OGOGAMI vabu ta ese ena natuna mero tamona ia rosia. Ia hoa bona moale badina matamanai ena natuna ia mase, to hari ia mauri lou bona ena kiri toana ia itaia. Vabu ena vadivadi tauna ia gwau: “Oi itaia, oiemu natuna be ia mauri noho.”

Unai toreisi lou karana be lagani 3,000 bamona gunanai ia vara. Unai sivarai be 1 King Taudia karoa 17 ai oi duahia diba. Unai vadivadi tauna be Dirava ena peroveta tauna Elia. Bona unai vabu be daika? Baibel ese ena ladana ia gwauraia lasi, to ia be Sarepata ena taoni ai ia noho vabu ta. Ena natuna ena toreisi lou karana ese iena abidadama ia hagoadaia. Ena sivarai amo mai anina bada gaudia haida do ita dibaia.

Iehova ia gwau, Israela ena king dikana Ahaba ena lohia negana ai hitolo bada do ia vara. Elia ese hitolo do ia vara herevana ia harorolaia murinai, Dirava ese Ahaba dekena amo Elia ia hunia, bona hoa dalanai galo manudia ia siaia paraoa bona vamu amo Elia idia ubua totona. Bena Iehova ese Elia ia hamaoroa: “Oi toreisi, Sarepata, Sidono kahana hanua ta dekenai oi lao, unuseni do oi noho. Lau ese vabu ta lau oda henia, ia ese oi do ia ubua.”​—⁠1 Kin. 17:1-9.

Elia be Sarepata dekenai ia ginidae neganai, ogogami vabu ta ia itaia au ia haboua noho. Unai vabu ese Elia do ia ubua, a? Ia be ogogami dainai, edena dala ai Elia do ia ubua? Ena be Elia ia daradara, to ia ese vabu ia hereva henia. Ia gwau: “Ranu sisina mani oi mailaia, lau inua.” Vabu be ranu abia totona ia lao gwauraia neganai, Elia ma ia gwau: “Aniani sisina danu lau dekenai oi mailaia.” (1 Kin. 17:10, 11) Vabu ese ranu ia henia be auka lasi, to aniani do ia henia be auka sisina.

Vabu ia haere, ia gwau: “Mauri Lohiabada, oiemu Dirava [“Iehova,” NW] ena  ladana dekenai oi lau hamaoroa momokani, lau be beredi ta lasi, paraoa sisina sibona, mereki dekenai, bona olive dehoro sisina kapusi lalonai. Harihari lau be lahi totona au lau haboua noho, lau lao, aniani do lau nadua. Vadaeni lau bona egu natuna ai ania murinai, ai be do ai mase.” (1 Kin. 17:12) Unai sivarai amo dahaka ita dibaia?

Vabu ia itaia Elia be Dirava ia gari henia Israela tauna. Unai ita diba badina ia gwau: “Mauri Lohiabada, oiemu Dirava [“Iehova,” NW].” Ena be Israela edia Dirava ia diba, to ia be unai Dirava ia hesiai henia lasi. Badina Iehova ia herevalaia neganai, ia gwau lasi “egu Dirava.” Ia be Poinikia ena hanua ta, Sidono, ena taoni ladana Sarepata ai ia noho. Sarepata be Bala tomadiho henia karana amo ia honu. To, Iehova ese unai vabu ena kudouna ai gau namona ta ia itaia.

Ena be unai vabu be kaivakuku tomadiho henia taudia huanai ia noho, to ia hahedinaraia ia be Iehova ia abidadama henia. Iehova ese Elia ia siaia unai vabu dekenai, unai amo idia ruaosi ia durua diba. Unai amo mai anina bada gauna ta ita dibaia.

Sarepata ai haida be Bala idia tomadiho henia lasi. Iehova ese Elia be unai vabu dekenai ia siaia karana ese ia hahedinaraia, Iehova be Ia idia do hesiai henia lasi kudou-maoro taudia Ia laloa bada. Oibe, “bese ibounai lalonai ia idia gari henia bona kara maoromaoro idia karaia taudia be ia ese ia abia dae.”​—⁠Kara 10:35.

Emu teritori ai, taunimanima hida be Sarepata vabu bamona? Ena be tomadiho koikoi taudia huanai idia noho, to idia be tomadiho maorona idia tahua noho. Reana idia be Iehova idia diba sisina o idia diba lasi, bona tomadiho momokanina idia abia dae totona heduru idia abia be namo. Oi ese unai bamona taudia oi tahua bona durua, a?

Elia ese vabu ia noia do ia karaia gauna mani oi laloa. Matamanai, vabu be Elia ia hamaoroa, ia be aniani orena do ia nadua bona ena natuna ida do idia ania murinai, do idia mase. To, Elia be dahaka ia gwau? Ia gwau: “Oi laloa lasi, oi lao, beredi maragina ta oiemu paraoa bona olive dehoro dekena amo do oi gabua, lau dekenai do oi mailaia. Unai murinai, oi bona oiemu natuna ena do oi gabua. Badina be Lohiabada, Israela ena Dirava, be inai bamona ia hereva, ia gwau, ‘Paraoa, mereki dekenai ia noho gauna be do ia ore lasi, bona olive dehoro, kapusi dekenai ia noho gauna danu be do ia ore lasi, ela bona Lohiabada ese medu be tanobada dekenai do ia hadihoa dinana.’”​—⁠1 Kin. 17:11-14.

Reana haida be do idia ura lasi edia aniani orena be ma ta idia henia, ani? To, vabu be unai bamona lasi. Ena be ia ese Iehova ia diba namonamo lasi, to Elia ia abidadama henia bona ena noinoi hegeregerena ia karaia. Unai be hahetoho badana, to ia be abia hidi maorona ia karaia.

