Mani haheitalai iharuana oi laloa: Adavana lasi taihu ta bona ena natuna rua be tadikaka ta bona ena adavana ese idia boiria idia aniani hebou totona. Taihu be ena natudia ia hadibaia neganai, idia moale bona mai ura bada ida unai dina idia naria. To, unai dina ia kahirakahira neganai, tadikaka bona ena adavana ese unai taihu idia hamaoroa gau ta ia vara dainai, do idia aniani hebou lasi. To, gabeai taihu ia kamonai idia ese edia palani idia haidaua badina, edia turadia ma haida ese idia boiridia unai hanuaboi ai idia aniani hebou totona, bona unai idia abia dae.

Ita be Keristani taudia dainai eda gwauhamata ita hagugurudia be mai anina bada. Namo lasi ita gwau “Oibe,” ma gabeai ita gwau “Lasi.” (2 Kor. 1:18) To, matamanai haheitalai rua bamona, eda gwauhamata ita hagugurua o lasi edia badina be idauidau. Nega haida reana dala ma ta be lasi dainai, ita karaia palani do ita haidaua. Nega ta aposetolo Paulo be unai bamona ia karaia danu.

Lagani 55 C.E. ai, Paulo be Efeso dekenai ena misinari loaloa ihatoina ia karaia neganai, palani ia karaia Aegean Davarana amo do ia hanaia lao Korinto, bena Makedonia do ia lao. Danu Ierusalema dekenai ia giroa lou lalonai, palani ia karaia Korinto kongrigeisen do ia vadivadi henia lou, unai amo edia harihari gaudia be Ierusalema dekenai do ia abia lao. (1 Kor. 16:3) Unai be 2 Korinto 1:15, 16 ese ia hahedinaraia, ia gwau: “Unai lau diba momokani dainai, guna lau ura umui dekenai nega iharuana lau mai, unai amo umui moale lou diba, bona Makedonia dekenai lau do lao lasi neganai, lau ura nega sisina umui danu lau noho bona Makedonia amo umui dekenai do lau giroa mai, bona lau do umui hakaua lao bona Iudea ia lao henia dalana dekenai do umui rakatania.”

Toana be Paulo ese revareva ma ta amo Korinto tadikaka ia hamaoroa idia do ia vadivadi  henia. (1 Kor. 5:9) Paulo be unai revareva ia torea murinai, Kiloe ena ruma bese amo ia kamonai kongrigeisen lalonai hepapahuahu badana ta ia vara. (1 Kor. 1:10, 11) Unai dainai, Paulo ese ena palani ia haidaua bona idia dekenai Korinto Ginigunana ena revareva ia torea. Unai revareva amo Paulo ese idia ia sisiba henia bona hamaoromaoroa. Danu, idia ia hamaoroa ia ese ena palani ia haidaua, bona ia be Makedonia do ia lao guna, bena idia dekenai do ia lao.​—1 Kor. 16:5, 6. a

Korinto tadikaka ese Paulo ena revareva idia abia neganai, haida idia gwau ia be koikoi tauna, badina ena gwauhamata ia hamomokania lasi. Idia laloa idia be Paulo idia hereaia. Unai dainai, Paulo ia gwau idia be, “aposetolo namo hereadia.” Ia haere henidia totona, Paulo ia henanadai: “Unai lalohadai lau abia neganai, unai lau laloa maragi lasi, ani? Lau ura karaia gaudia be lau sibona egu namo totona lau karaia lasi, vadaeni lau gwau ‘Oibe’ bena lau gwau ‘Lasi,’ a?”​—2 Kor. 1:17; 11:5.

Reana do ita henanadai, Unai nega ai Paulo be ia vara gauna ia “laloa maragi,” a? Lasi! Grik herevana idia hahanaia “laloa maragi,” ese ia koikoi bona ena gwauhamata ia hamomokania lasi tauna ia herevalaia. Paulo ia gwau: “Lau ura karaia gaudia be lau sibona egu namo totona lau karaia lasi.” Unai hereva amo Korinto tadikaka do idia laloparara Paulo be ia koikoi lasi, to badina maorona ta dainai ena palani ia haidaua.

