1, 2. Keristani taudia ese edena aniveseri do idia laloa bada be namo, bona dahaka dainai?

 INAI hereva “aniveseri” oi kamonai neganai, dahaka oi laloa? Bema oi be oi headava, reana emu headava dinana do oi laloatao. Reana haida be dina badana ta hegeregere, edia tano ena independens dinana do idia laloatao. To, bese ta be lagani 3,500 lalodiai aniveseri ta ia karaia. Unai oi diba, a?

² Unai aniveseri be Pasova ariana. Israela taudia ese unai aria idia karaia neganai, idia be Dirava ese Aigupito ena igui hesiai amo ia ruhadia negana idia laloatao. Oi dekenai unai aniveseri be mai anina bada. Dahaka dainai? Badina emu mauri lalonai ia be mai anina bada gauna ta ia laulaulaia. To, reana do oi laloa, ‘Pasova be Israela besena ese idia karaia, to lau be Israela tauna lasi. Dahaka dainai unai aniveseri do lau laloa bada?’ Unai henanadai be inai siri ese ia haerelaia: “Keriso, iseda Pasova mamoena be idia bouboulaia vadaeni.” (1 Kor. 5:7) Unai siri ena anina ita lalopararalaia totona, Israela taudia ese idia karaia Pasova ita stadilaia be namo. Bona ita tahua dahaka dainai Iesu ese Keristani taudia dekenai ia henia haheganina ta lalonai unai aria be mai anina bada.

3, 4. Pasova ginigunana idia do karaia lasi neganai dahaka ia vara?

³ Tanobada hegegemadai Israela lasi taudia milioni momo be Pasova ginigunana idia do karaia lasi neganai idia vara gaudia edia sivarai idia diba. Reana Baibel bukana Esodo lalonai unai idia duahia, ena sivarai idia kamonai, eiava muvi dekenai idia itaia.

⁴ Israela taudia be lagani momo lalonai Aigupito ai igui hesiai gaukara idia karaia murinai, Iehova ese Mose bona Arona be Farao dekenai ia siaia, Israela taudia ia ruhaia totona. To, Farao be ia hekokoroku bona ia ura  lasi Israela taudia do ia ruhaia. Unai dainai, Iehova ese hisihisi 10 amo Aigupito taudia ia panisia. Bena Dirava ese hisihisi namba 10 ai Aigupito taudia edia vara guna natudia ibounai ia hamasedia. Unai murinai Farao ese Israela taudia ia ruhaia.—Eso. 1:11; 3:9, 10; 5:1, 2; 11:1, 5.

5. Israela taudia be Aigupito idia do rakatania lasi neganai, dahaka idia karaia guna? (Laulau ginigunana itaia.)

⁵ To, Israela taudia be Aigupito idia do rakatania lasi neganai, dahaka idia karaia guna? Unai nega be lagani 1513 B.C.E., March 21/22 bamona, bona Heberu taudia edia kalenda ai unai be hua ladana Abib; gabeai idia haidaua Nisan. a Dirava ia gwau Nisan 10 ai Israela taudia be Nisan 14 ai do idia karaia gaudia totona do idia hegaegae matamaia. Heberu taudia edia kalenda ai dina ia diho (6 oklok), daba ia rere, bena dina ma ia diho lou (6 oklok) be dina ta. Hegeregere, Thursday dina ia diho ela bona Friday dina ia diho be dina ta. Nisan 14 ai, ruma bese ta ta ese mamoe (o nanigosi) tau ta idia alaia, bona ena rara be iduara ena ataiai bona kahana kahana dekenai do idia atoa. (Eso. 12:3-7, 22, 23) Idia ese lahi dekenai idia gabua mamoe natuna, hatubua muramura ia noho lasi paraoa, bona raurau iditadia idia ania. Dirava ena aneru be Aigupito tano do ia hanaia bona edia vara guna natudia ibounai do ia alaia, to kamonai Israela taudia edia vara guna natudia do ia hamasea lasi. Unai murinai, Israela besena ese Aigupito do ia rakatania.—Eso. 12:8-13, 29-32.

