1, 2. (a) Daika ena headava dainai guba ai moale bada do ia vara? (b) Edena henanadai edia haere do ita tahua?

 IDIA ura headava taudia be nega daudau lalonai idia hegaegae. To, hari ita be headava idauna ta, King ta ena headava do ita herevalaia. Unai headava be lagani 2,000 bamona lalonai idia hegaegaelaia noho! Hari, unai king ena headava be ia kahirakahira vadaeni. Iena ruma ai miusiki do idia gadaralaia bona guba ai ane do idia abia, idia gwau: “Iah umui hanamoa, badina Iehova iseda Dirava, Siahu Ibounai Diravana, be ia lohia matamaia vadaeni. Namona be ita moale, do ita moale bada herea, bona ia ita hanamoa, badina Mamoe Natuna ena headava negana ia ginidae, bona iena adavana be headava totona ia hegaegae vadaeni.”—Apok. 19:6, 7.

² Unai “Mamoe Natuna” be Iesu Keriso. (Ioa. 1:29) Iena headava dainai guba ai moale bada do ia vara. Iena headava dabua ena toana be edena bamona? Iena adavana be daika? Edena dala ai unai headava totona ia hegaegae? Unai headava be edena negai do ia vara? Guba ai moale bada do ia vara, to tanobada helarona idia abia taudia be edena bamona? Inai stadi ai Salamo karoa 45 ita herevalaia neganai, unai henanadai edia haere do ita davaria.

3, 4. (a) Salamo torea tauna ese headava tauna ena dabua be edena bamona ia herevalaia, bona dahaka dainai headava tauna ia moale? (b) Headava tauna ida idia moale “King haida edia natudia hahine” bona “kwini” be daidia?

³ Salamo 45:8, 9 duahia. Headava tauna, Iesu Keriso be ena headava dabua hairaina ia hahedokilaia. Iena dabua dekenai “muramura namo herea,” hegeregere muro bona kasia edia bonana ia daekau. Israela ai unai muramura be dehoro helagana ida idia mikisia hebou.—Eso. 30:23-25.

⁴ Guba ai King be ena headava ia kahirakahira neganai, ena ruma lalonai aneru edia ane regena ese ena moale ia habadaia. “Kwini,” Dirava ena guba oreana unai, bona “King haida edia natudia hahine,” aneru helagadia unai, be king ida idia moale hebou. Aneru idia boiboi idia gwau: “Namona be ita moale, do ita moale bada herea . . . badina Mamoe Natuna ena headava negana ia ginidae”!

5. “Mamoe Natuna ena adavana” be daika?

⁵ Salamo 45:10, 11 duahia. Ita be headava tauna ita diba vadaeni, to iena adavana be daika? Ia be kekeni korikorina lasi, to horoa Keristani taudia 144,000 ibounai ia laulaulaia. Iesu be unai horoa kongrigeisen ena kwarana. (Efeso 5:23, 24 duahia.) Idia be Keriso ida ena Mesia Basileia lalonai do idia lohia. (Luka 12:32) Herevana, Mamoe Natuna be edeseni ia lao, to horoa Keristani taudia be ia murinai idia raka. (Apok. 14:1-4) Idia be “Mamoe Natuna ena adavana” ai idia lao bona ia ida guba ai do idia noho.—Apok. 21:9; Ioa. 14:2, 3.

6. (a) Dahaka dainai horoa Keristani taudia idia gwauraia, “King ena natuna kekeni”? (b) Dahaka dainai edia ‘bese taudia idia laloaboio’ be namo?

⁶ Headava matamata kekeni idia gwauraia danu, “King ena natuna kekeni.” (Sal. 45:13, BHḡ) Unai “king” be daika? Ia be Iehova. Ia ese horoa Keristani taudia be ena “natudia” ai ia halaoa. (Roma 8:15-17) Idia be guba ai Mamoe Natuna do idia adavaia dainai, Iehova ese ia hamaorodia, ‘edia bese taudia bona edia tamana ena ruma do idia laloaboio.’ Idia ese ‘guba gaudia do idia laloa noho, to tanobada gaudia do idia laloa lasi.’—Kol. 3:1-4.

