1. Dirava ese iena toana hegeregerena ita ia karaia dainai, dahaka ita karaia diba?

 NEGA momo inai hereva ita kamonai, “Unai mero be tamana bamona.” Momokani, natudia momo be tamadia o sinadia edia toana bamona bona edia kara idia hahedinaraia. Iehova, iseda guba Tamana, be mauri ia Henia Diravana. (Sal. 36:9) Bona ita be iena natudia dainai, iena kara haida ita hahedinaraia danu. Ita be iena toana hegeregerena ia karaia dainai, ita laloa maoromaoro, abia hidi ita karaia bona ma haida ita tura henidia diba.—Gen. 1:26.

2. Dahaka dainai Iehova be iseda Turana namona ai ita halaoa diba?

² Iehova be iseda Turana namona ai ita halaoa diba, badina Ia ese ita ia lalokau henia, bona ita ese Ia bona ena Natuna ita abidadama henia. Iesu ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Idaunegai, Iehova ena hesiai taudia momo be Ia idia tura henia. Mani idia rua edia sivarai ita herevalaia.

3, 4. Edena dala ai Aberahamo ena hetura karana Iehova ida be Israela taudia edia amo ia idau?

³ Iehova ese Israela taudia edia tamana ia gwauraia “lauegu  turana Aberahamo.” (Isa. 41:8) Danu, 2 Sivarai 20:7 ese Aberahamo ia gwauraia Dirava ena turana. Dahaka dainai Aberahamo be ena Havaraia Tauna ena turana ai ia lao? Badina Iehova ia abidadama henia.—Gen. 15:6; Iamesi 2:21-23 duahia.

⁴ Matamanai, Aberahamo ena tubudia, Israela taudia unai, ese Iehova be edia Tamana bona Turana ai idia halaoa. To, gabeai idia ese edia hetura karana Dirava ida idia hadikaia. Dahaka dainai? Badina Iehova ena gwauhamata idauidau idia abidadama henidia lasi.

5, 6. (a) Edena dala ai Iehova be emu Turana namona ai oi halaoa? (b) Sibona dekenai dahaka henanadai ita henia be namo?

⁵ Iehova oi dibaia noho lalonai, emu abidadama bona lalokau ia dekenai do ia goada ia lao. Mani oi laloa, Baibel oi stadilaia matamaia neganai, oi laloparara Dirava be ia mauri noho bona oi tura henia diba. Danu, oi laloparara Adamu ena gwau-edeede dainai, ita ibounai be mai eda kara dika. Bona oi laloparara taunimanima ibounai be Dirava amo idia daudau. (Kol. 1:21) To gabeai, oi laloparara iseda guba Tamana be ita amo ia daudau lasi bona ita ia laloa bada. Oi laloparara Iehova ese ena Natuna ena mauri ia bouboulaia, bona unai oi abidadama henia neganai, oi be Dirava oi tura henia matamaia.

⁶ Unai gaudia ita laloa lou neganai, namona be sibona ita nanadaia: ‘Egu hetura karana Dirava ida lau hagoadaia noho, a? Dina ta ta ai egu abidadama bona lalokau Iehova, egu Turana namona, dekenai ia goada ia lao, a?’ Idaunegai, Iehova ia tura henia tauna ma ta be, Gideona. Mani ena sivarai ita herevalaia, bona ita itaia edena dala ai ia ita tohotohoa diba.

7-9. (a) Gideona dekenai dahaka ia vara, bona unai amo dahaka ia dibaia? (Laulau ginigunana itaia.) (b) Edena dala ai Iehova ita tura henia diba?

⁷ Israela taudia be Gwauhamata Tanona ai idia vareai murinai, hahemaoro tauna Gideona be nega aukana lalonai Iehova ia hesiai henia. Gunalaia Tauna bukana karoa 6 ese ia hahedinaraia, Iehova ena aneru be Opera dekenai Gideona ia vadivadi henia. Unai nega ai, Midiana taudia be Israela taudia edia hetura karana Iehova ida idia hadikaia diba. Unai dainai, Gideona be wain idia moia rumana lalonai ia komu bona witi ia kwadia. Unai amo Midiana taudia amo witi ia hunia haraga diba. Gideona ia hoa badina aneru ta ia hedinarai, bona ia hamaoroa ia be “goada herea tauna.” Ena be Iehova ese Israela taudia be Aigupito ai ia hamauridia, to Gideona ia daradara Iehova ese idia do ia hamauria lou eiava lasi. Unai dainai, Iehova ena aneru ese Gideona ia gwauhamata henia Iehova be ia do ia durua.