6. Dahaka dainai Israela taudia ese lagani ta ta ai Pasova idia moalelaia noho be namo?

⁶ Israela taudia be Pasova idia karaia neganai, Aigupito ena igui hesiai amo Dirava ese ia ruhadia negana idia laloatao. Dirava ia gwau: “Inai dina danu do umui laloa noho hanaihanai, iena aria danu do umui karaia Lohiabada ena. Uru ibounai taudia danu ese do idia karaia, bona aria ena taravatu do idia badinaia hanaihanai.” Nisan 14 ai Pasova aria idia karaia murinai, Israela taudia be dina ma seven lalonai Au Raurau Ruma Maragidia Aria idia karaia danu. Unai aria idia karaia dinadia 8 idia gwauraia Pasova. (Eso. 12:14-17; Luka 22:1; Ioa. 18:28; 19:14) Pasova be Heberu taudia ese lagani ta ta ai idia moalelaia ariana ta.—2 Siv. 8:13.

7. Pasova ginigabena ai, Iesu ese edena aria matamatana be ena aposetolo taudia ia hadibadia?

⁷ Iesu bona ena aposetolo taudia be Israela besena amo dainai, Mose ena Taravatu hegeregerena, Pasova idia karaia. (Mat. 26:17-19) Pasova ginigabena idia karaia neganai, Iesu be ena aposetolo taudia dekenai lagani ta ta ai do idia karaia aria matamatana ta ia hadibadia. Unai be Lohiabada ena Anibou. To, edena dina ai unai aria do idia karaia?

8. Pasova bona Lohiabada ena Anibou dainai, dahaka henanadai ia vara?

⁸ Iesu ese Pasova ginigabena ia karaia murinai, ena aposetolo taudia dekenai Lohiabada ena Anibou karaia dalana ia hadibaia. Unai dainai, Lohiabada ena Anibou be Pasova dinana ai idia karaia. To, reana oi itaia hari Israela taudia ese idia moalelaia Pasova ena dina, be ita ese Keriso ena mase ita laloatao dinana amo ia idau. Dahaka dainai? Dirava ena hahegani Israela besena dekenai ese unai ia haerelaia. Dirava ese Israela taudia dekenai Nisan 14 ai mamoe do idia alaia ena taim ia hadibaia; unai taim ai Pasova do idia hamatamaia.—Esodo 12:5, 6 duahia.

9. Esodo 12:6 hegeregerena, edena negai Pasova mamoe idia alaia? (Maua ladana  “Edena Taim Ai Idia Karaia?” itaia.)

 ⁹ Esodo 12:6 ese ia hahedinaraia mamoe be “dina ia diho kahirakahira neganai” do idia alaia. Baibel ma haida, hegeregere Jewish Tanakh, ai inai hereva “adorahi kahana” idia gaukaralaia. Unai dainai, ita gwau diba mamoe be dina ia diho vadaeni to gabu ia diari sisina lalonai idia alaia mase, unai be Nisan 14 ena matamana ai idia karaia.

10. Haida idia laloa Pasova mamoe be edena negai idia alaia? To, Baibel ese unai ia hamomokania, a?

¹⁰ Lagani haida murinai, Israela taudia ese Pasova mamoe ibounai be dubu helaga dekenai idia abia lao, bona hora momo lalonai idia bouboulaidia. Unai dainai, Israela taudia haida idia laloa Esodo 12:6 be Nisan 14 ena dokona ia herevalaia. Anina be dina ia diho matamaia negana (dina tubua murinai) amo ela bona dina ia diho murinai. To bema unai be momokani, vadaeni edena negai Pasova mamoe idia ania? Profesa Jonathan Klawans ia gwau, reana Nisan 15 ai Pasova mamoe idia ania. To ma ia gwau, Esodo bukana ese unai ia hahedinaraia lasi. Rabi taudia edia toretore lalonai, lagani 70 C.E. ai dubu helaga idia do hadikaia lasi neganai, Pasova idia karaia dalana idia herevalaia lasi.

11. (a) Lagani 33 C.E., Pasova dinana ai, Iesu dekenai dahaka ia vara? (b) Dahaka dainai lagani 33 C.E., Nisan 15 idia gwauraia “Sabati dinana badana”? (Futnout itaia.)