7. (a) Edena dala ai Keriso ese ena adavana be headava totona ia hegaegaelaia? (b) Headava matamata kekeni ese ena adavana be edena bamona ia laloa?

⁷ Lagani momo lalonai, Keriso ese ena adavana ia hegaegaelaia guba ai idia headava totona. Aposetolo Paulo ia gwau Keriso “ese kongrigeisen ia lalokau henia bona ia dainai sibona ia henia hegeregerena, unai amo kongrigeisen ia hahelagaia, bona Dirava ena hereva ena ranu amo ia hagoevaia. Ia ura kongrigeisen be ena matanai ia hairai, ia dekenai miro, makuku, eiava unai bamona gaudia ta be lasi, to ia helaga bona goeva be namo.” (Efe. 5:25-27) Paulo ese Korinto horoa Keristani taudia ia hamaoroa, ia gwau: “Lau ese umui lau laloa bada, Dirava ese umui ia laloa bada hegeregerena, badina lau ese tau tamona dekenai emui maoheni lau karaia vadaeni, unai tauna be Keriso, bona lau ura umui be ia kara goeva rami-hebou kekenina bamona, ia dekenai lau henia.” (2 Kor. 11:2) Headava matamata kekeni ena tomadiho dalana be ia goeva bona Dirava ese ia abia dae dainai, King Iesu Keriso ia gwau ena adavana be mai “hairaina.” Bona headava matamata kekeni be King vairanai ia tui diho bona ia abia dae ia be iena “lohia.”

8. Dahaka dainai headava matamata kekeni idia gwauraia, mai “hairaina” be maoro?

⁸ Salamo 45:13, 14a duahia. Headava matamata kekeni be “mai hairaina” ida headava totona ia lao. Apokalupo 21:2  ese headava matamata kekeni be taoni ta, Ierusalema Matamatana unai, ida ia hahegeregerea. Unai taoni be “Dirava ena hairai” ia abia bona “ia be ia diaridiari, dava bada nadina bamona, iasipa nadina ena diaridiari bamona, bona ia be galasi bamona.” (Apok. 21:10, 11) Apokalupo bukana ese Ierusalema Matamatana ena hairai ia herevalaia namo herea. (Apok. 21:18-21) Unai dainai, salamo torea tauna ia gwau, unai headava matamata kekeni be mai “hairaina”! Oibe, guba dekenai king ena headava be unai bamona.

9. Headava matamata kekeni be daika dekenai idia hakaua lao, bona iena dabua ena toana be edena bamona?

⁹ Headava matamata kekeni be ena adavana, Mesia King dekenai idia hakaua lao. Ia be “helaga bona goeva,” badina King ese “Dirava ena hereva ena ranu amo ia hagoevaia.” (Efe. 5:26, 27) Unai kekeni be headava totona dabua maorodia ia hahedokilaia be namo. Oibe, “iena dabua be golo varo dekena amo idia hatua” bona “king ena vairana dekenai idia hakaua vareai.” Mamoe Natuna ia adavaia totona, “ia ese maoro ia abia dabua namo hereana ta ia hahedokilaia totona. Unai dabua be ia diaridiari bona ia goeva. Unai dabua namo hereana ese helaga taudia edia kara maoromaoro ia laulaulaia.”—Apok. 19:8.

10. Mamoe Natuna be edena negai do ia headava?

¹⁰ Apokalupo 19:7 duahia. Mamoe Natuna be edena negai do ia headava? Ena be Apokalupo 19:7 ia gwau, “iena adavana be headava totona ia hegaegae,” to murina siridia be unai headava idia herevalaia lasi. Unai siri ese hisihisi badana ena dokona kahanai do idia vara gaudia idia herevalaia goevagoeva. (Apok. 19:11-21) Unai ena anina be headava be King ia do kwalimu lasi neganai do ia vara, a? Lasi. Apokalupo bukana ai matahanai ibounai be edia guguru negadia korikorina hegeregerena idia torea lasi. Salamo karoa 45 ese ia hahedinaraia King, Iesu Keriso ese ‘ena tuari kaia be gaba gauna dekenai do ia kwatua’ bona ena inai taudia ia halusia bona ‘ia kwalimu’ murinai, unai headava do ia vara.—Sal. 45:3, 4.

