Lagani 1985 ai, egu mauri lagani be 10 neganai, Cambodia amo natu maragidia haida be egu sikuli Columbus, Ohia, U.S.A. dekenai idia mai. Idia huanai mero ta be English gado sisina ia diba. Ia ese laulau amo Cambodia ai idia vara hisihisi karadia, ala-ala bona hanua amo idia heau sivaraidia be lau dekenai ia gwauraia. Hanuaboi ai idia lau laloa dainai lau tai. Lau ura idia dekenai Paradaiso bona toreisi lou helarona lau herevalaia, to English gado idia diba lasi. Ena be lau be mero maragina, to egu lalona lau hadaia Cambodia gado do lau dibaia, unai amo egu sikuli turadia dekenai Iehova lau herevalaia diba. Unai nega ai lau diba lasi, unai ese egu vaira nega maurina do ia haidaua.

Cambodia gado lau dibaia be auka. Nega rua lau ura Cambodia gado dibaia karana lau hadokoa, to Iehova ese egu tama sina amo lau ia hagoadaia. Gabeai, egu tisa bona sikuli turadia ma haida ese lau idia doria moni gaukara namona lau tahua totona. To lau ura lau painia dainai, kosi ta lau karaia unai amo pat-taim moni gaukara do lau karaia bona lau painia diba. Nega momo sikuli murinai, lau ese painia haida lau bamoa bona ai haroro hebou. Danu, lau volantia ma haida dekenai English gado lau hadibaia totona​—⁠unai ese gabeai lau ia durua.

Egu mauri lagani be 16 neganai, lau kamonai Long Beach, California, U.S.A. ai, Cambodia grup ta ia noho. Unai grup lau vadivadi henia bona Cambodia gado duahia dalana lau dibaia. Sikuli lau haorea murinai, painia gaukara lau hamatamaia bona egu gabu ai idia noho Cambodia taudia lau haroro henidia. Egu mauri lagani be 18 neganai, lau laloa Cambodia dekenai do lau lao. Ia be do gabu dikana, to lau diba Cambodia ai taunimanima 10 milioni idia noho, bona idia momo be sivarai namona idia do kamonai lasi. Unai nega ai, Cambodia ai kongrigeisen be tamona bona pablisa be 13 sibona. Egu mauri lagani be 19 neganai, nega ginigunana Cambodia lau vadivadi. Bena lagani rua murinai, egu lalona lau hadaia unuseniai do lau noho. Lau ese English gado hahanaia bona hadibaia pat-taim gaukara ta lau davaria. Gabeai, lau headava bona lau bona egu adavana emai tahua gaudia be hegeregere. Ai moale badina Cambodia taudia momo ai durua Dirava dekenai edia mauri idia gwauhamatalaia totona.

Iehova ese lau ‘ura henia gaudia be lau dekenai ia henia.’ (Sal. 37:4) Oibe, haroro gaukara ese gaukara ibounai ia hereaia. Lau be lagani 16 Cambodia ai lau noho vadaeni, bona matamanai pablisa be 13 sibona, to hari kongrigeisen ibounai be 12 bona grup maragidia be foa!​—⁠Jason Blackwell ese ia sivarailaia.