Vanegai idia halasia Gima Kohorona oi duahia namonamo, a? Henunai idia noho henanadai mani oi haerelaidia:

Edena negai Iesu ese “dibura ruma ai idia noho lauma” ia haroro henidia? (1 Pet. 3:19)

Toana be Iesu ia toreisi lou murinai, unai lauma dikadia dekenai Dirava ese idia do ia panisia karana ia harorolaia.​—6/15, rau 23.

Edena negai Iesu ese taunimanima be “mamoe” bona “nanigosi” bamona do ia hahemaoro henidia? (Mat. 25:32)

Iesu be hisihisi badana negana ai do ia mai neganai, bese iboudiai be mamoe o nanigosi bamona do ia hahemaoro henidia. Unai be tomadiho koikoi ibounai idia ore murinai.​—7/15, rau 6.

Witi bona ava dikadia edia parabole lalonai, kara dika taudia be edena negai do idia taitai bona isena do idia koria? (Mat. 13:36, 41, 42)

Hisihisi badana ai, do idia laloparara edia heau mauri gabuna be lasi neganai, unai bamona do idia karaia.​—7/15, rau 13.

Iesu ena hereva igui hesiai tauna mai ena kamonai bona kara maoromaoro tauna dekenai, be edena negai ia guguru? (Mat. 24:45-47)

Unai be Pentekoste 33 C.E. ai ia guguru lasi, to lagani 1914 murinai ia guguru matamaia. Lagani 1919 ai, Iesu ese unai igui hesiai tauna ia abia hidi iena hesiai taudia, Keristani taudia ibounai unai, dekenai Baibel ena hereva momokani ia henia totona.​—7/15, rau 21-23.

Edena nega ai Iesu ese igui hesiai tauna do ia abia hidi iena kohu ibounai ia naria totona?

Vaira negana ai igui hesiai tauna mai ena kamonai be ena guba ahuna ia abia neganai, unai do ia vara.​—7/15, rau 25.

Baibel ese haida edia ladana ia gwauraia lasi badina idia be anina lasi o dika taudia, a?

Lasi. Baibel lalonai abidadama taudia haida bona dika taudia haida edia ladana idia noho lasi. (Ruta 4:1-3; Mat. 26:18) Baibel ese abidadama aneru rua sibona edia ladana ia gwauraia.​—10/1, rau 10.

Sachsenhausen kamepa amo Iehova ena Witnes taudia 230 be Mase Rakana lalonai idia raka. Dirava ena lauma helaga bona dahaka ese ia durudia idia mauri totona?

Ena be edia tauanina ia manoka badina idia hitolo bona gorere, to idia be hanaihanai ta ta idia hagoadaia idia raka noho totona.​—8/15, rau 18.

Dahaka dainai Israela taudia be Ioridane Sinavai idia raka hanaia bona Gwauhamata Tanona ai idia vareai sivaraina ese eda abidadama ia hagoadaia?

Ena be sinavai be ia abata, to Iehova ese sinavai ena heau ia hadokoa, unai amo iena taunimanima idia raka hanaia diba. Unai ese Israela taudia edia abidadama ia hagoadaia bona Ia dekenai idia tabekau. Unai sivarai ese ita ia hagoadaia danu.​—9/15, rau 16.

Hari inai negai, Mika 5:5 ese ia perovetalaia “mamoe naria taudia 7” bona “gunalaia taudia 8” be edena dala ai ia guguru?

Ita laloparara Mika 5:5 ese ia perovetalaia “mamoe naria taudia 7” bona “gunalaia taudia 8” (o “hanua lohiadia,” BHḡ) be kongrigeisen elda taudia idia laulaulaia. Idia ese Iehova ena taunimanima idia hagoadaia, vaira negana ai idia dekenai do ia vara tuari ta dainai idia hegaegae totona.​—11/15, rau 20.