1, 2. Hua matamatana ia hedinarai neganai, reana aposetolo taudia be dahaka idia laloa?

 ‘ORI be lasi, bona hua ena kahana sisina ita itaia diba. Varani adorahi, reana Ierusalema ena gima taudia ese hua ena diari sisina idia itaia danu. Sanhedrin taudia be unai idia itaia neganai, idia gwau hua matamata, Nisan ia ginidae vadaeni. Bena lahi amo saini ta idia karaia eiava hereva gwauraia taudia amo unai sivarai idia siaia iniseniai bona gabu ibounai dekenai. Lau diba, Pasova ia do ginidae lasi neganai, Iesu be do ia ura Ierusalema dekenai ia lao.’

² Reana Iesu ena aposetolo taudia haida be unai bamona idia laloa. Unai negai, idia be Perea ai idia noho, Ioridane Sinavai ena kahanai. Iesu be nega ginigabena Ierusalema ia lao neganai idia be ia idia bamoa. (Mat. 19:1; 20:17, 29; Mar. 10:1, 32, 46) Iuda taudia be Nisan hua ena dina ginigunana idia dibaia neganai, dina 13 murinai—Nisan 14, dina ia diho murinai—Pasova idia karaia.

3. Dahaka dainai Keristani taudia be Pasova ena deit idia laloa bada?

³ Lohiabada ena Anibou idia karaia dinana ena deit bona Pasova idia karaia dinana ena deit be tamona. Lagani 2014 ai, unai be April 14. Keristani taudia momokanidia bona kamonai taudia dekenai unai deit be mai anina bada. Dahaka dainai? Badina 1 Korinto 11:23-25 ia gwau: “Iesu ena mase dalana do idia karaia hanuaboina ai, ia ese paraoa ia abia, bona Dirava ia tanikiu henia murinai, ia makohia bona ia gwau: ‘Inai be egu tauanina ia laulaulaia, umui totona do lau henia. Inai bamona do umui karaia noho lau umui laloatao totona.’ Unai hegeregerena, idia aniani murinai, kapusi danu ia abia bona ia gwau: ‘Inai kapusi ese kontraka matamatana ia laulaulaia, egu rara dainai ia vara. Inai kapusi amo umui inua negadia ibounai, inai bamona do umui karaia noho lau umui laloatao totona.’”

4. (a) Memorial totona dahaka henanadai oi lalodia be namo? (b) Lagani ta ta ai Memorial ena deit be edena bamona idia abia hidi? (Maua ladana  “Memorial 2014” itaia.)

 ⁴ Iesu ese ena murinai idia raka taudia ia hamaorodia lagani ta ta ai Memorial do idia karaia, bona ai diba oi be unai hebou do oi lao. To, oi do lao lasi lalonai namona be sibona oi nanadaia: ‘Memorial ariana lau lao totona, edena dala ai lau hegaegae be namo? Memorial ai dahaka gaudia do idia gaukaralaia? Memorial be edena bamona do idia karaia? Dahaka dainai Memorial bona idia gaukaralaia wain bona paraoa lau laloa bada be namo?’

5. Pasova hegaegaelaia totona Iesu be ena aposetolo taudia dekenai dahaka ia gwau?

⁵ Iesu ese ena aposetolo taudia ia hamaoroa Pasova totona daiutu ta do idia hegaegaelaia neganai, ia gwau lasi herahera gaudia momo do idia atoa. To ia ura daiutu ia goeva bona ia hegeregere idia ibounai idia haboua totona. (Mareko 14:12-16 duahia.) Unai aria totona gau haida idia hegaegaelaia, hegeregere hatubua lasi paraoana bona wain kakakakana. Pasova idia karaia murinai, Iesu ese hatubua lasi paraoa bona wain ia herevalaia.

6. (a) Pasova murinai, Iesu ese paraoa be edena bamona ia herevalaia? (b) Memorial ai edena bamona paraoa idia gaukaralaia?

