Brazil ai, tama ta ia gwau: “Emai Ruma Bese ena Tomadiho lalonai mai moale ida ai herevahereva dainai, nega haida bema egu ruma bese lau koua lasi, ai herevahereva ela bona hanuaboi momokani.” Japan ai, tama ta ia gwau: “Egu natuna mero ena mauri lagani be ten, bona ia ura lasi stadi do ai hadokoa, herevana stadi taim ia lata.” Dahaka dainai? Ma ia gwau: “Badina egu natuna be emai famili ena tomadiho karana ia moalelaia.”

To, natudia ma haida be ruma bese ena tomadiho idia moalelaia lasi. Dahaka dainai? Togo ai, tama ta ia gwau: “Namo lasi Iehova tomadiho henia karana ita hesikulaia.” Bema unai hekwakwanai ita itaia, namona be ruma bese ena tomadiho karaia dalana ita haidaua. Momo idia gwau edia ruma bese ena tomadiho negana be “moale” negana, Isaia ese Sabati dinana ia gwauraia hegeregerena.​—Isa. 58:13, 14.

Tama haida idia gwau bema edia ruma bese ena tomadiho negana ai idia herevahereva, kiri bona drama idia karaia, ibounai ese idia moalelaia. Ralf ena natuna kekeni be toi bona mero be tamona, bona ia gwau: “Emai ruma bese ena tomadiho be Baibel stadi bamona ai karaia lasi, to herevahereva hebou dalanai ai karaia, anina be ta ta ese ena lalohadai ia herevalaia.” To, nega haida unai bamona ita karaia be auka. Sina ta ia gwau: “Nega haida lau hesiku dainai, egu ruma bese ena tomadiho lau karaia namonamo lasi.” Emu ena tomadiho oi hanamoa diba, a?

Germany ai, tama ta ena natuna be rua bona ia gwau: “Ruma bese ena tomadiho karaia dalana ita haidaua diba.” Natalia, ena natuna be rua hahinena, ia gwau: “Gau badana be emai ruma bese ena tomadiho lalonai gau idauidau ai karaia.” Famili momo ese edia tomadiho negana be idia haria. Brazil ai, tama ta ladana Cleiton ena natudia be rua, ia gwau: “Emai tomadiho negana be kahana idauidau ai ai haria dainai, unai ese stadi dalana ia hanamoa  bona ibounai be mai moale ida idia herevahereva.” Bema natudia edia mauri lagani be idauidau, vadaeni tama sina ese stadi negana idia haria, natu ta ta ena diba hegeregerena idia hadibaia totona. Danu, tama sina ese do idia stadilaia gauna bona stadi do idia karaia dalana idia haidaua diba.

Haida be edena dala ai ruma bese ena tomadiho idia karaia? Haida be edia tomadiho negana idia hamatamaia totona, Iehova hanamoa anedia idia abia. Mexico ai, Juan ia gwau: “Unai ese hemami namona ia havaraia bona emai lalona ia hegaegaelaia.” Iena famili ese idia abia hidi anedia be hanuaboi ai do idia stadilaia gaudia hegeregerena.

Famili momo be Baibel ena sivarai ta idia duahia hebou. Nega haida, idia ta ta be Baibel sivarai lalonai idia noho taudia ta ta edia kahana idia duahia. Japan ai, tama ta ia gwau: “Matamanai lau dekenai unai bamona duahiduahi dalana be auka.” To, ena natudia memero rua idia moale badina idia itaia edia tama sina danu be unai duahiduahi karana idia moalelaia. Famili haida be Baibel drama idia karaia. South Africa ai, Roger, mai ena natudia memero rua ia gwau, natudia be “Baibel sivarai lalonai ai itaia lasi gaudia idia itaia diba.”

Dala ma ta be emui famili ida gau ta umui karaia hebou, hegeregere Noa ena lagatoi, o Solomona ena dubu helaga maragina umui haginia. Unai gaudia haginia totona, do umui karaia tahua karana do umui moalelaia. Asia ai famili ta ese idia karaia gauna mani ita laloa. Tama sina ta, edia natuna ena mauri lagani faiv, bona tubuna hahinena be edia ruma ai idia helai bona bodi ta idia karaia hebou. Unai bodi dekenai aposetolo Paulo ena misinari loaloa ena mapu idia torea. Bena idia ese unai gabu ta ta dekenai idia loaloa ena gadara idia karaia. Famili ma haida be bodi ta ai Israela taudia edia loaloa tano gagaena dekenai ena mapu idia torea, Esodo bukana ese ia herevalaia bamona. Togo ai Donald, mauri lagani 19 merona, ia gwau: “Emai ruma bese ena tomadiho lalonai gau idauidau ai karaia dainai, unai ese emai famili maurina ia hanamoa.” Emui ruma bese ena tomadiho umui moalelaia totona, dahaka gau ta umui karaia hebou diba?

Danu, eda ruma bese ena tomadiho lalonai diba ita abia totona, ita ibounai ita hegaegae be namo. Nega haida natudia be idia hesiku haraga dainai, namona be tama ese stadi gaudia ia laloa namonamo guna, bona nega ia atoa ia hegaegae namonamo totona. Tama ta ia gwau: “Lau hegaegae neganai, ibounai ese stadi idia moalelaia.” Germany ai, tama ta be hua vairai do idia stadilaia gaudia be ena famili ia hadibaia. Benin ai, tama ta ena natuna be siks, bona nega haida eda orea ena DVD ta idia itaia hebou, gabeai famili tomadiho lalonai idia herevalaia totona. To, unai DVD idia do itaia lasi neganai, ia ese henanadai haida ia henia famili idia hegaegae totona. Momokani, hegaegae karana ese ruma bese ena tomadiho ia durua diba.

Bema famili be edia tomadiho lalonai do idia stadilaia gauna idia diba guna, wiki lalonai unai idia herevalaia diba. Unai amo idia be mai edia ura ida stadi negana do idia naria. Bona bema ta ta be mai edia kahana, vadaeni do idia mamia unai tomadiho be idia ibounai totona.

Momo idia gwau wiki ta ta ai ruma bese ena tomadiho idia karaia be auka. Dahaka dainai?

Tama momo be hora momo moni gaukara idia karaia tauanina dalanai edia famili idia naria totona. Hegeregere, Mexico ai tama ta be daba siks o’klok ruma ia rakatania bona hanuaboi eit o’klok ruma dekenai ia giroa lou. Nega haida sekit tauna ia vadivadi o hebouhebou badadia dainai, haida be edia Ruma Bese ena Tomadiho negana idia haidaua diba.

To, gau badana be wiki ta ta ai ruma bese ena tomadiho ita karaia. Togo ai, Loïs, ena mauri lagani be 11 ia gwau: “Ena be dina lalonai gau ta ia vara, to nega ibounai emai ruma bese ena tomadiho negana ai reaia lasi, herevana taim korikori dekenai ai hamatamaia lasi.” Dala namona ta be emui ruma bese ena tomadiho be wiki ena dina ginigunadia ai umui karaia. Bema unai dina ai hekwakwanai ta ia vara, vadaeni ruma bese ena tomadiho be unai wiki ena dina ma ta ai umui karaia diba.

Dahaka dainai ita gwau “ruma bese ena tomadiho”? Badina unai nega ai ita be Iehova ita tomadiho henia. Unai dainai, namona be eda ruma taudia ibounai ida wiki ta ta ai Iehova ita “hanamoa.” (Hos. 14:2) Danu, namona be eda famili ida unai nega ita moalelaia, “badina be Lohiabada dainai ita moale neganai, goada do ita abia.”​—Neh. 8:9, 10.