11. Keriso be ia do headava lasi neganai, dahaka do ia karaia?

¹¹ Unai dainai ita gwau diba vaira negana ai do idia vara gaudia be inai: Ginigunana be, Keriso ese “ariara hahine badana,” Babulonia Badana o tanobada ena tomadiho koikoi ibounai unai, do ia haorea. (Apok. 17:1, 5, 16, 17; 19:1, 2) Iharuana be, Keriso ese Aramagedono, Siahu Ibounai Diravana ena dina badana ena tuari, amo Satani ena tanobada dikana do ia haorea. (Apok. 16:14-16; 19:19-21) Bena dokonai, Tuari King do ia kwalimu badina ia ese Satani bona ena demoni be guri dobu masemase lalonai do ia negea diho. Unuseniai idia be mase taudia bamona gau ta do idia karaia diba lasi.—Apok. 20:1-3.

12, 13. (a) Mamoe Natuna be edena negai do ia headava? (b) Guba dekenai, daidia be Mamoe Natuna ena headava do idia moalelaia?

¹² Dina gabedia ai, Dirava idia badinaia ela bona idia mase horoa Keristani taudia be do idia toreisi lou bona guba maurina do idia abia. Keriso ese Babulonia Badana ia hadikaia ore murinai, ia ese horoa orena taudia ibounai be guba ai do ia abia daekau. (1 Tes. 4:16, 17) Unai dainai, Aramagedono ia do mai lasi neganai, “headava matamata hahine” ena orea taudia ibounai be guba dekenai idia daekau vadaeni. Bena Aramagedono murinai, Mamoe Natuna do ia headava. Unai be moale bada negana! Apokalupo 19:9 ia gwau: “Mamoe Natuna ena headava aria dekenai idia boiria taudia be idia moale.” Oibe, headava matamata hahine oreana, 144,000 taudia unai, be do idia moale bada. Bona King be do ia moale bada, badina iena horoa tadikaka ibounai be ia ida  guba ai idia noho. (Luka 22:18, 28-30) To, idia sibona do idia moale lasi.

¹³ Matamanai ita herevalaia bamona, aneru be ane do idia abia, idia gwau: “Namona be ita moale, do ita moale bada herea, bona ia ita hanamoa, badina Mamoe Natuna ena headava negana ia ginidae, bona iena adavana be headava totona ia hegaegae vadaeni.” (Apok. 19:6, 7) Iehova ena hesiai taudia tanobada ai be edena bamona? Idia danu do idia moale, a?

14. Salamo karoa 45 ese ia herevalaia “durua kekeni taudia” be daidia?

¹⁴ Salamo 45:12, 14b, 15, duahia. Peroveta tauna Sekaraia ia peroveta, dokona negana ai tanobada hegegemadai taunimanima bona horoa orena taudia be mai moale ida, Iehova do idia hesiai henia. Ia gwau: “Unai dinadia lalonai tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.’” (Sek. 8:23) Unai “tau ibounai 10” be Salamo 45:12 ese ia gwauraidia “Turo kekenidia” bona “taga herea taudia.” Idia ese horoa orena taudia edia lalonamo bona heduru abia totona, idia dekenai harihari gaudia idia abia lao. Lagani 1935 amo horoa orena taudia ese taunimanima milioni momo dekenai ‘dala maoromaoro idia hadibaia.’ Anina be idia dekenai hereva momokani idia hadibaia. (Dan. 12:3) Unai “tau ibounai 10” be edia mauri idia hagoevaia, tomadiho koikoi idia dadaraia bona horoa orena taudia idia durua. Unai dainai, idia gwauraidia “durua kekeni taudia.” Edia mauri be Iehova dekenai  idia gwauhamatalaia, bona idia hahedinaraia idia be Headava Matamata King, Iesu Keriso idia badinaia.