⁶ Unai negai Mataio be ia noho, bona gabeai ia gwau: “Iesu ese paraoa ia abia bona ia guriguri murinai, ia makohia bona ena hahediba taudia dekenai ia henia, ia gwau: ‘Umui abia bona umui ania.’” (Mat. 26:26) “Paraoa” lalonai hatubua muramura idia atoa lasi, Pasova ai idia gaukaralaia bamona. (Eso. 12:8; Deu. 16:3) Memorial paraoana be witi paraoa bona ranu amo idia karaia. Paraoa lalonai hatubua muramura o gau ma haida hegeregere, damena idia atoa lasi dainai, ia tubu lasi. To, ia be bisikesi bamona, ia kaukau bona ia makohi haraga diba. Hari, Memorial dinana ia kahirakahira neganai, elda taudia ese reana ta do idia noia paraoa ia gabua totona. Ia ese witi paraoa be ranu ida ia mikisia murinai, oela sisina be pani dekenai ia atoa bena paraoa ia gabua diba. Bema witi paraoa ia noho lasi, raisi, bali, koni, o unai bamona gauna ta ena paraoa ia gaukaralaia diba.

7. Iesu ese Lohiabada ena Anibou dekenai ia gaukaralaia kapusi lalonai dahaka ia noho? Memorial ai edena bamona wain ita gaukaralaia diba?

⁷ Mataio ma ia gwau, Iesu ese “kapusi ta ia abia bona Dirava ia tanikiu henia murinai, idia  dekenai ia henia, ia gwau: ‘Inai kapusi amo umui ibounai umui inua.’” (Mat. 26:27, 28) Iesu ese ia gaukaralaia kapusi lalonai be wain kakakakana ia noho. Edena dala ai ita diba unai be vain huahua ranuna lasi? Badina unai negai vain huahua gogoa negana ia ore vadaeni. Aigupito ai Pasova idia karaia neganai, wain idia gaukaralaia lasi. To, Iesu be ena aposetolo ida Pasova bona Lohiabada ena Anibou ia karaia neganai, wain ia gaukaralaia. Unai dainai, Keristani taudia ese Memorial lalonai wain idia gaukaralaia. To, unai wain be muramura aukadia haida hegeregere, brandy ida idia mikisia lasi. Ita gaukaralaia diba wain haida be Beaujolais, Burgundy, o Chianti.

8. Dahaka dainai Keristani taudia ese paraoa bona wain edia anina idia laloa bada?

⁸ Aposetolo Paulo ese ia hahedinaraia, aposetolo taudia sibona lasi to Keristani taudia danu be Lohiabada ena Anibou do idia karaia. Korinto tadikaka dekenai ia gwau: “Lohiabada amo lau abia hereva be umui dekenai lau hadibaia. Gauna be inai: Lohiabada Iesu . . . ese paraoa ia abia, bona Dirava ia tanikiu henia murinai, ia makohia bona ia gwau: ‘Inai be egu tauanina ia laulaulaia, umui totona do lau henia. Inai bamona do umui karaia noho lau umui laloatao totona.’” (1 Kor. 11:23, 24) Unai dainai, ema bona hari, Keristani taudia ese lagani ta ta ai Memorial idia karaia, bona paraoa bona wain edia anina idia laloa bada.

9. Haida be paraoa dekenai dahaka lalohadai kererena idia abia?

⁹ Tomadiho taudia haida idia gwau, Iesu be inai bamona ia hereva: “Inai be lauegu tauanina.” Unai dainai, idia abia dae paraoa be hoa dalanai Iesu ena tauanina korikorina ai ia lao. To, unai ia vara lasi. a Badina unai negai, Iesu ena tauanina bona hatubua lasi paraoana be aposetolo taudia vairanai idia noho. Unai dainai, Iesu ena hereva anina be paraoa ese iena tauanina ia  laulaulaia. Nega momo Iesu be unai bamona laulau herevadia ia gaukaralaia.—Ioa. 2:19-21; 4:13, 14; 10:7; 15:1.

10. Lohiabada ena Anibou dekenai idia gaukaralaia paraoa ese dahaka ia laulaulaia?

¹⁰ Aposetolo taudia ese idia itaia bona do idia ania paraoa be Iesu ena tauanina ia laulaulaia. Edena tauanina? Guna Dirava ena hesiai taudia idia laloa unai paraoa be horoa taudia edia kongrigeisen ia laulaulaia, Baibel ese unai kongrigeisen ia gwauraia, “Keriso ena tauanina.” Unai idia abia dae badina, Iesu ese paraoa ia makohia, to iena tauanina ena turia ta idia makohia lasi. (Efe. 4:12; Roma 12:4, 5; 1 Kor. 10:16, 17; 12:27) To gabeai, Baibel idia stadilaia namonamo murinai, idia laloparara paraoa be Iesu ena tauanina korikorina ia laulaulaia. Siri momo ese idia hahedinaraia, Iesu be ena “tauanina ai hisihisi ia abia” bona au dekenai idia kokoa kau. Unai dainai, Lohiabada ena Anibou dekenai idia gaukaralaia paraoa ese Iesu ena tauanina korikori, iseda kara dika kokia totona ia bouboulaia gauna, ia laulaulaia.—1 Pet. 2:21-24; 4:1; Ioa. 19:33-36; Heb. 10:5-7.

