1. Dahaka gaudia dainai taunimanima be edia ura gaudia haida idia dadaraia?

 TAUNIMANIMA be mai anina bada gaudia abia totona, edia ura gaudia haida idia dadaraia. Tama sina be edia nega, moni bona goada idia gaukaralaia edia natudia naria totona. Ena be matamata taudia haida be moale karadia idia karaia, to Olympic gadara lalonai idia ura vareai matamata taudia be dina ibounai edia nega bada idia gaukaralaia idia treinini goadagoada totona. Iesu danu be mai anina bada gaudia ia abia totona, ena ura gaudia haida ia dadaraia. Ia be kohu momo maurina ia tahua lasi bona bese ia havaraia lasi. To, ia ura ena goada ia gaukaralaia Basileia ia durua totona. (Mat. 4:17; Luka 9:58) Iena murinai idia raka taudia danu be Basileia idia durua totona edia ura gaudia momo idia dadaraia. Unai idia karaia badina edia mauri lalonai Dirava ena Basileia idia laloa bada. (Mat. 4:18-22; 19:27) Unai dainai namona be sibona ita nanadaia, ‘Egu mauri lalonai dahaka be mai anina bada?’

2. (a) Keristani taudia momokanidia ese dahaka gaudia idia bouboulaia be namo? (b) Dahaka dainai momo be sibodia edia ura idia dadaraia?

² Keristani taudia momokanidia ese edia hetura karana Iehova ida idia hanamoa bona hagoadaia totona, gau haida idia bouboulaia be namo. Hegeregere, edia nega bona goada idia gaukaralaia idia guriguri, Baibel idia duahia, ruma bese ena tomadiho idia karaia, hebou idia lao, bona haroro gaukara idia karaia. a (Ios. 1:8; Mat. 28:19, 20; Heb. 10:24, 25) Iseda hekwarahi bona Iehova ena hahenamo dainai, haroro gaukara be ia bada ia lao bona momo be “[Iehova] ena Dubu Helaga ia gini ororona” dekenai idia aru mai noho. (Isa. 2:2) Momo be Basileia idia durua totona, sibodia edia  ura idia dadaraia bona Betele gaukara, Kingdom Hall bona Assembly Hall haginia gaukara bona hebouhebou hegaegaelaia gaukara idia durua, eiava disasta idia vara gabudia ai heduru idia henia. Namo lasi ita laloa unai gaukara idauidau ita karaia dainai do ita mauri. To, ita karaia ena badina be ita ura Dirava ena Basileia ita durua.

3. (a) Basileia totona gau haida ita rakatania neganai, dahaka namo ita davaria diba? (b) Edena henanadai ita lalodia be namo?

³ Hari, Basileia durua gaukaradia ita habadaia be namo. Ita moale badina tadikaka taihu momo be mai ura ida gau haida idia rakatania Iehova idia hesiai henia totona. (Salamo 54:6 duahia.) Dirava ena Basileia ita naria noho lalonai, unai bamona ita karaia neganai do ita moale. (Deu. 16:15; Kara 20:35) To, namona be ita ta ta ese eda mauri ita sekea namonamo. Eda ura gaudia ma haida ita rakatania diba Basileia ena gaukara ita karaia totona, a? Eda nega, moni, goada, bona diba be edena dala ai ita gaukaralaia? Boubou gaudia ita henia neganai, dahaka ita laloatao be namo? Mai edia ura ida boubou gaudia idia henia taudia haida edia sivarai mani ita herevalaia, bona ita itaia edena dala ai idia ita tohotohoa diba. Unai ese ita do ia durua ita moale noho totona.

4. Edena dala ai Israela taudia be boubou gaudia idia henia dainai namo idia davaria?

⁴ Idaunegai, Israela taudia be Dirava ese edia kara dika ia gwauatao totona boubou gaudia idia henia. Danu, unai bamona idia karaia amo Iehova ena lalonamo idia abia diba. Boubou gaudia haida be taravatu hegeregerena idia henia, bona ma haida be sibona edia ura dainai idia henia. (Lev. 23:37, 38) Gabua ore bouboudia be sibona edia ura hegeregerena o harihari gaudia bamona Iehova dekenai idia henia diba. Boubou karana hereadaena ta be Solomona ena negai dubu helaga idia hahelagaia neganai idia karaia.—2 Siv. 7:4-6.