Dirava ese unai ogogami vabu ia laloaboio lasi. Elia ena gwauhamata hegeregerena, Iehova ese vabu ena aniani ia habadaia, unai amo Elia, vabu bona ena natuna dekenai aniani ia noho ela bona hitolo negana ia ore. Oibe, “[Iehova] ese Elia dekena amo ia gwauhamata hegeregere, unai paraoa be mereki dekenai ia ore lasi, bona unai olive dehoro be kapusi dekenai ia ore lasi.” (1 Kin. 17:16; 18:1) Bema vabu ese Elia ia kamonai henia lasi, paraoa  bona olive dehoro sisina amo ia gabua paraoa be reana edia aniani dokona. To, ena kara amo ia hahedinaraia Iehova ia abidadama henia, bona Elia ia ubua guna.

Ita dibaia gauna be inai: Dirava ese abidadama idia hahedinaraia taudia ia hanamoa. Bema emu abidadama idia tohoa gaudia idia vara to oi gini goada, Ia ese oi do ia durua. Ia be emu Hamauria Tauna, Gimaia Tauna bona Turana ai do ia lao, unai amo oi do ia durua hekwakwanai oi haheaukalaia totona.​—⁠Eso. 3:13-15.

Lagani 1898 ai, Zion’s Watch Tower ese unai vabu ena sivarai amo ita dibaia gauna ta ia herevalaia, ia gwau: Bema vabu be mai ena abidadama bona Elia ia kamonai henia, Iehova ese do ia durua. Bema ia ese Iehova ia abidadama henia lasi, vadaeni Iehova be vabu ma ta do ia tahua. Unai atikol ma ia gwau, ita danu be unai bamona. Nega haida hahetoho idia vara neganai, Iehova ese ia koua lasi. Bema ita be mai eda abidadama, “hahenamo do ita davaria, to bema ita be abidadama lasi, hahenamo do ita davaria lasi.”

Hahetoho ita davaria neganai, gau badana be Baibel bona iseda pablikeisen amo heduru ita tahua. Unai murinai, Iehova ena hakaua herevadia ita badinaia, herevana ita badinaia be auka. Ita ese hahenamo do ita davaria momokani bema inai aonega herevana ita badinaia: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”​—⁠Aon. 3:5, 6.

Unai vabu be ena abidadama ia tohoa gauna ma ta ia davaria. Baibel ia gwau: “Nega sisina ia lao murinai, unai vabu ena natuna mero be ia gorere. Iena gorere be ia bada lao, ela bona ia hahodi lasi, ia mase vadaeni. Vabu ese Elia ia hamaoroa, ia gwau, ‘Dirava ena tau e, lau dekenai dahaka oi karaia? Lauegu kara dika oi hedinaraia lou Dirava dekenai, bona egu mero ena mase havaraia totona oi mai, a?’” (1 Kin. 17:17, 18) Ena hereva ena anina be dahaka?

Unai vabu be guna ia karaia kara dika ta dainai ia lalohekwarahi, a? Ia laloa Dirava ese ia panisia dainai ena natuna ia mase, bona Elia be Dirava ese ia siaia ena natuna do ia hamasea, a? Baibel ese unai ia hahedinaraia lasi, to ita diba gauna be inai: Vabu be Dirava dekenai bleim ia henia lasi.

Reana Elia ia hoa badina vabu ena natuna ia mase, bona vabu ia laloa Elia ese unai mase ia havaraia. Elia ese mero be ataiai daiutu dekenai ia abia daekau bena ia boiboi, ia gwau: “Lohiabada, lauegu Dirava e, oi ese inai vabu, ia dekenai lau noho hahine, dekenai dika oi havaraia vadaeni, iena natuna oi hamasea, a?” Elia ia laloa bema unai hariharibada hahinena ia hisihisi noho, unai ese Iehova ena ladana do ia hadikaia. Unai dainai ia guriguri, ia gwau: “Lohiabada, lauegu Dirava e, inai mero do oi hamauria lou!”​—⁠1 Kin. 17:20, 21.

Iehova ese Elia ena guriguri ia kamonai. Vabu ese abidadama ia hahedinaraia bona Elia ia ubua. Reana Dirava ese mero ena mase ia koua lasi, badina Ia diba gabeai unai mero ena toreisi lou sivaraina ese momo dekenai helaro do ia henia. Baibel lalonai unai be toreisi lou karana ena sivarai ginigunana. Iehova ese Elia ena guriguri ia kamonai, bona mero ia hatorea isi lou. Elia be vabu dekenai ia gwau, “Oi itaia, oiemu natuna be ia mauri noho” neganai, vabu be ia moale dikadika! Elia dekenai ia gwau: “Harihari lau diba oi be Dirava ena tau momokani, bona Lohiabada ese iena hereva oiemu uduna dekena amo ia gwauraia momokani!”​—⁠1 Kin. 17:22-24.

King Taudia Ginigunana karoa 17 ena murina siridia ese unai vabu idia herevalaia lou lasi. To, reana unai vabu be Iehova ena abidadama hesiai hahinena ta ai ia lao dainai, Iesu ese ena haheitalai namona ia gwauraia. (Luka 4:25, 26) Iena sivarai amo ita diba, Dirava ese ena hesiai taudia idia kara namo henidia taudia ia hanamodia. (Mat. 25:34-40) Ia hahedinaraia danu, nega aukadia ai Dirava ese iena abidadama hesiai taudia edia dabu gaudia ia henia. (Mat. 6:25-34) Ma danu, unai sivarai ese ia hahedinaraia, Iehova be ia ura bona ia be mai ena siahu mase taudia ia hatorea isi lou totona. (Kara 24:15) Unai badina namodia dainai, ita ura Sarepata vabu ita laloatao.