15. Edena dala ai “durua kekeni taudia” be horoa orena taudia idia durua?

¹⁵ Horoa orena taudia be “durua kekeni taudia” dekenai idia moale, badina mai gari lasi ida tanobada hegegemadai “Basileia ena sivarai namona” harorolaia gaukarana idia durua. (Mat. 24:14) ‘Lauma helaga bona headava matamata hahine idia gwau, “Mai!”’ To, idia sibodia lasi, edia hereva idia kamonai taudia danu idia gwau: “Mai!” (Apok. 22:17) Unai ena anina be, “mamoe ma haida” idia kamonai horoa taudia idia gwau, “Mai!” bona idia danu be ma haida dekenai idia gwau, “Mai!”—Ioa. 10:16.

16. Iehova ese “mamoe ma haida” dekenai dahaka hahenamo ia henia?

¹⁶ Unai horoa orena taudia be edia durua taudia idia lalokau henia. Bona idia moale badina Headava Matamata Tauna ena Tamana, Iehova, ese unai “mamoe ma haida” ia abia hidi Mamoe Natuna ena headava idia moalelaia totona. Peroveta herevana ia gwau, unai “durua kekeni taudia” be “mai moale bada ida, king ena ruma” “dekenai idia hakaua vareai.” Oibe, Mamoe Natuna ena headava be guba ai idia karaia neganai, tanobada ai mauri hanaihanai helarona idia abia “mamoe ma haida” danu do idia moale. Apokalupo bukana ia gwau, “hutuma bada” taudia be “Mamoe Natuna vairanai idia gini.” Idia be tanobada ai Iehova ena lauma dubu helagana dekenai hesiai gaukara helagana idia karaia.—Apok. 7:9, 15.

17, 18. Edena dala ai Mamoe Natuna ena headava ese hahenamo do ia havaraia? Keriso ena Lagani 1,000 Lohia Negana lalonai daidia edia tamana ai do ia lao?

¹⁷ Salamo 45:16 duahia. Headava matamata kekeni ena “durua kekeni taudia” be do idia moale, badina idia itaia unai headava ese tanobada matamatana ai hahenamo momo do ia havaraia. Headava Matamata King ese tanobada ai ena “tubuna” do ia hatoredia isi lou, bona iena “natuna” ai do ia halaodia. (Ioa. 5:25-29; Heb. 11:35) Idia haida do ia abia hidi, ‘tanobada kahana ibounai dekenai, king taudia ai do idia lao totona.’ Unai ena anina be, Keriso ese hari idia noho abidadama elda taudia haida do ia abia hidi, tanobada matamatana ai gunalaia gaukara idia karaia totona.—Isa. 32:1.

¹⁸ Keriso ena Lagani 1,000 Lohia Negana lalonai, ia be ma haida edia tamana ai do ia lao. Edena dala ai? Iesu ena mauri davalaia boubouna idia abidadama henia taudia ibounai be mauri hanaihanai do idia abia. (Ioa. 3:16) Unai amo ia be edia “Hanaihanai Noho Tamana” ai do ia lao.—Isa. 9:6, 7.

19, 20. Dahaka dainai Keristani taudia ibounai dekenai, Salamo 45 ese ia herevalaia gaudia be mai anina bada?

¹⁹ Salamo 45:1, 17 duahia. Keristani taudia ibounai dekenai, Salamo karoa 45 ese ia herevalaia gaudia be mai anina bada. Tanobada ai idia do noho horoa orena taudia be idia moale, badina kahirakahira edia tadikaka bona Headava Tauna ida guba ai do idia haboua. “Mamoe ma haida” be mai ura ida edia King hairaina idia badinaia, bona idia moale badina tanobada ai horoa orena taudia ida idia durua diba. Headava murinai, Keriso bona ia ida ena Basileia do idia lohiaia taudia ese tanobada dekenai hahenamo momo do idia havaraia.—Apok. 7:17; 21:1-4.

²⁰ Ita itaia Mesia King idia perovetalaia herevadia idia guguru dainai, ita ura ma haida dekenai iena ladana do ita hadibaia. Oibe, King do ita “hanamoa ela bona hanaihanai.”