11, 12. (a) Iesu ese wain be edena bamona ia herevalaia? (b) Lohiabada ena Anibou dekenai idia gaukaralaia wain ese dahaka ia laulaulaia?

¹¹ Unai ese ita ia durua, Iesu ese wain ia herevalaia dalana ita lalopararalaia totona. Baibel ia gwau: “Unai hegeregerena, idia aniani murinai, kapusi danu ia abia bona ia gwau: ‘Inai kapusi ese kontraka matamatana ia laulaulaia, egu rara dainai ia vara.’” (1 Kor. 11:25) Baibel momo be The Holy Bible, Robert Young ese ia torea gauna idia badinaia. Ia gwau: “Inai kapusi be kontraka matamatana, lauegu rarana dekena amo.” (Bold be aiemai.) Iesu ese ia dogoatao kapusi be kontraka matamatana, a? Lasi. To, Iesu be kapusi lalonai ia noho wain ia herevalaia. Iesu ia gwau unai wain ese dahaka ia laulaulaia? Wain ese ena rara, ia bouboulaia gauna ia laulaulaia.

¹² Mareko ena Evanelia bukana lalonai, Iesu ia gwau: “Inai be egu rara, ia be ‘kontraka ena rara’ ia laulaulaia, taunimanima totona do ia bubua.” (Mar. 14:24) Oibe, Iesu ena rara be “taunimanima edia kara dika gwauatao totona do ia bubua.” (Mat. 26:28) Unai hegeregerena, wain kakakana ese Iesu ena rara ia laulaulaia. Unai mauri davalaia boubouna ena rara amo Dirava ese “iseda kerere ia gwauatao” diba.—Efeso 1:7 duahia.

13. Lagani ta ta ai, Memorial be edena bamona idia karaia?

¹³ Bema oi be nega ginigunana Iehova ena Witnes taudia edia Memorial hebouna dekenai oi lao, dahaka do oi itaia? Ia be gabu namona bona goevana ta ai do idia karaia, bona ibounai be do idia helai bona unai hebou do idia moalelaia. Reana flaoa namodia haida sibona do idia atoa, to pati ena herahera gaudia do oi itaia lasi. Lo elda ta ese mai hemataurai ida Baibel amo Memorial ena anina do ia herevalaia. Helai taudia ibounai do ia durua Keriso ese ita dainai ia karaia gauna do idia lalopararalaia. Do ia hahedinaraia Keriso be mauri davalaia boubouna bamona ia mase, unai amo mauri hanaihanai ita abia diba. (Roma 5:8-10 duahia.) Danu, ia ese Keristani taudia totona Baibel ese ia herevalaia helaro rua do ia gwauraia hedinarai.

14. Memorial hebouna ai, edena helaro rua do idia herevalaia?

¹⁴ Helaro ginigunana be Keristani taudia haida sibona totona, hegeregere aposetolo taudia. Idia be Keriso ida guba ai do idia lohia. (Luka 12:32; 22:19, 20; Apok. 14:1) Helaro iharuana be, hari Dirava idia hesiai henia kamonai Keristani taudia totona. Idia be tanobada paradaisona ai do idia noho ela bona hanaihanai. Dirava ena ura gauna be tanobada ai do ia vara, guba dekenai ia vara bamona. Keristani taudia be nega daudau lalonai unai idia gurigurilaia. (Mat. 6:10) Baibel ia gwau, unai negai mauri namona do idia moalelaia ela bona hanaihanai.—Isa. 11:6-9; 35:5, 6; 65:21-23.

15, 16. Memorial ai paraoa be edena bamona do idia gaukaralaia?

