sivarai namona ita harorolaia. Unai dainai, Keriso Iesu, kongrigeisen ena Kwarana, be ena murinai idia raka taudia gimaia totona, ia haganidia bese ibounai taudia be hahediba taudia ai do idia halaoa, bona idia hadibaia Iesu ena hahediba herevadia idia badinaia totona. (Mat. 28:19, 20) Iena hereva ita badinaia totona namona be do ita haroro goadagoada. Oi laloa Tesalonika tadikaka be mai hesiku ida edia haroro bona hadibaia gaukarana idia karaia, a? Lasi. Paulo ia gwau: “Lauma helaga ena lahi umui habodoa lasi. Namo lasi umui laloa peroveta herevadia be anina lasi.” (1 Tes. 5:19, 20) Ita stadilaia peroveta herevadia be ma haida dekenai ita hadibaia be moale gauna!

15. Ruma bese ena tomadiho lalonai dahaka gaudia ita herevalaia diba?

 ¹⁵ Ita ura iseda ruma bese taudia ta ta ita durua edia haroro daladia idia hanamoa totona. Unai idia karaia totona, tadikaka taihu momo be edia ruma bese tomadiho ena kahana ta ai haroro gaukara daladia idia hegaegaelaia. Reana lou henia karaia dalana umui hegaegaelaia diba. Hegeregere, ruma tauna ta umui lou henia neganai, dahaka do umui herevalaia? Edena hereva ese iena lalona do ia veria? Edena nega be nega namona oi lou henia totona? Momo be edia ruma bese ena tomadiho lalonai, miniti haida idia gaukaralaia hebou gaudia idia hegaegaelaia totona. Emu ruma bese be unai ia karaia diba, a? Hebou ai haere henia karana ese emu abidadama do ia hagoadaia, unai amo emu laloa namonamo karana do oi haboioa lasi. (Sal. 35:18) Oibe, ruma bese ena tomadiho ese haida edia lalohadai bona daradara gaudia amo ita do ia gimaia.

16. Dahaka ese horoa taudia ia hagoadaia dainai, edia laloa namonamo karana idia dogoatao noho?

¹⁶ Idia hanaia laganidia lalonai Iehova ese ena taunimanima dekenai peroveta herevadia edia anina ia hahedinaraia. Unai ese ita ia hagoadaia, badina ita diba vaira negana ai hahenamo idauidau do ita abia. Horoa taudia be Keriso ida guba ai do idia lohia. Unai helaro ese idia ia hagoadaia dainai, edia laloa namonamo karana idia dogoatao noho! Paulo ese Tesalonika tadikaka dekenai ia torea herevadia be horoa taudia dekenai ita gwauraia diba, ia gwau: “Iehova ese ia lalokau henia tadikaka e, emai maduna be nega ibounai umui totona Dirava ai tanikiu henia. Badina Dirava ese matamana amo umui ia abia hidi . . . Iena lauma helaga amo umui ia hahelagaia bona hereva momokani umui abidadama henia karana amo, unai abia hidi ia karaia.”—2 Tes. 2:13.

17. Edena dala ai 2 Tesalonika 3:1-5 ena hereva ese oi ia durua?

¹⁷ Namona be tanobada ai mauri hanaihanai do idia abia taudia idia hekwarahi, edia laloa namonamo karana idia haboioa haraga lasi totona. Bema emu helaro be tanobada ai do oi noho, Paulo ese Tesalonika ai idia noho horoa taudia dekenai ia torea hagoadaia herevana oi laloa bada be namo. (2 Tesalonika 3:1-5 duahia.) Ita ta ta ese unai hereva namodia ita laloa bada. Oibe, Paulo ese Tesalonika taudia dekenai ia torea revareva ese haida edia lalohadai bona daradara gaudia amo ita idia gimaia. Ita be dina gabediai ita noho dainai, ita dekenai unai sisiba herevadia be mai anina bada.