¹¹ Vadaeni, lagani 33 C.E. ai, Israela taudia ese edena dina ai Pasova idia karaia? Nisan 13 ai, ‘Pasova animal idia bouboulaia’ dinana ia kahirakahira neganai, Iesu ese Petero bona Ioane ia siaia, ia gwau: “Umui lao, Pasova umui hegaegaelaia ita ania totona.” (Luka 22:7, 8) Vadaeni, Nisan 14, Thursday hanuaboi, dina ia diho murinai, Iesu be ena aposetolo taudia ida Pasova idia karaia. Unai murinai, Iesu ese Lohiabada ena Anibou ia hamatamaia. (Luka 22:14, 15) Unai hanuaboi ai Iesu idia dogoatao bona idia kota henia. Nisan 14 ai, dina tubua kahirakahira ai, Iesu be au dekenai idia kokoa kau, bena adorahi ai ia mase. (Ioa. 19:14) Unai dainai ita gwau diba, Pasova mamoena idia alaia dinana ai, “Keriso, iseda Pasova mamoena” ese ena mauri ia bouboulaia danu. (1 Kor. 5:7; 11:23; Mat. 26:2) Bena Nisan 15 ia do matamaia lasi neganai, Iesu idia guria. b—Lev. 23:5-7; Luka 23:54.

12, 13. Edena dala ai Israela taudia edia natudia be Pasova idia moalelaia danu?

¹² To, mani Aigupito ai ia vara gauna ita laloa lou. Mose ia gwau, vaira neganai Dirava ena taunimanima ese Pasova be lagani ibounai do idia karaia “ela bona hanaihanai.” Lagani ta ta ai unai aria idia karaia neganai, natudia be edia tama sina idia nanadaia dahaka dainai unai aria idia karaia. (Esodo 12:24-27 duahia; Deu. 6:20-23) Unai dala amo natudia danu be Pasova do idia “laloa noho hanaihanai.”—Eso. 12:14.

¹³ Uru matamatadia idia tubu daekau neganai, Israela taudia ese edia natudia dekenai Pasova ena sivarai idia hadibaia. Idia hadibadia Iehova be ia idia tomadiho henia taudia ia gimaia. Natudia idia diba Iehova be ia noho momokani, ena taunimanima ia laloa bada bona ia gimadia. Hisihisi namba 10 ai Aigupito taudia edia vara guna natudia ia alaia mase, to Israela taudia edia vara guna natudia ia hamauria neganai, unai ia hamomokania.

14. Keristani tama sina ese Pasova ena sivarai amo edia natudia dekenai dahaka idia hadibaia diba?

¹⁴ Keristani tama sina be lagani ta ta ai edia natudia dekenai Pasova ena sivarai idia herevalaia lasi. To, oi ese emu natudia oi hadibaia, Dirava be ena taunimanima ia gimaia, a? Emu natudia dekenai oi hahedinaraia oi abia dae momokani, hari Dirava ese ena taunimanima ia gimaia danu, a? (Sal. 27:11; Isa. 12:2) Unai gaudia umui herevalaia neganai, oi sisiba auka henidia lasi, to mai moale ida umui herevahereva hebou be namo. Unai gaudia umui herevalaia neganai, emui famili do umui durua Iehova umui abidadama henia noho totona.

15, 16. Pasova bona Esodo bukana amo Iehova dekenai dahaka ita dibaia?

¹⁵ Pasova amo ita dibaia mai anina bada gauna ma ta be, Iehova ese ena taunimanima ia hamauria diba. Hegeregere, ia ese ‘Aigupito amo ia hakaudia siri’ bona ia hamauridia. Idia ia hamauria dalana mani oi laloa. Idia be ori bona lahi ese ia hakaua. Davara Kakakakana ia parara bona tano kaukauna amo idia raka hanai. Idia hanaia murinai, idia itaia Aigupito ena ami taudia be davara ese ia koudia. Bena Israela taudia idia gwau: “Lau be ane do lau abia, Lohiabada ena, . . . Hosi bona idia guia taudia, be davara dekenai ia negea diho vadaeni. Lohiabada ese iena goada, bona iena siahu, be lau dekenai ia henia. Ia sibona ese lau ia hamauria vadaeni.”—Eso. 13:14, 21, 22; 15:1, 2; Sal. 136:11-15.

¹⁶ Bema oi be mai emu natudia, idia oi hadibaia Iehova, Hamauria Tauna, idia abidadama henia totona, a? Emu kara, hereva bona abia hidi gaudia amo natudia ese emu abidadama Iehova dekenai idia itaia, a? Ruma bese ena tomadiho neganai, Esodo karoa 12-15 umui herevalaia diba, bona Iehova ese ena taunimanima ia hamauria dalana umui herevalaia. Nega haida unai lalohadai oi habadaia totona, Kara 7:30-36 eiava Daniela 3:16-18, 26-28 oi herevalaia diba. Oibe, namona be ita matamata bona buruka  taudia ita abia dae Iehova be guna Mose ena negai ena taunimanima ia hamauria hegeregerena, vaira negana ai ita do ia hamauria danu.—1 Tesalonika 1:9, 10 duahia.