5. Iehova ese ogogami taudia totona dahaka ia karaia?

⁵ Iehova ia laloparara Israela taudia haida be ogogami taudia, unai dainai ia gwau idia dekenai idia noho gaudia hegeregerena boubou gauna do idia henia. Iehova ena taravatu hegeregerena animal ena rarana do idia bubua, bona unai be Iesu amo “do idia mai gau namodia edia laulau sibona.”  (Heb. 10:1-4) To, Iehova ese unai taravatu ia ha-aukaia lasi. Hegeregere, ogogami taudia ia hamaoroa, bema idia hegeregere lasi mamoe o nanigosi idia bouboulaia totona, vadaeni pune manu idia bouboulaia diba. Unai amo idia danu be Iehova dekenai boubou gaudia idia henia diba. (Lev. 1:3, 10, 14; 5:7) Ena be idia bouboulaia animal be idauidau, to Iehova ia ura boubou gaudia idia henia taudia ese gau rua do idia karaia.

6. Iehova ia ura boubou gauna ia henia tauna ese edena taravatu rua do ia badinaia? Dahaka dainai unai be mai anina bada?

⁶ Namba 1 be, Israela tauna ese ia dekenai ia noho gau namona do ia henia. Iehova ese Israela taudia ia hamaoroa iena “laloa namo” idia abia totona, namona be idia bouboulaia animal be ia bero lasi bona toto lasi. (Lev. 22:18-20) Bema idia bouboulaia animal be mai ena bero, Iehova ese do ia abia dae lasi. Namba 2 be, boubou gauna ia henia tauna ia goeva be namo. Bema ia goeva lasi, ia ese kara dika eiava kerere davana henia boubouna do ia karaia guna. Unai amo Iehova ese do ia lalonamo henia, bona sibona ena ura dainai ia henia boubou gauna do Ia abia dae. (Lev. 5:5, 6, 15) Unai be mai anina bada, badina bema ia goeva lasi tauna ta be maino karaia boubouna ia ania, do idia panisia. (Lev. 7:20, 21) To, bema boubou gaudia ia henia tauna be Dirava ese ia lalonamo henia, bona ia bouboulaia animal be ia goeva, vadaeni unai tauna be do ia moale.—1 Sivarai 29:9 duahia.

7, 8. (a) Momo be Basileia totona sibona idia henia dainai, dahaka hahenamo idia davaria? (b) Iehova dekenai dahaka gaudia ita bouboulaia diba?

⁷ Hari, haida be mai edia ura ida sibona idia henia Iehova idia hesiai henia totona, bona Iehova be unai ia laloa bada. Tadikaka durua totona ita gaukara goada neganai do ita moale. Tadikaka ta be Kingdom Hall haginia bona disasta gabudiai heduru ia henia dainai ia moale bada. Ia gwau: “Tadikaka taihu be Kingdom Hall matamata idia abia o disasta ta murinai heduru idia abia dainai idia moale lau itaia neganai, lau mamia lau karaia gaukara be anina namona ia havaraia.”

⁸ Hanaihanai Iehova ena orea be dala ia tahua Iehova ena gaukara ia durua totona. Lagani 1904 ai, Tadikaka C. T. Russell, ia gwau: “Namona be ta ta idia laloa idia be Lohiabada ese ia abia hidi, edia nega, siahu, moni, bona ma gau haida idia  gaukaralaia totona, bona idia ta ta ese unai gaudia do idia gaukaralaia edia Biaguna idia hanamoa totona.” Ena be Iehova dainai gau haida ita rakatania, to hahenamo momo do ita davaria. (2 Sam. 24:21-24) Iseda nega, moni, goada bona diba be Iehova hesiai henia totona ita gaukaralaia diba, a?