⁸ Gideona ia daradara edena dala ai “Israela be Midiana taudia edia siahu dekena amo do [ia] hamauria.” Iehova ese ia haere henia ia gwau: “Lau ese oi dekenai do lau noho, vadaeni oi ese Midiana taudia do oi halusia, tau tamona do oi halusia bamona.” (Gun. 6:11-16) To, Gideona ia daradara noho dainai, Iehova ia noia toa ta do ia hahedinaraia. Namona be ita laloatao, aneru bona Gideona idia herevahereva lalonai, Gideona ia abia dae Iehova be momokani ia noho.

⁹ Gabeai ia vara gauna ese Gideona ena abidadama ia hagoadaia, bona Dirava kahirakahira ia lao. Gideona ese aniani ia hegaegaelaia bona aneru ia henia. Aneru ese itotohi be aniani dekenai ia atoa neganai, lahi ese aniani ia gabua ore. Vadaeni Gideona ia laloparara unai aneru be Iehova ese ia siaia. Mai gari bada ida ia gwau: “Dirava, Lohiabada! Lau ese Lohiabada ena aneru ena vairana lau itaia vadaeni!” (Gun. 6:17-22) Ia vara gauna ese Gideona ena hetura karana Iehova ida ia hadikaia, a? Lasi! To, Gideona ia mamia ia be Dirava ida maino ai ia noho. Unai ita diba badina Gideona ese ia haginia boubou patana ta ena ladana ia gwauraia, “Lohiabada Saloma.” Heberu gado ai ena anina be, “Iehova be maino.” (Gunalaia Tauna  6:23, 24 duahia.) Dina ta ta ai Iehova ese ita totona ia karaia gaudia ita laloa dobu neganai, ita laloparara ia be iseda Turana korikori. Hanaihanai Ia ita guriguri henia neganai, do ita mamia ia ida maino ai ita noho bona eda hetura karana be ia goada.

10. Salamo 15:3, 5 ena hereva hegeregerena, Iehova ita tura henia totona dahaka ita karaia be namo?

¹⁰ Iehova ita tura henia totona, mai anina bada gaudia haida ita karaia be namo. Salamo karoa 15 ai Davida ese ia hahedinaraia ita be dahaka ita karaia diba, unai amo ‘Iehova ena dubu helaga ai do ita noho,’ eiava ena turana ai ita lao diba. (Sal. 15:1) Unai gaudia rua mani ita herevalaia: ma haida edia ladana hadikaia lasi karana bona kara momokani badinaia karana. Davida ese Iehova ena dubu helaga ai ia ura noho tauna ia herevalaia, ia gwau: “Ia ese iena hereva dekenai, haida ia hadikaia lasi. . . . Bona kerere lasi tauna hadikaia totona, taunimanima ese moni idia henia gwauraia neganai, unai tau ese unai moni ia abia dae lasi.”—Sal. 15:3, 5.

11. Dahaka dainai ma haida edia ladana hadikaia karana ita dadaraia be namo?

¹¹ Davida ma ia gwau: “Emui malana do umui naria, hereva dika do umui gwauraia lasi.” (Sal. 34:13) Bema unai sisiba ita badinaia lasi, iseda hetura karana eda guba Tamana ida be do ia dika. Ma haida edia ladana hadikaia karana be Iehova ena inai tauna badana, Satani, ena kara badana ta. Greek herevana “Diabolo” ena anina be “ma ta ena ladana hadikaia totona koikoi herevadia ia gwauraia tauna.” Bema ma haida dekenai ita gwauraia herevadia bona idia ita herevalaia dalana ita naria namonamo, unai ese ita ia durua Iehova kahirakahira do ita noho. Elda taudia ita kara henia neganai, unai ita laloatao be namo.—Heberu 13:17; Iuda 8 duahia.

12, 13. (a) Dahaka dainai gau ibounai lalonai kara momokani ita hahedinaraia be namo? (b) Ita kara momokani neganai, dahaka namo ia vara diba?