17, 18. Dahaka dainai Iesu ena rara ese Pasova mamoe ena rara ia hereaia?

¹⁷ Keristani taudia momokanidia be lagani ta ta ai Pasova idia karaia lasi. Unai aria be Mose ena Taravatu henunai ia noho, to ita be unai Taravatu henunai ita noho lasi. (Roma 10:4; Kol. 2:13-16) To, ita be mai anina bada aniveseri ta ita karaia. Unai be Dirava ena Natuna ena mase ita laloatao. To, Aigupito ai idia karaia Pasova ena kahana haida be mai anina bada ita dekenai.

¹⁸ Israela taudia ese edia iduara ena ataiai bona kahana kahana dekenai idia atoa mamoe ena rara ese edia vara guna natudia idia hamauria. Hari, ita be Pasova dinana o dina ma ta ai, Dirava dekenai animal ita bouboulaia lasi. To, boubou gauna ma ta ese ita dekenai mauri hanaihanai ia henia diba. Aposetolo Paulo ia gwau, “vara guna natudia edia kongrigeisen, edia ladadia be guba ai idia torea vadaeni.” Iesu ena “rara ia negea lao” karana amo dala ia kehoa, horoa Keristani taudia be guba ai idia mauri hanaihanai diba. (Heb. 12:23, 24) Tanobada ai mauri hanaihanai do idia abia Keristani taudia be unai rara ese ia hamauridia danu. Namona be nega ibounai inai hereva idia laloatao: “Unai lalokau natuna ese mauri davana ia karaia bona ena rara amo ita ia ruhaia. Unai dainai Dirava ese iseda kerere ia gwauatao, iena hebogahisi hereadaena hegeregerena.”—Efe. 1:7.

19. Edena dala ai Iesu ena mase dalana ese iseda abidadama Baibel ena peroveta herevadia dekenai idia hagoadaia?

¹⁹ Israela taudia ese Pasova mamoena idia alaia neganai, ena turia ta idia hamakohia lasi. (Eso. 12:46; Num. 9:11, 12) “Dirava ena Mamoe Natuna,” mauri davalaia boubouna ia henia tauna, be edena bamona? (Ioa. 1:29) Au dekenai idia kokoa kau neganai, iena badinai be kara dika taudia rua idia noho. Idia mase haraga totona, Israela taudia ese Pilato idia noia au dekenai idia kokoa kau tatau edia turia do idia makohia. Unai dala amo Nisan 15 ena sabati dinana be do lasi neganai, edia tauanina idia kokia diba. Unai dainai, tuari taudia ese kara dika taudia rua edia aena idia makohia, “to Iesu dekenai idia mai neganai, idia itaia ia be ia mase vadaeni, unai dainai ena aena idia makohia lasi.” (Ioa. 19:31-34) Unai be Aigupito ai Pasova mamoena idia alaia dalana hegeregerena, ita gwau diba unai mamoe be lagani 33 C.E., Nisan 14 ai idia vara gaudia “edia laulau sibona.” (Heb. 10:1) Ma danu, idia vara gaudia ese Salamo 34:20 ena hereva idia hagugurua, bona unai ese iseda abidadama Baibel ena peroveta herevadia dekenai idia hagoadaia.

20. Pasova bona Lohiabada ena Anibou edia idau be dahaka?

²⁰ Pasova idia karaia dalana, bona Lohiabada ena Anibou idia karaia dalana be mai edia idau. Hegeregere Aigupito ai, Israela taudia be mamoe ena hidio idia ania to ena rara idia inua lasi. Unai be Iesu ese ena aposetolo taudia ia hadibaia dalana amo ia idau. Ia gwau “Dirava ena Basileia lalonai” do idia lohia taudia ese paraoa do idia ania bona wain do idia inua. Unai ese iena tauanina bona iena rara idia laulaulaia. Stadi gabena ai unai do ita herevalaia namonamo.—Mar. 14:22-25.

21. Dahaka dainai Pasova ena sivarai ita diba be namo?

²¹ To, Dirava ese Israela taudia ia kara henia dalana dekenai Pasova be mai anina bada, bona ita ese unai aria amo gau momo ita dibaia. Ena be Pasova be Israela taudia sibona ese idia “laloa noho hanaihanai” gauna, to ita Keristani taudia ese unai sivarai ita dibaia be namo, badina “Toretore Helagadia be Dirava ena hahekau henunai idia torea.”—2 Tim. 3:16.