9. Luka 10:2-4 amo dahaka ita dibaia?

⁹ Iseda nega. Iseda pablikeisen hahanaia bona printaia, Kingdom Hall bona Assembly Hall haginia, hebouhebou hegaegaelaia, disasta negadiai bona gaukara ma haida karaia totona, tadikaka be edia nega bona goada bada idia henia. Momokani dina ta ta ai hora be 24 sibona, to Iesu ena hakaua herevana ta ese ita do ia durua eda nega ita gaukaralaia namonamo totona. Iena hahediba taudia be haroro gaukara totona ia siaia neganai, ia hamaorodia: “Dala dekenai nega umui halusia lasi ta umui hedavari henia totona.” (Luka 10:2-4) Dahaka dainai Iesu be unai bamona ia hereva? Baibel ia diba bada tauna ta ia gwau: “Orient taudia edia hanamoa karana be ita ese ita karaia bamona lasi, idia igo diho sisina lasi, eiava imana idia udeudea lasi, to nega momo ta ta idia rosia, idia tui diho, bona tano dekenai idia goru diho danu. Unai ibounai karaia totona nega bada idia halusia.” Iesu be ena hahediba taudia ia hamaoroa lasi ma haida do idia kara auka henidia. To, ia ura do idia laloparara nega be bada lasi dainai, edia nega do idia gaukaralaia mai anina bada gaudia karaia totona. (Efe. 5:16) Unai sisiba herevana hegeregerena, eda nega bada be Basileia totona ita gaukaralaia diba, a?

10, 11. (a) Tanobada hegegemadai gaukara durua totona ita henia kontribusen be edena dala ai idia gaukaralaia? (b) Edena dala ai 1 Korinto 16:1, 2 ena hakaua herevana ese ita ia durua diba?

¹⁰ Iseda moni. Basileia gaukaradia durua totona, Iehova ena orea ese moni bada ia gaukaralaia. Lagani ta ta ai, moni milioni momo idia gaukaralaia loaloa naria taudia, painia taudia bona misinari taudia edia gaukara durua totona. Lagani 1999 ema bona hari, ogogami tanodia ai Kingdom Hall 24,500 mai kahana idia haginia vadaeni. To, Kingdom Hall 6,400 be idia do haginia lasi. Danu, hua ta ta ai Gima Kohorona bona Awake! magasin 100 milioni idia printaia. Unai gaukara ibounai be emu kontribusen monina ese ia durua.

¹¹ Aposetolo Paulo be kontribusen henia totona do ita badinaia hakaua hereva ta ia henia. (1 Korinto 16:1, 2 duahia.) Ia ese Korinto tadikaka ia hagoadaia wiki ena dina ginigunadia ai, idia dekenai ia noho gauna hegeregerena kontribusen moni sisina do idia atoa siri. Namo lasi idia naria ela bona wiki dokona bona moni be ia hegeregere lasi. Aposetolo edia nega bamona, hari, iseda tadikaka taihu danu be palani idia karaia edia noho dalana hegeregerena kontribusen idia henia totona. (Luka 21:1-4; Kara 4:32-35) Iehova ese unai bamona henia karana ia moalelaia.

12, 13. Dahaka dainai haida idia laloa reana edia goada bona diba be hegeregere lasi Iehova idia hesiai henia totona? To edena dala ai Iehova ese idia do ia durua?

¹² Iseda goada bona diba. Basileia totona eda goada bona diba ita gaukaralaia neganai, Iehova ese ita ia durua. Bema iseda goada ia ore, Ia gwauhamata ita do ia durua. (Isa. 40:29-31) Ita laloa iseda diba be hegeregere lasi Basileia ita durua totona, a? Ita laloa ma haida edia diba ese iseda ia hereaia, a? Laloatao, Iehova ese ta ena diba ia habadaia diba, Besalele bona Oholiaba dekenai ia karaia bamona.—Eso. 31:1-6; laulau ginigunana itaia.

¹³ Iehova ia ura lasi gau ta ese eda hariharibada karana do ia koua. (Aon. 3:27) Iuda taudia be Ierusalema ena dubu helaga idia haginia lou neganai, Iehova ese ia hamaorodia idia karaia gaukarana do idia laloa  namonamo. (Hag. 1:2-5) To, gau haida ese edia lalona idia veria dainai edia gaukara idia laloa bada lasi. Unai dainai, namona be sibona ita nanadaia: Iseda mauri lalonai Iehova ena ura ita atoa guna, a? Ita ese eda mauri do ita laloa namonamo bona palani ita karaia inai dina gabedia ai Dirava ena Basileia ita durua totona, a?