 ¹⁵ Memorial ena tok dokona kahanai, tadikaka ese do ia hahedinaraia idia be Iesu ese Lohiabada ena Anibou ia karaia dalana do idia badinaia. Matamanai ita herevalaia bamona, unai negai hatubua lasi paraoana bona wain kakakakana do idia gaukaralaia. Idia be tok henia tadikaka ena badinai ia noho teibolo latanai idia atoa. Tadikaka be Baibel siri ta amo Iesu ese paraoa dekenai ia karaia gauna do ia herevalaia. Hegeregere, Mataio 26:26 do ia duahia, ia gwau: “Iesu ese paraoa ia abia bona ia guriguri murinai, ia makohia bona ena hahediba taudia dekenai ia henia, ia gwau: ‘Umui abia bona umui ania. Inai be egu tauanina ia laulaulaia.’” Iesu ese hatubua lasi paraoana ia makohia, unai amo iena kahana kahana ai idia helai aposetolo taudia ia henia diba. April 14 ena Memorial ai do oi itaia hatubua lasi paraoana be idia makohia bona mereki latanai idia atoa.

¹⁶ Mereki haida do idia gaukaralaia, unai amo nega kwadogina lalonai helai taudia ibounai dekenai paraoa idia siaia lao diba. Unai aria lalonai aniani bada eiava kohu momo do idia gaukaralaia lasi. Tadikaka ta ese guriguri kwadogina ia gwauraia murinai, mereki do idia siaia loaloa. Lagani 2013 ena Memorial bamona, haida sibona (eiava reana ta lasi) be paraoa do idia ania.

17. Memorial ai wain be edena bamona do idia gaukaralaia?

¹⁷ Unai murinai Mataio ese ia herevalaia gauna do idia karaia. Ia gwau: “[Iesu ese] kapusi ta ia abia bona Dirava ia tanikiu henia murinai, idia dekenai ia henia, ia gwau: ‘Inai kapusi amo umui ibounai umui inua, badina inai be egu rara, ia be “kontraka ena rara” ia laulaulaia, taunimanima edia kara dika gwauatao totona do ia bubua.’” (Mat. 26:27, 28) Unai siri hegeregerena, idia guriguri murinai wain kakakakana ena “kapusi” be helai taudia dekenai do idia siaia loaloa.

18. Ena be paraoa do ita ania lasi o wain do ita inua lasi, to dahaka dainai Memorial hebouna ita lao be mai anina bada?

¹⁸ Iesu ese ia hahedinaraia iena guba Basileia ai do idia lohia taudia sibona ese paraoa do idia ania bona wain do idia inua. (Luka 22:28-30 duahia; 2 Tim. 4:18) Unai dainai, Memorial idia lao taudia momo be paraoa bona wain idia itaia sibona. To, Memorial dekenai idia lao be mai anina bada, badina unai amo idia hahedinaraia Iesu ena boubou gauna idia laloa bada. Memorial ai, idia ese Iesu ena mauri davalaia boubouna dainai do idia abia hahenamo idauidau idia laloa diba. Edia helaro be, “hisihisi badana” amo do idia roho mauri “hutuma bada” taudia huanai do idia noho. Unai abidadama taudia be “Mamoe Natuna ena rarana lalonai edia dabua idia huria bona idia hakurokuroa vadaeni.”—Apok. 7:9, 14-17.

19. Memorial totona oi hegaegae bona unai hebou ai laloparara oi abia totona, dahaka oi karaia be namo?

¹⁹ Tanobada hegegemadai Iehova ena Witnes taudia be unai spesel hebou totona idia hegaegae. Memorial be do lasi neganai, wiki haida lalonai ita be taunimanima do ita boiria unai hebou idia mai totona. Danu, Memorial purana ai ita momo be Baibel lalonai lagani 33 C.E. ai Iesu ese ia karaia gaudia bona Lohiabada ena Anibou be do lasi neganai idia vara gaudia edia sivarai do ita duahia. Namona be palani ita karaia, unai amo Memorial ita lao diba. Bona namona be program ia do matamaia lasi neganai ita ginidae, unai amo vadivadi taudia ita welkam henidia bona program ibounai ita kamonai. Ita ibounai, kongrigeisen taudia bona vadivadi taudia, be do ita laloparara bema tok henia tadikaka ese ia duahia siri be eda Baibel amo ita badinaia, bona edia anina ia herevalaia neganai ita kamonai. To gau badana be, Memorial hebouna ai ita noho ese ia hahedinaraia ita be Iesu ena boubou gauna ita laloa bada. Danu, ita hahedinaraia iena hahegani ita badinaia. Ia gwau: “Inai bamona do umui karaia noho lau umui laloatao totona.”—1 Kor. 11:24.