Paulo be edia hadikaia herevana ia koua totona, ia gwau: “To Dirava umui tabekau henia hegeregerena, umui dekenai ai gwauraia herevana be nega tamona Oibe bona Lasi ai gwauraia lasi.” (2 Kor. 1:18) Oibe, Paulo be Korinto tadikaka taihu ia laloa bada dainai ena palani ia haidaua. Korinto Iharuana 1:23 ai ia gwau: “Lau be Korinto dekenai lau do mai lasi, badina lau ura lasi umui lalometau.” Ia ese nega ia henidia kongrigeisen lalonai ia vara hekwakwanai do idia hamaoromaoroa guna, bena do ia vadivadi henidia. Paulo be Makedonia ai ia do noho neganai, ia kamonai idia be unai bamona idia karaia. Tito amo ia kamonai iena revareva ese Korinto taudia ia durua dainai, idia laloparara idia kerere bona idia helalo-kerehai. Unai ese Paulo ia hamoalea bada.​—2 Kor. 6:11; 7:5-7.

Paulo be ena palani ia haidaua dainai “aposetolo namo hereadia” ese idia gwauraia dika, bona reana idia gwau danu iena haroro gaukara idia abidadama henia lasi. To, Paulo ese Korinto tadikaka ia hamaoroa ia be idia dekenai Iesu Keriso ia harorolaia. Ia gwau: “Lau bona Silivanus bona Timoteo ese Dirava ena Natuna, Keriso Iesu, be umui huanai ai harorolaia. Ia be nega tamona ai, Oibe bona Lasi ai ia lao lasi, to iena Oibe be Oibe sibona.” (2 Kor. 1:19) Iesu Keriso be gau haida dekenai ia koikoi, a? Lasi! Iesu ena mauri bona haroro gaukara lalonai, hanaihanai hereva momokani ia gwauraia. (Ioa. 14:6; 18:37) Bema Iesu ese ia harorolaia gaudia be momokani bona ita abidadama henia diba, vadaeni Paulo be unai gaudia ia harorolaia danu, unai dainai iena haroro gaukara ita abidadama henia diba.

Iehova be “kara momokani ena Dirava.” (Sal. 31:5) Paulo ese unai ia hamomokania, ia gwau: “Herevana Dirava ena gwauhamata be momo herea, to Iesu amo idia ibounai be Oibe.” Iesu be tanobada ai ia noho neganai, ia be Iehova ia badinaia goevagoeva. Unai dainai, do ita daradara lasi to ita diba momokani Iehova ena gwauhamata ibounai be do idia guguru. Paulo ma ia gwau: “Unai dainai [Iesu] amo Dirava dekenai ita gwau ‘Amen,’ unai amo Dirava ita hanamoa diba.” (2 Kor. 1:20) Dahaka dainai ita gwau Iesu be “Amen”? Badina Iesu amo Iehova ena gwauhamata ibounai do idia guguru!

Iehova bona Iesu be nega ibounai idia hereva momokani idia gwauraia hegeregerena, Paulo danu be nega ibounai hereva momokani ia gwauraia. (2 Kor. 1:19) Ia be koikoi tauna lasi,  bona ‘sibona ena namo totona’ gwauhamata ia karaia lasi. (2 Kor. 1:17) To, ia ese Dirava ena ‘lauma helaga ena dala hegeregerena ia raka.’ (Gal. 5:16) Ma haida ia kara henia neganai, edia namo ia laloa bada. Iena Oibe be Oibe sibona!

Hari, Dirava ena hakaua herevadia idia badinaia lasi taudia be gwauhamata idia karaia, to hekwakwanai maragina ta dainai eiava idia ura lasi neganai, edia gwauhamata idia hamomokania lasi. Danu, ena be bisinesi karadia ai kontraka idia sainia, to nega momo edia “Oibe” idia hamomokania lasi. Bona danu, momo idia laloa headava lalonai tau bona hahine ese idia karaia gwauhamata helagana be edia mauri ibounai lalonai do idia badinaia lasi. To, divos karana ia bada ia lao ese ia hahedinaraia, momo idia laloa headava be gadara gauna bona idia hadokoa haraga diba.​—2 Tim. 3:1, 2.

Oi be edena bamona? Oiemu “Oibe” be “Oibe,” a? Momokani, inai atikol ena matamana kahanai ita herevalaia bamona, reana nega haida emu palani do oi haidaua, badina oi koua diba lasi gauna ta ia vara. To, bema oi be Keristani momokani tauna, namona be oi hekwarahi emu gwauhamata oi hagugurua totona. (Sal. 15:4; Mat. 5:37) Bema unai bamona oi karaia taunimanima do idia gwau, oi idia abidadama henia diba, badina emu gwauhamata oi hamomokania bona nega ibounai hereva momokani oi gwauraia. (Efe. 4:15, 25; Iam. 5:12) Bema taunimanima idia itaia oi be gau ibounai dekenai kara momokani oi hahedinaraia, Dirava ena Basileia oi harorolaia neganai, mai edia ura ida do idia kamonai. Unai dainai, namona be iseda Oibe be Oibe!