¹² Iehova ena hesiai taudia be kara momokani taudia. Aposetolo Paulo ia gwau: “Ai totona do umui guriguri noho, badina ai diba emai lalomamina be ia goeva. Bona ai ura mai momokani ida gau ibounai ai karaia.” (Heb. 13:18) Oibe, ita ura “mai momokani ida gau ibounai [ita] karaia,” unai dainai ita ura lasi eda tadikaka ita koidia,” unai dainai ita ura lasi eda tadikaka ita koidia. Hegeregere, bema tadikaka ta be iseda kampani ai ia gaukara, namona be mai momokani ida ita kara henia bona ena pei maorona ita henia. Ita be Keristani taudia dainai, namona be eda gaukara taudia bona ma haida be mai momokani ida ita kara henidia. Bona bema ita be tadikaka ta ena kampani ai ita gaukara, namo lasi ia ita doria ita dekenai dagi badana ia henia totona.

¹³ Tanobada hegegemadai taunimanima ese Iehova ena Witnes taudia idia hanamoa, badina idia be kara momokani taudia! Hegeregere, kampani badana ta ena bosi ia itaia Iehova ena Witnes taudia be edia gwauhamata idia badinaia. Ia gwau: “Umui be emui gwauhamata hegeregerena umui karaia.” (Sal. 15:4) Unai kara ese ita ia durua Iehova ita tura henia noho totona. Bona unai ese iseda lalokau guba Tamana ena ladana ia hanamoa.

14, 15. Edena dala ai haroro gaukara ai ita davaria taudia ita durua diba, Iehova idia tura henia totona?

¹⁴ Ena be haroro gaukara ai ita davaria taudia momo idia abia dae Dirava ia noho, to idia Tura henia lasi. Edena dala ai idia ita durua diba? Iesu ese ena hahediba taudia be haroro totona rua rua ia siaidia neganai, ia hamaorodia herevana mani ita laloa. Ia gwau: “Umui vareai rumadia lalonai inai do umui gwauraia guna: ‘Maino do ia noho inai ruma dekenai.’ Danu, bema maino ia ura henia tauna ta ia  noho lasi, emui maino be do umui abia lou. To bema maino ia ura henia tauna ta ia noho, emui maino be ia latanai do ia noho.” (Luka 10:5, 6) Bema taunimanima ita kara namo henidia, hereva momokani do idia abia dae. Bema ita idia dagedage henia taudia ita kara namo henidia, unai ese edia badu karana do ia koua bona nega ma ta ai hereva momokani do idia abia dae.

¹⁵ Ena be ita haroro henia taudia be tomadiho koikoi edia hadibaia hereva, o Baibel ena taravatu idia utua kastom karadia idia badinaia, to idia ita kara namo henidia be namo. Danu, hebou idia mai taudia ibounai ita welkam henidia be namo. Idia haida be tanobada ena mauri dalana idia hesikulaia bona idia ura ita tomadiho henia Diravana idia dibaia. Atikol ladana, “Baibel ese Mauri Ia Haidaua” lalonai unai bamona taudia edia sivarai ita duahia diba.

16. Edena dala ai ita be Iehova ena turadia bona ia ida ita “gaukara hebou taudia”?

¹⁶ Nega momo, idia gaukara hebou taudia be tura namodia ai idia lao. Iehova dekenai edia mauri idia gwauhamatalaia taudia be iena turadia sibona lasi, to ia ida idia “gaukara hebou taudia.” (1 Korinto 3:9 duahia.) Oibe, haroro bona hahediba taudia halaoa gaukarana ita karaia neganai, ita ese eda guba Tamana ena kara namodia ita dibaia. Ita itaia edena dala ai iena lauma helaga ese ita ia durua sivarai namona ita harorolaia totona.