14, 15. (a) Ogogami tanodia ai idia noho tadikaka edia haheitalai ese edena dala ai ita ia durua? (b) Dahaka ita karaia be namo?

¹⁴ Momo edia noho gabudiai, mauri be auka bona ogogami be bada. Unai dainai, iseda orea be ia gaukara goada unai gabu ai idia noho tadikaka ia durua totona. (2 Kor. 8:14) To, unai ogogami tadikaka be hariharibada karana idia laloa bada danu. Mai moale ida hariharibada karana idia hahedinaraia dainai, Iehova ese edia kara ia laloa bada.—2 Kor. 9:7.

¹⁵ Africa ena ogogami tanona ta ai, tadikaka ese edia uma ai kahana ta idia makaia, bona ena aniani idia hoihoilaia neganai, idia davaria monina be Basileia gaukara durua totona idia henia. Danu, unai tano ai, tadikaka be Kingdom Hall ta haginia totona idia hegaegae bona tadikaka taihu be idia ura heduru idia henia. To, unai gaukara be edia hadohado negana lalonai do idia karaia. Unai dainai, tadikaka taihu be dina ai unai gaukara idia durua, to hanuaboi ai uma dekenai idia gaukara. Oibe, idia ese Iehova ena ura idia atoa guna! Edia kara dainai ita ese aposetolo edia negai idia noho Makedonia tadikaka ita laloa. Ena be idia “ogogami momokani,” to idia ese Paulo idia noia edia tadikaka totona moni do idia henia. (2 Kor. 8:1-4) Oibe, namona be Dirava ese ita ta ta dekenai ia henia gauna hegeregerena, harihari gaudia do ita henia.—Deuteronomi 16:17 duahia.

16. Bema ita ura Iehova ese iseda boubou gaudia do ia abia dae, dahaka ita laloatao be namo?

¹⁶ Boubou gaudia ita henia neganai, ita naria namonamo be namo. Israela taudia bamona, Dirava ese ia ura henia gaudia sibona do ita bouboulaia. Dahaka dainai Iehova ese iseda boubou gaudia ia dadaraia diba? Namona be ita laloatao, Iehova dekenai ita sibona bona eda famili edia tomadiho karana be mai anina bada. Unai dainai, bema Kingdom Hall haginia gaukara ita durua, disasta gabudiai heduru ita henia, bona gaukara ma haida ita karaia, to eda famili be tauanina dalanai ita naria lasi, bona edia tomadiho karana ita laloa lasi, Iehova ese eda boubou gauna do ia abia dae lasi. Unai be hegeregere ita dekenai ia noho lasi gauna be Iehova dekenai ita henia. (2 Korinto 8:12 duahia.) Danu, iseda abidadama ia goada noho be namo, unai amo Iehova ena lalonamo do ita haboioa lasi. (1 Kor. 9:26, 27) To, namona be ita laloatao, bema Baibel ena sisiba ita badinaia, iseda boubou gaudia dainai do ita moale bona Iehova ese do ia “abia dae.”

17, 18. Basileia totona gau haida idia rakatania taudia dekenai iseda lalohadai be dahaka? Bona ita ibounai ese dahaka ita laloa be namo?

¹⁷ Iseda tadikaka taihu momo be sibona idia henia Basileia idia durua totona, unai amo idia be “idia bubua wain boubouna hegeregerena.” (Fili. 2:17) Unai bamona taudia ita laloa bada. Danu, Basileia gaukaradia idia gunalaia tadikaka edia adavadia bona natudia ita hanamoa be namo, badina edia adavana o tamana idia henia Basileia ia durua totona.

¹⁸ Basileia durua totona do ita gaukara goada be namo. Namona be ita guriguri bona unai gaukara do ita durua daladia ita laloa. Bema unai bamona ita karaia, ita ese davana namona do ita davaria, hari bona “do ia mai nega oromana ai” danu.—Mar. 10:28-30.