17. Edena dala ai hebouhebou badadia bona maragidia ese idia hahedinaraia Iehova be iseda Turana?

¹⁷ Bema eda nega bada be haroro gaukara ai ita gaukaralaia, do ita mamia ita be Iehova kahirakahira ita noho. Hegeregere, ita itaia edena dala ai Iehova ese eda haroro gaukara idia ura koua taudia edia dala ia koua. Lagani gunadia ai idia vara gaudia mani oi laloa. Ita itaia gaudia momo ese idia hamomokania Iehova be ita ia hakaua noho. Ia ese hebou bona pablikeisen idauidau amo ita ia hadibaia dalana dekenai ita hoa. Iseda hebouhebou badadia ai ita itaia eda lalokau Tamana be iseda hekwakwanai bona ura gaudia ia lalopararalaia. Famili ta be iseda hebouhebou ta murinai, idia gwau: “Program ese emai kudouna ia hamarerea. Ai mamia Iehova ese ita ta ta ia lalokau henia, bona ia ura ita ibounai do ita kwalimu.” Germany amo tadikaka ta bona adavana be Ireland ai hebouhebou badana idia lao murinai, Brens Ofesi idia tore henia bona idia gwau, idia moale badina tadikaka ese mai lalokau ida idia abidia dae bona naridia. Ma idia gwau: “To, ai ura Iehova bona iena King, Iesu Keriso ai hanamoa bada. Idia ese ai idia boiria inai lalotamona tadikaka oreana ida ai hebou totona. Ita be lalotamona karana ita herevalaia sibona lasi, to dina ta ta ai ita moalelaia danu. Dublin ena spesel hebouhebou lalonai ai davaria ekspiriens ese hanaihanai ai do ia hadibaia, umui ida  iseda Dirava hereadaena ita hesiai henia be hahenamo hereadaena.”

18. Iseda herevahereva karana Iehova ida ita laloa neganai, sibona dekenai dahaka henanadai ita henia be namo?

¹⁸ Taunimanima idia herevahereva namonamo neganai, edia hetura karana ia goada. Hari, taunimanima momo be Intanet idia gaukaralaia bona teks mesiji idia siaia. To, iseda herevahereva karana eda Turana namona, Iehova, ida be edena bamona? Ia be “guriguri ia kamonai Diravana.” (Sal. 65:2, BHḡ.) To, ita be hanaihanai nega ita atoa Ia ita hereva henia totona, a?

19. Dahaka ese ita do ia durua Iehova dekenai eda hemami ita gwauraia hedinarai totona?

¹⁹ Iehova ena hesiai taudia haida ese edia kudouna ai idia noho gaudia idia herevalaia be auka. To, Iehova ia ura ia ita guriguri henia neganai, eda kudouna ai idia noho gaudia be ia dekenai do ita gwauraia. (Sal. 119:145; Lal. 3:41) Ena be Iehova dekenai eda hemami ita gwauraia hedinarai be auka, to heduru ita abia diba. Paulo be Roma kongrigeisen ia tore henia, ia gwau: “Nega haida ita diba lasi, dahaka do ita gurigurilaia. Unai bamona negadia ai, ena be ita diba lasi dahaka do ita gwauraia, to Dirava ena siahu amo heduru ita abia. Dirava ese taunimanima edia kudouna ia tahua bona lauma helaga amo idia vara herevadia edia anina ia lalopararalaia. Badina lauma helaga be Dirava ena ura hegeregerena ia noinoi bona unai bamona ia karaia helaga taudia durua totona.” (Roma 8:26, 27) Baibel bukadia hegeregere Iobu, Salamo bona Aonega Herevadia ai idia noho herevadia ita laloa dobu karana ese ita do ia durua, Iehova dekenai eda hemami ita herevalaia totona.

20, 21. Filipi 4:6, 7 ese edena dala ai ita ia hagoadaia?

²⁰ Bema hekwakwanai badadia ita davaria, namona be Paulo ena revareva Filipi tadikaka dekenai ita laloatao, ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” Iehova ida unai bamona ita herevahereva neganai, lalogoada do ita abia. Paulo ma ia gwau: “Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7) Oibe, namona be ita moale, badina “Dirava ena maino” ita abia, bona unai ese iseda kudouna bona lalohadai ia gimaia.

²¹ Guriguri karana ese ita ia durua eda hetura karana Iehova ida ita hagoadaia totona. Unai dainai, namona be ‘nega ibounai ita guriguri.’ (1 Tes. 5:17) Namona be inai stadi ese eda hetura karana Iehova ida ia hagoadaia, bona eda lalona ita hadaia iena kara maoromaoro taravatudia ita badinaia totona. Bona namona be nega ita atoa ita davaria hahenamo ita lalodia totona, badina Iehova be iseda Tamana, Dirava bona Turana.